Segopotso sa Loso Lwa ga Jesu Labotlhano, April 3, 2015

KA Matlhatso, March 7, 2015, diphuthego mo lefatsheng lotlhe di ne tsa simolola letsholo la dibeke di le nnè la go laletsa batho ba le bantsi kafa go ka kgonegang ka gone go tla go gopola loso lwa ga Jesu Keresete le go reetsa puo ya gore loso lwa gagwe lo re solegela molemo jang. Batho ba le dimilione ba ne ba newa ditaletso, ba lalediwa ka founo le ka makwalo. A ba ne ba tla nna gone? Ruri Basupi ba ga Jehofa ba ne ba itumelela go amogela batho ba le 19 862 783 ka Labotlhano, April 3, 2015 mo tiragalong eno e e boitshepo. Gone jaanong go dirwa maiteko a magolo go thusa botlhe ba ba neng ba le gone go kopanela le batho ba ga Jehofa ka metlha, go obamela Modimo wa boammaaruri le go itumelela masego le lorato lwa gagwe.—Mik. 4:2.