Dikgatiso Tse di Dirisiwang mo Bukaneng ya Botshelo le Bodiredi
JULY 1-7
MATLOTLO A A MO LEFOKONG LA MODIMO | BAKOLOSA 1-4
“Apolang Botho jo Bogologolo Mme lo Apare Botho jo Bosha”
(Bakolosa 3:5-9) Jalo, bolayang ditokololo tsa lona tsa mmele tse di mo lefatsheng ka ga kgokafalo, boitshekologo, keletso ya tlhakanelodikobo, keletso e e utlwisang botlhoko, le keletso ya bopelotshetlha, se e leng kobamelo ya medingwana. 6 Ka ntlha ya dilo tseo tšhakgalo ya Modimo e a tla. 7 Le lona lo kile lwa tsamaya mo go tsone dilo tseo, fa lo ne lo tlwaetse go tshela mo go tsone. 8 Mme jaanong di tloseng tsotlhe mo go lona, tšhakgalo, bogale, bosula, puo ya go kgoba, le puo e e ferosang sebete e e tswang mo molomong wa lona. 9 Lo se ka lwa akelana. Apolang botho jo bogologolo le ditlwaelo tsa jone,
Amogela Moya wa Modimo, e Seng wa Lefatshe
12 Botho jwa me bo bontsha gore ke na le moya ofe? (Bala Bakolosa 3:8-10, 13.) Moya wa lefatshe o godisa ditiro tsa nama. (Bagal. 5:19-21) Selo se segolo se se senolang gore re tlhotlhelediwa ke moya ofe ga se tsela e re itshwarang ka yone fa dilo di itshiametse fela, go na le moo ke e re itshwarang ka yone fa dilo di sa tsamaye sentle, ka sekai, fa mokaulengwe kgotsa kgaitsadi a re itlhokomolosa, a re kgopisa kgotsa e bile a re leofela. Mo godimo ga moo, fa re le nosi kwa gae, go ka bonala gore tota re laolwa ke moya o o boitshepo kgotsa moya wa lefatshe. Go ka nna molemo gore re itlhatlhobe. Ipotse, ‘Mo dikgweding tse thataro tse di fetileng, a botho jwa me bo ne jwa bontsha dinonofo tsa Bokeresete kgotsa a ke boetse mo mekgweng ya me e e sa siamang ya go bua le ya boitsholo?’
13 Moya wa Modimo o ka re thusa gore re “[apole] botho jo bogologolo le ditlwaelo tsa jone” mme re ikapese ka “botho jo bosha.” Seno se tla re thusa gore re nne lorato re bo re nne pelonomi. Re tla itshwarela ba bangwe re gololesegile, tota le fa go lebega re na le lebaka le le utlwalang la go ngongorega. Le fa re sa bontshiwa tshiamiso re ka se ka ra tlhola re araba ka “kgakalo yotlhe ya letlhoo le bogale le tšhakgalo le go goa thata le puo ya go kgoba.” Go na le moo, re tla kgaratlhela gore re nne “pelotlhomogi ka bonolo.”—Baef. 4: 31, 32.
(Bakolosa 3:10-14) mme lo apare botho jo bosha, jo bo ntšhafadiwang ka kitso ya boammaruri go ya ka setshwano sa Ene yo o neng a bo bopa, 11 koo go se nang Mogerika le fa e le Mojuda gone, go rupa le fa e le go sa rupa, motswakwa, Mosethia, motlhanka, mogololesegi, mme Keresete ke dilo tsotlhe e bile o mo go botlhe. 12 Jalo, jaaka ba ba tlhophilweng ba Modimo, ba ba boitshepo le ba ba ratwang, aparang lorato lwa bopelotlhomogi, bopelonomi, mogopolo o o ikokobeditseng, bonolo, le go itshwara ka bopelotelele. 13 Tswelelang lo itshokelana e bile lo itshwarelana lo gololesegile fa mongwe a na le lebaka la go ngongorega ka yo mongwe. Le eleng jaaka Jehofa a ne a lo itshwarela a gololesegile, jalo le lona dirang jalo. 14 Mme, mo godimo ga dilo tseno tsotlhe, aparang lorato, gonne ke sebofo se se itekanetseng sa kutlwano.
A o Ile wa Fetoga?
18 Fa re batla gore Lefoko la Modimo le re fetole, re tlhoka go dira se se fetang fela go bala Baebele le go e ithuta ka metlha. Batho ba le bantsi ba bala Baebele gangwe le gape mme ka jalo ba itse se e se buang. Gongwe o ile wa kopana le batho ba ba ntseng jalo fa o le mo bodireding. Ba bangwe e bile ba kgona go umaka ditemana tsa Baebele ka tlhogo. Le fa go ntse jalo, seno se ka tswa se sa tlhotlheletse tsela e ba akanyang ka yone kgotsa e ba tshelang ka yone. Ke eng se ba sa ntseng ba tlhoka go se dira? Gore Lefoko la Modimo le tlhotlheletse motho le go mo fetola, o tshwanetse go le letla gore le tsenelele mo pelong ya gagwe. Ka jalo, re tshwanetse go ipha nako ya go akanya ka se re se ithutang. Go tla bo go le molemo gore re ipotse jaana: ‘A ke tlhatswegile pelo gore eno ga se thuto nngwe fela ya bodumedi? A ga ke ise ke lemoge gore ke boammaaruri? Mo godimo ga moo, a ke lemoga kafa nka dirisang se ke se ithutang ka gone mme ke sa se lebe fela e le sengwe se ke tshwanetseng go se ruta ba bangwe? A ke ikutlwa e kete Jehofa o bua le nna?’ Go akanya ka dipotso tseno le go tlhatlhanya ka tsone go ka re thusa gore re nonotshe tsela e re ikutlwang ka yone ka Jehofa mo pelong. Tsela e re mo ratang ka yone e tla nonofa. Mme fa pelo ya rona e tlhotlheletsegile, re tla dira diphetogo tse di tla re solegelang molemo.—Dia. 4:23; Luke 6:45.
19 Go bala Lefoko la Modimo ka metlha le go tlhatlhanya ka lone, go tla re tlhotlheletsa gore re tswelele re dira sengwe se Paulo a neng a re re se dire: ‘Go apola botho jwa bogologolo le ditlwaelo tsa jone, mme re apare botho jo bosha, jo bo ntšhafadiwang ka kitso ya boammaaruri.’ (Bakol. 3:9, 10) Re tla tswelela re atlega mo ntlheng eno fa re tlhaloganya sentle se Lefoko la Modimo le se kayang e bile re le letla go re tlhotlheletsa. Botho jo bosha jwa Bokeresete jo re tla nnang le jone, bo tla re thusa gore re sireletsege kgatlhanong le maano a a boferefere a ga Satane.
Go Ribolola Matlotlo mo Dikwalong
(Bakolosa 1:13, 14) O ne a re golola mo taolong ya lefifi a ba a re fetisetsa mo bogosing jwa Morwa wa lorato lwa gagwe, 14 yo re gololwang ka ene ka thekololo, e leng boitshwarelo jwa maleo a rona.
it-2-E 169 ¶3-5
Bogosi Jwa Modimo
“[Bogosi] Jwa Morwa wa Lorato Lwa Gagwe.” Malatsi a le lesome morago ga gore Jesu a tlhotlogele kwa legodimong, o ne a tshololela barutwa ba gagwe moya o o boitshepo. E ne e le ka Pentekosete ya 33 C.E. Ka nako eo, barutwa ba gagwe ba ne ba tlhatswegile pelo gore, Jesu o ne a “[tlhatloseditswe] kwa seatleng sa moja sa Modimo.” (Dit 1:8, 9; 2:1-4, 29-33) “Kgolagano e ntšha” e ne ya simologa. Mme barutwa ba gagwe e ne ya nna batho ba ntlha go nna karolo ya “setšhaba se se boitshepo” e leng Iseraele wa semoya kgotsa batlodiwa.—Bah 12:22-24; 1Pe 2:9, 10; Bag 6:16.
Jaanong o ne a ntse kafa seatleng sa moja sa ga Rraagwe. Gape e ne e le tlhogo ya phuthego. (Bae 5:23; Bah 1:3; Baf 2:9-11) Baebele e re thusa go bona gore go simologa ka Pentekosete ya 33 C.E., barutwa ba ga Jesu ba ne ba nna mo taolong ya gagwe. Fa moaposetoloi Paulo a kwalela Bakeresete ba kwa Kolosa, o ne a umaka gore Jesu o ne a setse a na le bogosi. O ne a re: “[Modimo] o ne a re golola mo taolong ya lefifi a ba a re fetisetsa mo bogosing jwa Morwa wa lorato lwa gagwe.”—Bak 1:13; bapisa le Dit 17:6, 7.
Fa e sa le ka Pentekosete ya 33 C.E., bogosi jwa ga Keresete bo ne jwa simolola go busa Iseraele wa semoya kgotsa Bakeresete ba ba tshotsweng ka moya wa Modimo gore e nne bana ba Modimo. (Joh 3:3, 5, 6) Fa Bakeresete bano ba ba tshotsweng ka moya ba amogela tuelo ya bone e e kwa legodimong, ba tla bo ba sa tlhole ba busiwa ba le mo lefatsheng mme ba tla bo ba busa e le dikgosi le Keresete Jesu kwa legodimong.—Tsh 5:9, 10.
(Bakolosa 2:8) Disang: gongwe go ka tswa go na le mongwe yo o tla lo tsayang jaaka ba a ba tsomileng a dirisa botlhajana le tsietso e e lolea go ya ka ngwao ya batho, go ya ka dilo tsa tshimologo tsa lefatshe mme e seng go ya ka Keresete;
Dintlhakgolo go Tswa mo Makwalong a a Yang go Bagalatia, Baefeso, Bafilipi le Bakolosa
2:8—“Dilo tsa tshimologo tsa lefatshe” tse Paulo a neng a tlhagisa ka tsone ke eng? Tseno ke dilo tsa lefatshe la ga Satane—dilo tsa motheo kana melaometheo e e le bopang, e e le kaelang kana e e le tlhotlheletsang. (1 Johane 2:16) Dilo tseno di akaretsa filosofi, go rata dikhumo le madumedi a maaka a lefatshe leno.
Mmalo wa Baebele
(Bakolosa 1:1-20) Paulo, moaposetoloi wa ga Keresete Jesu ka thato ya Modimo, le Timotheo mokaulengwe wa rona 2 ke kwalela baitshepi le bakaulengwe ba ba ikanyegang ba ba seoposengwe le Keresete kwa Kolosa: E kete lo ka nna le bopelonomi jo bo sa re tshwanelang le kagiso go tswa kwa Modimong Rraarona. 3 Re leboga Modimo Rra Morena wa rona Jesu Keresete ka metlha fa re lo rapelela, 4 e re ka re ne ra utlwalela ka tumelo ya lona ka ga Keresete Jesu le lorato lo lo ratang baitshepi botlhe ka lone 5 ka ntlha ya tsholofelo e lo e beetsweng kwa magodimong. Lo ne lwa utlwalela ka tsholofelo eno pele fa go ne go bolelwa boammaaruri jwa dikgang tse di molemo tseo 6 tse di itlhagisitseng kwa go lona, fela jaaka di ungwa maungo e bile di oketsega mo lefatsheng lotlhe le jaaka gape di dira mo go lona, go tloga ka letsatsi le lo neng lwa utlwa ka lone lwa ba lwa itse sentle bopelonomi jo bo sa re tshwanelang jwa Modimo ka boammaaruri. 7 Seo ke se lo se ithutileng mo go Epaforase motlhankammogo le rona yo o rategang, yo e leng modiredi yo o ikanyegang wa ga Keresete mo boemong jwa rona, 8 yo gape a re lotlegetseng lorato lwa lona ka tsela ya semoya. 9 Gape ke gone ka moo rona, go tloga ka letsatsi le re neng ra utlwalela ka lone, re sa kgaotsang go lo rapelela le go kopa gore lo tladiwe ka kitso ya boammaaruri ya thato ya gagwe ka botlhale jotlhe le go tlhaloganya ga semoya, 10 gore lo tsamaye kafa go tshwanetseng Jehofa gore lo mo itumedise ka botlalo jaaka lo tswelela lo ungwa maungo mo tirong nngwe le nngwe e e molemo e bile lo oketsega mo kitsong e e boammaaruri kaga Modimo, 11 lo dirwa maatla ka maatla otlhe mo lo bileng lo na le thata ya gagwe e e galalelang gore lo itshoke ka botlalo le gore lo itshware ka bopelotelele ka boipelo, 12 lo leboga Rara yo o dirileng gore lo tshwanelege go nna le seabe mo bosweng jwa baitshepi mo leseding. 13 O ne a re golola mo taolong ya lefifi a ba a re fetisetsa mo bogosing jwa Morwa wa lorato lwa gagwe, 14 yo re gololwang ka ene ka thekololo, e leng boitshwarelo jwa maleo a rona. 15 Ke setshwano sa Modimo yo o sa bonaleng, leitibolo la popo yotlhe; 16 ka gonne dilo tsotlhe tse dingwe di ne tsa bopiwa ka ene kwa magodimong le mo lefatsheng, dilo tse di bonalang le dilo tse di sa bonaleng, go sa kgathalesege gore a e ka ne e le ditulo tsa bogosi kgotsa barena kgotsa dipuso kgotsa ditaolo. Dilo tsotlhe tse dingwe di bopilwe ka ene e bile di bopetswe ene. 17 Gape, o nnile gone pele ga dilo tsotlhe tse dingwe mme dilo tsotlhe tse dingwe di ne tsa dirwa ka ene gore di nne gone, 18 e bile ke tlhogo ya mmele, e leng phuthego. Ke tshimologo, leitibolo le le tswang mo baswing, gore a nne yo e leng wa ntlha mo dilong tsotlhe; 19 ka gonne Modimo o ne a bona go le molemo gore botlalo jotlhe bo nne mo go ene, 20 le go letlanyetsa gape dilo tsotlhe tse dingwe ka ene ka go dira kagiso ka madi ao a a tsholotseng mo koteng ya tlhokofatso, go sa kgathalesege gore a e ka ne e le dilo tse di mo lefatsheng kgotsa dilo tse di kwa magodimong.
JULY 8-14
MATLOTLO A A MO LEFOKONG LA MODIMO | 1 BATHESALONIKA 1-5
“Nnang lo Kgothatsane Lo bo Lo Agane”
(1 Bathesalonika 5:11-13) Jalo nnang lo gomotsane lo bo lo agane, fela jaaka tota e bile lo dira. 12 Jaanong re a lo kopa, bakaulengwe, gore lo tlotle ba ba dirang ka natla mo gare ga lona ba bile ba lo okametse mo Moreneng le go lo tlhagisa; 13 le gore lo ba tlotle ka tsela e e fetang e e tlwaelegileng ka lorato ka ntlha ya tiro ya bone. A mongwe le mongwe a nne le kagiso le yo mongwe.
‘Tlotlang ba ba Dirang ka Natla mo Gare ga Lona’
12 Go ‘okamela’ phuthego ga go kaye go e ruta fela. Lefoko leno le dirisiwa gape mo go 1 Timotheo 3:4. Paulo o ne a re molebedi o tshwanetse go nna “monna yo o okamelang ba ntlo ya gagwe ka mokgwa o o molemo, a na le bana ba ba mo taolong ka bomasisi jotlhe.” Fano lefoko go ‘okamela’ ga le akaretse fela go ruta bana ba gagwe gape le akaretsa le go etelela lelapa pele le go nna le “bana ba ba mo taolong.” Ee, bagolwane ba etelela phuthego pele ba thusa botlhe gore ba nne mo taolong ya ga Jehofa.—1 Tim. 3:5.
‘Tlotlang ba ba Dirang ka Natla mo Gare ga Lona’
19 O ne o ka dira eng fa o ne o ka amogela mpho e e diretsweng wena? A o ne o tla bontsha gore o a e anaanela ka go e dirisa? Jehofa o dirisitse Jesu Keresete go go naya “dimpho tse e leng banna.” Tsela nngwe e o ka bontshang ka yone gore o lebogela dimpho tseno ke ka go reetsa ka kelotlhoko fa bagolwane ba neela dipuo le ka go leka go dirisa dintlha tse ba di bolelang. Gape o ka bontsha kanaanelo ka go akgela go tswa pelong fa o le kwa dipokanong. Ema nokeng tiro e bagolwane ba e eteletseng pele, e e jaaka tirelo ya tshimo. Fa o solegetswe molemo ke kgakololo nngwe e mogolwane mongwe a go neileng yone, ke eng fa o sa mmolelele? Mo godimo ga moo, ke eng o sa bontshe go anaanela malapa a bagolwane? Gakologelwa gore, e le gore mogolwane a dire ka natla mo phuthegong, lelapa la gagwe le ithontsha nako e ba ka bong ba e fetsa le ene.
(1 Bathesalonika 5:14) Kafa letlhakoreng le lengwe, re a lo rotloetsa, bakaulengwe, tlhagisang ba ba sa direng dilo ka thulaganyo, buang ka tsela e e gomotsang le meya e e tshwenyegileng maikutlo, tshegetsang ba ba bokoa, nnang pelotelele mo go botlhe.
Bontshang Lorato “ka Tiro le Boammaaruri”
13 Thusa ba ba bokoa. Taelo eno ya Baebele e ka senola gore a lorato lwa rona ke lwa mmatota: “Tshegetsang ba ba bokoa, nnang pelotelele mo go botlhe.” (1 Bathes. 5: 14) Le fa gone batho ba le bantsi ba ba bokoa ba feleletsa ba nonofa mo tumelong, ba bangwe ba tlhoka gore re tswelele re le pelotelele le bone. Seno se ka akaretsa go ba nonotsha ka Dikwalo, go dira le bone mo bodireding kgotsa go ipha nako ya go ba reetsa. Mo godimo ga moo, go na le go akanya gore mokaulengwe kgotsa kgaitsadi mongwe o “nonofile” kgotsa o “bokoa” re tshwanetse go itse gore go na le dilo tse re di kgonang le gore rotlhe re na le makoa. Tota le moaposetoloi Paulo o ne a tlhalosa gore o na le makoa. (2 Bakor. 12: 9, 10) Ka jalo, rotlhe re ka solegelwa molemo ke go engwa nokeng ke Bakeresetemmogo le rona.
Etsa Sekao sa ga Jesu sa go Nna Boikokobetso le sa Bopelonomi
16 Mafoko a rona a bopelonomi. Bopelonomi bo re tlhotlheletsa gore re bue “ka tsela e e gomotsang le meya e e tshwenyegileng maikutlo.” (1 Bathesalonika 5:14) Ke eng se re ka se buang go ba kgothatsa? Re ka ba bolelela gore re amegile thata ka bone. Re ka ba akgola le go ba thusa gore ba lemoge dinonofo tse di molemo tse ba nang le tsone le bokgoni jo ba nang le jone. Re ka ba gopotsa gore Jehofa o ne a ba thusa gore ba bone boammaaruri, ka jalo o ba tsaya ba le botlhokwa thata. (Johane 6:44) Re ka ba tlhomamisetsa gore Jehofa o amega thata ka batlhanka ba gagwe ba ba “pelo e phatlogileng” kgotsa ba ba “moya o pitlaganeng.” (Pesalema 34:18) Mafoko a rona a bopelonomi ruri a ka lapolosa batho ba ba tlhokang go gomodiwa.—Diane 16:24.
Go Ribolola Matlotlo mo Dikwalong
(1 Bathesalonika 4:3-6) Gonne seno ke se Modimo o se ratang, go itshepisiwa ga lona, gore lo ithibe mo kgokafalong; 4 gore mongwe le mongwe wa lona a itse kafa a ka tsholang sejana sa gagwe ka gone se le boitshepo e bile se tlotlega, 5 e seng mo go eletseng tlhakanelodikobo ka bopelotshetlha mo go ntseng jaaka mo ditšhaba tse di sa itseng Modimo le tsone di nang le gone; 6 gore motho a se ka a feleletsa a gobaditse e bile a tseneletse mo ditshwanelong tsa mokaulengwe wa gagwe mo kgannyeng eno, ka gonne Jehofa ke ene yo o diragatsang kotlhao ka dilo tseno tsotlhe, fela jaaka re ne ra lo bolelela go sa le pele ra ba ra lo naya bosupi ka botlalo.
it-1-E 863-864
Kgokafalo
Fa motho a dira kgokafalo, a ka kgaolwa kgotsa a tlosiwa mo phuthegong ya Bokeresete. (1Bak 5:9-13; Bah 12:15, 16) Moaposetoloi Paulo o ne a re Mokeresete yo o dirang kgokafalo, o a bo a leofela mmele wa gagwe ka gonne o dirisa serwe sa gagwe sa tsalo go dira boitsholo jo bo sa siamang. Motho yoo ga a tlhole a atamalane le Modimo, o leswafatsha phuthego ya Modimo e bile a ka tshwarwa ke malwetse a tlhakanelodikobo. (1Bak 6:18, 19) O tsenelela mo ditshwanelong tsa Bakeresete ba bangwe (1Bath 4:3-7) (1) ka go leswafatsa phuthego le go goga leina la phuthego mo seretseng (Bah 12:15, 16), (2) ka go dira gore motho yo a dirang kgokafalo le ene, a nne le segakolodi se se molato, mme fa a sa nyala, a tsene mo lenyalong a se phepa, (3) ka go dira gore ba lelapa la gagwe ba itsege ka boitsholo jo bo sa siamang, (4) le ka go leofela batsadi, monna kgotsa mosadi wa motho yo a dirileng kgokafalo le ene. Mokeresete yoo, ga a itlhokomolose molao wa motho o o ka tswang o sa kgale kgokafalo mme o itlhokomolosa molao wa Modimo, ene yo o tla mo atlholelang boleo jo a bo dirileng.—1Bath 4:8.
(1 Bathesalonika 4:15-17) Gonne seno ke se re se lo bolelelang ka lefoko la ga Jehofa, gore rona batshedi ba re tshelang go fitlha kwa go nneng gone ga Morena ga re na go etelela pele ba ba robetseng mo losong ka gope; 16 ka gonne Morena ka boene o tla fologa kwa legodimong ka mokgosi wa taelo, ka lentswe la moengele yo mogolo le ka terompeta ya Modimo, mme ba ba suleng ba le seoposengwe le Keresete ba tla tsoga pele. 17 Morago ga moo rona batshedi ba re tshelang, mmogo le bone, re tla phamolelwa kwa marung go kgatlhantsha Morena mo moyeng; mme ka gone re tla nna le Morena ka metlha.
“Kgololo ya Lona e a Atamela”!
14 Go tla direga eng fa Gogo wa Magogo a simolola go tlhasela batho ba Modimo? Baebele ya re Morwa motho “o tla romela baengele mme ba tla phutha ba ba tlhophilweng ba gagwe go tswa kwa diphefong tse nnè, go tswa ntlheng ya lefatshe go ya ntlheng ya legodimo.” (Mareko 13:27; Mathaio 24:31) Tiro eno ya go phutha ga e kaye nako ya fa Bakeresete ba ba tloditsweng ba ne ba tlhophiwa la ntlha. Gape ga e kaye go tshwaiwa la bofelo ga batlodiwa ba ba sa ntseng ba le mo lefatsheng. (Mathaio 13:37, 38) Go tshwaiwa moo go tla diragala pelenyana fela ga pitlagano e kgolo e simologa. (Tshenolo 7:1-4) Ka jalo, tiro eno ya go phutha ke eng? Ke nako ya fa Bakeresete ba ba tloditsweng ba ba sa ntseng ba le mo lefatsheng ba tla bong ba amogela tuelo ya bone mme ba ya legodimong. (1 Bathesalonika 4:15-17; Tshenolo 14:1) Seno se tla direga nako nngwe fa Gogo wa Magogo a sena go simolola go tlhasela batho ba Modimo. (Esekiele 38:11) Go tswa foo, fela jaaka Jesu a ile a bolela, “basiami ba tla phatsima thata fela jaaka letsatsi mo bogosing jwa ga Rraabone.”—Mathaio 13:43.
15 A seno se raya gore Bakeresete ba ba tloditsweng ba tla phamolelwa ka mebele ya bone ya nama mme ba kopanngwe le Jesu mo lefaufaung? Madumedi a le mantsi a ruta thuto eo. Gape ba akanya gore ba tla bona Jesu fa a boa go tla go busa lefatshe. Le fa go ntse jalo, Baebele e tlhalosa sentle gore go boa ga ga Jesu ke mo go sa bonaleng, ya re: “Sesupo sa Morwa motho se tla bonala kwa legodimong,” mme Jesu o tla tla a le mo “marung a legodimo.” (Mathaio 24:30) Gape Baebele ya re “nama le madi ga di ka ke tsa rua bogosi jwa Modimo.” Ka jalo, ba ba tla bong ba tseelwa kwa legodimong sa ntlha ba tla tshwanelwa ke go “fetolwa, ka nakwana, ka ponyo ya leitlho, mo nakong ya terompeta ya bofelo.” (Bala 1 Bakorintha 15:50-53.) Ka jalo, thuto ya gore batlodiwa ba tla phamolwa ka mebele ya nama go ya go kopana le Jesu mo lefaufaung ga e dumalane le se Dikwalo di se rutang. Mme gone, Bakeresete ba ba tloditsweng ba ba sa ntseng ba le mo lefatsheng ba tla phuthiwa botlhe ka ponyo ya leitlho.
Mmalo wa Baebele
(1 Bathesalonika 3:1-13) Ka gone, e rile re sa tlhole re kgona go itshoka, ra bona go le molemo gore re tlogelwe kwa Athena; 2 mme re ne ra romela Timotheo, mokaulengwe wa rona le modiredi wa Modimo mo dikgannyeng tse di molemo kaga Keresete, gore a lo nitamise le go lo gomotsa mo boemong jwa tumelo ya lona, 3 gore ope a se ka a akgaakgiwa ke dipitlagano tseno. Gonne lona ka bolona lo a itse gore re laoletswe sone selo seno. 4 Tota e bile, gape, fa re ne re na le lona, re ne re tle re lo bolelele go sa le pele gore re ne re laoletswe go boga pitlagano, fela jaaka gape go diragetse le jaaka lo itse. 5 Ke gone ka moo, eleruri, e rileng ke sa tlhole ke kgona go itshoka, ke neng ka roma gore ke itse ka boikanyegi jwa lona, ka jaana gongwe ka tsela nngwe Moraedi a ka tswa a lo raetse, mme tiro ya rona ya bonatla e ka tswa e feletse e le lefela. 6 Mme Timotheo o sa tswa go tla mo go rona gone fela jaanong a tswa kwa go lona e bile o re neile dikgang tse di molemo kaga boikanyegi jwa lona le lorato, le gore lo nna lo re gakologelwa ka tsela e e molemo ka metlha, lo tlhologeletswe go re bona ka yone tsela eo, eleruri, jaaka le rona re lo tlhologeletswe. 7 Ke gone ka moo, bakaulengwe, re gomotsegileng kaga lona mo tlalelong yotlhe ya rona le pitlagano ka boikanyegi jo lo bo bontshang, 8 ka gonne jaanong re a tshela fa lo ema lo nitame mo Moreneng. 9 Gonne re ka leboga Modimo jang ka lona ka ntlha ya boipelo jotlhe jo re ipelang ka jone ka ntlha ya lona fa pele ga Modimo wa rona, 10 fa bosigo le motshegare re ntse re dira mekokotlelo e megolo thata gore re bone difatlhego tsa lona le go siamisa dilo tse di tlhaelang ka ga tumelo ya lona? 11 Jaanong e kete Modimo wa rona le Rara ka boene le Morena wa rona Jesu ba ka kaela ka katlego tsela ya rona ya go tla kwa go lona. 12 Mo godimo ga moo, e kete Morena o ka dira gore lo oketse, ee, a lo totise, mo go rataneng le mo go rateng botlhe, fela jaaka le rona re lo rata; 13 gore a nitamise dipelo tsa lona, e le tse di ka se kang tsa pegwa molato mo boitshepong fa pele ga Modimo wa rona le Rara mo go nneng gone ga Morena wa rona Jesu a na le baitshepi botlhe ba gagwe.
JULY 15-21
MATLOTLO A A MO LEFOKONG LA MODIMO | 2 BATHESALONIKA 1-3
“Go Senolwa ga Motho Yo o Se Nang Molao”
(2 Bathesalonika 2:6-8) Mme jaanong lo itse selo se se dirang jaaka thibelo, ka boikaelelo jwa gore a senolwe mo nakong ya gagwe e e tshwanetseng. 7 Ke boammaaruri, bosaitsiweng jwa go tlhoka molao gono bo setse bo dira; mme ke fela go fitlha yo o dirang jaaka thibelo gone jaanong jaana a tswa mo tseleng. 8 Go tswa foo, eleruri, yo o se nang molao o tla senolwa, yo Morena Jesu o tla mo tlosang ka moya wa molomo wa gagwe a ba a mo nyeletsa ka go bonatshega ga go nna gone ga gagwe.
it-1-E 972-973
Boineelo Jwa Bomodimo
Jaanong jono ke bosaitseweng jo bongwe jo bo kgatlhanong le “sephiri se se boitshepo” sa ga Jehofa. Ke “bosaitseweng jwa go tlhoka molao.” Bakeresete ba boammaaruri ba ne ba sa itse bosaitseweng jono ka ntlha ya gore ka motlha wa ga moaposetoloi Paulo, setlhopha se se emelwang ke “monna yo o se nang molao,” se ne se ise se nne gone e bile se sa bonale sentle. Tota le morago ga gore “monna” yono a nne gone, bontsi bo ne bo se kitla bo mo itse ka gonne o ne a tla itira e kete o ineetse mo Modimong mme a dira ditiro tse di sa siamang a sa lemotshege. Tota e bile go dira jalo, ke go nna kgatlhanong le boineelo jwa bomodimo. Paulo o ne a re “bosaitseweng jwa go tlhoka molao,” bo ne bo setse bo le gone ka motlha wa gagwe ka gonne go ne go na le tlhotlheletso ya go tlhoka molao mo phuthegong ya Bokeresete e e neng e tla dira gore go feleletse go na le setlhopha sa batlhanogi. Jesu Keresete o tla fedisa setlhopha seno ka nako ya fa go nna gone ga gagwe go tla bong go bonatshega. Setlhopha seno se se laolwang ke Satane, se ne se tlile go ikgodisa mo go “mongwe le mongwe yo o bidiwang ‘modimo’ kgotsa selo se se newang poifo ya bomodimo” (Ka Segerika, seʹba·sma). Ka jalo “monna” yono yo o ganetsang Modimo yo o dirisiwang ke Satane, o tla tsietsa batho ba le bantsi e bile o tla dira gore ba ba latelang ditsela tsa gagwe ba nyelediwe. Selo se se dirang gore “monna [yono] yo o se nang molao” a tsietse batho ba le bantsi, ke ka gonne o itira e kete o ineetse mo Modimong.—2Bath 2:3-12; bapisa Mat 7:15, 21-23.
(2 Bathesalonika 2:9-12) Mme go nna gone ga yo o se nang molao go kafa go direng ga ga Satane ka tiro nngwe le nngwe e e maatla le ditshupo tsa maaka le dikgakgamatso 10 le ka tsietso nngwe le nngwe e e sa siamang mo go ba ba nyelelang, e le tefetso ka gonne ba ne ba se ka ba amogela lorato lwa boammaaruri gore ba bolokwe. 11 Jalo ke gone ka moo Modimo a letlang gore go dira ga tlolo go ye kwa go bone, gore ba tle ba dumele maaka ano, 12 gore botlhe ba atlholwe ka gonne ba ne ba se ka ba dumela boammaaruri mme ba natefelelwa ke tshiamololo.
it-2-E 245 ¶7
Maaka
Jehofa Modimo o letla batho ba ba sa rateng kgotsa ba ba sa batleng go utlwa molao wa gagwe ba tlole molao “gore ba tle ba dumele maaka” go na le go dumela dikgang tse di molemo ka ga Jesu Keresete. (2Bath 2:9-12) Seno ke se se ileng sa diragalela kgosi ya Iseraele e bong Ahabe. Baporofeti ba maaka ba ne ba bolelela Ahabe gore fa a ya ntweng kwa Ramothe-gileade, o tla fenya mme moporofeti wa ga Jehofa e bong Mikaia ene o ne a mmolelela gore ga a na go fenya. Mo ponatshegelong ya ga Mikaia, Jehofa o ile a letla sebopiwa sa semoya gore se nne “moya o o tsietsang” mo molomong wa baporofeti ba ga Ahabe. Seno se raya gore sebopiwa seno sa semoya, se ne se tla dira gore baporofeti bano ba se ka ba bua boammaaruri mme ba bue se ba neng ba batla go se bua le se Ahabe a neng a batla go se utlwa. Le fa Ahabe a ile a tlhagisiwa, o ile a itetla go tsiediwa ke baporofeti bao ka gonne o ne a batla go utlwa maaka ao mme seno se dirile gore a swe.—1Dik 22:1-38; 2Dit 18.
Go Ribolola Matlotlo mo Dikwalong
(2 Bathesalonika 1:7, 8) mme, lona ba lo bogang pitlagano, go lo duela ka go lo golola mmogo le rona fa Morena Jesu a senolwa go tswa legodimong a na le baengele ba gagwe ba ba maatla 8 mo molelong o o tutumang, jaaka a tlisa pusoloso mo go ba ba sa itseng Modimo le ba ba sa reetseng dikgang tse di molemo kaga Morena wa rona Jesu.
it-1-E 834 ¶5
Molelo
Petere o ne a re “magodimo le lefatshe tse di gone jaanong di boloketswe molelo.” Go ya ka temana eno le tse dingwe, re kgona go bona gore ga go buiwe ka molelo wa mmatota mme go buiwa ka tshenyego ya bosakhutleng. Fela jaaka ka nako ya Morwalela wa ga Noa go ile ga se ka ga senngwe magodimo le lefatshe mme go ile ga senngwe batho ba ba bosula, le ka nako a ya fa Jesu Keresete a senolwa a na le baengele ba gagwe ba ba maatla mo molelong o o tutumang, o tla fediwa batho ba ba bosula le dilo tsotlhe tse di bosula mo lefatsheng.—2Pe 3:5-7, 10-13; 2Bath 1:6-10; bapisa Isa 66:15, 16, 22, 24.
(2 Bathesalonika 2:2) gore lo se ka lwa tshikhinngwa ka bofefo mo go akanyeng ga lona le fa e le go tsosiwa maikutlo ka mafoko a a tlhotlheleditsweng kgotsa ka molaetsa o o buiwang ka molomo kgotsa ka lekwalo jaaka e kete le tswa mo go rona, kaga gore letsatsi la ga Jehofa le gorogile.
w86 7/15 19 ¶19
Lo Nne lo Tshela Jaaka Bana ba Modimo
19 Morago ga moo Johane o bontsha ka moo re ka itisang ka gone. (Bala 1 Johane 4:1) Ga re a tshwanela go dumela moya mongwe le mongwe, kgotsa “mafoko a a tlhotlheleditsweng” mme re tshwanetse go “[tlhatlhoba] dipolelwana tse di tlhotlheleditsweng go bona gore a di tswa mo Modimong.” Goreng re tshwanetse go dira jalo? “Ka gonne baporofeti ba le bantsi ba maaka ba tswetse mo lefatsheng.” Bangwe ba baruti bano ba ba tsietsang ba ne ba kgarakgatshega ka nako eo, ba kopanela le diphuthego tse di farologaneng, mme ba batla go “[gogela] barutwa kwa go bone.” (Ditiro 20:29, 30; 2 Johane 7) Ka jalo batho ba ba ikanyegang ba ne ba tshwanetse go itlhokomela.
Mmalo wa Baebele
(2 Bathesalonika 1:1-12) Paulo le Silefano le Timotheo re kwalela phuthego ya Bathesalonika e e seoposengwe le Modimo Rraarona le Morena Jesu Keresete: 2 E kete lo ka nna le bopelonomi jo bo sa re tshwanelang le kagiso tse di tswang kwa Modimong Rara le Morena Jesu Keresete. 3 Re patelesega go leboga Modimo ka metlha kaga lona, bakaulengwe, jaaka go tshwanela, ka gonne tumelo ya lona e gola go fetelela le lorato lwa mongwe le mongwe wa lona le lwa lona lotlhe lo oketsega mongwe go yo mongwe. 4 Ka ntlha ya moo rona ka borona re ipela ka lona mo diphuthegong tsa Modimo ka ntlha ya boitshoko jwa lona le tumelo mo dipogisong tsotlhe tsa lona le dipitlagano tse lo di itshokelang. 5 Seno ke bosupi jwa katlholo e e siameng ya Modimo, e e isang kwa go reng lo kaiwe lo tshwanela bogosi jwa Modimo, jo eleruri lo bogang ka ntlha ya jone. 6 Seno se kopanyeletsa le gore go siame mo Modimong go duela ka pitlagano ba ba lo pitlaganyang, 7 mme, lona ba lo bogang pitlagano, go lo duela ka go lo golola mmogo le rona fa Morena Jesu a senolwa go tswa legodimong a na le baengele ba gagwe ba ba maatla 8 mo molelong o o tutumang, jaaka a tlisa pusoloso mo go ba ba sa itseng Modimo le ba ba sa reetseng dikgang tse di molemo kaga Morena wa rona Jesu. 9 Bone bano ba tla tlelwa ke kotlhao ya katlholo ya tshenyego ya bosakhutleng e e tswang fa pele ga Morena e bile e tswa mo kgalalelong ya nonofo ya gagwe, 10 ka nako e a tlang go galalediwa malebana le baitshepi ba gagwe le go lejwa ka kgakgamalo mo letsatsing leo malebana le botlhe ba ba neng ba supa tumelo, ka gonne bosupi jo re neng ra bo naya bo ne jwa kopana le tumelo mo go lona. 11 Ka ntlha ya sone seo eleruri re lo rapelela ka metlha, gore Modimo wa rona a lo kaye lo tshwanela pitso ya gagwe a bo a dire ka botlalo gotlhe mo a go ratang ga molemo le tiro ya tumelo ka maatla; 12 gore leina la Morena wa rona Jesu le galalediwe mo go lona, lo le seoposengwe le ene, tumalanong le bopelonomi jo bo sa re tshwanelang jwa Modimo wa rona le jwa Morena Jesu Keresete.
JULY 22-28
MATLOTLO A A MO LEFOKONG LA MODIMO | 1 TIMOTHEO 1-3
“Kgaratlhela Tiro e e Molemo”
(1 Timotheo 3:1) Polelo eo e a ikanyega. Fa monna ope a kgaratlhela tiro ya bolebedi, o eletsa tiro e e molemo.
A o Bona Botlhokwa Jwa go Tokafatsa Tsela e o Direlang Jehofa ka Yone?
3 Bala 1 Timotheo 3:1. Lefoko la Segerika le le ranotsweng e le go ‘kgaratlha,’ le kaya go otlolola letsogo gore o tshware sengwe se se kgakala. Fa moaposetoloi Paulo a ne a dirisa lefoko leno, o ne a gatelela gore motho o tlhoka go tsaya matsapa gore a tokafatse tsela e a direlang Jehofa ka yone. A re re mokaulengwe mongwe o akanya ka isagwe ya gagwe mo phuthegong. Gongwe ga e ise e nne motlhanka wa bodiredi mme o lemoga gore o tlhoka go dira ka natla gore a nne le dinonofo tsa Bokeresete. Sa ntlha, o kgaratlhela go nna motlhanka wa bodiredi. Mme fa nako e ntse e ya o solofela gore o tla tshwanelegela go nna molebedi. O dira ka natla gore a nne le ditshwanelego tse di tlhokegang gore a kgone go sikara maikarabelo a a oketsegileng a phuthego.
(1 Timotheo 3:13) Gonne banna ba ba direlang ka mokgwa o o molemo ba iponela boemo jo bo molemo le kgololesego e kgolo ya go bua mo tumelong ka ga Keresete Jesu.
km 10/78 8 ¶7
Bao ‘ba Iponelang Boemo jo bo Molemo’
7 Go motlhofo go bona, he, lebaka leo Paulo a boletseng gore banna ba ba ntseng jalo “ba ipōnela boèmō yo bo molemō.” Jo ga se botswelelopele mo setlhopheng sa kereke. Bogolo, batlhanka ba bodihedi bao ‘ba direlang sentle’ ba tlhomamisediwa lesego le le tswang go Jehofa le Jesu, mme ba na le tlotlo le kemo-nokeng ya phuthego yotlhe. Ka tshwanelo ba iponela “choshologō e e kgolo mo tumeloñ e e mo go Keresete Yesu.” Ba le boammaaruri mo maemong a bone, ba anaanelwa bakeng sa tirelo ya bone e e molemo; ba na le tlhomamiso ya tumelo mme ba ka bolela tumelo ya bone kwantle ga bogatlapa kana poifo ya go kgobiwa.
Go Ribolola Matlotlo mo Dikwalong
(1 Timotheo 1:4) le fa e le go tlhokomela dipolelo tsa maaka le dipolelo tsa tlhatlhamano ya masika, tse di felelang e se sepe, mme e le tse di tsosang dipotso tse di tlhokang go batlisisiwa go na le gore Modimo a abe sengwe ka ga tumelo.
it-1-E 914 ¶ 2-3
Dipolelo Tsa Tlhatlhamano ya Masika
Go ne go se na mosola go ithuta kgotsa go tlotla ka dilo tseno, tota le ka nako ya fa Paulo a ne a kwalela Timotheo. Go ne go sa tlhole go le botlhokwa go itse ditlhatlhamano tsa masika ka gonne Modimo o ne a tsaya Bajuda le batho ba e seng Bajuda e le batho ba le bangwe fela mo phuthegong ya Bokeresete. (Bag 3:28) Gape dipego tsa tlhatlhamano ya masika di ne di setse di buile ka tatelano ya losika lwa ga Keresete. Lebaka le lengwe ke gore Paulo o ne a tla bo a setse a kwadile gore Jerusalema e tlile go senngwa mmogo le dipego tseno tsa Bajuda. Modimo ga a ka a di boloka. Ka jalo Paulo o ne a tshwenyegile ka go re Timotheo le diphuthego tse a neng a tla ya kwa go tsone, ba se ka ba fetsa nako e ntsi ba batlisisa le go tsenelela mo dikgannyeng tseno ka gonne di ne di sa age ope mo phuthegong. Tlhatlhamano ya losika e e mo Baebeleng, ke bosupi jo bo lekaneng jwa gore Keresete ke Mesia e bile ke yone ya botlhokwa mo Bakereseteng. Dipego tse dingwe tsa tlhatlhamano ya masika tse di mo Baebeleng, di bontsha gore se se mo Baebeleng se boammaaruri.
(1 Timotheo 1:17) Jaanong a Kgosi ya bosakhutleng, e e sa senyegeng, e e sa bonaleng, Modimo yo o esi, e nne le tlotlo le kgalalelo ka bosaengkae le go ya go ile. Amen.
“Bona! Yono ke Modimo wa Rona”
15 Sereto se sengwe se se dirisiwang mo go Jehofa fela ke “Kgosi ya bosakhutleng.” (1 Timotheo 1:17; Tshenolo 15:3) Seno se bolela eng? Ga go motlhofo go tlhaloganya seno sentle ka megopolo ya rona e e tlhaelang, mme gone, Jehofa ke wa bosakhutleng ka kgopolo ya gore ga a na tshimologo e bile ga a na bokhutlo. Pesalema 90:2 ya re: “O Modimo le eleng go tswa bosasimologeng go ya bosakhutleng.” Ka gone, Jehofa ga a na tshimologo; o sa le a ntse a le teng. O bidiwa sentle go twe ke “Mogologolo wa Malatsi”—o sa le a ntse a le teng go tloga kwa bosasimologeng pele ope fela kana sepe fela se nna teng mo lobopong! (Daniele 7:9, 13, 22) Tota ke mang yo o ka nnang le mabaka a a utlwalang a go belaela tshwanelo ya gagwe ya go nna Morena Molaodimogolo?
Mmalo wa Baebele
(1 Timotheo 2:1-15) Jalo sa ntlhantlha, ke rotloetsa gore mekokotlelo, dithapelo, go rapelelana, go ntshiwa ga ditebogo, go direlwe batho ba mefuta yotlhe, 2 dikgosi le botlhe ba ba mo maemong a a kwa godimo; gore re tle re tswelele re tshela botshelo jo bo sisibetseng le jo bo didimetseng ka boineelo jo bo tletseng jwa bomodimo le bomasisi. 3 Seno se molemo e bile se a amogelesega mo ponong ya Mmoloki wa rona, e bong Modimo, 4 yo thato ya gagwe e leng gore batho ba mefuta yotlhe ba bolokwe mme ba tle mo kitsong e e leng yone, ya boammaaruri. 5 Gonne go na le Modimo a le mongwe, le motsereganyi a le mongwe gare ga Modimo le batho, monna, e bong Keresete Jesu, 6 yo o intshitseng thekololo e e lekanang a e ntshetsa botlhe—seno ke sone se ruri go tla newang bosupi ka sone ka dinako tse e leng tsa sone. 7 Ka boikaelelo jwa bosupi jono ke ne ka tlhomiwa go nna moreri le moaposetoloi—ke bua boammaaruri, ga ke ake—ke le yo o rutang ditšhaba mo kgannyeng ya tumelo le boammaaruri. 8 Jalo ke eletsa gore mo lefelong lengwe le lengwe banna ba tswelele ba rapela, ba tsholetsa diatla tse di ikanyegang, kwantle ga tšhakgalo le dikganetsano. 9 Ka tsela e e tshwanang ke eletsa gore basadi ba ikgabise ka diaparo tse di rulagantsweng sentle, ka boingotlo le go itekanela sentle ga mogopolo, e seng ka ditsela tsa go loga moriri loetse le ka gouta kgotsa diperela kgotsa moaparo wa tlhwatlhwa e e kwa godimo thata, 10 fa e se ka tsela e e tshwanelang basadi ba ba ipolelang fa ba tlotla Modimo, e leng, ka ditiro tse di molemo. 11 A mosadi a ithute ka tidimalo ka boikobo jo bo tletseng. 12 Ga ke letle mosadi go ruta, kgotsa go dirisa taolo mo monneng, fa e se go nna ka tidimalo. 13 Gonne Adame o ne a bopiwa pele, go tswa foo Efa. 14 Gape, Adame o ne a sa tsiediwa, mme mosadi o ne a tsiediwa ka botlalo mme a simolola go nna mo tlolong. 15 Le fa go ntse jalo, o tla bolokwa a babalesegile ka go tshola bana, fa fela ba tswelela mo tumelong le mo loratong le mo boitshepisong mmogo le ka mogopolo o o itekanetseng sentle.
JULY 29–AUGUST 4
MATLOTLO A A MO LEFOKONG LA MODIMO | 1 TIMOTHEO 4-6
“Ke Eng se se Siameng—Go Direla Jehofa Kgotsa go Rata Dikhumo?”
(1 Timotheo 6:6-8) Eleruri, boineelo jono jwa bomodimo mmogo le thetebalo ke tsela ya papadi e kgolo. 7 Gonne ga re a tlisa sepe mo lefatsheng, mme le gone re ka se ka ra tswa re tshotse sepe. 8 Jalo, e re ka re na le dijo le se re ipipang ka sone, re tla kgotsofalela dilo tseno.
Go Ithuta Tsela ya go Ritibala
Sengwe sa botlhokwa se se neng sa dira gore Paulo a nne a itumetse e bile a kgotsofetse ke gore o ne a ritibetse. Mme gone, go ritibala go kayang? Totatota, go kaya go kgotsofalela dilo tsa botlhokwa. Fa Paulo a ne a bua ka seno, o ne a raya Timotheo yo a neng a tsamaya le ene mo bodireding, a re: “Eleruri, boineelo jono jwa bomodimo mmogo le thetebalo ke tsela ya papadi e kgolo. Gonne ga re a tlisa sepe mo lefatsheng, mme le gone re ka se ka ra tswa re tshotse sepe. Jalo, e re ka re na le dijo le se re ipipang ka sone, re tla kgotsofalela dilo tseno.”—1 Timotheo 6:6-8.
Ela tlhoko gore Paulo o ne a amanya go ritibala le boineelo jwa bomodimo. O ne a itse gore motho a ka se bone boitumelo jwa boammaaruri ka go nna le dithoto kgotsa khumo mme a ka bo bona ka go nna le boineelo jwa bomodimo, ke gore, go baya tirelo ya Modimo kwa pele. Go nna le “dijo le se [a] ipipang ka sone” e ne e le tsela fela ya gore a kgone go tswelela a ineetse mo Modimong. Ka jalo se se neng se dira gore Paulo a nne a ritibetse e ne e le go ikaega ka Jehofa, go sa kgathalesege maemo.
(1 Timotheo 6:9) Le fa go ntse jalo, ba ba ikemiseditseng go huma ba wela mo thaelong le mo serung le mo dikeletsong tse dintsi tsa go tlhoka tlhaloganyo le tse di utlwisang botlhoko, tse di thabuetsang batho mo tshenyegong le mo tshenyong.
Go Ikemisetsa go Huma—Kafa Go ka Go Amang ka Teng
Gone ke boammaaruri gore, bontsi jwa batho ga ba swe ka ntlha ya go gagamalela dikhumo. Le fa go ntse jalo, go motlhofo gore ba tshele fela ba se na kgotsofalo epe ka go bo ba ineetse mo go batleng dikhumo. Go ka direga gape gore boleng jwa botshelo jwa bone bo senyege fa e le gore ba tshwenyega thata kwa tirong kgotsa mathata a tsa madi a dira gore ba ngomoge pelo, ba tlhorege boroko, ba opiwe ke tlhogo e e sa foleng kgotsa ditlhagala tsa mala—mathata a botsogo a a ka khutshwafatsang botshelo jwa motho. Mme tota le fa kgabagare motho a itharabologelwa a bo a lemoga gore o tlhoka go fetola dilo tse di tlang pele mo botshelong jwa gagwe, go ka direga gore o setse a le thari thata. Molekane wa gagwe a ka nna a bo a sa tlhole a mo tshepa, go ka tswa go setse go amile bana ba gagwe ka tsela e e sa siamang mo maikutlong mme le botsogo jwa gagwe bo ka tswa bo senyegile. Gongwe ditshenyego tse dingwe di ka baakanngwa, mme go tla tlhokega tiro e e seng kana ka sepe. Ruri batho ba ba ntseng jalo ba “itlhabakakile ka ditlhabi tse dintsi.”—1 Timotheo 6:10.
(1 Timotheo 6:10) Gonne lorato lwa madi ke modi wa mefuta yotlhe ya dilo tse di utlwisang botlhoko, mme ka go gagamalela lorato lono bangwe ba fapositswe mo tumelong e bile ba itlhabakakile ka ditlhabi tse dintsi.
Ditsela Tse Thataro Tsa go Atlega
Jaaka re bone mo setlhogong sa ntlha sa motseletsele ono wa ditlhogo, batho ba ba dumelang ka pelo yotlhe gore go gagamalela dikhumo ke tsela ya go atlega tota ba lelekisa phefo. Mo godimo ga gore ba itlisetse maswabi ba itlisetsa le ditlhabi tse dintsi. Ka sekai, fa batho ba ntse ba gagamalela go bona dikhumo ka tlhoafalo, gantsi ba latlhegelwa ke kamano ya bone le ba lelapa le ditsala. Ba bangwe ba tlhorega boroko jo ba bo tlhokang—fa e se ka ntlha ya tiro e tla bo e le ka go bo ba tlhobaela kgotsa ba tshwenyegile. Moreri 5:12 ya re: “Boroko jwa motho yo o dirang bo monate, le fa a ja bonnye kgotsa bogolo, mme go kgora ga mohumi ga go mo leseletse go robala.”—Baebele e e Boitshepo.
Madi ga se fela mong yo o setlhogo mme gape ke mong yo o tsietsang. Jesu Keresete o ne a bua ka “maatla a a tsietsang a dikhumo.” (Mareko 4:19) Ka mafoko a mangwe, dikhumo di solofetsa motho boitumelo mme ga di ke di mo naya jone. Di dira fela gore motho a nne a eletse go nna le mo go oketsegileng. Moreri 5:10 ya re: “Monna yo o ratang madi le ka motlha ga a ke a nna le mo go lekaneng.”—The New English Bible.
Ka bokhutshwane, fa motho a rata madi, a ka ikgobatsa ka boene mme kgabagare o tla feleletsa a utlwile botlhoko, a kgobegile marapo kgotsa le e leng go dira bokebekwa. (Diane 28:20) Dilo dingwe tse di amanang thata le boitumelo le katlego ke bopelotshweu, boikutlo jwa go rata go itshwarela, boitsholo jo bo phepa, lorato le kgolagano e e molemo le Modimo.
Go Ribolola Matlotlo mo Dikwalong
(1 Timotheo 4:2) ka boitimokanyo jwa batho ba ba buang maaka, ba ba tshwailweng mo digakoloding tsa bone jaaka e kete ka tshipi e e babolang;
A Segakolodi sa Gago se Thapisitswe Sentle?
Go tla diregang fa re tlhopha go itlhokomolosa segakolodi sa rona? Fa nako e ntse e ya, segakolodi sa rona se ka se tlhole se re tlhagisa. Go nna re itlhokomolosa segakolodi sa rona go ka tshwantshiwa le go babola nama ka tshipi e e fisang. Fa nama e setse e babogile, motho ga a e utlwe fa a e kgoma. (1 Timotheo 4:2) Segakolodi se se ntseng jalo ga se tlhole se kgona go re latofatsa fa re dirile boleo, e bile ga se re thuse gore re se ka ra boa ra leofa gape. Segakolodi se se senyegileng se itlhokomolosa melao e e mo Baebeleng ya se se siameng le se se sa siamang mme se nna segakolodi se se bosula. Ke segakolodi se se suleng, mme mong wa sone ga a ‘tlhole a na le boikutlo ka gope ka boitshwaro’ e bile o kgaogane le Modimo. (Baefeso 4:17-19; Tito 1:15) Go itlhokomolosa segakolodi sa rona ruri go tlisa masetlapelo!
(1 Timotheo 4:13) Fa ke sa ntse ke tla, tswelela o dira ka bojotlhe mo go baleng phatlalatsa, mo go rotloetseng, mo go ruteng.
it-2 E 714 ¶1-2
Go Bala Phatlalatsa
Mo Phuthegong ya Bokeresete. Mo lekgolong la ntlha la dingwaga, go ne go le botlhokwa gore batho ba bale phatlalatsa ka gonne ke batho ba se kae fela ba ba neng ba na le memeno ya Baebele. Moaposetoloi Paulo o ne a laela gore makwalo a gagwe a balwe phatlalatsa kwa diphuthegong mme fa phuthego e feditse go bala lekwalo, e le ise kwa phuthegong e nngwe gore le bone ba tle ba le bale. Paulo o ne a gakolola Timotheo gore a dire ka natla “mo go baleng phatlalatsa, mo go rotloetseng, mo go ruteng.”—1Ti 4:13.
Motho yo o balang phatlalatsa o tshwanetse go bala ka thelelo. (Hab 2:2) Go bala phatlalatsa ke tsela e e dirisiwang go ruta batho. Ka jalo motho yo o balang phatlalatsa, o tshwanetse go itse ka se a se balang, a tlhaloganye maikaelelo a mokwadi le gore kafa a balang ka gone, a se ka a dira gore bareetsi ba tlhaloganye se a se balang ka tsela e e seng yone. Go ya ka Tshenolo 1:3, ba ba balelang mafoko a boporofeti kwa godimo, le ba ba a utlwang, le ba ba a bolokang, ba tla itumela.
Mmalo wa Baebele
(1 Timotheo 4:1-16) Le fa go ntse jalo, polelo e e tlhotlheleditsweng e bolela ka tlhomamo gore mo dipakeng tsa moragonyana tsa nako bangwe ba tla wa mo tumelong, ba tlhokomela dipolelo tse di tlhotlheleditsweng tse di tsietsang le dithuto tsa madimona, 2 ka boitimokanyo jwa batho ba ba buang maaka, ba ba tshwailweng mo digakoloding tsa bone jaaka e kete ka tshipi e e babolang; 3 ba iletsa gore go tsenwe mo lenyalong, ba laela gore go ithijwe mo dijong tse Modimo a di bopileng gore ba ba nang le tumelo ba bile ba itse boammaaruri sentle ba di je ba ntsha ditebogo. 4 Lebaka la seno ke gore popo nngwe le nngwe ya Modimo e molemo, mme ga go na sepe se ruri se tla ganwang fa se amogelwa ka go ntshiwa ga ditebogo, 5 gonne se itshepisiwa ka lefoko la Modimo le ka go se rapelela. 6 Fa o naya bakaulengwe dikgakololo tseno o tla bo o le modiredi yo o molemo wa ga Keresete Jesu, yo o otliwang ka mafoko a tumelo le a thuto e e molemo e o e lateletseng gaufi thata. 7 Mme gana go amogela dipolelo tsa maaka tse di senyang boitsheko jwa se se boitshepo le tse basadibagolo ba di bolelang. Kafa letlhakoreng le lengwe ithapise, mokgele wa gago e le boineelo jwa bomodimo. 8 Gonne go thapisa mmele go tswela mosola go le gonnye; mme boineelo jwa bomodimo bo tswela mosola mo dilong tsotlhe, e re ka bo na le tsholofetso ya botshelo jaanong le ya jo bo tla tlang. 9 Polelo eo e a ikanyega e bile e tshwanelwa ke go amogelwa ka botlalo. 10 Gonne re dira ka natla e bile re iteka go dira seno, ka gonne re solofetse mo Modimong yo o tshelang, yo e leng Mmoloki wa batho ba mefuta yotlhe, segolobogolo wa ba ba ikanyegang. 11 Nna o neye ditaelo tseno o bo o di rute. 12 A motho ope a se ka a lebela bosha jwa gago kwa tlase le ka motlha. Go na le moo, nna sekao sa ba ba ikanyegang, mo go bueng, mo boitshwarong, mo loratong, mo tumelong, mo boitshekong. 13 Fa ke sa ntse ke tla, tswelela o dira ka bojotlhe mo go baleng phatlalatsa, mo go rotloetseng, mo go ruteng. 14 O se ka wa tlhokomologa mpho e e mo go wena e o neng wa e newa ka polelelopele le fa setlhopha sa banna ba bagolwane se ne se go baya diatla. 15 Tlhatlhanya ka dilo tseno; nwelelela mo go tsone, gore botswelelopele jwa gago bo bonatshege mo bathong botlhe. 16 Nna o itlhokometse e bile o tlhokometse go ruta ga gago. Nna mo dilong tseno, gonne ka go dira seno o tla ipoloka o bo o boloka ba ba go reetsang.