A Go na le Molemo Mongwe mo go Bogisegeng?

FA BA lebagane le pogisego e kgolo, batho ba le bantsi ba a gakatsega. Ba bangwe fa ba le mo maitemogelong a a tshwanang kana le eleng a a maswe thata ba nna pelotlhomogi le go nna le maikutlo a a bonolo mo bathong ba bangwe. Ka mo go tshwanang, go na le bao ba ba latolang go nna gone ga Modimo fa ba ntse ba le mo mathateng ka lobaka lo loleele, fa ba bangwe ba ralala diteko tse di maswe ka tumelo e e sa tlhaeleng mo go Mogodimodimo. Ke eng fa go ntse jalo?

Gantsi batho ba gakadiwa le go latlhegelwa ke tumelo ka ntlha ya gore ba ipona ba tlotlega thata mme ba palelwe ke go lemoga gore ke batho ba ba leofileng le ba ba tshelang mo lefatsheng le le itlhokomolosang melao ya Modimo. Ba bona Mogodimodimo molato ka ntlha ya dilo tse di maswe tse batho ba tshwanetsweng ke go bonwa molato ka ntlha ya tsone. Ka gone moo, ga ba ithute sepe se se nang le mosola mo mathateng mme ebile, morago ga ba sena go bona kgololo, ba ka nna ba bontsha ditshupo tse di ntsi tsa botho jo bo sa batlegeng le eleng go feta pele.

Gore seno se seka sa re diragalela, re tshwanetse go dira boiteko jwa go solegelwa molemo mo go sepe se se ka re diragalelang. Seno se tlhoka pono e e tshwanetseng mo go bogisegeng ga batho. Buka ya Bibela ya dikhutsahalo e thusa thata mo go beyeng kgang eno ka mokgwa o o tlhaloganyesegang.

Boloka Tsholofelo

Buka ka boyone e na le maboko a le matlhano a hutsahaletse kana a lelela tshenyego e e maswe e e neng ya tlela Jerusalema ka Bababelona. Mo lebokong la boraro la maboko ano, moperofeti Jeremia, a kgoromelediwa ke moya wa Modimo, o tshololela kwantle maikutlo a gagwe a a boteng, a a fitisetsa mo tšhabeng yotlhe mo setshwanong sa monna yo o itekanetseng. (Dikhutsahalō 3:1) Lemororo Jeremia a ile a bogisega mmogo le tšhaba yotlhe, boitemogelo joo ga bo a ka jwa dira gore a tlalelwe. O ne a lebelela ka tsholofelo kwa nakong eo kamogelo ya Modimo e neng e tla a nna le batho ba gagwe gape mme o ne a amogela se se neng sa wela tšhaba jaaka tiragatso e e tshwanetseng ya katlholo ya Modimo.

Tsholofelo ya kgololo mo isagweng e ne ya tshegetsa Jeremia. Re bala jaana: “Ruri moya wa gago [Jehofa ka boene] o tlaa nkgakologelwa le go nkokama. Seo ke se ke tlaa se gakologelwang. Ke gone mo ke tlaa nnang ke lebeletse.” (Dikhutsahalō 3:20, 21, NW) Go ne go sena pelaelo mo mogopolong wa ga Jehofa gore labofelo Jehofa o ne a tla a amogela batho ba gagwe ba ba sokologileng. Ke boammaaruri, ba ne ba isitswe kwa tlase thata ka go fenngwa mo gogolo. Mme Jehofa o ne a tla a inama go tswa kwa bodulong jwa gagwe jo bo kwa godimo jwa selegodimo, jaaka go ka tualo, a ba tsholetsa go tswa mo seemong sa bone se se isitsweng kwa tlase. Ka mogopolo ono, Jeremia o ne a ka gomotsa pelo ya gagwe le go lebelela ka bopelotelele go fitlhelela Jehofa a dira mo boemong jwa batho ba gagwe ba ba sokologileng.

Ka jalo, fa re le mo boemong jo bo hutsahatsang, ga re a tshwanela go latlhegelwa ke tsholofelo. Re tshwanetse go gakologelwa lebaka la gore diteko di na le tshimologo le jone bokhutlo. Mogodimodimo le ka motlha ga a kitla a letlelela batlhanka ba gagwe ba ba boikanyego go boga ka bosakhutleng le bao e seng batho ba gagwe ba ba ineetseng. Ke gone mo eleng gore re tshwanetse go lebelela ka bopelotelele go fitlhelela Jehofa a tlisa kgololo e e rileng.

Lebaka fela la go bo motho o sa ntse a tshela le tshwanetse go mo neela motheo wa tsholofelo. Bogologolo mo motlheng wa ga Jeremia, motse mogolo wa Jerusalema le lefatshe la Juda di ne tsa senngwa, mme Baiseraele ba le bantsi ba ne ba nyelela. Lefa go le jalo go ne go na le bafalodi. Se se ne sa neela tlhomamisego e e tswelelang pele ya mautlwelo-botlhoko a Modimo mo bathong ba gagwe. Re bala jaana: “Ha e bo ne ne re sa nyelediwe yana ke ka ntlha ea mapelonomi a ga Yehofa, le ka go bo matlhomoga pelo a gagwè a sa tlhaele. A nntse masha ka meshō meshō; boikañō yoa gago bo bogolo. Yehofa ke kabèlo ea me, go bua mōea oa me; ke gōna ke tla sholohèlañ mo go èna.”​—Dikhutsahalō 3:22-24.

Fa e ne e se ka ntlha ya bopelonomi jo bo lorato jwa Modimo, kamego ya gagwe e e boteng mo bathong ba gagwe, go ne go ka bo go se kile ga nna le bafalodi gareng ga Baiseraele. Mme Jehofa Modimo o ne a bontsha mautlwelo-botlhoko. Ka jalo ditshupo tsa boutlwelo-botlhoko tsa gagwe di ne di tla a tswelela go ya mo bathong ba gagwe, di ntšhahadiwa moso le moso. Lebaka la go bo boikanyego jwa ga Jehofa bo le bogolo le ile la tlhomamisa gore mautlwelo-botlhoko a gagwe a ne a ka ikanngwa. A ne a tlaa nnela ruri, a se kitla a koafala kana e nna a a sa direng. Ereka Mogodimodimo a ne a nna kabelo, kana boswa jwa batho ba gagwe, go ne go na le lebaka le le utlwalang mo go bone go tswelela ba lebeletse go fedisiwa ga dipaka tse di tlhokofatsang tse o neng a ba letleletse go nna mo go tsone ka ntlha ya go sa ikanyegeng ga bone.

Ka moo go ka Lebelelwang ka Bopelotelele ka Gone

Ke eng se se tshwanetseng go bontsha go lebelela moo? Buka ya Dikhutsahalō e a araba: “Yehofa o molemō mo go ba ba mo lebelèlañ, le mo moeeñ o o mmatlai. Go molemō gore motho a sholohelè a bè a lebèlèlè poloka ea ga Yehofa a iketlile hèla. Go molemō mo monneñ go rwala yokwe mo bokauñ yoa gagwè. A a dulè a le esi, a didimalè ka a e beile mo go èna. A a beè molomo oa gagwè mo loroleñ; e tle e re kgotsa go bo go na le cholohèlō. A a neèlè eo o mo tlhanyañ lesama ya gagwè; a a tladiwè kgōbō, e tlalè.”​—Dikhutsahalō 3:25-30.

Tlhokomela gore mo nakong eo ya tlhokofatso, motho o tshwanetse go tswelela a lebelela ka tsholofelo kgololo mo Modimong le go atamela gautshwane le ene. Motho o tshwanetse go batla go nna pelotelele, go lebelela ka tidimalo kana kwantle ga go ngongorega go fitlhelela Mothatayotlhe a tlisa kgololo, kana poloko. Gore motho a ithute jalo gore a tle a sikare jokwe ya pogo mo bonnyaneng jwa gagwe go molemo mogolo. Ka ntlha yang? Ka ntlha ya gore go dira gore go nne motlhofo thata mo go ene go tsena mo boitemogelong jo bo tshwanang moragonyana mo botshelong kwantle ga go latlhegelwa ke tumelo. Ka go itse gore o ile a ralala mathata a magolo pele, o na le motheo wa tsholofelo gore o tla a kgona go dira jalo gape.

Jaanong, fa motho a pegilwe jokwe ya tlhokofatso, ga a a tshwanela go ya kwa le kwa a ngongorega. Nnyaa, o tshwanetse go nna a le nosi, jaaka motho yo o hutsahetseng, mme a nne ka tidimalo. O tshwanetse go nna a ikokobeditse, molomo wa gagwe o kgoma lorole. Se se raya gore ka boikokobetso o tshwanetse go ikobela diteko tse Modimo a di letlelelang gore a di sikare, mme o tshwanetse go lebelela ka tsholofelo mo kgololong e e tlang. Ga a a tshwanela go tsogologela babogisi ba gagwe mme o tshwanetse go itshokela tshotlo ya sebele le ya dipuo. Se se re gakolola tsela e Jesu a neng a itshwara ka yone. Rekoto ya Bibela e bega jaana: “Eo e rileñ a kgōywa, a se ka a ba a kgōba; eo e rileñ a boga botlhoko, a se ka a bōpa; me a ineèla hèla mo go eo o atlholañ ka tshiamō.”​—1 Petere 2:23.

Ntlha e nngwe ya botlhokwa e e tshwanetsweng ke go gakologelwa fa re bogisega ke gore Modimo ga a amogele dilo tse di maswe tse batho ba ka di dirang. Lefa go ntse jalo, Mogodimodimo o letlelela dilo dingwe go diragala ka tebelelo ya boikaelelo bongwe jo bo molemo. Se se bontshitswe sentle mo mafokong a a latelang a a tswang mo bukeng ya Dikhutsahalō: “Gonne Yehofa ga a ketla a latlhèla rure. Gonne leha a hutsahatsa, o tla tlhomoga pelo kaha bontsiñ yoa mautlwèlō botlhōkō a gagwè. Gonne ga a bogisi ka go rata, leha e le go hutsahatsa bana ba batho. Go gatakèla bagolegwi botlhe ba lehatshe, Go haposa tshiamèlō ea monna ha pele ga sehatlhōgo sa Mogodimodimo, Go phècolèla motho mahoko a gagwè a a sèkwañ, dilō tse, Yehofa ga a di rate.”​—Dikhutsahalō 3:31-36.

Mo kgannyeng ya Baiseraele ba ba sa ikanyegeng, Jehofa Modimo o ne a ba letlelela go tsena mo boitemogelong jo bo botlhoko mo Bababeloneng. O ile a ba latlha go ya bokgakaleng jwa go ba letlelela go isiwa botshwarong. Lefa go le jalo, seno e ne e le ka boikaelelo jo bo siameng, e le go ntsha masalela a a sokologileng gareng ga bafalodi le bana ba bone. Jehofa o ne a tla bontsha boutlwelo-botlhoko mo masaleleng ano. Mothatayotlhe o ne a sena boitumelo bope mo go otlhayeng Baiseraele. E ne e se keletso ya pelo ya gagwe go ba hutsahatsa le go ba utlwisa botlhoko ka go ba neela mo mabogong a baba ba bone. Jehofa o ne a sa amogele tshwaro e e maswe e bano ba neng ba tshwere batho ba gagwe ka yone. O ne a sa amogele batho ba ba neng ba gatelela ditshwarwa tsa ntwa, bao ba neng ba ganela motho ka ditshwanelo tsa gagwe tse a di neetsweng ke Modimo le bao ba neng ba gana go diragatsa tshiamiso mo tshekong ya kafa molaong.

Ka mo go tshwanang, fa re bogisiwa ke batho, ga re a tshwanela go bona Modimo molato ka ntlha ya ditshiamololo tse batho ba di dirang. Mogodimodimo ga a amogele kgatelelo ya bone le thubakanyo. Labofelo ba tla a tshwanelwa ke go arabela ditiro tsa bone tse di sa siamang kwa go ene.

Go tloga foo, gape, batho ba ka nna ba itlisetsa pogisego. Baiseraele ba ba sa ikanyegeng ba ne ba hularela Jehofa Modimo, ba itatola kamego ya gagwe ya tshireletso. Ka tshwanelo, go tloga foo, o ne a ba tlogelela baba ba bone. Ka jalo ba ne ba sena motheo ope wa go ngongorega mabapi le se se neng se ba diragaletse. Se se otlelelwa mo potsong eno: “Ana motho eo o tshedileñ o ñōñōrègèlañ, e le motho, ka ntlha ea go belediwa dibe tsa gagwè?” (Dikhutsahalō 3:39) Mo boemong jwa go ngongorega, Baiseraele ba ka bo ba boetse kwa go Jehofa Modimo ka go sokologa, ba mo kopa mautlwelo-botlhoko. Re bala jaana: “A re kheleiseñ re lekeñ ditsela tsa rona, me re bè re shokologèlè mo go Yehofa. A re choleletseñ Modimo mo magodimoñ dipelo di na le diatla tsa rona. Re tlodile, re cuolotse; ga ua re ichwarèla.”​—Dikhutsahalō 3:40-42.

Ee, go ne go sena nako epe ya go ngunanguna le go ngongorega. E ne e le nako ya go tlhatlhoba ka kelotlhoko ditsela tsa bone, mokgwa wa botshelo kana boitshwaro, le go tlhokomela gore ke eng se se ileng sa nna matswela. Mo boemong jwa go tswelela-pele mo ditseleng tsa bone go ipogisa, ba ne ba tshwanetse go boela mo go Jehofa le go dumalana le ditaelo tsa gagwe. Go sokologa ga ka kwantle, go tsholetsa diatla fela fa go rapelwa, go ne go sa lekana. Go sokologa mo go tswang pelong ka ntlha ya ditlolo go ne go tlhokafala.

Ka gone fa re bogisega, re tshwanetse go lebelela tsela ya rona ya go tshela. A re ne ra tlisa mathata mo go rona ka go itlhokomolosa melao ya Modimo? Fa go ntse jalo, ga re na motheo ope wa go bona Mogodimodimo molato. Mo boemong jwa moo, re tshwanetse go bontsha gore re solegetswe molemo mo kotlhaong e e botlhoko ka go tlogela tsela e e phoso mme ka go sokologa re boela mo Modimong. Fa re lekile go tshela botshelo jwa boammaaruri mme lefa go le jalo ra itemogelela tlhokofatso, ga re a tshwanela go lebala gore se batho ba ba bosula ba ka se re dirang ga se se Modimo o se amogelang. Ka nako eo, re tshwanetse go ikoba le go ineela mo ditekong tsa rona, re letetse ka bopelotelele le kwantle ga go ngongorega go fitlhelela Jehofa Modimo a tlisa kgololo. Fa re dirisa kgakololo ya Lefoko la Modimo fa re le mo pogisegong, re tla a solegelwa molemo. Re tla ithuta bopelotelele, boitshoko, le go ikaega mo go feletseng mo go Jehofa. Le ka motlha ga re kitla re etsa ditsela tse di sa siamang tsa batho ba ba gatelelang, mme re tla a tswelela go nna bonolo le kamego mo bathong ba bangwe.

[Setshwantsho mo go tsebe 23]

Jeremia, yo o neng a tlhama Dikhutsahalō o ne a ka kwala go tswa boitemogelong ka ga pogisego