Kafa O Ka Fetolang Se O Leng Sone ka Gone

KE ENG se se ntseng se tlhaela mo ditseleng tsa boitshwaro tse di neng tsa tlhomiwa le phetogo e re setseng re buile ka yone? Dikeletso tsa motho ka namana mmogo le tiriso ya boikemisetso jwa gagwe! Go dira go rata ga gagwe ka go itlhophela ka boene ka ntlha ya kitso e a nang le yone. Ka bokhutshwane fela go tlhaela boikgapo jwa gagwe!

Dingaka tsa boitshwaro di ile tsa fitlhela gore di na le sebaka se se botoka sa go fitlhelela matswela a a tla tsayang lobaka lo loleele fa e le gore motho yo o alafiwang o letlelelwa go itirela phetso mo go tlhomeng mekgele ya gagwe ya boitshwaro. Vance Packard o kwala jaana mo bukeng ya gagwe The People Shapers: “Go lebega gore ka kgakololo e potlana fela, motho ope fela yo o botlhale sentle jaanong o ka kgona go fetola boitshwaro jwa gagwe.” Seno se bidiwa go ipaya mo taolong. Ka mantswe a mangwe, koo go dirisiwang boikgapo jwa selekanyo se se rileng gone, go ile ga nna le ditokafatso tse di tlhomologileng.

Bakeresete ba na le tshiamelo mo go tlhokafalang boikgapo teng, ka go bo ba ithutile go dirisa seno jaaka nngwe ya maungo a a robangbongwe a moya o o boitshepo wa Modimo. (Bagalatia 5:22, 23) Seno se bolela gore maatla a a dirang a Modimo Mothatayotlhe a ka dirisiwa go fetola boitshwaro jwa gago mme a go thusa gore o atlege.

Ka jalo, ke eng se o batlang go se dira ka boitshwaro jwa gago? A eleruri o batla go fetoga? Fa go ntse jalo, o fetoga go tswa go eng? O fetogela go eng? Mme ka ntlha yang? A o ka ikanya go itaola? Ke kae ko o ka bonang thuso e e ka tlisang melemo fela gone?

A re lebeng dingwe tsa ditsela le dilo tse di thusang go fetola ditshekamelo tsa boitshwaro.

Kgato 1: Lemoga Gore Tota O Motho wa Mofuta Ofe

O santse o ka tokafatsa se o batlang go nna sone. O tshwanetse wa bopa botho jwa gago jo bosha ka go fetola botho jwa gago jo bogologolo. Ka jalo o tshwanetse wa ikitse sentlentle. A o ka tlhalosa gore ke dikarolo dife tsa boitshwaro jwa gago tse o neng o ka rata go di fetola?

Ereka go le thata go sekaseka boitshwaro jwa gago, o tshwanetse wa leba mo tekanyetsong e e tlotlegang le e e utlwalang. Bibela e e Boitshepo ke yone e akantshiwang mo go seno. Dirisa Bibela, mme o tla ipona ka fa o ntseng ka gone moo o ka tswang o ne o sa go bone pele. Ebile o ka nna wa seka wa rata se o se bontshiwang, mme o ka tlhomamisega gore e tla bo e le tshwano ya mmatota.

Bibela e ile ya tshwantshiwa le seipone, mme batho ba rotloediwa go tlhodumela mo go yone. “Ha motho moñwe a le moutlwi oa lehoko, me a se modihi oa yeōna, o chwana le motho eo o ipōnañ sehatlhōgō sa gagwè sa tlholègō mo seiponiñ: Gonne oa ipōna, me a tsamaee, me a tloge a lebale ka bonakō popègō ea gagwè kaha e ne e nntse ka gōna. Me motho eo o lebañ mo molaoñ o o itekanetseñ, eboñ molaō oa kgololègō, me ha a cwèlèla yalo, motho eouō o tla segōhala mo go diheñ ga gagwè, ka e se moutlwi hèla eo o lebalañ, me e le modihi eo o dihañ.” (Yakobe 1:23-25) Bibela, fa e tlhaloganngwa le go dirisiwa ka tshwanelo, e na le maatla a a phunyeletsang ko teng a a sekasekang ao a ka se kang a go bontsha fela seo o leng sone jaaka motho mme le eleng go senola maitlhomo a gago le maikutlo. Ka gone, Paulo o ne a kwala jaana: “Lehoko ya Modimo le tshedile, le tlhaga, le bogale go heta dichaka cotlhe tse di magale mabedi, . . .me le bohehō go lemoga megopolō le maikaèlèlō a pelo.” Lefoko la Modimo le dira le eleng go feta ka go naya kaelo ya gore ke eng tota se se tshwanetseng le gore ke eng tota se se sa tshwanelang.—Bahebera 4:12; 5:14.

Bibela e ka kgona go go direla dilo tseno tsotlhe ka go bo e le Lefoko la ga Jehofa, Modimo wa boammaaruri yo o botlhale. Go ya ka Pesalema 139, Modimo o a go batlisisa ebile o sekaseka ka tlhomamo se o leng sone. Jaaka temana ya 1 e bolela: “Yehofa, u mphukuditse, me u nkitsile.” Modimo o ntse a go lebile ka kelotlhoko fa esale o imiwa. O go itse fela jaaka a ikitse. O ile a dira gore dikakgelo tsa botshelo jwa motho di kwalwe mo Bibeleng ka ditsela tse di farologaneng ka mo go ka kgonegang. O tla iphitlhela o bontshitswe go lo gongwe mo ditsebeng tsa yone, e ka tswa e le ka mo go siameng kana ka mo go sa siamang.

Ka gone, o ka kgona go itse gore tota o motho wa mofuta ofe—fa o batla go dira jalo.

Kgato 2: Dira Tshwetso ya Gore O Batla go Nna Motho wa Mofuta Ofe

Fa e le gore o tla fetoga, tlhomamisa gore phetogo eno e nne e e mosola. Tlhomamisa gore ke seo o se batlang le gore ke se se botoka go gaisa ka mo o ntseng ka gone jaanong. Ke mekgele efe ya boitshwaro e e tokafaditsweng e o tshwanetseng wa e tlhoma? Ke kae koo o ka bonang kgakololo e e tshwanetseng gone mabapi le mekgwa ya boitshwaro e e eletsegang? Gape, go akantshiwa Bibela mo go seno.

Bibela e go rotloetsa gore o fetoge go nna yo o botoka, gore o “aparè motho eo mosha.” Paulo o ne a gakolola jaana: “Kaga mokgwa oa botshelō yoa lona yoa galè, lo apolè motho oa bogologolo, eo o bōlañ kaha dithatoñ tsa tsieco; Le gore . . . lo aparè motho eo mosha, eo kaha Modimoñ o bopilweñ mo tshiamoñ, le mo boitshepoñ yoa boamarure.” (Baefesia 4:22-24) Bibela e go bontsha gore mekgwa eno e e botoka ke efe. A o gakologelwa lefatshe le le itekanetseng le le neng la tlhalosiwa pelenyana? Fa o batla go nna karolo ya lefatshe leo, o tla tshwanelwa ke gore o bone kafa go leng botlhokwa ka gone gore o tlhagolele dinonofo tse di tlhalosiwang mo go Bakolosa 3:12-17, dinonofo tse di jaaka bopelotlhomogi, bopelonomi, boikokobetso, bonolo, bopelotelele, go itshwarelana, lorato, kagiso, le tebogo.

Jalo he morago ga go tlhatlhoba Bibela ya gago, itlhomele mekgele. E kwale. Dira gore mokgele mongwe le mongwe e nne o o tlang pele. Berekela mo go one!

Kgato 3: Batla Dikao tse di Mosola

Bogolo jwa boitshwaro jwa gago bo ne jwa tlhomiwa ka go etsa ba bangwe—ditsala, balekane, batsadi, barutabana ba sekolo. Ke ka ntlha yang fa e sa re morago ga o sena go dira phetso ya mekgele ya boitshwaro jo o batlang go nna najo, o sa batle motho yo mongwe yo o itshwarang ka tsela e o batlang go e etsa? Go tswa foo batla thuso ya motho yoo. Seane sa Bibela ka botlhale se bontsha jaana: “Tsamaea le batho ba ba botlhale, me u tla nna botlhale.”—Diane 13:20.

Bibela e tshotse polelo kaga botshelo jwa sekao se se molemolemo sa motho yo re ka mo etsang rotlhe, Jesu Keresete ka namana. Bala kafa a neng a itshwara ka teng tlase ga maemo otlhe, go itshwara ga gagwe mo boitsholong, temogo ya gagwe le botlhale, seriti se a neng a na naso, le go akanya ga gagwe le bopelonomi jo bo sa tlwaelegang le go amega ga gagwe ka batho ba bangwe. A bo go lapolosa jang ne go utlwa fa a re: “Tlañ kwano go nna lotlhe ba lo lapileñ, ba lo imèlwañ, me ke tla lo lapolosa. Ipeleseñ yokwe oa me, lo ithutè ga me; gonne ke bonōlō le boiñōtlō mo peduñ: me lo tla bōnèla meōea ea lona tapologō. Gonne yokwe oa me o monate, le morwalō oa me o motlhoho.”!—Mathaio 11:28-30.

Batho ba le dimilionemilione mo dinageng tsotlhe ba setse ba retologetse go Jesu Keresete jaaka motho yo ba ratang go mo etsa mme ba dira ka mo ba ka kgonang ka gone go latela dikgato tsa gagwe, fela jaaka ene ka mo go tshwanang, a ne a tsamaya ka tsela e Rraagwe wa selegodimo Jehofa Modimo a neng a mo kaela gore a tsamaye mo go yone. Dimilionemilione tseno tsa batho, ereka ba sa tlhole ba batla boitshwaro jo bo maswe jwa lefatshe ka kakaretso gompieno, ba ile ba retologela go phuthego e e mo legaeng la bone ya Basupi ba ga Jehofa go batla thuso le kaelo mme ga baa ka ba swabisiwa. Kwa Diholong tsa bone tsa Bogosi, go na le batho ba le bantsi ba ba molemo ba ba ka ediwang, mme thuso e e oketsegileng e ile ya neelwa ba ba batlang go fetola boitshwaro jwa bone ka namana go nna jo bo botoka. Legale, Basupi le bone ba na le makoa a a tlwaelegileng mo bathong ba ba sa itekanelang; mme gape ba na le maatla a semoya a a tshwanetseng a go tlhotlheletsa mogopolo.—Baefesia 4:23.

Kgato 4: Bona Nonofo Eo O E Tlhokang Gore O Atlege?

Bao ba batlang go fetola ditsela tsa bone ba tla gomotsega go itse gore thuso eo e gone. “Motho eo mosha” o tlhalosiwa jaaka “eo kaha Modimoñ o bopilweñ mo tshiamoñ, le mo boitshepoñ yoa boamarure.” (Baefesia 4:24) Seno se tiisetsa gore thuso e e fetang nonofo ya motho e gone go tswa kwa Modimong ka boene go bao ba e batlang. O ka bona jang thuso ya ga Jehofa Modimo?

Nngwe ya dithuso tsa konokono ke ka go rapela ka bowena. Thapelo e dira gore o bonane le Motswedi wa maatla a a tlhokegang gore o fetole ditsela tsa gago. Thapelo e dira gore o kgone go bua o gololesegile le ka tshosologo ka nako nngwe le nngwe, le eleng fa o le gare ga mathata. Go kgona go amana le Modimo wa mmatota jalo le yo o amegang go gaisa kgakala go bona thuso lefa e le epe fela mme ebile e dira gone fela foo. Ka gone, moaposetoloi Johane o ne a ka kwala jaana: “Mo ke yōna botlhōka poihō yo re nañ nayō ntlheñ ea gagwè, go re, ha re lōpa señwe kaha go rateñ ga ōna, oa re utlwa.” (1 Yohane 5:14) Mme mafoko a ga moperofeti Isaia a re kgothatsa jaana: “Batlañ Yehofa a sa nntse a ka boñwa; mmitseñ a sa nntse a le gauhi. A moikepi a latlhè tsela ea gagwè, le motho eo o sa siamañ kgopolō tsa gagwè; a boèlè kwa go Yehofa, me o tla mo utlwèla botlhoko; le kwa Modimoñ oa rona, gonne o tla ichwarèla ka botlalō.”—Isaia 55:6, 7.

Go ithuta Bibela gape go naya maatla, go naya tapologo, go go kgonisa go tsepama ka malatsi otlhe mo mekgeleng ya gago. Bibela e naya nonofo e e siameng fa o ntse o gagamalela go nna le boitshwaro jo o bo tlhophileng. Go feta moo, e tlhotlheletsa boikutlo jwa go ila ditsela tsa gago tsa pele. Go anya kitso ya Bibela ka metlha le diteng tsa yone gape go ka thibela tshedimosetso epe e e sa tlhamalalang eo e ka tsenang e tswa mo metsweding ya lefatshe le dithulaganyo tsa yone tsa thuto.

Dipokano tsa Bokeresete tse di nnang gone kwa Holong ya Bogosi ya Basupi ba ga Jehofa e e mo lefelong la lona ga e neye fela thuto mabapi le ditekanyetso tsa Bibela mme gape e dira gore go nne le setlhopha se se ka go tshegetsang le go tlhotlheletsana naso gore o tokafatse boitshwaro. Tshegetso eno e e neelwang ka phuthego e ile ya thusa batho ba le bantsi go fetola boitshwaro jwa bone ka katlego. Ke ka ntlha yang fa o sa buisane ka thuso eo le motho yo o neng wa amogela makasine ono mo go ene?

Kgato 5: Itshokele Dipoelomorago

Batho ba le bantsi ba ile ba leka go tokafatsa ditsela tsa bone mme ba ile ba kgobiwa marapo ke dipoelomorago tse di ka se kang tsa tilwa. Phelelo e ile ya nna gore ba bangwe ba ineele gotlhelele. Batho ba ba ntseng jalo gantsi ba tsaya gore fa se ba neng ba tsaya gore ke yone tsholofelo ya bone fela jaanong se padile, ga go sa tlhole go na le tsholofelo. Ba ka nna ya re morago ga foo ba ineela mo ditlhotlheletsong tsa lefatshe. Gantsi ba nna bosula go feta pele ga ba ne ba leka go fetoga.

Nna o tlhomamisegile gore go na le mosola go tlogela tsela epe fela ya pele. Moaposetoloi Paulo o ne a lebisa go boitshwaro jwa gagwe jwa pele le mofuta wa botshelo jaaka thotobolo ya malele kana matlakala. (Bafilipi 3:8) Ka jalo fa e ka re o ntse o dira diphetogo wa kgopiwa ke sekgoreletsi sengwe kana wa boelamorago, tsoga gape, mme o nne o gatele pele. Tswelela pele! Nna o lwe! Go tla go solegela molemo!

Gakologelwa, bontsi jwa ditsela tsa gago le mekgwa di ne tsa tsenngwa mo go wena ke maatla a a tswang kwa ntle ao o sa a tlhophang kana o neng o sa kake wa a laola ka yone nako eo. Maatla ano a santse a dira. A o tla letla gore a go gatelele mo mekgweng ya one? Nnyaa? He le ka motlha o se ka wa lapa!

Bontsintsi jwa batho go tswa mo ditsong tse di farologaneng—le eleng dikebekwa le batho ba ba tseneletseng thata mo boitshwarong jo bo sa siamang—ba ile ba kgona go fetola boitshwaro jwa bone ka katlego. Ba ile ba tshwarelela mo ditekanyetsong tsa bone tse di tokafaditsweng go fitlha le mo motlheng ono, batho ba le bantsi ba tsere masomesome a dingwaga ba ngaparetse ditsela tsa bone tse di botoka ka bothokgami jo bo eletsegang jwa boithatelo. Mme ba leboga Modimo ka maatla le tlhotlheletso ya go dira seno. Jaaka moaposetoloi Paulo a ne a bolela: “Nka diha dilō cotlhe ka èna eo o nnonotshañ.”—Bafilipi 4:13.

Ba a fenya mo ntweng ya go dira se se siameng. Le wena o ka dira phetogo fa tota o batla go dira jalo mme o ka itumelela botshelo mo lefatsheng le lesha la Modimo.—Pesalema 37:29; 2 Petere 3:13.

[Setshwantsho mo go tsebe 7]

Kgato 1: Lemoga gore tota o motho wa mofuta ofe

[Setshwantsho mo go tsebe 8]

Kgato 2: Dira tshwetso ya gore o batla go nna motho wa mofuta ofe

[Setshwantsho mo go tsebe 8]

Kgato 3: Batla dikao tse di mosola

[Setshwantsho mo go tsebe 9]

Kgato 4: Batla nonofo e o e tlhokang gore o atlege

[Setshwantsho mo go tsebe 9]

Kgato 5: Itshokele dipoelomorago

[Setshwantsho mo go tsebe 10]

Bao ba fetogang gape ba ka rua lefatshe le le fetogileng