Yuropa e e Dirilweng Seoposengwe—Ke ka Ntlha Yang Fa e Tshwanetse go go Ama?

BOJALWA bo ne jwa tlisiwa ga nowa. Dikirikete tsa bonesa loapi. Go ne go ketekwa eng? Mileniamo o mosha? Nnyaa, ruri tiragalo eno e ne e le botlhokwa thata go feta go fetoga fela ga dinomoro mo dikhalendareng tsa lefatshe. E ne e le January 1, 1999. Madi a le mangwe fela a masha a European Union (EU [lekgotla la Dinaga Tse di Kopaneng Tsa Yuropa])—e leng madi a a bidiwang euroa—a ne a simolola go dirisiwa semolao ka letsatsi leo.

Bayuropa ba le bantsi ba leba go dirisiwa ga madi a le mangwe fela e le kgato e e botlhokwa thata mo matsapeng a a sa bolong go simololwa bogologolo mo Yuropa a go batla kutlwano. Lokwalodikgang longwe lwa Se-Dutch lwa De Telegraaf lo ne lwa nesetsa go tlisiwa ga euro pula, lo re ke “phitlhelelo e kgolo thata mo go direng gore Yuropa e nne seoposengwe.” Eleruri, morago ga masomesome a dingwaga go ntse go lorwa, go tshwarwa ditherisano e bile go diegwa, go lebega go nna seoposengwe ga Yuropa go le gaufi thata go feta le fa e le leng pele.

Gone ke boammaaruri gore batho ba ba nnang kwa ntle ga Yuropa ba ka nna ba ipotsa gore boitumelo jo bo kanakana ke jwa eng. Go goroga ga euro le maiteko a go dira gore Yuropa e nne seoposengwe go ka nna ga bonala go sa ame matshelo a bone a letsatsi le letsatsi ka gope. Le fa go ntse jalo, go dira Yuropa seoposengwe go ne go tla simolola mokgatlho o mogolo thata wa dinaga tse di tshwaraganetseng ikonomi mo lefatsheng. Ka jalo, go ne go tla nna thata gore motho a itlhokomolose Yuropa e e dirilweng seoposengwe—le fa a ka tswa a nna kae.

Ka sekai, bosheng jaana Marc Grossman yo e leng Mothusi wa Tona ya Merero ya Puso wa United States o ne a bolelela setlhopha sengwe sa kwa Amerika Bokone se se neng se mo reeditse jaana: “Katlego ya rona e amana thata le Yuropa.” Ka ntlha yang? Gareng ga mabaka a a neng a a bua, lengwe la one e ne e le gore “motho a le mongwe mo bathong bangwe le bangwe ba le 12 ba United States ba ba berekang mo madirelong o thapilwe kwa go nngwe ya dikgwebo di le 4 000 tsa Bayuropa tse di leng kwa United States.” Gape go begwa gore madi a masha a Yuropa a ka nna a ama le tlhwatlhwa ya dilwana tse di tsenang di tswa kwa dinageng di sele—le eleng ditlhwatlhwa tsa dilwana tse di rekwang ka peelelo—kwa dinageng tse di kgakala le Yuropa.

Dinaga tse di tlhabologang di ka nna tsa solegelwa molemo. Jang? Patlisiso nngwe e bolela jaana: “Go dirisiwa ga euro mo boemong jwa madi a a farologaneng a a ntseng a dirisiwa ke dinaga tsa Yuropa go tla tlhofofatsa dikamano tsa kgwebo tse dinaga tse di tlhabologang di nang natso le EU.” Mo godimo ga moo, bangwe ba bolelela pele gore difeme tsa Japane le tsa United States tse di gwebang kwa Yuropa di tlile go solegelwa molemo. Fa go dirisiwa euro, ga go na go nna le go fetofetoga ga selekanyo sa kananyo ya madi mo gare ga dinaga tsa Yuropa. Go gweba kwa Yuropa go ka somarela madi fela thata.

Fa e le gore o rulaganyetsa go etela Yuropa, le wena o ka nna wa utlwa melemo ya go dirwa ga Yuropa seoposengwe. Go ise go ye kae o tla bo o kgona go reka dilwana le go duelela ditirelo tse dingwe kwa dinageng tse di farologaneng tsa Yuropa ka madi a le mangwe fela, e leng euro, e e batlang e lekana le dolara e le nngwe ya United States ka boleng. Kgang ya gore bajanala ba eme tlhogo ba mekamekana le di-gulden, di-franc, di-lire, di-deutsche mark le go nna ba tshwara di-calculator tse dinnye e tla bo e le selo sa maloba.

Le fa go ntse jalo, go dirwa ga Yuropa go nna kontinente e e seoposengwe go re naya sengwe se se kgatlhang le go feta—tsholofelo. Akanya fela, Yuropa e ne e aparetswe ke ntwa mo masomeng a le mmalwa a dingwaga a a fetileng. Fa re leba dilo go ya ka boemo jono, kgang ya gore Yuropa e dirwe seoposengwe ke selo se se jesang kgakge. Mme batho mo lefatsheng lotlhe ba lemoga seo.

Ba le bantsi ba nna ba ipotsa gore a mme gone lefatshe lotlhe le ka tsamaya la nna seoposengwe. Eno ke tebelelo e e eletsegang eleruri! A dikgato tsa Yuropa tsa go dira gore e nne seoposengwe di tla dira gore batho ba nne gaufi thata le go kopanya lefatshe? Pele ga re sekaseka potso eno, re tlhoka go leba sentle kgang eno ya go dirwa ga Yuropa seoposengwe. Go sa ntse go tlhoka gore go ntshiwe dikgoreletsi dife mo tseleng pele e ka nna seoposengwe?

[Ntlha e e kwa tlase]

[Lebokoso mo go tsebe 12]

A DINAGA DI NTSE DI NNA SEOPOSENGWE?

Kgopolo eno ya gore dinaga tsa Yuropa di dirwe seoposengwe ga e simolole jaanong. Go ne go ntse go na le kutlwanonyana e e rileng ka nako ya Mmusomogolo wa Roma, go tswa foo ka nako ya fa Charlemagne a ne a busa mme moragonyana fa go ne go busa Napoléon I. Mo maemong ano dinaga di ne di nna seoposengwe ka go patelelwa le ka go bo di gapilwe mo ntweng. Le fa go ntse jalo, morago ga Ntwa ya Lefatshe II, dinaga di le mmalwa tse di neng di kgautlhantswe ke ntwa di ne tsa nna le boikutlo jwa gore di tlhoka kutlwano e e theilweng mo tirisanong mmogo. Dinaga tseno di ne di solofela gore go dirisana mmogo jalo go ne go se kitla go tokafatsa maemo a ikonomi fela mme gape go ne go tla thibela le ntwa. Ditiragalo tse di latelang ke dingwe tsa dikgato tsa botlhokwa tse di neng tsa felela ka boemo jo bo leng teng gompieno:

• 1948 Makgolokgolo a baeteledipele ba dipolotiki ba Yuropa ba kokoana mmogo kwa The Hague, kwa Netherlands, ba bo ba ikana jaana: “Ga re kitla re tlhola re lwantshana gape.”

• 1950 Fora le Jeremane di simolola go dirisana mmogo gore di sireletse madirelo a tsone a magala le a tshipi. Dinaga tse dingwe tse di oketsegileng di kopanela le tsone mo kgolaganong eno mme seno se felela ka gore go simololwe European Coal and Steel Community (ECSC). Mokgatlho ono wa ECSC o simolola go dira ka 1952 mme o akaretsa Belgium, Fora, Italy, Jeremane Bophirima, Luxembourg le Netherlands.

• 1957 Maloko a le marataro a ECSC a bopa mekgatlho e mengwe e mebedi: mokgatlho wa European Economic Community (EEC) le wa European Atomic Community (Euratom).

• 1967 Mokgatlho wa EEC o kopana le wa ECSC le Euratom go bopa European Community (EC).

• 1973 EC e amogela Denmark, Ireland le United Kingdom.

• 1981 Gerika e nna leloko la EC.

• 1986 Portugal le Spain di nna maloko a EC.

• 1990 EC e golela pele fa Jeremane Bophirima le Jeremane Botlhaba di kopana, go dira gore naga e pele e neng e le Jeremane Botlhaba e tsene mo mokgatlhong ono.

• 1993 Maiteko a maloko a EC a go dira gore maemo a ikonomi le a dipolotiki a tshwaragane thata a feleletsa a dirile gore go bopiwe European Union (EU).

• 2000 EU e na le maloko a le 15—Austria, Belgium, Denmark, Finland, Fora, Gerika, Ireland, Italy, Jeremane, Luxembourg, Netherlands, Portugal, Spain, Sweden le United Kingdom.

[Setshwantsho mo go tsebe 11]

Euro e tla dirisiwa mo boemong jwa mefuta e mentsi ya madi a a dirisiwang ke dinaga tsa Yuropa

[Motswedi wa Setshwantsho mo go tsebe 11]

Euros and euro symbols on pages 11, 13-14, and 16: © European Monetary Institute