Ke Eng fa Kereke e Latlhegelwa ke Taolo Jaana?

“Mo-Stoic mongwe le mongwe e ne e le Mo-Stoic tota; mme Bakeresete ba Labokeresete bone ba kae?”

RALPH WALDO EMERSON, MOKWADI WA MOAMERIKA WA DITLHAMO LE MMOKI WA LEKGOLO LA BO19 LA DINGWAGA.

“KE Mokatoliki—mme ga ke yo o tlhagafetseng,” go tlhalosa jalo mmè mongwe yo mmotlana. “Tota ga ke tshwenyege thata ka bodumedi,” go oketsa jalo ngwana mongwe wa dingwaga tsa bolesome. Dikakgelo tseno tsa bone di tshwana le tsa thaka e tshesane ya Yuropa. Le mororo batsadi ba bone—kana borraabonemogolo le bommaabonemogolo—ba santse ba tsena dikereke, ga ba a fetisetsa tumelo ya bone mo kokomaneng e potlana.

Ke eng fa mekgwa ya bodumedi e e neng e ratiwa ke dikokomana tse dintsi tsa Yuropa jaanong e latlhilwe?

Poifo ga e Tlhole e le Teng

Batho ba Yuropa ba ne ba tlhotlhelediwa thata ke go boifa molelo wa dihele kana pakatori ka makgolokgolo a dingwaga. Dithero tse di bogale le ditshwantsho tse di takilweng tsa dikereke tse di supang dihele tse di sa timeng di ne di pateletsa batho ba ba tsenang kereke go akanya gore ba ka tila katlholo eo fela ka go tsena kereke ka tlhoafalo. Mo godimo ga moo, Catechism of the Catholic Church e bolela gore “Kereke e batla gore batho ba ba ikanyegang mo go yone ba ‘nne le seabe mo Tirelong ya Kobamelo ka Sontaga nngwe le nngwe le ka malatsi a meletlo.’”a Le kwa mafelong a selegae kgatelelo ya go nna le maemo e ne e le kgolo thata—mongwe le mongwe o ne a lebeletswe go tla kerekeng Sontaga nngwe le nngwe.

Lefa go ntse jalo, metlha e fetogile. Batho jaanong ba ikutlwa ba gololesegile go dira se ba se batlang. Ga ba tlhole ba boifa sepe. Ga go tlhole go buiwa ka dihele, e re ka bontsi jwa Bakatoliki ba Yuropa ba sa dumele gore di teng.

Totatota, “boleo” jwa go tlolwa ke Mmisa wa Sontaga ga bo tsewe bo le masisi. Tirso Vaquero, moruti wa Mokatoliki wa kwa Madrid, kwa Spain, o dumela jaana: “Fa Mokeresete [wa Mokatoliki] a sa tle Mmiseng ka Sontaga, re mo utlwela botlhoko tota gonne o fositswe ke tshono ya go bua le Modimo le bakaulengwe ba gagwe, e seng ka gonne a dirile boleo. Seo ga se botlhokwa.”

Ka jalo batho ga ba tlhole ba ineela ka ntlha ya go boifa. Go tweng ka taolo ya kereke le ya baeteledipele ba yone mo boitsholong—a ba ka kgona go thusa matsomane a bone gore a tswelele a ikanyega?

Bothata Jwa Bolaodi

Go nyelela ga poifo mo bodumeding go ile ga kopana le go senyega ga boemo jwa kereke mo boitsholong. “Re feditse makgolokgolo a dingwaga re na le . . . melao e mentsi ya boitsholo le batho ba le mmalwa ba ba tshelang ka melao ya boitsholo,” go ngongorega jalo rahisitori wa Motadiana, Giordano Bruno Guerri. Go tlhoka ketelelopele gono mo boitsholong go ne ga bonala thata ka dintwa tse pedi tsa lefatshe tse di neng tsa tlhakatlhakanya Labokeresete. Dikereke tsa kwa Yuropa di ne di se na nonofo ya go thibela badumedi gore ba se ka ba tsena mo dintweng tseo tsa go tsholola madi. Se se maswe le go feta, dikereke di ne tsa tsenelela thata mo dintweng—mo matlhakoreng oomabedi.

“Ntwa ya Lefatshe ya Ntlha, e e neng e le ntwa ya semorafe fa gare ga makoko a Bokeresete e ne ya simolola paka ya masetlapelo le ya matlhabisaditlhong mo Bokereseteng,” go akgela jalo Paul Johnson. “Ntwa ya Lefatshe ya Bobedi e ne ya senya boemo jwa tumelo ya Bokeresete thata go feta ya Ntlha. E ne ya senola gore dikereke tsa kwa Jeremane, tse Phetogo e Kgolo e simolotseng mo go tsone ga di na nonofo le gore Ofisi ya Mopapa e na le bogatlapa le bogagapa.”

Ditumalano tsa Vatican le puso ya Bonasi ya ga Hitler le puso ya Bokgokgontshi ya ga Mussolini wa Italy le ya ga Franco wa Spain le tsone di ne tsa senya taolo e kereke e neng e na le yone mo boitsholong. Kgabagare, go inyalanya ga bodumedi le dipolotiki ka tsela eo gore bo bone molemo go ile ga dira gore bo se ka jwa tlhola bo ikanngwa.

Kereke le Puso—Di a Kgaogana

Mo lekgolong leno la bo20 la dingwaga, dinaga tse dintsi tsa Yuropa kgabagare di ile tsa senya kgolagano e e neng e bofagantse Kereke le Puso. Tota e bile, ga go na naga epe e kgolo jaanong mo Yuropa eo e lebang Roma Katoliki jaaka bodumedi jwa yone jwa semolao.

Le mororo dikereke tse dikgolo di ka tswa di santse di newa madi ke puso, ga di tlhole di laola dipolotiki jaaka di ne di dira pele. Boemo jo bosha jono ga bo itumedise baruti botlhe. Mojesuite wa maemo a a kwa godimo wa kwa Spain, José María Díez-Alegría o dumela gore “baeteledipele ba kereke [ya Katoliki]—ba le bantsi thata ba bone ba akanya ba le peloephepa—gore ga ba kake ba kgona go dira ditiro tsa bone tsa boruti ba sa engwa nokeng ke batho ba ba nang le ‘thata.’”

Lefa go ntse jalo, “batho ba ba nang le ‘thata’” bano ga ba tlhole ba le teng. Spain, e puso ya yone e neng e le ya “setšhaba sa Bokatoliki” go fitlha ka 1975, ke bosupi jwa seno tota. Mo dingwageng tsa bosheng jaana, ditlhopha tsa baruti ba Spain di ile tsa nnela go lwa le puso eo ya Bososhialise gore e neye kereke madi. Bishopo wa kwa Teruel, kwa Spain, o ne a ngongorega mo bathong ba ba tsenang kereke ya gagwe a re o ikutlwa a “bogisiwa jaaka Mokatoliki” gonne puso ya Spain ga e neye kereke madi a a lekaneng.

Ka 1990, bobishopo ba kwa Spain ba ne ba itsise gore batho ba Spain ba ne ba na le “bothata jo bogolo jwa segakolodi le jwa go itse molemo le bosula.” Ke mang yo ba neng ba mo pega molato ka ‘bothata jwa go itse molemo le bosula’? Bobishopo ba ne ba bolela gore nngwe ya dilo tse dikgolo tse di bakang seno e ne e le “kgopolo e e sa tlhomamang e gantsi batsamaisi [ba puso ya Spain] ba e rotloetsang.” Go lebega bobishopo ba lebeletse gore puso e rotloetse dikgopolo tsa Sekatoliki mmogo le go ba naya madi.

A Baruti ba Dira Jaaka ba Rera?

Khumo e ntsintsi ya Kereke ya Katoliki ga e bolo go tlhabisa baruti ba batsenakereke ba bone ba nnang mo mafelong a a humanegileng ditlhong. Go ne go tlhabisa ditlhong thata ka nako ya fa Vatican Bank e ne e umakiwa mo go se makasine wa Time o neng wa se bitsa “matlhabisaditlhong a a maswe thata a tsa madi mo pakeng ya morago ga ntwa kwa Italy.” Ka 1987, bommakaseterata ba kwa Italy ba ne ba ntsha makwalo a go tshwara bishopomogolo le badiredibagolo ba babedi ba banka ya Vatican. Baruti bano ba ba neng ba le molato ba ne ba kgona go tila go tshwarwa ka ntlha ya seemo se se kgethegileng sa Vatican jaaka naga e e ikemetseng. Vatican Bank e ne ya ganelela mo go reng ga go na molato ope o o dirilweng mme e ne ya palelwa ke go tlosa mogopolo wa gore kereke ga e dire jaaka e rera.—Bapisa Mathaio 23:3.

Boitsholo jo bo maswe jwa tlhakanelodikobo jo metswedi ya dikgang e neng ya bua ka jone thata le jone bo dirile tshenyo e ntsi. Ka May 1992, bishopo mongwe wa kwa Ireland, yo o neng a itsege thata ka go gatelela ga gagwe go sa nyale, o ne a kopa batho ba kereke ya gagwe gore ba mo “itshwarele” le go mo “rapelela.” O ne a patelediwa go lesa tiro fa go sena go itsiwe gore o ne a na le ngwana wa mosimane wa dingwaga tse 17 le gore o ne a dirisitse madi a kereke go duelela thutego ya gagwe. Kgwedi pele ga foo, moruti mongwe wa Katoliki o ne a tlhaga mo thelebisheneng ya Jeremane a na le “tsala” ya gagwe le bana ba bone ba babedi. O ne a bolela gore o batla gore go “simololwe puisano” ka kgang ya ditsala tsa sephiri tse baruti ba bantsi ba nang le tsone.

Ruri matlhabisaditlhong ano ga a lebalwe. Mo bukeng ya gagwe ya Gli italiani sotto la Chiesa (Batadiana Kafa Tlase ga Taolo ya Kereke), mokwalahisitori e bong Guerri, o gatelela gore “Kereke e ile ya tlhabisa Batadiana ditlhong ka makgolokgolo a dingwaga.” O bolela gore seno se felela ka “go ilwa ga baruti ke batho ba bantsi, le e leng ke baikanyegi.” Bakatoliki ba ba galefisiwang ke seno ba ka nna ba ikutlwa ba batla go botsa baruti dipotso tse di tshwanang le tse moaposetoloi Paulo a neng a di botsa Baroma fa a ne a re: “Ka sekai, o rera kgatlhanong le go utswa, mme a o tlhomamisa gore wena o a ikanyega? O kgala boaka, a o tlhomamisa gore wena o itshekile?”—Baroma 2:21, 22, Phillips.

Go sa Dumalane go Gogolo fa Gare ga Baruti le Batsenakereke

Bothata jo bo sa bonaleng thata gongwe e bile e le jone jo bo e koafatsang thata ke go sa dumalane go go kgaoganyang baruti le batsenakereke. Makwalo a seruti a a tswang kwa go bobishopo a lebega a galefisa batsenakereke go na le go ba ruta sengwe. Mo patlisisong nngwe kwa Spain, ke diperesente tse 28 fela tsa ba ba neng ba botsolodiwa ba ba neng ba “dumalana le mafoko a bobishopo.” Palo e e lekanang le eo “e ne e sa tshwenyege ka gope,” e bile diperesente tse 18 tsa bone di ne tsa bolela gore ga di “tlhaloganye gore [bobishopo] ba bua ka eng.” Bishopomogolo Ubeda wa kwa Majorca, kwa Spain o ne a dumela jaana: “Rona bobishopo re tshwanetse go dumela molato wa rona mo tiragalong eno ya go latlhiwa ga Bokeresete—goo tota go diragalang.”

Go tlhokega ga molaetsa o o phepafetseng wa Dikwalo le gone go dira gore batsenakereke ba ikgogone. Go ya ka Catholic Herald, “baruti ba bantsi [kwa Fora] ba ile ba tsena mo dipolotiking e le gore ba lejwe ba le ‘botlhokwa,’” le fa gone bontsi jwa batsenakereke bo ne bo ka rata gore bo tlhome mogopolo mo dilong tsa semoya. Moruti wa Motadiana e bile e le moithutaloago, Silvano Burgalassi o dumela jaana: “Gongwe [basha] ba ka tswa ba latlhile Modimo ka ntlha ya sekao sa rona se se maswe. Re ba file fela ‘matlhare a a swabileng’ a go tlhakatlhakanya bodumedi le kgwebo, bogagapa le boitshekologo.” Ga go gakgamatse go bo baruti ba lebelwa kwa tlase mo loagong. “Ke Mokatoliki mme ga ke dumele mo baruting,” ke polelo e e utlwiwang thata e e buiwang ke Bakatoliki ba kwa Spain.

Bakatoliki bangwe ba fitlhela go le bokete go bolelela baruti diphiri tsa bone, e bile ba bangwe ba belaela dithuto tsa kereke thata—segolobogolo tse ba di lebang di sa utlwale kana tse di senang mosola.

Dithuto Tsa Motheo Tse di sa Kgoneng go Tlhaloganngwa

Sekai se se papametseng thata ke sa thuto ya semolao ya Katoliki ya dihele. Catechism of the Catholic Church e bolela jaana: “Dithuto tsa Kereke di gatelela gore go na le dihele le gore ke tsa bosakhutleng.” Lefa go ntse jalo, dipatlisiso tsa bosheng di supa gore ke kwatara fela ya Bakatoliki ba Bafora le nngwetharong ya batho ba Spain ba ba dumelang gore dihele di teng.

Ka tsela e e tshwanang, fa go tla mo dikgannyeng tsa boitsholo, batho ba Yuropa ke “Bakeresete ba ba itirelang se ba se ratang.” Mimmi, mosetsana mongwe wa dingwaga tsa bolesome wa Molutere wa kwa Sweden, o dumela gore dikgang tsa boitsholo, jaaka go tshola bana o sa nyalwa, ke “dilo tse wena ka bowena o ka itirelang tshwetso mo go tsone.” Bontsi jwa Bakatoliki ba Bafora ba tla dumalana le ene. Diperesente tse 80 tsa bone di bolela gore fa di tshwanela go dira ditshwetso tse di bokete mo botshelong, di tla latela kafa digakolodi tsa bone di ba kaelang ka teng mme e seng se ba se kaelwang ke kereke.

Mo nakong e e fetileng kereke e ne e nonofile mo e neng e kgona go didimatsa lentswe lepe fela le le neng le bua kgatlhanong le yone. Vatican yone ga e bone sepe fela se se fetogileng. Catechism e bolela e nonofile gore “dilo tsotlhe tse di setseng di boletswe ka mokgwa wa go ranola Dikwalo di tshwanetse go atlholwa ke Kereke.” Lefa go ntse jalo, tsela eo ya go dira dilo ka go gatelela batho ga e engwe nokeng ke ope. “Kgang ya taolo e ntse e tsweletse,” go ngongorega jalo Antonio Elorza, porofesa wa kwa Spain wa dithuto tsa sepolotiki. “Kereke e rata go aga lorako lo e itshireletsang ka lone, e itshekisa ngwao ya yone ka dilo tse di dirilweng mo hisitoring.” Tlhotlheletso ya kereke le taolo ya yone e ntse e ngotlega kafa ntle ga “lorako lo e itshireletsang” ka lone lono.

Kwantle ga go wela tlase ga semoya, mathata a loago ke one a oketsang go itlhokomolosiwa ga bodumedi. Barekisi ba dira gore go nne le ditshono tse dintsi tsa boitlosobodutu le boitapoloso—e bile batho ba bantsi ba Yuropa ba a di eletsa e bile ba a di kgona. Fa di bapisiwa, go ya kerekeng ke selo se se lapisang pelo tota se o ka se dirang ka Sontaga mo mosong. Kwantle ga moo, dithero tsa kereke ga se gantsi di tlamelang batho semoyeng.

Go lebega bodumedi jwa motheo bo se kitla bo kgona go laola matsomane a jone a kwa Yuropa. A maatla a bodumedi bo neng bo na nao a fedile—a bo tlile go nyelela jaaka di-dinosaur?

[Ntlha e e kwa tlase]

[Mafoko a a mo go tsebe 6]

Ngwao ya go rata boiketlo e laola dinaga tse di botlhokwa tsa Labokeresete

[Setshwantsho mo go tsebe 7]

Fa motho a tshwanetse go tlhopha fa gare ga go reetsa thero le go iketla a arametse letsatsi kwa lewatleng, batho ba bantsi ba Yuropa ba ikela kwa lewatleng