Go o Leba go Tswa Kwa Boalong Jwa Bo29

FA O tswa mo lifiting o tsena mo boalong jwa bo29 jwa kago ya lekgotla la Ditšhaba Tse di Kopaneng kwa New York City, letshwao le lennye le le bududu le go supetsa tsela e e yang kwa Ofising ya Mokomisinara yo Mogolo wa Ditshwanelo Tsa Botho ([OHCHR] Office of the High Commissioner for Human Rights). Ofisi eno ya bogokaganyi e emela ntlokgolo ya OHCHR kwa Geneva kwa Switzerland—e bong lefelo la konokono la lekgotla la Ditšhaba Tse di Kopaneng le le malebana le ditshwanelo tsa botho. Le fa Mary Robinson, Mokomisinara yo Mogolo wa Ditshwanelo Tsa Botho e le ene mookamedi wa OHCHR kwa Geneva, Elsa Stamatopoulou wa Mogerika o okametse ofisi e e kwa New York. E ne ya re go sa le gale monongwaga, Mohumagadi Stamatopoulou a amogela mongwe wa bakwadi ba Tsogang! ka bopelontle mme a tlotla le ene ka ditiro tse di dirilweng ke ditshwanelo tsa botho mo masomeng a le matlhano a a fetileng a dingwaga. Dingwe tsa dilo tse di tlotlilweng mo potsolotsong eno ke tseno.

P. O akanya gore go dirilwe kgatelopele efe mo go rotloetseng ditshwanelo tsa botho?

K. Ke tla go neela dikai di le tharo tse di bontshang kgatelopele e e dirilweng: Sa ntlha, dingwaga di le 50 tse di fetileng kgopolo ya ditshwanelo tsa botho e ne e se teng mo ajentareng ya boditšhabatšhaba; gompieno e nna e le teng ka metlha yotlhe e bile e a latelwa. Dipuso tse di neng di ise di utlwe sepe ka ditshwanelo tsa botho mo masomeng a a fetileng a dingwaga jaanong di setse di bua ka tsone. Sa bobedi, gone jaanong re na le melao e e amang ditšhaba tsotlhe, kgotsa buka ya melao, e e dirilweng ka ditumalano di le mmalwa mme di kwaletswe dipuso go di bolelela kafa di tshwanetseng go tshwara baagi ba tsone ka teng. [Bona lebokoso la “Molaotlhomo wa Boditšhabatšhaba wa Ditshwanelo Tsa Botho,” mo tsebeng ya 7.] Go tsere dingwaga di le dintsi go dirwa ka natla go kwala melao eno. Re motlotlo thata ka yone. Sekai sa boraro ke gore gompieno batho ba bantsi go feta pele ba nna le seabe mo mekgatlhong ya ditshwanelo tsa botho e bile ba kgona go itlhalosa sentle mo dikgannyeng tse di malebana le ditshwanelo tsa botho.

P. Lo kopana le mathata afe?

K. Morago ga go bereka ka dithulaganyo tsa ditshwanelo tsa botho tsa lekgotla la Ditšhaba Tse di Kopaneng ka dingwaga di le 17, ke batla go go bolelela gore re lebana le mathata a a boima. Bothata jo bogolo ke gore gantsi dipuso di leba ditshwanelo tsa botho e le kgang ya sepolotiki mo boemong jwa go di leba e le go direla ba bangwe molemo. Di ka nna tsa se ka tsa rata go diragatsa ditumalano tse di malebana le ditshwanelo tsa botho ka gonne di ikutlwa di tshosediwa mo sepolotiking. Mo mabakeng ao, ditumalano tse di malebana le ditshwanelo tsa botho e nna selo fela se se kwadilweng fa fatshe mme se sa diragadiwe. Bothata jo bongwe gape e nnile go sa kgone ga lekgotla la Ditšhaba Tse di Kopaneng go thibela go gatakelwa ga ditshwanelo tsa botho mo go feteletseng kwa mafelong a a jaaka e e kileng ya bo e le Yugoslavia, Rwanda le Algeria bosheng jaana. Go palelwa ga lekgotla la Ditšhaba Tse di Kopaneng go thibela dipolao tsa kgailo tse di diragetseng kwa dinageng tseno e nnile go palelwa go gogolo thata. Dithulaganyo tsa ditshwanelo tsa botho di teng, mme di tlhoka fela yo o ka di diragatsang. E tla nna mang? Fa dikgatlhego tsa dinaga tse di ka kgonang go sireletsa ditshwanelo tsa botho di se mo kotsing, gantsi ga di ke di tlhotlheletsega go ema di thibele go gatakelwa gono ga ditshwanelo tsa botho.

P. Ke eng se o bonang se ka direga mo isagweng?

K. Ke bona matshosetsi le tsholofelo mo tseleng e e isang kwa goreng botlhe ba nne le ditshwanelo tsa botho. Se se ntshwenyang ke matshosetsi a a tlhagisiwang ke go dirwa ga ikonomi selo sa lefatshe lotlhe, e leng selo se se rotloetsang ditlamo tse dikgolo tsa kgwebo gore di itshetlele kwa dinageng tse go sa duelweng badiri madi a mantsi mo go tsone. Gompieno, fa go tlhokega, re ka kgona go bona dipuso molato ka ntlha ya go gatakelwa ga ditshwanelo tsa botho mme ra di gatelela. Mme re ka bona mang molato fa ditumalano tsa kgwebo tse di dirwang ke dinaga di le dintsi di tseela dipuso maatla a tsone mme di a neela mekgatlho e e dirang ikonomi selo sa lefatshe lotlhe? E re ka re sa laole mekgatlho eno e e tlhotlheletsang ikonomi, seno se koafatsa boemo jwa mekgatlho e e dirang mo dipusong tse di farologaneng e e jaaka lekgotla la Ditšhaba Tse di Kopaneng. Fa go tliwa mo ditshwanelong tsa botho, mokgwa ono o kotsi thata. Jaanong go botlhokwa thata gore re dire gore dikgwebo tse di ikemetseng ka nosi di kgatlhegele ditshwanelo tsa botho.

P. Tsholofelo yone?

K. Go gola ga setso sa ditshwanelo tsa botho mo lefatsheng lotlhe. Ke raya gore ka thuto re tshwanetse go dira gore batho ba itse thata ka ditshwanelo tsa botho. Gone mme ke kgwetlho e kgolo tota ka gonne seno se akaretsa go fetola tsela e ba akanyang ka yone. Ke gone ka moo, dingwaga di le lesome tse di fetileng, lekgotla la Ditšhaba Tse di Kopaneng le neng la simolola letsholo la lefatshe lotlhe la go sedimosetsa batho phatlalatsa go ba ruta kaga ditshwanelo tsa bone le go ruta dinaga ka maikarabelo a tsone. Mo godimo ga moo, lekgotla la Ditšhaba Tse di Kopaneng le tshwaile dingwaga tsa 1995 go ya go 2004 e le “Lesome la Dingwaga la go Ruta Batho ka Ditshwanelo Tsa Botho.” Re solofela gore thuto e ka fetola megopolo le dipelo tsa batho. Seno se ka nna sa utlwala jaaka Efangele, mme fa go tliwa mo go ruteng batho ka ditshwanelo tsa botho, ke modumedi wa mmatota. Ke solofela gore lefatshe le tla amogela setso sa ditshwanelo tsa botho e le tsela e le akanyang ka yone mo lekgolong le le latelang la dingwaga.

[Lebokoso mo go tsebe 7]

Molaotlhomo wa Boditšhabatšhaba wa Ditshwanelo Tsa Botho

Mo godimo ga Maiphako a Lefatshe Lotlhe a Ditshwanelo Tsa Botho, gape go na le Molaotlhomo wa Boditšhabatšhaba wa Ditshwanelo Tsa Botho. Di amana jang?

Fa o tsaya gore Molaotlhomo ono wa Boditšhabatšhaba wa Ditshwanelo Tsa Botho ke buka e e nang le dikgaolo di le tlhano, he Maiphako a Lefatshe Lotlhe a ka tshwantshiwa le kgaolo 1 ya one. Dikgaolo 2 le 3 ke Kgolagano ya Boditšhabatšhaba Kaga Ditshwanelo Tsa Baagi le Tsa Dipolotiki le Kgolagano ya Boditšhabatšhaba Kaga Ditshwanelo Tsa Ikonomi, Setšhaba le Setso. Mme dikgaolo 4 le 5 tsone nngwe le nngwe ya tsone e na le Melawana ya Ntlha E e Sa Patelediweng.

Le fa gone Maiphako a Lefatshe Lotlhe go bolelwa gore a molemo, a bolelela ditšhaba se di tshwanetseng tsa bo di se dira, dikarolo tse dingwe tse nnè tsa molaotlhomo di tlama semolao, di bolelela ditšhaba se di tshwanetseng go se dira. Le fa gone go simolotswe go bereka mo molaotlhomong ono ka 1949, go tsere masome a dingwaga pele o ka tsena mo tirisong otlhe. Gompieno, dikarolo tseno tse nnè tsa molaotlhomo mmogo le Maiphako a Lefatshe Lotlhe di dira Molaotlhomo wa Boditšhabatšhaba wa Ditshwanelo Tsa Botho.

Mo godimo ga Molaotlhomo ono wa Boditšhabatšhaba, lekgotla la Ditšhaba Tse di Kopaneng le tlhomamisitse ditumalano tse dingwe gape di feta 80 tsa ditshwanelo tsa botho. Mankge mongwe wa ditshwanelo tsa botho o akgela jaana: “Ka jalo go phoso go akanya gore ditumalano tsa ditshwanelo tsa botho tse di mo Molaotlhomong wa Boditšhabatšhaba di botlhokwa go feta tse dingwe. Ka sekai, Tumalano ya 1990 e e kaga Ditshwanelo Tsa Bana ke karolo ya molao e e tlhomamisitsweng tota ke lekgotla la Ditšhaba Tse di Kopaneng e bile e amogelwa mo lefatsheng lotlhe, mme le fa go ntse jalo ga se karolo ya Molaotlhomo wa Boditšhabatšhaba. Lereo ‘Molaotlhomo wa Boditšhabatšhaba wa Ditshwanelo Tsa Botho’ le ne la tlhangwa gore o gape batho ba le bantsi e seng gore e ne e le lereo la semolao. Mme o tla dumalana gore ke lereo le le gapang tlhokomelo thata.”a

[Ntlha e e kwa tlase]

[Setshwantsho mo go tsebe 6]

Elsa Stamatopoulou

[Motswedi wa Setshwantsho]

UN/DPI photo by J. Isaac