Kgopolo E E mo Bibeleng

Mokeresete A Ka Iphemela go ya Bokgakaleng Jo Bo Kana Kang?

“Ke ka ntlha yang o tshelela mo poifong? Ithute ditsela tse di nang le mosola tsa go iphemela mme o falole mo motlhaseding wa gago. Ditsela tsa go itshireletsa tse di motlhofo le tse di dirang di supiwa ka botlalo. Video eno e e rutang e ka nna pharologanyo magareng ga go nna mmolaiwa kana mofalodi.”—Phasalatso e e tswang go “video” ya go iphemela.

GA GO NA yo o ka tlhalosang bontsi jo video eno e e ntseng jalo e ka rekisiwang ka jone gompieno. Kwa toropokgolong ya Philadelphia, Pennsylvania, U.S.A., digopa tsa basha ba boaboeletsa jaana ba ntse ba tsamayatsamaya le mebila ba batla batho bao ba ka ba tlhaselang “Betsa, betsa, betsa.” “Go tshaba ditlhotlheletso tsa bokebekwa ke selo se se atileng mo motseng oo otlhe” wa Rio de Janeiro, go bega jalo makasine wa Time. Kwa Hong Kong dirukhutlhi tse di tlhomeletseng ka dibetsa le go hula di gona mo dikarolong tse bokebekwa jo bogolo bo neng bo sa itsiwe gotlhelele gone—go fitlha le jaanong.

Dipego tse di tshwanang di utlwiwa lefatshe ka bophara. Ka matswela afe? “Baagi ba akanya ka dikotsi tse di ka nnang gone fa batho ba ka hula ba ipusolosetsa,” go bolela jalo Newsweek. Bakeresete ga ba a sireletsega ‘mo metlheng eno ya bofelo ya dipaka tse di tlhokofatsang,’ mme a go hula ba ipusolosetsa tota go dira “pharologanyo mo go reng a motho o tla nna mmolaiwa kana mofalodi”?—2 Timotheo 3:1.

A O Lwa le Bokebekwa ka go Dira Jo Bongwe?

‘Fa ke tshola tlhobolo,’ ba bangwe ba dumela jalo ‘ke tla bo ke babalesegile. Ke tla mo hula pele a ka mphula. Bobotlana ke tla mo tshosa!’ Lefa go ntse jalo, seo ga se selo se se motlhofo jalo.

George Napper, wa Atlanta, Georgia, U.S.A., morongwa mo go tsa ipabalelo ya setšhaba o bolela jaana: “Go nna le tlhobolo e potlana go raya go nna o ipaakanyeditse go tshela ka ditlamorago tsa go bolaya motho yo mongwe.” A Mokeresete o ipaakanyeditse go tshela ka phelelo e e ntseng jalo, eo e ka akaretsang go nna le molato wa madi?—Bapisa Dipalō 35:11, 12.

Gape, Lefoko la Modimo le laela jaana? ‘Thulang ditšhaka tsa lona go nna magale a megoma.’ Gape le a re, ‘Batlang kagiso lo bo lo e latele.’ (Mika 4:3; 1 Petere 3:11) Bakeresete ba ka batla tshireletso jang ka go dirisa ditlhobolo mme mo letlhakoreng le lengwe ba tshela tumalanong le ditlhokafalo tsa Bibela? Mme ebile kana, motlhasedi go lebega a ka nna bofefo go hula pele ga yo o tlhaselwang.

Jesu o ne a ganana le go iphemela ka dibetsa. Ke boammaaruri, o ne a laela baaposetoloi ba gagwe gore ba tseye ditšhaka di le pedi fa ba ne ba ya kwa tshimong ya Gethesemane, lefelo leo a neng a tla tshwarwa kwa go lone. Mme ke ka ntlha yang fa a ne a dira seno? Ka go bo ba ne ba na le dibetsa, lefa go ntse jalo ba sa di dirise, go ne go bontsha ka maatla gore balatedi ba ga Jesu ga baa tshwanela go ikaega ka dibetsa tsa senama. Go a lemosega gore ereka go ne go na le sebetsa fa gaufi, Petere o ne a se dirisa kwantle ga go akanya. Jesu o ne a mo kgalemelela kgato e e bofefo eno ka maatla ka mafoko a a reng: “Botlhe ba ba tsaeañ chaka ba tla nyèlèla ka chaka.”—Mathaio 26:36, 47-56; Luke 22:36-38, 49-51.

‘Seo se dira fela mo go bao ba nang le ditlhobolo,’ mongwe o ka nna a bolela jalo. ‘Mme go tweng ka go ithuta botswerere jwa go tlhabanela go iphemela, jaaka jwa judo, karate, le kendo?’ Ipotse jaana, a boikaelelo jwa go ithuta seno ga se go lwa kana go gobatsa ba bangwe? Mme a tota ikatiso eno ga e tshwane fela le go itlhomelela ka mo go kotsi? (1 Timotheo 3:3) Le eleng dithulaganyo tsa go ikatisa di ile tsa felela ka dikgobalo tse di masisi le dipolao.

Baroma 12:17-19 e naya kgakololo e e botlhale mabapi le seno: “Se dueleñ boshula yoa ga opè ka boshula. . . . Ha go ka nna yalo, lo nnè kagishō le batho botlhe, kaha nonohoñ ea lona. Baratwa, se ipusholosetseñ, me lo thibogèlè bogale; gonne go kwadilwe, ga twe, Pusholoshō ke ea me; ke tla duèla, go bua Morèna.” Lefoko la Segerika le le reng “boshula” (ka·kosʹ) le Paulo a le dirisang fano gape le ka raya go “senya, go gobatsa.” Ka jalo, Bakeresete ba tshwanetse go ithiba mo dikgopolong tsotlhe tsa go ipusolosetsa ka go gobatsa motho yo mongwe.

Go na le go bontsha bogale jwa gagwe kwantle ga go akanya, Mokeresete o ikanya mo Modimong ka botlalo, yo o rayang batho ba gagwe a re: “Eo o lo amañ o ama thaka ea leitlhō ya gagwè.” Tumalanong le seno, Modimo o solofetsa go ‘senya baikepi’ fa nako e fitlha.—Sekaria 2:8; Pesalema 145:20.

A Ke Nako ya Go Lwa?

‘Ke ka se tlogele madi a me ke sa lwe!’ bangwe ba khutsa jalo ka sebete. Dick Mellard, motsamaisi wa tsa thuto kwa National Crime Prevention Institute, o tlhagisa jaana: “Go iphemela ke mokgwa o motho o bopilweng a na nao, mme mokgwa o motho o bopilweng a na nao o ka dira gore [o] bolaiwe mo boemong jo bo sa siamang.” Batlhasedi ba le bantsi ba tlhomela ka mo go kotsi ka dibetsa ebile ba abo ba gateletswe mo mogopolong, ba tshogile. Madi a a latlhegileng a ka kgona go bonwa gape, mme go tweng ka botshelo jo bo latlhegileng? A go mosola go ipaya mo kotsing?

George Napper o fa kgakololo eno: “Gongwe tsela e e molemolemo ya go itshireletsa ke go baya dithoto tsa gago mo kotsing go na le botshelo jwa gago. Bontsi jwa dirukhutlhi le bathubi ba abo ba tlile go utswa, eseng go bolaya.” Mo boemong jwa fa motho a atamelwa fela kana fa go batliwa madi a gagwe, molaomotheo o o utlwalang ke o o reng: “Motlhanka oa Morèna ga a chwanèla go lwa.”—2 Timotheo 2:24.a

Seno ga se tetlanyo, e leng maikemisetso a go sa iphemele ka go lwa tlase ga boemo bope fela. Mo go Ekesodo 22:2, 3, go tlhalosiwa ka boemo bongwe jo mo go jone legodu lengwe le neng la itewa mo go botlhoko fa le ne le tsena mo ntlong ya motho mongwe go le motshegare. Dikgato tse di ntseng jalo tsa go iphemela di ne di tsewa fela jaaka go bolaya, ka go bo legodu leo le ne le ka lemogiwa mme la tlisiwa kwa kgotlatshekelong go tla go sekisiwa. Mme fa go le bosigo, go ne go ka nna thata gore mong wa ntlo a bone motho yo o tseneng a bo a lemoge maikaelelo a gagwe. Ka jalo, motho yo a neng a bolaya motho yo o tseneng mo lefifing o ne a tsewa a se molato.

Ka gone, Bibela ga e tshegetse maiteko a potlako a go itshireletsa. Lefa go ntse jalo, go sa dumalane le tletlanyo, Bibela e bontsha gore go na le nako ya go itshireletsa. Bakeresete ba ka thiba ditlhaselo tse di bogale tsa mo mmeleng e le go iphemela, go femela malapa a bone, kana ba bangwe ba ba tlhokang go sirelediwa ka mmatota.b Mme e ne e ka se ka ya nna bone ba ba simololang go tlhasela, le gone ba ne ba ka se ka ba ipusolosetsa ka go lwa e le go babalela dithoto tsa bone. Ba ne ba ka se ka ba tsaya dibetsa ba lebeletse gore ba tla tlhaselwa ka tsela e e ntseng jalo; go na le moo, ba lekela go ‘tshela ka kagiso.’—2 Bakorintha 13:11.

[Dintlha tse di kwa tlase]

[Setshwantsho mo go tsebe 12]

Betrayal of Christ, by Albrecht Dürer, 1508