Diabolo o Ntse Jang?

Karabo ya Baebele

Ga re kgone go bona Diabolo ka gonne ke moya, seo se raya gore ga a na mmele o o tshwanang le wa rona.—Baefeso 6:11, 12.

Setshwantsho se se tumileng sa ga Diabolo a tshwere foroko. O ntse jaaka sebopiwa se se tshwanang le podi se se nang le dinaka le mogatla.

Gantsi ditshwantsho di bontsha Diabolo e le sebopiwa se se tshwanang le podi se se nang le dinaka, se na le mogatla gape se tshwere foroko. Bangwe ba akanya gore ditshwantsho tseo tsa ga Diabolo di dirilwe ke bataki ba bogologolo ba ba neng ba tlhotlhelediwa ke dinaane le ditlhamane tsa bogologolo.

Baebele e a re Diabolo o ntse jang?

Baebele e tlhalosa Diabolo ka ditsela tse di farologaneng. Ditlhaloso tseno di re thusa go tlhaloganya botho jwa gagwe e seng ditebego tsa gagwe. Dingwe tsa ditlhaloso tseno di akaretsa:

Moengele wa lesedi. O itira e kete o batlela batho dilo tse di siameng gore a tle a ba ngoke gore ba latele dithuto tsa gagwe e seng tsa Modimo.—2 Bakorintha 11:14.
Tau e e kurutlang. O tlhasela batho ba ba obamelang Modimo ka bogale.—1 Petere 5:8.
Noga e kgolo. O a tshosa, o na le maatla e bile o tletse tshenyo.—Tshenolo 12:9.

Ditemana tsa Baebele tse di buang ka Diabolo

2 Bakorintha 11:14: “Satane ka boene o nna a itira moengele wa lesedi.”

Se e se kayang: Satane o itira e kete o siame e le gore a tle a tsietse batho gore ba latele dithuto tsa gagwe e seng tsa Modimo.
Baefeso 6:11: “Aparang diaparo tsa ntwa tse di feletseng tse di tswang kwa Modimong gore lo tle lo kgone go ema lo tiile. Fa lo dira jalo lo tla kgona go emelana le maano a a boferefere a ga Diabolo.”

Se e se kayang: Diabolo o tsietsa batho gore ba se ka ba ikobela Modimo.
Jakobe 4:7: “Ka jalo ikobeleng Modimo; ganetsang Diabolo, mme o tla lo tshaba.”

Se e se kayang: Motho a ka fenya Satane ka go ikobela Modimo go na le go ikobela Diabolo.
1 Petere 5:8: “Mmaba wa lona, e bong Diabolo, o tsamayatsamaya jaaka tau e e kurutlang, a batla go kometsa mongwe.”

Se e se kayang: Diabolo o tlhoile ba ba obamelang Modimo mme o batla go senya botsala jwa bone le Ene.