Basha ba Botsa Jaana . . .

Go Tla Diragalang Fa Nka Ratana le Motho yo o Sa Dumeleng?

“Ke na le bothata,” go ne ga bolela jalo mosetsana mongwe wa Mokeresete. “Ke na le lorato lwa go ijesa dijo tsa ditoro ka moagisani wa me. O pelonomi, o na le maitseo, e bile o a akanyetsa, mme lefa go ntse jalo, go na le selo se le sengwe se a sa se direng—ga a rate Jehofa. Ke a itse gore ga go a siama gore ke bo ke mo rata, mme tota ga ke itse gore ke dire eng ka maikutlo a me.”

Mark o ne a le dingwaga di le 14 fa a ne a tsena mo boemong jo bo tshwanang.a O ne a nna le lorato lwa go ijesa dijo tsa ditoro ka mosetsana mongwe yo o neng a sa dumele dilo tse a di dumelang mo bodumeding jwa gagwe. “Gantsi ke ne ke tle ke akanye gore go ne go tla nna jang fa re le mmogo, re nyalane,” a bolela jalo. “Lefa go ntse jalo, ke ne ke itse gore go phoso.”

GANTSI basha ba ba mo dingwageng tsa bolesome ba nna le lorato lwa go ijesa dijo tsa ditoro, ka gonne maikutlo a bone a lorato a maatla thata ka nako eo. (Bapisa 1 Bakorintha 7:36.) Gantsi basha ba nna le lorato lwa go ijesa dijo tsa ditoro ka barutabana ba ba ba ratang thata, batho ba ba tlosang ba bangwe bodutu le batho ba ba tshwanang le bao ka go bo ba sa kgone go kgotsofatsa maikutlo a bone ka tsela e e se kitlang e ba utlwisa botlhoko. E re ka ba ka se ka ba tsalana le batho ba ba ntseng jalo, lorato lwa go ijesa dijo tsa ditoro gantsi lo nna selo sa nakwana fela mme ga le utlwise botlhoko thata.b Mme gone, go tweng fa e le gore o simolola go rata motho yo e leng monkana wa gago—e le motho yo o batlang e bile a kgona go nna le kamano e e ntseng jalo le wena—mme lefa go ntse jalo, motho yoo a sa dumele dilo tse wena o di dumelang mo bodumeding jwa gago?

Batho bangwe ba ka tswa ba sa bone fa seno e le bothata. Boammaaruri ke gore basha ba bantsi ga ba kgatlhegele bodumedi mo go kalo. Mme le gare ga bao ba bo kgatlhegelang, go intsha le motho wa bodumedi bo sele go tsewa fela gore go siame. Mo bathong ba ba senang sepe gore go diragalang go itshiametse fela. Lefa go ntse jalo, batho ba bantsi ba ba godileng, ba bona mathata a a tla tsogang mo kamanong e e ntseng jalo, ka gore gantsi a nna teng mo lenyalong. Ke ka ntlha ya moo mokwadi mongwe e bong Andrea Eagan a neng a gakolola basha jaana: “Fa bobedi jwa lona lo sa kgatlhegele bodumedi he ga go botlhokwa gore bodumedi jo lo godisitsweng ka bone bo tshwane. Fa e le gore go nna modumedi go botlhokwa mo go mongwe wa lona kana mo go lona ka bobedi, he, lo tshwanetse lwa akanya ka go sa tshwane ga bodumedi jwa lona. . . . Ga go tlhokege gore bodumedi jwa lona bo tshwane . . . , mme lo tshwanetse gore lo tshwanelane.”

Go ka nna ga lebega kgakololo e e ntseng jalo e utlwala. Mme tota ke “botlhale yoa lehatshe.” (1 Bakorintha 3:19) Bibela e bontsha gore go ratana ga motho yo o dumetseng le yo o sa dumeleng ke kgang e e botlhokwa thata go feta go tshwanelana mo lenyalong. Basha ba e leng Basupi ba ga Jehofa ba itse gore ke kgang ya go utlwa Lefoko la Modimo, le le kgothatsang Bakeresete gore ba nyale mo “Moreneñ hèla.” (1 Bakorintha 7:39) E re ka go intsha mmogo e se go itlosa bodutu fela mme e le selo se se tla dirang gore lo tsene mo lenyalong, Modimo ga o kitla o itumela fa mongwe wa batlhanka ba gagwe a ratana le motho yo o sa ineelang mo go Jehofa.

Mme lefa go ntse jalo, basha bangwe ba Basupi ba ile ba kgatlhegela batho ba ba sa dumeleng. Seno se direga jang? Ke eng se o tshwanetseng go se dira fa o iphitlhela o le mo boemong jo bo ntseng jalo?

Kafa go Diragalang ka Teng

Sa ntlha, o tshwanetse go lemoga gore batho botlhe ba dira diphoso. “E mañ eo o ka lemogañ ditimèlō tsa gagwè?” mopesalema o ne a botsa jalo. (Pesalema 19:12) Basha ke bone bao segolobogolo ba dirang diphoso mo dikgannyeng tsa lorato. Ka ntlha yang? Lebaka le le lengwe ke ka go bo ga ba na botlhale jo motho a nnang le jone ka ntlha ya boitemogelo le ka ntlha ya go gola. (Diane 1:4) Ka go bo mosha wa Mokeresete a ise a ko a dirisane le motho wa bong bo sele, a ka tswa a sa itse gore a itshware jang fa a mo rata—kana a mo kgatlhegela.

Seno se ile sa diragalela Sheila fa a lemoga gore mongwe yo o tsenang sekolo le ene o na le lorato lwa go ijesa dijo tsa ditoro mo go ene. “Ke ne ke itse gore o a nthata,” Sheila a bolela jalo. “Ka nako ya dijo o ne a tla go ja le nna. Ka nako ya go ithuta kwa laeboraring, o ne a tle a mpatle.” Sheila o ne a simolola go rata mosimane yono. Mark, yo o umakilweng kwa pelenyana le ene o gakologelwa jaana: “Ke ne ke a tle ke bone mosetsana yono kwa tlelaseng ya boitshidilo. O ne a dira matsapa gore a tle go bua le nna. Go ne go se thata gore re simolole botsalano.” Mo kgannyeng ya ga Pam wa dingwaga tse 14, mosimane mongwe yo o nnang gaufi le legae la gaabo o ne a bo a mo naya palamonwana go supa gore o a mo rata.

Mme gone, ga se ka metlha Mosupi e nnang ene a latelwang ke motho yo mongwe. Mosetsana mongwe o ne a bontsha fela fa a itumelela tsela e mosimane mongwe wa Mokeresete yo o bidiwang Jim a neng a mo kgatlhegela ka yone. Lefa go ntse jalo, o ne a patelesega gore a bolele gore o ne a dirile eng fa ka letsatsi lengwe mosetsana yono a ne a tla go mmatla kwa Holong ya Bogosi ya Basupi ba ga Jehofa!

Go sa kgathalesege gore boemo ke bofe, o ka tswa o ne o itse gore go phoso gore o ratane. Mme lefa go ntse jalo, ka dinako tse dingwe go thata go tila motho wa bong bo sele fa a go kgatlhegela. Akanya ka Andrew. Fa a le mo ngwageng wa gagwe wa ntlha kwa sekolong se segolwane, batsadi ba gagwe ba ne ba tlhalana. “Ke ne ke tlhoka motho yo nka buang le ene,” o gakologelwa jalo. Go ne go na le mosetsana mongwe kwa sekolong yo go neng go lebega fa a ne a bua lefoko le le siameng le le neng le mo kgothatsa ka metlha. Ka bonakonyana fela ba ne ba simolola go ratana.

Dikotsi tsa Gone

Fa o sa tlhokomele, maikutlo a a ntseng jalo a ka go tsenya mo mathateng. Diane 6:27 e bolela jaana: “A motho a ka tsaea molelō mo sehubeñ sa gagwè, me diaparō tsa gagwè di sa she?” Ka sekai, akanya ka se se diragaletseng mosetsana mongwe yo o bidiwang Kim. Le mororo a ne a godisitswe jaaka Mokeresete, o ne a itetla go ratana le mosimane mongwe kwa sekolong. “E ne e le mongwe wa basimane ba ba itsegeng thata le ba ba kgatlhang thata kwa sekolong,” Kim o gakologelwa jalo. Go ise go ye kae o ne a ikutswa a ya kwa diphathing tse mo go tsone go neng go dirisiwa diokobatsi go sa iphitlhwe. “Ke ne ke boifa thata, mme lefa go ntse jalo, ke ne ke mo rata. Ke ne ka nna moimana.” Kim o ne a nyalana le lekau la gagwe, mme lefa go ntse jalo o ne a feletsa a tlhatlhetswe kwa kgolegelong ka ntlha ya go thukutha. Tlhagiso ya Bibela e ile ya itshupa gape e le boammaaruri: “Go ikōpanya le ba ba boshula, go tlo go bodise mekgwa e mentlè.”—1 Bakorintha 15:33.

Seno ga se reye gore basha botlhe ba e seng Basupi ba ga Jehofa ga ba na boitsholo jo bo siameng kana ba dirisa diokobatsi. Lefa go ntse jalo, basha ba ba ntseng jalo ga ba na ditekanyetso tse di tshwanang le tsa basha ba Basupi kana mekgele ya bone le go leba dilo ka tsela e bone ba di lebang ka yone. Bakorintha wa ntlha 2:14 e tlhalosa gore motho yo o sa dumeleng ga a “amogele dilō tsa Mōea oa Modimo; gonne ke dinyana mo go èna; me ga a kake a di itse, ka di sekasekwa kaha mokgweñ oa semōea.” Akanya kafa ditekanyetso tsa gago tsa bodumedi di bopileng maikutlo a gago ka teng—kafa o itumelang ka teng fa o le kwa dipokanong tsa Bokeresete, le kafa o itumelang ka gone go bolelela batho ba ba batlang go reetsa molaetsa wa Bibela, kafa o itumelang ka teng go ithuta Bibela ka boyone. A motho yo o sa dumeleng a ka tlhaloganya—kana le e leng go ikutlwa ka tsela eo? Le eseng.

Ke ka moo Paulo a gakololang Bakeresete jaana: “Se pataganeleñ yokwe le ba ba sa dumeleñ, e le mo go sa lekalekaneñ: gonne tshiamō e na le bolekane bohe le tshiamololō? kgotsa lesedi le na le kabalanō ehe le lehihi? Me Keresete o na le kutlwanō ehe le Beliale? kgotsa eo o dumèlañ o na le kabèlō ehe le eo o sa dumeleñ?” (2 Bakorintha 6:14, 15) Sonya yo mmotlana o ne a ithuta seno fa a ne a ratana le motho yo o sa dumeleng. O dumela jaana: “Go nna le molekane yo o sa kgatlhegeleng Jehofa le go mo rata jaaka wena go jesa bodutu thata go gaisa kafa motho a ka akanyang ka teng. Go utlwisa maikutlo a gago botlhoko. Fa boammaaruri e le selo se se botlhokwa thata mo botshelong jwa gago, o patelesega gore o bo bolelele ba bangwe—o tshwanetse! O ikutlwa o sa itumela fa o sa kgone go bo bolelela molekane wa gago ka go bo e le motho yo o sa dumeleng.”

Mo lenyalong le le ntseng jalo, bodumedi e ka se ka ya nna selo se lo utlwanang mo go sone mme go na le moo e tla nna selo se segolo se lo ganetsanang ka sone. Go ka nna motlhofo gore o ikutlwe o patelesega gore o se ka wa dira dilo tse o di kgatlhegelang tsa semoya gore go nne le kagiso. Mme lefa go ntse jalo, go dira jalo go tla senya fela bomoya jwa gago. Mosadi mongwe yo mosha o anela jaana: “Ke ne ka tlwaelana thata le mosimane mongwe yo e neng e se Mosupi. Mme fa botsalano jwa rona bo ntse bo gola, ke ne ka lemoga gore ke a mo rata. Kamano ya me le Jehofa e ne ya nna e senyega ka bonya; mme kamano ya me le mosimane yono e ne ya nna sone selo se se botlhokwa thata mo go nna. Ke ne ke sa tlhole ke batla go ya dipokanong, ke sa batle go kopana le bakaulengwe ba Bakeresete, kana go ya go dira tiro ya go rera. Se ke neng ke se batla fela e ne e le go nna le ene. Ke ne ka nna Mosupi yo o tsidifetseng dingwaga tse pedi morago ga foo. Mme mo nakong eno yotlhe, ‘tsala’ ya me ga e ise e ko e nthate jaaka ke ne ke mo rata. Ke ne ke nna ke ntse ke akanya gore ka letsatsi lengwe o tla nthata, mme ga go ise go ko go nne jalo.”

Ee, go ratana le motho yo o sa tseyeng bodumedi le melao ya boitsholo e le botlhokwa jaaka wena go tla go tlisetsa bohutsana le kutlobotlhoko. Selo se se botlhale ke gore o se ka wa pataganela jokwe ka tsela e e sa lekalekaneng jalo. Mme o ka kgona jang fa e le gore o rata mongwe thata? Eno e tla nna kgang e go buiwang ka yone mo setlhogong sa rona se se latelang mo motseletseleng ono.

[Dintlha tse di kwa tlase]

[Setshwantsho mo go tsebe 27]

A motho yo o sa dumeleng a ka tlhoafalela dilo tsa semoya jaaka wena?