Lefatshe Le le Se Nang Bokebekwa—Jang?
GO LOWA le bokebekwa jwa digongwana mo lefatsheng lotlhe. U.S.News & World Report e bolela jaana: “Go ile ga nna le kgatelopele e kgolo mo go lweng le Bamafia mo lobakeng lo lokhutshwane fela, segolobogolo ka ntlha ya molao o le mongwe fela wa Racketeer Influenced and Corrupt Organizations Act kana RICO.” O letla gore digongwana tsa dikebekwa di sekisiwe go ya ka mofuta wa ditiro tsa kgwebo e e sa siamang e di e dirang e seng fela go ya ka ditiro dingwe tse di rileng. Molao ono le tshedimosetso e e bonwang ka go thaisa difouno tsa maloko a digopa tseno le e e tswang mo malokong a teng a a kopang go newa katlholo e e motlhoswana ka go senola diphiri tsa teng, di nnile le seabe mo katlegong e e nnileng gone kgatlhanong le Bamafia kwa United States.
Le kwa Italy, balaodi ba tsentse digopa tsa dinokwane kgoro tsotlhe. Kwa mafelong a a jaaka Sicily, Sardinia le Calabria, koo digongwana tsa dinokwane di leng dintsi teng, ditlhopha tsa masole di tsamaya di disitse mafelo a botlhe le mafelo a a botlhokwa gore a se ka a tlhaselwa ke dikebekwa. Puso e tsaya seno e le selo se se tshwanang le ntwa ya selegae. Ka ntlha ya go bo moeteledipele yo o itsegeng thata wa digongwana tsa bokebekwa a latlhetswe mo kgolegelong e bile motho yo pele e kileng ya bo e le tonakgolo yo o kaiwang a ne a dirisana le Bamafia a latofadiwa, jaanong dilo di a tokafala kwa Italy.
Kwa Japane, puso e ne ya kgoreletsa bo-yakuza thata fa e ne e tlhoma Anti-Organized Crime Law ka March 1, 1992. Go ya ka molao ono, fa setlhopha sengwe se ka lemotshega gore ke sa digongwana tsa bonokwane, se tla thibelwa go dira ditiro tse 11 tsa tirisodikgoka, go akaretsa le go batla madi a pipamolomo, go inaakanya le kgwebo e e sokameng ya ditiro tsa tshireletso le go nna le seabe mo go rarabololeng dikgotlhang ka go duelwa madi. Puso e gagamaditse molao ono e le gore e tle e thibele ditiro tsotlhe tse digongwana tseno di bonang madi ka tsone. Molao ono o phutlhamisa digongwana tsa bonokwane thata. Ditlhopha dingwe tsa teng di thubegile mme moeteledipele mongwe wa dikebekwa o ipolaile—gongwe e le ka ntlha ya melao eno e e gagamaditsweng.
Ee ruri, puso le ditheo tse di gagamatsang molao di leka ka bojotlhe go lwantsha digongwana tsa bokebekwa. Go ntse go le jalo, fa Mainichi Daily News e bega ka khuduthamaga e e neng ya tshwarwa ka 1994 ke baatlhodi le mapodise go tswa mo lefatsheng lotlhe, e ne ya re: “Bokebekwa jwa digongwana bo oketsega thata e bile beng ba jone ba huma thata mo e batlang e nna mo mafelong otlhe mo lefatsheng, ba ikgobokanyetsa lotseno lwa madi a a ka tshwarang didolara di le bilione [diranta di le dibilione di le 4,67] ka ngwaga.” Ka maswabi, maiteko a motho a a dirileng go leka go nyeletsa digongwana tsa dikebekwa mo lefatsheng a a tlhaela. Lengwe la mabaka a seno ke ka gonne tshiamiso e sa dirwe ka bonako e bile ga ya tlhomama. Batho ba le bantsi ba bona fa melao e sekametse mo go thuseng dikebekwa e seng batho ba ba bo direlwang. Baebele e ne ya bolela jaana dingwaga tse 3000 tse di fetileng: “Ereka katlholo ka ga tiro e e bosula e sa dirafadiwe ka bonako, ke gone ka moo pelo ya bana ba batho e tlhomameng mo go bone ka mokgwa o o tletseng, go tla ba dira bosula.”—Moreri 8:11.
Go Ikgaoganya le Digongwana Tsa Bokebekwa
Mo godimo ga go leka go thuba digongwana tsa bokebekwa go tswa kafa ntle, dipuso di ile tsa leka go thusa batho ba ba mo teng ga tsone go ikgaoganya le tsone. Go dira jalo ga go motlhofo. Go ya ka polelo nngwe ya bogologolo, “tsela e le nngwe fela ya go ikgaoganya le Bamafia ke go ya lebitleng.” Fa sekebekwa se batla go tlogela segongwana sa bo-yakuza, se tshwanetse go duela madi a mantsi thata kana se kgaolwe monwana wa sone kana karolo ya one. Selo se sengwe gape se se oketsang poifo ya motho fa a ikgaoganya le ditiro tseo tsa sephiri, ke gore o lebane le kgwetlho ya go tshela botshelo jo bo tlhamaletseng. Gantsi o a ganwa fa a batla tiro. Lefa go ntse jalo, kwa dinageng dingwe, go na le dithulaganyo tsa go founela mapodise mo sephiring go thusa batho ba ba batlang go ikgaoganya le ditiro tsa bokebekwa mme ba na le mathata a go bona mebereko e e siameng.
Gore motho a kgone go fenya mathata a a ka a bakelwang ke segongwana sa gagwe sa bokebekwa le go tlhoiwa ke batho, o tshwanetse go ititaya sehuba go tshela botshelo jo bo tlhamaletseng. Ke eng se se ka mo tlhotlheletsang go dira jalo? E ka nna lorato lo a ratang lelapa la gagwe ka lone, go batla go tshela botshelo jo bo ritibetseng kana keletso ya go batla go dira se se siameng. Lefa go ntse jalo, selo se se maatla thata se se ka tlhotlheletsang motho se lemotshega sentle mo kgannyeng ya ga Yasuo Kataoka mo setlhogong se se latelang.
Yasuo Kataoka ke mongwe wa makgolokgolo a batho ba ba ileng ba fetola matshelo a bone gotlhelele. Mekgwa ya sephologolo e ba neng ba na le yone pele ba ile ba e fetola mme ba apara motho yo mosha “yo ka fa Modimong o bopilweng mo tshiamong, le mo boitshepong jwa boammaaruri.” (Baefeso 4:24) Gone jaanong, batho ba ba neng ba tshwana le diphiri ba tshela ka kagiso le batho ba ba bonolo jaaka dikwana, tota e bile ba thusa le batho ba bangwe!—Isaia 11:6.
Go Tlogela Moya wa Lefatshe
Jaaka go umakilwe mo setlhogong se se fetileng, lefatshe lotlhe le laolwa ke mmusi a le mongwe yo o sa bonaleng e bong Satane Diabolo, e seng digongwana tsa bokebekwa di le nosi fela. Tota e bile batho ga ba lemoge gore Satane o dirile gore lefatshe le mo thuse go dira ditiro tsa gagwe tsa bokebekwa. Fela jaaka fa digongwana tsa bokebekwa di thusa batho go huma le go dira gore ba ikutlwe e kete ke lelapa, o na le seabe se segolo mo go itireng mong yo o molemo yo o tlamelang batho ka dikhumo, maitlhapediso le go ikutlwa ba le seoposengwe. Lefa o sa lemoge seo, o ka tswa o tsieditswe ke maano a gagwe a a boikepo. (Baroma 1:28-32) Baebele e re bolelela gore “yo o ratang go nna tsala ya lefatshe, o itira mmaba wa Modimo.” (Jakobe 4:4) Go itsalanya le lefatshe leno le le tlhotlhelediwang ke Satane go kotsi. Mmopi wa lobopo o na le matsholo a baengele a a laolwang ke Jesu Keresete a a ipaakanyeditseng go tlhasela Satane le badimona ba gagwe gore ba se ka ba tlhola ba tlhotlheletsa lefatshe ka tsela e e bosula.—Tshenolo 11:18; 16:14, 16; 20:1-3.
Mme he, o ka dira jang gore o se ka wa tlhola o tlhotlhelediwa ke lefatshe la ga Satane? E seng ka go nna motshelanosi, go na le moo, ka go tlogela mekgwa le tsela ya go akanya e e tletseng mo lefatsheng gompieno. Gore o kgone go dira jalo, o tshwanetse go lwa le maano a a tshosang a ga Satane le go gana dilo tse a tlhotlheletsang batho ka tsone tse a tshwarang batho ka tsone. (Baefeso 6:11, 12) Seno se ka tlhoka gore o itime dilo dingwe, lefa go ntse jalo o ka kgona go di tlogela fela jaaka batho ba bangwe ba dirile fa e le gore o ititeile sehuba le fa o batla gore Basupi ba ga Jehofa ba go thuse.
Go tla diragalang fa Modimo a sena go baakanya lefatshe leno le le tletseng ka bokebekwa? Baebele ya re: “Losika lwa baikepi lo tlaa kgaolwa.” E tswelela e re: “Basiami ba tlaa rua lefatshe, ba tlaa aga mo go lone ka bosakhutleng.” (Pesalema 37:28, 29) Ka nako eo, go tla bo go sa tlhole go na le lebaka la go tshaba batho ba ba kileng ba bo ba na le mekgwa ya bobatana, ka gonne ba tla bo ba fetotswe ke “kitso ya go itse Jehofa,” e e tla bong e tletse ka lefatshe.—Isaia 11:9; Esekiele 34:28.
Gompieno phetogo e e ntseng jalo e setse e diragetse jaaka fa hisitori e e latelang ya botshelo jwa yo e kileng ya bo e le leloko la yakuza kwa Japane e bontsha.
[Setshwantsho mo go tsebe 10]
Mo lefatsheng le lesha la Modimo batho botlhe ba tla itumelela tiro ya diatla tsa bone