Go Tsewa o se Motho wa Sepe

“Mo dingwageng tsa fa ke ne ke simolola sekolo sa poraemari kwa Spain, bana ba bangwe mo tlelaseng ya me ba ne ba mpitsa ka maina a tshotlo, ka go bo ke ne ke le mokhutshwane thata mo go bone. Ke ne ke a tle ke ye gae ke lela mo e ka nnang letsatsi le letsatsi.”—Jennifer, morwadia batswakwa bangwe ba kwa Philippines.

“Fa ke ne ke ya kwa sekolong se sesha, baithuti ka nna ba basweu ba ne ba mpitsa ka maina a tshotlo. Ke ne ke itse gore ba batla go nkgalefisa gore ke lwe le bone. Mme le fa go ntse jalo, ka tsela nngwe ke ne ka kgona go nna ke ritibetse—mme mo pelong ke ne ke utlwile botlhoko e bile ke ikutlwa ke kgapetswe kwa thoko.”—Timothy, Moamerika wa mothomontsho.

“Fa ke ne ke le dingwaga di le supa, Ba-Igbo le Ba-Hausa kwa Nigeria ba ne ba nna le dikgotlhang. Letlhoo leo le ne la nkama, mme ke ne ka simolola go sotla mosimane mongwe mo tlelaseng ya me yo e neng e le Mo-Hausa, tota le fa e ne e le tsala ya me.”—John, leloko la lotso lwa Ba-Igbo.

“Nna le morongwa ka nna re ne re ntse re bolelela baagelani ba rona ka molaetsa wa Baebele fa bana ba ba neng ba rotloediwa ke baruti ba lefelo leo ba ne ba simolola go re ngata ka matlapa. Baruti bano ba ne ba batla gore re tswe mo toropong eo.”—Olga.

A O KILE wa tlontlololwa ka go tlhaolwa, go go bonalang go ne go bakiwa ke letlhoo? Gongwe e le ka ntlha ya mmala wa letlalo la gago, bodumedi jwa gago, seemo sa gago sa ikonomi, bong jwa gago tota le e leng dingwaga tsa gago. Batho ba ba tlhaolwang ka metlha gantsi ba nna ba boifa gore ba tla tshwarwa makgwakgwa gape. Ba tlhobaela thata fa ba feta mo setlhopheng sa batho, ba tsena mo lebenkeleng, ba ya kwa sekolong se sesha, kgotsa ba ya kwa kokoanong e e rileng.

Mo godimo ga moo batho ba ba tlhoiwang le go tlhaolwa ba ka nna le mathata a go bona tiro, kgotsa ba fiwa kalafi ya maemo a a kwa tlase, ba nna le thutego e e kwa tlase e bile ga ba na ditshiamelo le ditshwanelo tsa semolao tse di tshwanang le tsa batho ba bangwe. Fa tlhaolele e rotloediwa ke batho ba ba mo taolong, e ka baka bosula jo bo jaaka go ganyaolana ga merafe. Sekai sengwe sa bogologolo sa maiteko a go ganyaola morafe se tlhalosiwa mo bukeng ya Baebele ya Esethere. Ela tlhoko se letlhoo le tlhaolele di ileng tsa se dira.—Esethere 3:5, 6.

Letlhoo le ka tswelela pele le fa go na le melao e e kgatlhanong le tlhaolele. Mokomishinara yo Mogolo wa lekgotla la Ditšhaba Tse di Kopaneng wa Ditshwanelo Tsa Batho o ne a bolela jaana: “Masome a dingwaga a le marataro morago ga gore go amogelwe Maiphako a Lefatshe Lotlhe a Ditshwanelo Tsa Batho . . . , melaometheo ya go lekalekana ga batho le ya go sa tlhaolane ga e ise e dirisiwe gongwe le gongwe mo lefatsheng le mo go mongwe le mongwe.” Seo se tshwenya tota, ka gonne go fudugela kwa dinageng di sele ga batho le go oketsega ga batshabi go fetotse thata dipalopalo tsa baagi mo dinageng di le dintsi.

Ka jalo, a kgang ya gore go nne le setšhaba se se sa tlhaolaneng ke toro fela? Kgotsa a letlhoo le tlhaolele di ka fenngwa? Ditlhogo tse di latelang di tla sekaseka dipotso tseno.