Kgopolo E e Mo Baebeleng

Di-UFO—A ke Barongwa ba ba Tswang Modimong?

FA LEKGOLO leno la bo20 la dingwaga le ntse le tantabela kwa bokhutlong mme maemo a lefatshe a senyegela pele, batho ba le bantsi ba simolola go dumela dilo dingwe tse di fofang tse di sa itsiweng (UFO [Unidentified Flying Objects]) le bapagami ba tsone ba batswagosele. A di-UFO ke tlhamane fela, kgang fela e e latlhang batho, kinane fela e e anamisiwang ke batho ba ba itumelelang go tshega tsela e setšhaba se tsietsegang motlhofo ka yone?

Batho ba ba reng ba bone di-UFO kana bapagami ba tsone ba batswagosele ba akaretsa batho ba go bonalang ba itekanetse sentle, batho ba ba ikanngwang; tota e bile, batho ba ba dumelang mo baeting bano ba ba tswang dipolaneteng tse dingwe ba akaretsa le boporofesa ba ba rutegileng thata le baitsesaense. Batho bano ba dumela ba sa belaele gore batswagosele bano ba etse batho tlhoko e bile ka dinako tse dingwe ba buisana le bone. Go na le ditlhopha tse go tweng ke tsa go emana nokeng tsa batswagosele tse di thusang batho ba ba reng ba kile ba kopana le baeti ba ba tswang lefaufaung.a

Thulaganyo ya go Falotsa ya Batswagosele

Mo kgatisong ya Aliens Among Us, Ruth Montgomery o tsamaya a botsolotsa batho ba palo ya bone e ntseng e oketsega ba ba dumelang ba sa belaele gore ke baeti ba batswagosele ba ba nnang mo mebeleng ya batho. Bangwe ba batho bano ba ba reng ke batswagosele ba ba apereng mebele ya batho ba bolelela pele gore ka ngwaga wa 2000 go tla nna le “tiragalo e e boitshegang e e amang lobopo lotlhe e ditlhopha tsa baengele le balaodi ba teng ba ntseng ba e ipaakanyetsa.” Batho bangwe ba dumela gore batswagosele bangwe ba dirisa di-UFO go phutha le go babalela mefuta ya dimela le diphologolo kana gore di-UFO di tla dirisiwa go nna disutlhalefaufau tse di namolang tse di tla tshabisetsang dimilione tsa batho go sele jaaka fa lefatshe le tla bo le ribegediwa. Morago ga tshenyego eo e kgolo, batho ba tla busediwa gape mo lefatsheng fa go tla bo go simologa “Motlha o Mosha kana Thulaganyo e Ntšha” ya kitso ya dilo tsa semoya. Lekawana lengwe la kwa Colorado, U.S.A., yo e leng leloko la setlhopha se se ipitsang “Alien Youth,” o ne a bolelela Tsogang! jaana a tlhoafetse tota: “Nna le ditsala tsa me re letetse borraaronamogolo ba batswagosele go tla go re tlhatlosa.”

Ba sekae ba batho bano ba ba bolelang gore ke batswagosele ba re ba kaelwa ke Modimo mme ba bangwe ba re ba bua le ene ka kgololesego go kopa kgakololo e ba ka thusang batho ka yone. A Modimo o dirisa baeti ba ba tswang dipolaneteng tse dingwe go namola batho mo masetlapelong a a tlang?

Ditsela Tsa Modimo Tsa go Buisana le Batho

Mo tshimologong ya hisitori ya batho, Modimo o ne a tle a buisane le batho. Pego ya Baebele e tlhalosa ditsela tse Modimo a neng a buisana ka tsone le Atame, Efa, Noa, Aberahame le ba bangwe.b (Genesise 3:8-10; 6:13; 15:1) Modimo o ne a dirisa ditoro, mantswe le diponatshegelo go itsise batho ka thato ya gagwe le go kwala Baebele. Lefa go ntse jalo, fa Baebele e sena go wediwa, a go ne go santse go tlhokega gore a buisane le batho ka tlhamalalo go tswa legodimong? Nnyaa, ka gonne Baebele e bolela gore Dikwalo tse di Boitshepo di dira gore “motho wa Modimo . . . a nne boitekanelo, a iketleeletse ruri tiro nngwe le nngwe e e molemo.” (2 Timotheo 3:17) Go ya ka Baebele, kaelo e e malebana le motlha ono wa mathata e tswa mo Lefokong le le kwadilweng la Modimo. Lefa go ntse jalo, a re na le lebaka la go dumela gore Modimo o tla buisana le rona kana a re neela ditaelo ka tlhamalalo a dirisa mmueledi mongwe wa motswagosele? Ga go a nna jalo ka gonne moaposetoloi Paulo o ile a bolela jaana: “Le fa e ka bo e le rona, kgotsa e le moengele yo o tswang legodimong, fa a ka lo rerela mafoko a a molemo a sele, kwa ntle ga a re a lo reretseng, a a hutsege.”—Bagalatia 1:8.

Lefa gone dilo tse di bolelwang ke batho ba go tweng ke batswagosele di bonala di dumalana le boporofeti jwa Baebele jwa gore lefatshe le tloga le welwa ke phetogo e kgolo ya masetlapelo, di buelela mekgwa ya go namola e e ikaegileng ka dilo tse di bopilweng. Baebele ga e re batho ba tshabele kwa sesutlhalefaufaung sengwe kana kwa lefelong lengwe le go tweng ba tla babalelwa kwa go lone. Go na le moo, e re bolelela gore re senke pabalesego ka boineelo jwa go tsalana le Modimo, e leng boineelo jo bo tshwantshediwang ka go kolobediwa mo metsing. (1 Petere 3:21; bapisa Pesalema 91:7; Mathaio 28:19, 20; Johane 17:3.) E bile Jesu o ne a re “yo o itshokelang bokhutlong, ene yoo o tlaa bolokwa.”—Mathaio 24:13.

A dikwalo tseno ga di gatelele gore re ka falola ka go nna le botsalano le Modimo e seng ka go nna le botshabelo bongwe kana lefelo lengwe la mmatota? Ka gone, go na le gore dipolelo tse di kaga ‘ditshedi tse e seng batho’ di thuse batho go bona phalolo, di dira gore ba tlhokomologe se tota Modimo a batlang ba se dira gore ba bone pabalesego ya bosakhutleng.

Ke mang yo o ka faposang batho go tswa mo tseleng e Modimo a tlileng go ba namola ka yone mme gape a ipolela gore ke moemedi wa Modimo? Mo bukeng ya gagwe ya Report on Communion, Ed Conroy o bolela gore “bayufoloji [batho ba ba ithutang ka di-UFO] ba ba tlhoafetseng ba ba katiseditsweng saense ya thutotlhaloganyo le ya loago” gape ba dira dipatlisiso ka “‘batho ba ba etelang batho ba robetse,’ dipoko, ledimo, dilo tsa sedimo, diponatshegelo tsa bodumedi le dilo tse go tsewang gore ke badimona.” Bontsi jwa bayufoloji le batho ba ba reng ke batswagosele ba ba mo sebopegong sa motho, ba bolela gore tota ga go tlhokege gore go dirisiwe disutlhalefaufafu go tsaya mesepele. Ba re batho bano ba ka kgona go tsaya mesepele ba sa bonale le go ikapesa mebele ya batho gongwe le gongwe mo lefatsheng ba sa dirise disutlhalefaufau.

Baebele e re tlhagisa gore Satane le badimona ba gagwe ba ikaeletse go timetsa batho. Ba sola seemo sa batho sa go tlalelwa le go tlhoka tsholofelo molemo ka go ba solofetsa tharabololo e e kgatlhang mme e le ya maaka. (2 Bakorinthe 11:14) Ke sone se Baebele e tlhagisang jaana: “Mo metlheng ya morago bangwe, ba tlaa tenega mo tumelong, ba tlhokomela mewa e e timetseng, le dithuto tsa badimo.”—1 Timotheo 4:1.

Le rona gompieno, re tshwanetse go gana go dumela se go tweng ke baeti le se se bonalang e le kaelo e e molemo ya bone, go sa kgathalasege sebopego se e tlang ka sone. Batho ba ba latelang kgakololo ya se go tweng ke “batswagosele” go na le go latela ya Lefoko la Modimo ruri ba tla timela—phoso e kgolo tota mo metlheng eno e e masisi.

[Dintlha tse di kwa tlase]