Lebaka La go Bo Mefuta ya Ditshedi E le Mo Kotsing ya go Nyelela

MEFUTA mengwe ya ditshedi e nyelela ka mabaka a a farologaneng. A o ko o akanyetse mabaka ano a mararo a magolo. Batho ba ikarabelela mo go a le mabedi a one e se ka tlhamalalo mme le lengwe lone ke ka tlhamalalo.

Go Senya Mafelo a Tsone

Go senngwa ga mafelo a di nnang mo go one ke gone go dirang gore mefuta mengwe ya ditshedi e fokotsege. The Atlas of Endangered Species e tlhalosa seno e le “matshosetsi a a kotsi thata” mme gape ke “a a bokete thata go ka thibelwa.” Palo e e oketsegang thata ya baagi e dira gore batho ba sutelele thata kwa nageng e pele e neng e le legae la diphologolo. Sekai se segolo sa seno ke dikgwa tsa pula tsa lefatshe.

‘Kgang ya gore dikgwa tsa pula di tlile go nyelela mo dingwageng tse 40,’ ke phopholetso e e tshosang e e dirang gore go elwe tlhoko thata se batho ba bantsi ba se lebang e le go latlhegelwa ke dikuno tse di botlhokwa. E bile tota, mo e ka nnang kwatara ya melemo yotlhe e e itsiweng kwa dinageng tsa Bophirima e tswa mo dimeleng tsa dikgwa tsa pula tsa boboatsatsi. Le mororo dikgwa tsa pula di dira diperesente tse 7 fela tsa naga ya polanete eno, ke legae la bonèbotlhanong jwa dimela tse di tlhogang mo lefatsheng lotlhe.

Go rema dikota le mekgwa e e ntseng e fetolwa ya temothuo go senya boswa jo bogolo jwa dikgwa tsa pula tsa Afrika Bophirima. Go rengwa ga dikgwa kwa karolong e kgolo ya kontinente kwa India go fetotse le maemo a bosa tota, go dira gore pula e e nang kwa mafelong mangwe e fokotsege e bile go baka merwalela kwa go a mangwe.

Fa batho ba ntse ba rema ditlhare gore ba bone mafelo a temothuto, go swa dimela, diphologolo, dinonyane, digagabi le ditshenekegi. Porofesa wa Harvard, Edward Wilson, o fopholetsa gore dikgwa di fokotsega ka peresente e le 1 ka ngwaga mme seno se dira gore diketekete tsa mefuta ya ditshedi di nne mo kotsing ya go nyelela fa nako e ntse e tsamaya. Go boifiwa gore mefuta e mentsi ya ditshedi e tlile go nyelela le pele e rewa leina la saense.

Boemo bo a tshwana le kwa mafelong a a moraga a lefatshe, ao e leng mangwe a mafelo a a mo kotsing. Batho ba monya metsi ano gore ba kgone go aga matlo kana balemi ba fetola mafelo ano go nna a temo. Mo dingwageng tse 100 tse di fetileng bontsi jwa diperesente tse 90 tsa mafelo a a neng a tlhoga tlhaga fela a Yuropa a ile a dirisediwa temothuo. Go latlhegelwa ke mafulo kwa Boritane mo dingwageng tse 20 tse di fetileng go ile ga dira gore palo ya metsutsuropu e fokotsege ka diperesente di le 64.

Le mororo makasine wa Time o bitsa setlhaketlhake sa Madagascar “araka ya ga Noa ya jioloji,” mefutafuta ya ditshedi tsa teng e mo kotsing. Fa baagi ba ntse ba oketsega le fa madi a ba a kolotang dinaga tse dingwe a ntse a oketsega, ba patelesega gore ba fetole dikgwa tsa teng masimo a reisi. Go senngwa ga lefelo la bonno jwa dikgatla tse dikhunou tse di ratang ditlhare tsa bamboo go ile ga dira gore borarobonèng jwa tsone bo nyelele mo dingwageng tse 20 tse di fetileng, mo e leng gore go setse fela diphologolo tseno di le 400.

Tsela e motho a ileng a fetola tsela e a dirisang naga thata ka yone ruri e dira gore a tlhokomologe ditshedi tsa lefelo le a nnang mo go lone. Sekai se sengwe se se tshwanetseng go akanyediwa ke sa Ba-Polynesia ba ba neng ba goroga kwa Hawaii dingwaga tse 1600 tse di fetileng. Go ne ga nyelela mefuta e le 35 ya ditshedi ka ntlha ya ditiro tsa bone.

Baagi ba ntlhantlha ba ba neng ba ya kwa Australia le New Zealand ba ne ba tla ka dikatse tse di nnang mo gae, tseo dingwe tsa tsone di neng tsa fetoga diphage. Go ya ka makasine wa New Scientist, diphage tseno jaanong di ja mefuta e le 64 ya diamusi tse di fitlhetsweng kwa Australia. Tsone mmogo le diphokoje tse di tserweng kwa Yuropa, di tlhasela mefuta e e setseng ya ditshedi tse di mo kotsing ya go nyelela.

Tlhaselo e e Tlhamaletseng

Go tsoma ga se selo se sesha. Pego ya Baebele ya Genesise e umaka Nimerote wa motsuolodi, motsomi yo o neng a tshela dingwaga tse 4000 tse di fetileng. Le mororo go sa umakiwe gore o ne a nyeletsa mofuta mongwe wa ditshedi, gone mme e ne e le seganka sa motsomi.—Genesise 10:9.

Fa makgolo a dingwaga a ntse a feta, batsomi ba ile ba gaila ditau kwa Gerika le Mesopotamia, dikubu kwa Nubia, ditlou kwa Afrika Bokone, dibera le dipepe kwa Boritane le dinare kwa Yuropa Botlhaba. “Ka bo1870 le bo1880, batsomi ba ne ba bolaya ditlou di le kwatara ya milione kwa Afrika Botlhaba fela,” go bega jalo Radio Times, makasine o o kwalang dikgang tsa BBC. “Ka lobaka lwa dingwaga di le masomeamatlhano, Afrika e ne ya tlhaselwa ke batho ba ba itsegeng thata, ba ba humileng le ba maemo a a kwa godimo, ba bolaya ditlou, ditshukudu, dithutlwa, losika lwa dikatse tse dikgolo le sepe fela se ba neng ba ka kgona go se bolaya. . . . Boitshwaro jo gompieno bo tshosang bo ne bo amogelwa fela ka nako eo.”

Akanya gape ka boemo jwa nkwe e ntle. Fa go ne go balwa dipalo ka bo1980 go ile ga fitlhelwa gore maiteko a go di sireletsa le go di boloka a ne a atlega. “Lefa go ntse jalo, dilo di ne di se motlhofo jaaka di ne di lebega,” go bolela jalo 1995 Britannica Book of the Year. “Fa go ne go balwa gape ka kelotlhoko, go ne ga fitlhelwa gore dipalo tse di neng di kile tsa tsewa di ne di okeditswe ke badiredi ba bagolo ba ba neng ba ja le babolai ba tsone kana ba ba neng ba batla fela go kgatlha baokamedi ba bone. . . . Kgwebo e e seng kafa molaong ya dirwe tsa dinkwe e ne ya oketsega thata ka nako ya fa go tlhokega ga tsone go ne go dira gore ditlhwatlhwa tsa tsone di tlhatlogele kwa godimo.” Ka jalo, ka 1995, tlhwatlhwa ya nkwe ya Siberia e ne e simolola ka R36 300 e fitlha ka R92 600—nnyaa, e seng ka ntlha ya letlalo la yone fela le le tsewang le le tlhwatlhwakgolo mme gape le ka ntlha ya marapo a yone, matlho, ditetswana, meno, dirwe tsa kafa teng, dirwe tsa bong, tsotlhe di tseelwa kwa godimo mo kalafing ya ngwao ya kwa Botlhaba.

Time e bolela gore kgwebo ya dinaka tsa ditlou, dinaka tsa ditshukudu, matlalo a dinkwe le dirwe tse dingwe tsa diphologolo jaanong ke kgwebo e e seng kafa molaong e e dirang dimilionemilione tsa didolara, e gaisiwa fela ke ya diokobatsi. Mme seno ga se dirwe fela ka diamusi tse dikgolo. Ka 1994 go ne ga dirisiwa dipitse tsa lewatle di le dimilione di le 20 mo kalafing ya ngwao ya Se-China, mo go neng ga dira gore palo ya tse di neng di tshwarwa e wele kwa tlase ka diperesente di le 60 mo dingwageng tse pedi mo mafelong mangwe a Borwabotlhaba jwa Asia.

Ga go bokete go itse gore molato ke wa ga mang fa mofuta mongwe wa setshedi o tsomiwa gore o bo o nyelele. Go tweng he, ka bao ba amogelang dilo tseno? Papalagae nngwe e e mo kotsing ya go nyelela, e e bidiwang golden conure, fa e rekisiwa mo kgwebong e e sa letliweng ke molao kwa Brazil e ja R1900. Mme fa e rekisiwa kwa dinageng di sele go bonwa madi a a fetang ao a menagane gararo le sephatlo.

Dintwa le tshenyo e di e bakang, batshabi ba bantsi ba ba ntseng ba oketsega, mmogo le go tsholwa ga bana ba bantsi, kgotlelo e e oketsegang le e leng bojanala, di tsenya ditshedi tse di nyelelang mo kotsing. Bajanala ba ba tsamayang ka mekoro ya dienjene ba gobatsa didolofine tse ba thologang ka bontsi go tla go di bona, mme modumo o mekoro eno e o dirang kafa tlase ga metsi o tlhakatlhakanya tsela e e bosisi thata e didolofine di dupelelang ka yone gore ga go na dikgoreletsi dipe mo tseleng ya tsone.

Morago ga go bua ka dilo tse dintsi tseno tsa tlhakatlhakano e e dirilweng ke motho, o ka nna wa ipotsa jaana, ‘Tota batho ba ba sireletsang le go boloka ditshedi le naga ba dira eng go boloka mefuta ya ditshedi e e mo kotsing ya go nyelela mme ba atlega go le kana kang?’

[Setshwantsho mo go tsebe 22]

Fa batho ba ntse ba rema ditlhare, go swa dimela, diphologolo, dinonyane, digagabi le ditshenekegi