Tsela e Manta Ray e Sefang Dijo ka Yone

Fa manta ray e ntse e thuma, e ja ka go tsenya metsi a a tlhakaneng le ditshedi tse dinnye mo leganong la yone. Metsi ao a a tlhakaneng le ditshedi tse dinnye, a fetela kwa sefong ya tlhapi eno, mme ditshedi tseo di itaya sefo eo di bo di fetela kwa mometsong gore tlhapi eo e kgone go di kometsa. Metsi a feta ka sefo a bo a tswa mo marobeng a tlhapi eo. Le fa go ntse jalo sefo ya tlhapi eno e kgona go dira gore ditshedi tse dinnye thata go feta maroba a yone di se ka tsa feta le metsi. Mmegadikgang mongwe wa saense yo o bidiwang Ed Yong o bontsha gore bokgoni jwa tlhapi eno, “bo a gakgamatsa.”

Akanya ka seno: Sefo ya tlhapi eno e tshwana le marapo a a obegileng mme a bo a nna le meno a e keteng a sekamo kgotsa kamo mo matlhakoreng a mabedi. Mangwe a meno ao a lebile kwa pele mme a mangwe kwa morago. Meno ano a dira gore metsi a tsamaye mo godimo ga one le mo gare ga one, seo se bo se dira gore metsi a fuduege.

Fa ditshedi tse dinnye di atamela sefe ya tlhapi eno, metsi a a fuduegang a di gogela ka bonako mo mometsong wa yone gore e di kometse. Metsi a a fuduegang a dira gore le ditshedi tse dinnye thata di se ka tsa feta le metsi, ditshedi tseo di itaya metsi ao a a fuduegang di bo di fetela kwa mometsong. Seno se dira gore ditshedi tse dinnye thata tse di ka kgonang go feta mo diphatlheng tsa meno a sefe eno di se ka tsa feta di bo di boela kwa lewatleng.

Mo godimo ga moo, sefo eno ga e ke e kabala mme gape e a iphepafatsa go sa kgathalesege gore tlhapi eno e thuma ka bonako jo bo kae kgotsa gore go tsena ditshedi di le di kae mo leganong la yone.

Babatlisisi ba batla go kopisa tsela e sefo ya tlhapi eno e dirang ka gone gore ba kgone go dira disefo tse di phepafatsang metsi le tse di tla ntshang leswe le go seng motlhofo go le bona ka matlho.

O akanyang: A bokgoni jwa manta ray jwa go sefa dijo bo itiragaletse fela? Kgotsa a e dirilwe ke mongwe?