Go Lemoga Dikgang

A ke Leina le le “Kgopisang”?

Gore leina la Modimo le seka la buiwa, gore gantsi le kwalwe jaaka JHWH, le gore le bidiwe jaaka “Morena,” ke selo se se kgothalediwang seo se tshwanetseng go amogelwa, lekwalo-paka la Katoliki e leng Com-nuovi tempi le bolela jalo. Seno ke ka moo go neng ga tsibogelwa thapedi eo e neng e tsositswe ke “Lekgotla la Botsalano Magareng ga Bojuda le Bokeresete” la Roma eo e saenilweng mmogo ke borathuto-bomodimo le bakanoki ba ba tumileng ba Katoliki le ba Bajuda. Thapedi eo e ne e kopa gore “madirelo a a gatisang le badiri ba ba kwalang makwalo-dikgang le dimakasine” ba seka ba tlhola ba dirisa leina “Jahweh” ka gonne le “kgopisa Bajuda, bao ba tsayang leina la Modimo jaaka leo le sa kgoneng go bidiwa.” Lekgotla leno le bolela gore, kopo ya lone e thailwe mo “ngwaong ya Bajuda e e sa bolong go nna gone” eo “e ileng ya bolokiwa kwantle ga go tshwenngwa” go tla go fitlha gompieno.

A mme Bakeresete ba tshwanetse ba kaelwa ke dingwao tsa Bajuda? A go tla bo go siame gore ba beele leina la Modimo kwa thoko le go tila go le bitsa? Bibela e bontsha gore Modimo o batla gore batho botlhe ba itse gore ene “eo leina la . . . [gagwe] e leñ YEHOFA,” ke Mogodimodimo. (Pesalema 83:18; Esekiele 38:23; Malaki 3:16) Jesu o ne a tlhoma sekao mo go seno. Go na le gore a latele dingwao tsa Bajuda tseo di neng di “diholotse lehoko ya Modimo,” o ne a ruta balatedi ba gagwe gore ba rapele jaana: “Leina ya gago a le itshepisiwè.” (Mathaio 6:9; 15:6) Mme dioura di se kae fela pele ga loso lwa gagwe lwa setlhabelo, o ne a bolela jaana mo thapelong: “Me ke ba itsisitse leina ya gago [barutwa], me ke tla nna ke le ba itsise.”​—Yohane 17:26.

Go Beeletsa: A ke Go Tlamana?

Mosadi mongwe yo mosha wa Brazil le monna yo o neng a mmeeleditse ba ne ba sa tswa go fetsa go tsenya ntlo ya bone e ntšha difenitšhara. Go ne go rometswe ditaletso, mme sengwe le sengwe se ne se lebega se tsamaela lenyalo la bone ka tolamo, leo le neng le saletswe ke malatsi a le mararo fela. Ereka monyadiwa a ne a lebeletse botshelo jwa gagwe jo bosha pele, o ne a tlogetse tiro ya gagwe. Morago ga moo, kwa ntle ga go dira kitsiso epe, monyadi o ne a tlogela go mmeeletsa. Ereka monyadiwa yo o gannweng yoo a ne a gamaregile le go kgobega marapo, o ne a senka thuso ya semolao. Mmueledi wa gagwe o ne bolela gore ‘go beelediwa lenyalo ke tlamano ya ntlha, mme fa e senngwa ka mo go sa tshwanelang, mmeeletsi/mmeelediwa yo eseng molato wa gagwe o tshwanetse a duelelwa ditshenyegelo dipe tseo a nnileng le tsone.’ Kgotla-tshekelo e ne ya dumalana mme ya laela monna yoo gore a neele yoo a neng a mmeeleditse ‘madi a a lekanang le tuelo e e setseng e tlhomilwe ke molao go le gale le go duela ditshenyegelo tsa kgotla-tshekelo mmogo le madi a babueledi.’ Fa mmueledi Nereu Mello a ne a akgela malebana le tshwetso eo, o ne a kwala jaana mo lekwalo-dikgannyeng la São Paulo e leng Jornal da Lapa: “Go beelediwa lenyalo ke tlamano e e masisi tota mme go e senya ga go lebiwe ka go e itlhokomolosa fa pele ga Molao.”

Mogopolo ono wa bomasisi jwa go beelediwa lenyalo ga o simologe. Kafa tlase ga Molao wa ga Moshe mosadi yo o beeleditsweng yo o neng a dira kgokafalo o ne a amogela kotlhao e e tshwanang le ya mosadi yo o nyetsweng wa seaka. Ka gone o ne a tshwarwa ka tsela e e farologaneng le ya mosadi yo o sa nyalwang yo o neng a dira kgokafalo. (Duteronomi 22:23, 24, 28, 29) Bogologolo ka nako eo go beeletsa go ne go lebiwa jaaka go go tlamang​—jaaka ekete bobedi joo bo ne bo setse bo nyalane. (Mathaio 1:19) Gompieno Bakeresete le bone ba leba go beeletsa jaaka kgato e e masisi. Ga ba go tseye motlhofo.​—Bapisa Mathaio 5:37.

E Kopantswe le Boranyane jwa Segompieno

Morago ga fa Martin Luther a sena go kgalemela kgatlhanong le kgwebo ya dithekololodibe (go itshwarelwa mo kotlhaong ya boleo ya mofuta o o rileng), Kereke ya Roma Katoliki e ne ya fedisa mokgwa oo ka 1562. Mme mosimegapuso mongwe wa Vatican ebong Pedro Albellan o ne a otlelela bosheng jaana gore go rutiwa malebana le go ntsha dithekololodibe go santse go ise go “tlogelwe ebile ga go kgonege gore go fetolwe.” Buka nngwe eo e kwadilweng sesha ya Roma Katoloki e e malebana le dithekololodibe e bontsha gore Vatican e ile ya kopanya tumelo eno ya bogologolo le boranyane jwa segompieno. Go ya ka The Times ya London, bobishopo jaanong ba ka “neela batho ba bone ba ba ikanyegang thekololodibe e e feletseng ka radio kana ka thelebishene gararo ka ngwaga fa ba neela tshegofatso ka leina la Mopapa.” Lefa go ntse jalo, go lekanyeditswe. “Kgaso e tshwanetse ya direlwa gongwe le tiragalo eo,” go bolela Luigi De Magistris jalo wa Phaposi e e Boitshepo ya Boaposetoloi e e Sekisetsang ya Vatican, eleng lephata leo le berekanang le thekololodibe. “Go bogela tiragalo eo fa e boelediwa ga go a lekana.”

Mme go sa kgathalesege gore dithekololodibe tseo di a rekisiwa kana di neelwa ka namana kana ka thelebishene, a di amana le Dikwalo? Lemororo Jesu, ka dinako dingwe, a ne a itshwarela dibe fela, ga a ka a bua sepe malebana le gore a dithekololodibe di a tlhokafala. Kana baaposetoloi. “Madi a ga Yesu Morwa ōna [Modimo] a re tlhapisa mo boleuñ yotlhe,” moaposetoloi Johane o ne a kwala jalo. “Ha re ipolèla dibe tsa rona, ōna o boikañō le tshiamō ea go re ichwarèla dibe tsa rona, le go re tlhapisa mo tshiamololoñ eotlhe.” (1 Yohane 1:7, 9) Fa ka gone e le gore maleo otlhe a a itshwarelwa, ke eng seo se saletseng seo se tshwanetseng sa duelelwa ka kotlhao kana sa bipiwa ka dithekololodibe?​—Yohane 3:36; Baroma 5:10.