Ditiragalo Tsa Lefatshe
◼ “Setlhopha sa baithutadinaledi se se neng se dirisa dithelesekoupo tsa Subaru le Keck kwa Mauna Kea [Hawaii] se fitlhetse mela e megolo ya dikarolo tse tharo ya losagaripa e e ka nnang sekgala se lesedi le ka se tsamayang ka dingwaga di le dimilione di le 200 go kgabaganya lefaufau. Mela eno e dira popego e kgolo go gaisa epe fela e e kileng ya lemogiwa.”—SUBARU TELESCOPE WEB SITE, JAPANE.
◼ United Kingdom’s Office for National Statistics e bega gore “ka 2006 palo ya manyalo [kwa Engelane le Wales] e ne e le kwa tlase go gaisa mo dingwageng di le 110. Baratani ba ba oketsegileng ba bona go le molemo go nna fela ba sa nyalana.”—THE GUARDIAN WEEKLY, BORITANE.
◼ Go ya ka Pew Forum on Religion and Public Life, “diperesente di le 44 tsa bagolo ba ka tswa ba ile ba fetola bodumedi jwa bone, ba bangwe ba ba neng ba se mo bodumeding ba ne ba ikgolaganya le bodumedi jo bo rileng, kgotsa ba bangwe ba ne ba tlogela gotlhelele go nna maloko a bodumedi jo bo rileng.”—U.S.A.
Dikholetšhe le go Tlhakanela Dikobo e le “Fela go Ijesa Monate”
“Kwantle fela ga dikholetšhe dingwe tsa boefangele . . . , go na le pharologano e nnye magareng ga dikholetšhe tsa setšhaba, tsa poraefete le tsa Katoliki le diyunibesithi fa go tliwa mo mokgweng wa baithuti wa go batla go nna le maitemogelo a go tlhakanela dikobo le batho ba le bantsi o o leng teng mo mafelong a bone a bonno.” Go ne ga bolela jalo Donna Freitas moithutabodumedi wa Mokatoliki e bile e le mothusa porofesa wa yunibesithi, morago ga gore a dire dipatlisiso ka boitshwaro jwa go tlhakanela dikobo le ka bodumedi mo dikholetšheng tsa kwa Amerika. Go ya ka lokwalodikgang lwa National Catholic Reporter, Freitas o rile, go retelelwa ga bodumedi mo kgannyeng ya boitsholo jwa tlhakanelodikobo go bontsha e seng fela “maatla a tlhakanelodikobo ya go ijesa monate fela” mme gape le “go palelwa ga bodumedi go thibela tlhotlheletso e e bosula.”
Batsadi ba Duelelwa go Godisa Bana ba Basetsana
Pego ya Dikgang ya BBC e bega gore, puso ya kwa India e solofetsa batsadi ba ba humanegileng madi a a batlang a lekana le diranta di le 23 000 gore ba godise bana ba basetsana. Malapa a tla amogela madi ano morago ga gore mosetsana a tsholwe le nako nngwe fa a ntse a gola go fitlha a nna dingwaga di le 18. Le fa go tlhopha bong jwa ngwana le go fedisa mpa fa e le bong jo bo rileng go ile ga thibelwa ke molao ka 1994, go sa ntse go aname. Tota e bile, go fopholediwa gore mo dingwageng tse 20 tse di fetileng, go ntsha mpa go fetile ka matshelo a le dimilione di le lesome tsa maseanyana a a iseng a tsholwe a basetsana, mme seno se ile sa ama thata tekatekano ya bong mo dikgaolong dingwe. Fa go ne go balwa batho ka 2001 mo nageng eo, go ne go na le basetsana ba le 927 mo basimaneng bangwe le bangwe ba le 1 000 ba ba kafa tlase ga dingwaga di le thataro mme e bile go bonala pharologano gare ga bone e ntse e oketsega. Mo kgaolong nngwe selekanyo sa palo ya basetsana bangwe le bangwe ba le 793 ba ba neng ba tsholwa e ne e lekana le ya basimane bangwe le bangwe ba le 1 000.
Tsela e Dinonyane di Tsibogelang Modumo ka Yone
Dinonyane dingwe di dira matsapa a magolo a gore di utlwiwe le fa go na le modumo mo ditoropong. Makasine wa New Scientist o ne wa bolela gore, le fa modumo wa mo ditoropong o ka tena batho, mo dinonyaneng, e ka nna kgang ya “botshelo le loso” e re ka dinonyane tse di tonanyana di opela “gore di tle di ngoke balekane ba tsone le gore di tshwaye melelwane ya tsone.” E re ka modumo wa mo ditoropong o utlwala kwa godimo, dinonyane dingwe di dira gore dipina tsa tsone di utlwale ka go opela bosigo kgotsa ka go tlhatlosa mantswe a tsone. Makasine ono wa re, go fetofetoga le maemo gono ga go dirwe ke dinonyane tse di nnang mo ditoropong fela. Le dinonyane tse di nnang gaufi le “diphororo le dinoka tse di phothoselang di opela ka mantswe a a kwa godingwana.”