A Saense e ka Lepalepana le Dikgwetlho tsa Lekgolo la Bo21 la Dingwaga?

“Go na le bosupi jo bo tletseng jwa saense jo bo bontshang gore Mmaetsho Lefatshe ga a kake a kgona go emelana le bana ba gagwe ba ba seng tlhoko ba bile ba le diganana ka lobaka lo loleele.”—The European, March 19-25, 1992.

BAITHUTATIKOLOGO ba le bantsi ba nna le mogopolo wa gore matshosetsi a a direlwang lefatshe, ga se selo se eseng sa sepe fela, go na le moo a magolo thata mo a tshwanetseng go tsewa tsia thata. Tota ebile, ba re go tlhokega go tsaya kgato ka bofefo go fema matlhotlhapelo. Mookamedi wa Worldwatch Institute o ne a bua jaana kwa bofelong jwa bo1980, “Ga re na nako e e tla tsayang dikokomana tse dintsi. Re na le dingwaga di sekae fela, tse ka tsone re ka lekang go baakanya dilo.”

Barulaganyi ba buka e go tweng 5000 Days to Save the Planet ba ne ba bua ka tlhamalalo ka 1990 fa ba ne ba gatisa buka ya bone. Fa esale ka nako eo nako e ntse e a tsamaya. Nako e e setseng go falotsa polanete eno, go ya ka nako e ba e beileng, jaanong e fa malatsing a le 4 000. Mme fa lekgolo la bo21 le ya go tla, fa e le gore ga go direge sepe se segolo mo nakong eno, malatsi ao a tla bo a fokotsegile go nna a le 1 500 fela.

Ke maemo afe a a sa tlwaelesegang a a tsetseng dipharagobe tse di lebegang di le teng tseno? Ke dikgwetlho dife tse di lerilweng ke lekgolo le le tlang la dingwaga?

Ga se Mathata ke Tlang lo Bone

Batho ba ba ratang kagiso ba itumelela go bo Go Dipisana go fedile. Mme lefa go le jalo kgwetlho ya go lere le go boloka kagiso ya lefatshe e santse e le bothata jo bo teng. Fa tautona ya Fora ebong Mitterrand a ne a bua ka January 1990 ka mathata a a emeng pele go kopana ga Yuropa, o ne a re: “Re tlogela lefatshe le le senang tekatekanyo mme lefa go le jalo le sa reketle, re ya kwa go le re solofelang gore le tla bo le na le tshiamiso e e botoka, mme e le le le tla bong le tekuma thata.” Mme The European e ne ya kwala jaana: “Tlhwatlhwa ya kgololesego [kwa mafatsheng a a kileng a bo aa ja le Soviet] ke go oketsega ga tlhakatlhakano, mo go okeditseng kotsi ya ntwa ya nuklea, le fa gone e se ka selekanyo se segolo mo go kalo.”

Tota kana, dingwe tsa dikgwetlho tse gompieno lefatshe le lebaganeng natso di ne di sa itsiwe gotlhelele fa Go Dipisana go ne go simologa. Ke fela jaaka 5000 Days to Save the Planet e lemotsha: “Mo e ka nnang dingwaga tse di masome a matlhano tse di fetileng tikologo ya lefatshe e ne e santse e le mo maemong. . . . Lefatshe e ne e le lefelo le letona, le lentle ebile le nonofile; tota re ne re ka le senya jang? Gompieno re bolelelwa gore polanate ya rona e mo dipharagobeng, gore re tsamaya re senya le go kgotlela go fitlhelela lefatshe lotlhe le apesiwa ke matlhotlhapelo.”

Mo go ntseng go bidiwa go twe ke dikodumedi tsa tlholego—merwalela, madimo, dithoromo tsa lefatshe, go thunya ga makgwamolelo—go diragala gongwe le gongwe. Go re go suasua tikologo ga motho go e amile go le kana kang ke kgang e e ka sekang ya tlhomamisiwa. Go na le bosupi jwa gore lebebe le le sireletsang lefatshe la ozone le sesafetse fela thata mo mafelong mangwe mo go ka nnang ga baka kotsi. Borasaense bangwe jaanong ba tlhagisa jaana gore, diphetogo tsa tlelaemete tse di ka tsalang ntshenatshe, di ka tlhagoga ka tshoganetso go na le go tla ka iketlo.

Kankere, malwetsi a pelo, mathata a motsamao wa madi, le matlhoko a mangwe a mantsi ga a bolo go nna a tsenya ba ba nang le kitso ya bongaka fa le fa. Le mororo go nnile le kgatelopele ya dingwaga tse dintsi ya kalafi, malwetsi ano a santse a bolaya. Kwa Yuropa e le yosi, palo e e fopholediwang mo go 1 200 000 ya batho ba bolaiwa ke kankere ngwaga le ngwaga, mo e ka nnang 65 lekgolong go feta lesome la dingwaga le le fetileng. Ka ntlha ya go boifa seru se sesha—AIDS, e e bolaileng batho ba ba kwa tlase thata ga palo eo—tatlhegelo eno e kgolo ga e tsewe tsia.

Kgwetlho e nngwe gape: Mo dingwageng tse di kafa tlase ga 200, palo ya batho mo lefatsheng e ne ya gola go tswa go dimilione tse di sekete a le mongwe go nna dimilione tse di dikete tse tlhano le sephatlo. Go sa kgathalesege go wa ga bosheng ga go ntsifala ga batho ka ngwaga, bangwe ba fopholetsa gore e tla re ka ngwaga wa 2025, palo ya batho mo lefatsheng e bo gongwe e fetile dimilione tse di dikete tse di robangbobedi, mme e tla re ka 2050 e bo e omela dimilione tse di dikete tse di lesome. Batho bano botlhe ba tla nna kae? Ba tla ja eng? Pego ya UN e e ntshitsweng ka 1991 e ne ya fopholetsa gore go setse go na le batho ba le dimilione di le sekete ba ba tshelelang mo lehumeng la nta ya tlhogo, matshelo a bone “a tletse ka go tlhaela dikotla, go sa itse go bala le go kwala le malwetsi mo eleng gore ga go na tlhaloso epe ya go tshela jaaka motho e e ba tshwanelang.”

Paul R. Ehrlich, porofesara ya dithuto tsa go ata ga batho kwa Yunibesithing ya Stanford kwa United States, o tlhalosa ka bogolo jwa bothata jono, jaana: “Fa go ntsifala go feta selekanyo ga batho ba mafatshe a a humanegileng go ba dira gore ba humanegele pele, go ntsifala go feta selekanyo ga batho mo mafatsheng a a humileng gone go kgoreletsa polanete eno yotlhe gore e se ka ya kgona go boloka botshelo.”

Lebaka la gore go ka nna ga direga gore mabaka a a sa tswang go umakiwa pelenyana—kana a mangwe a a etsang go sa dirise diokobatsi sentle, go sa nne le bonno jo bo lekaneng, tlolomolao, le dintwa tsa dikilano tsa lotso—a ka tlhosetsa matlhotlhapelo a lefatshe lotlhe mo nakong e e tlang e e seng kgakala go tlhobaetsa fela thata. Kgwetlho yone e teng. Tsela ya go lebagana le yone ke yone e seyong.

Go Batla Ditsela tsa Go Lepalepana le Seemo

Legale, ka ntlha ya bomasisi jwa mathata, dipuso, lefa gone di sa potlaka ka go tshwana, di batla tharabololo. Ka sekai, mo kgannyeng ya tikologo, kokoano e kgolo e e kileng ya nna teng ya go buisana ka tikologo e ne ya tshwarelwa kwa Rio de Janeiro ka June ngwaga e e fetileng. Kokoano eo e e neng e duelelwa ke UN ya Earth Summit e ne le ya bobedi ya mofuta oo, morago ga e e neng e tshwaretswe kwa Stockholm, Sweden ka 1972. Ka nako eo lepolotiki la Mojeremane le le itsegeng le ne la re: “Kokoano eno e ka nna selo sa konokono mabapi le kwa polaneteng eno e tla felelang e le teng.”

Kwa ntle ga pelaelo, phuthego ya 1972 e ne ya seka ya tsala se se neng se solofetswe. Maurice F. Strong, yo e neng e le ene morulaganyimogolo wa diphuthego tsa 1972 le 1992, o ne a dumela jaana: “Re ithutile mo dingwageng tse di 20 fa e sale phuthego ya Stockholm gore melao ya tikologo, e e leng yone sedirisiwa se le sosi se mekgatlho ya tikologo e nang le sone, e botlhokwa mme le fa go le jalo ga e a lekana. E tshwanetse go tsamaisana le diphetogo tsa botlhokwa tse di laolang maikutlo a rona a boitshwaro mo go tsa itsholelo.”

Lefa go le jalo, a phuthego ya 1992 e tla itshupa e atlegile mo go direng “diphetogo [tseno] tsa botlhokwa” go na le ya 1972? Fa go sa nna jalo, a polanete ya rona e tla bo e santse e ka kgona morago ga dingwaga tse di 20, ka 2012, go tshwara Earth Summit ya boraro e e ka nnang ya nna teng?

E Lebane le Kgwetlho ya Yone e e di Fetang Tsotlhe

Batho ka bontsi ba simolola go belaela gore a tota bodumedi le polotiki di ka kgona go rarabolola mathata a lefatshe. Mme fa e le gore bodumedi le polotiki ga di ka ke tsa kgona, ke eng se se ka lepalepanang le dikgwetlho tsa lekgolo la bo21 la dingwaga?

Boroutšhara bongwe jo bo gatisitsweng ke German Federal Ministry for Research and Technology bo araba potso eno. “Go dirisana le mathata ano go batla ditogamaano tsa sepolotiki tse di ka thusang e seng fela go tila diphetogo tse di ka bakiwang ke motho mme gape le go thibela ditlamorago tse di maswe tse di ka bakiwang ke diphetogo tsa lefatshe lotlhe. Ka ntlha ya go raraana ga mathata a a re lebaneng, ditshwetso tse di nang le mosola tsa sepolotiki di ka nna teng fela fa di thailwe mo ditshekatshekong tse di nonofileng tsa saense le mo diponelongpele tse di ka ikanngwang. Eno e lebega e le yone tsela e le yosi ya go tila ditlhabololo tse di lopang madi a mantsi kana tse di bileng di sa tlhokege di bile di le diphatsa. Go ntsha tshedimosetso eo ke kgwetlho e kgolo go di gaisa e e lebaneng borasaense mo nakong eno.”

Saense e ile ya lebana le dikgwetlho tse dikgolo mo nakong e e fetileng mme e ne ya di fenya, go ya bokgakaleng jo bo rileng. Lefa go le jalo, ga se phoso go botsa gore a saense e tla kgona dikgwetlho tsa lekgolo la bo21 la dingwaga le le tlang. A go na le mabaka a go nna le tsholofelo?

Tsogang! e itsise ka boitumelo jo bogolo go re go tla tlotliwa ka kgang eno e e masisi, e tla tlotliwa mo motseletseleng wa ditlhogo go simolola ka tokololo eno. Karolo 1 e a latela.

[Ditshwantsho mo go tsebe 4]

Ke eng se saense e ka se dirang mabapi le kgotlelo, bolwetsi, le go ntsifala thata ga batho?

[Metswedi ya Ditshwantsho]

WHO photo by P. Almasy

WHO photo by P. Almasy