‘Ke Emisitswe mo Godimo ga Serala sa Go Tlhola’

“Me a goa yaka tau, a re, Morèna, ke tlhola ke eme mo seraleñ sa go tlhola mo motshegariñ, ke lala ke emisicwe mo tebeloñ ea me masigo a ee go sa.”​—ISAIA 21:8.

1, 2. (a) Charles T. Russell o ne a na le mokgele ofe? (b) Dibuka tsa Bibela di ne di tla thusa jang gore a fitlhelele mokgele wa gagwe?

MONNA mongwe wa dingwaga di le 21 yo o boifang Modimo yo o nnang kwa bokone-botlhaba jwa United States o ne a romilwe. Mokgele wa gagwe e ne e le go senola dithuto tsa maaka tsa bodumedi tsa motlha wa gagwe, segolo-bogolo dithuto tsa go tlhokofalediwa ruri le tlholelo. Gape, o ne a batla go emela boammaaruri kaga thekololo le boikaelelo jwa go tla ga ga Keresete le mokgwa oo a neng a tla tla ka one. O ne a tla dira seno sotlhe jang? Ka go phatsimisa lesedi la Lefoko la Modimo, eleng Bibela e e Boitshepo, malebana le ditumelo tsa bodumedi.​—Pesalema 43:3; 119:105.

² Charles T. Russell, moakamedi wa ntlha wa Watch Tower Society, e ne e le ene monna yoo, mme o ne a swetsa ka 1873 gore a gatise dibuka tsa bodumedi jaaka tsela ya go tlhagisa lesedi la boammaaruri jwa Bibela. Dikgatiso tseo di ne di tla senolela babadi ba ba pelo-e-phepa go sa utlwane goo go leng mo dithutong tsa La-Bodumedi. Makoa ape a a fitlhegileng a dithuto tseo a ne a se kitla a falola lesedi le le maatla la Bibela. (Baefesia 5:13) Ka nako e e tshwanang, dibuka tseno di ne di tla bonesa ‘thuto e e molemo’ gore di age tumelo ya babadi. (Tito 1:9; 2:11; 2 Timotheo 1:13) A go tlhoafalela boammaaruri jwa Bibela goo go neng ga tlhotlheletsa Russell mo tirong ya gagwe go ne go kile ga diragala pele?​—Bapisa 2 Dikgosi 19:31.

Bakeresete ba Pele: Baemedi ba Lefoko la Modimo

3. Keresete Jesu o ne a tlhomela go emela boammaaruri sekao jang?

³ Bakeresete ba lekgolo la ntlha la dingwaga ba ne ba emela gore Lefoko la Modimo le dirisiwe mo Bajudeng le mo Baditšhabeng. Ba ne ba ema jaaka ekete ba emisitswe mo seraleng sa go tlhola, ba bolela boammaaruri mo go botlhe bao ba neng ba tla utlwa. (Mathaio 10:27) Moeteledipele wa bone, ebong Jesu Keresete, o ne a ba tlhomela sekao. O ne a re: “Ke tsalecwe gōna mouō, me ke tletse gōna mouō mo lehatshiñ, gore ke shupè kaga boamarure.” (Yohane 18:37) Lemororo a ne a itekanetse, o ne a gana go ikaega ka botlhale jwa gagwe ka namana kana ka dikgopolo tsa gagwe ka namama. Go na le moo, dithuto tsa gagwe di ne di tswa mo Morutising wa gagwe yo Mogolo, ebong Jehofa Modimo. ‘Ga ke dire sepe ka nosi,’ o ne a bolelela setlhopha sengwe sa Bajuda jalo. “Me ke bua dilō tse hèla yaka Rara a nthutile.” (Yohane 8:28; bona gape le Yohane 7:14-18.) Go ya ka dipego tsa Dibuka tsa Efangedi tsa bodihedi jwa gagwe jwa mo lefatsheng, Jesu o ne a tsopola (kana a bua ka dikgopolo tseo di dumalanang le) ditemana tseo di tswang mo dikwalong tse di ka nnang sephatlho se le sengwe sa Dikwalo tsa Sehebera.​—Luke 4:18, 19 (Isaia 61:1, 2); Luke 23:46 (Pesalema 31:5).

4. Neela dikai tsa ka moo Jesu a neng a dirisa Lefoko la Modimo go emela boammaaruri ka tsone.

⁴ Le eleng morago ga loso lwa gagwe le tsogo ya gagwe, Keresete o ne a santse a dirisetsa Lefoko la Modimo go ruta boammaaruri. Ka sekai, fa Keleopase le yoo a neng a mo patile ba ne ba tswa Jerusalema ba ya Emause, Jesu o ne a thusa barutwa bao gore ba fetolane ka Dikwalo. Pego eo e bolela gore: “Me a simolola ka Moshe, le ka baperofeti botlhe, a ba phuthololèla mo dikwaloñ cotlhe, dilō tse di kwadilweñ kaga gagwè.” (Luke 24:25-27) Moragonyana mo go lone letsatsi leo, Jesu o ne a tlhaga mo baaposetoloing ba le 11 le mo go bangwe ba barutwa ba gagwe go ba aga mo tumelong. Jang? Ka go dirisa Dikwalo ka matsetseleko. Luke o kwala jaana: “Hoñ a [Jesu] rarabolola tlhaloganyō ea bōnè, gore ba tlhaloganyè dikwalo; Me a ba raea, a re, Go kwadilwe yana, ha èna Keresete a tla shwa yalo, me a ba a coga mo bashwiñ ka letsatsi ya boraro.”​—Luke 24:45, 46.

5. Ka Pentekosete ya 33 C.E., Petere o ne a latela jang sekao sa ga Keresete malebana le go dirisa Dikwalo?

⁵ Phuthego ya Bokeresete e ne ya latela Motlhoma-sekao wa yone ka go simolola bodihedi jwa yone jwa phatlalatsa e dirisa Dikwalo ka 33 C.E. Ka mokgwa ono: lefelo lengwe le le atlhameng ka kwantle ga ntlo nngwe kwa Jerusalema. Fa boidiidi jwa diketekete tsa Bajuda ba Jerusalema le baeti ba Bajuda ba sena go utlwa modumo wa ‘mosumo o utlwala’ mo ntlong eno, ba ngokelwa mo lefelong leno ebile ba phuthegela mo go lone. Petere o fetela kwa pele​—a potologilwe ke baaposetoloi ba bangwe ba le 11—​mme o simolola go bua jaana ka lentswe le le maatla: “Lona banna ba Yudea, le lona lotlhe ba lo agileñ mo Yerusalema, a selō se se itsiwè ke lona, me lo tlhwaèlè mahoko a me tsèbè.” Morago ga moo fa a supa “se se builweñ ke moperofeti Yoele” le se ‘Dafida o se buang,’ Petere o tlhalosa kgakgamatso e e sa tswang go diragala le gore “Modimo o mo dihile Morèna le Keresete, eboñ èna Yesu eo lo mmapotseñ.”​—Ditihō 2:2, 14, 16, 25, 36.

6. (a) Tlhalosa gore go ne ga diragalang kwa pokanong nngwe ya setlhopha se se laolang sa lekgolo la ntlha la dingwaga. (b) Diphuthego di ne tsa itsisiwe jang tshwetso ya setlhopha se se laolang, mme ka diphelelo dife?

⁶ Fa Bakeresete ba pele ba ne ba tlhoka tshedimosetso e e papametseng malebana le tumelo le boitshwaro, setlhopha se se laolang sa lekgolo la ntlha la dingwaga le sone se ne sa dirisa Dikwalo ka botlalo. Ka sekai, kwa pokanong ya setlhopha se se laolang ka ngwaga wa 49 C.E., morutwa Jakobe, yoo o neng a direla jaaka modula-setulo, o ba tlhokomedisa lekwalo lengwe le le tshwanetseng leo le fitlhelwang mo go Amose 9:11, 12. “Bakauleñwe, ntheetsañ,” o bolela jalo. “Simone o boletse kaha e rileñ pele Modimo oa lekola Badichaba, gore o tlhaolèlè leina ya ōna batho mo go bōnè. Le mahoko a baperofeti a dumalanye le gōna; yaka go kwadilwe.” (Ditihō 15:13-17) Setlhopha sotlhe se ne sa dumalana le kakantsho ya ga Jakobe mme morago ga moo se ne sa kwala tshwetso ya sone e e tserweng mo dikwalong gore e tle e isediwe diphuthego tsotlhe le gore di e bale. Diphelelo e ne ya nna eng? Bakeresete “ba itumèlèlèla kgomoco,” mme “diphuthègō tsa kgothala mo tumeloñ, me tsa ntsihala mo paloñ ka malatsi aotlhe.” (Ditihō 15:22-31; 16:4, 5) Ka gone, phuthego ya pele ya Bokeresete e ne ya fetoga “lekotwana le setshegeco sa boamarure.” Mme go tweng ka histori ya motlha wa segompieno? A C. T. Russell le balekane ba gagwe ba diithuti tsa Bibela ba ne ba tla etsa sekao seno se se molemo, sa lekgolo la ntlha la dingwaga? Ba ne ba tla emela boammaaruri jang?​—1 Timotheo 3:15.

Dimakasine tse di Bonelang Kgakala

7. (a) Boikaelelo jwa Zion’s Watch Tower e ne e le eng? (b) E ne e lebeletse go mang gore a e tshegetse?

⁷ July 1879 e ne ya bona go tsalwa ga kolotsana ya konokono ya ga Russell ya tshedimosetso ya Bibela​—eleng Zion’s Watch Tower and Herald of Christ’s Presence. Tokololo yayone ya ntlha e ne ya bontsha boikaelelo jo bo molemo jwa makasine ono: “Jaaka leina la one le supa, boikaelelo jwa one ke gore e nne lefelo la go tlhola leo dikgang tse di kgatlhisang ebile di le mosola di ka itsisiweng ‘letsomanyane’ go tswa kwa go lone mme jaaka ‘Herald of Christ’s Presence,’ gore e tsholele ba ‘ntlo ya tumelo’ ‘dijo ka paka ya gone.’” Boikaelelo jwa konokono jwa makasine ono e ne e le gore go ikanngwe Modimo mothatayotlhe. Tokololo ya one ya bobedi e ne ya bolela jaana: “Re dumela gore ‘Zion’s Watch Tower’ e engwa nokeng ke JEHOFA, mme ka nako e seno se ntseng jalo ka yone ga e kitla e bo e tsamaya e kopa batho kana e ba lopa gore ba e tshegetse. Fa e le gore Ene yo o reng: ‘Gauta le selefera eotlhe ya dithaba ke ya me,’ o palelwa ke go tlamela ka madi a a tlhokafalang, re tla tlhaloganya gore ke nako ya gore re emise go e gatisa.”

8. Tlhalosa ka moo Tora ya Tebelo e neng ya gola ka gone o dirisa Isaia 60:22 le Sakaria 4:10.

⁸ Zion’s Watch Tower, eo jaanong e leng Tora ya Tebelo, e na le dingwaga tse di fetang 107 e ntse e gatisiwa e sa kgaotse. E godile go tloga ka dikaelo di le 6 000 tsa makasine ono tsa kgwedi le kgwedi tseo di neng di gatisiwa ka puo e le nngwe go ya go dikaelo tsa makasine ono wa gabedi ka kgwedi di le 12 315 000 tseo di leng gone ka dipuo di le 103.​—Bapisa Isaia 60:22; Sekaria 4:10.

9. Setlhogo se se reng Tora ya Tebelo e ne e le se se opang kgomo lonaka jang?

⁹ Setlhogo seno, eleng Watch Tower, Russell o ne a se tlhophile ka nepo. Lefoko leo gantsi le dirisediwang “serala sa go tlhōla” mo Dikwalong tsa Sehebera le kaya “go lebela” kana “setlhoa sa go keleka,” leo molebedi a neng a ka bona mmaba motlhofo a sale kwa kgakala mme a bo a utlwatsa tlhagiso nako e sale gone ya gore kotsi e a atamela. Ka gone, mo dingwageng tsa yone tsa ntlha di le 59 e ntse e gatisiwa, tsebe ya yone ya setlhogo e ne e na le tsopolo eno e e gwetlhang e e tswang mo go Isaia 21:11, 12, ka tshwanelo: “Molebedi, Ke nakō Ehe ea Bosigo?” “Bosa Boè Tla.”

10. Ke mang yo o direlang jaaka molebedi wa Isaia 21:11 gompieno, mme o bolela molaetsa ofe?

¹⁰ Molebedi yo o emisitsweng wa boperofeti jwa ga Isaia o ne a tloga a gatela pele. Mo gare ga boemo jwa ga jaanong jo bo lefifi jwa boikepo jwa lefatshe, Russell o ne a ile a gasa mafoko a a molemo ka boitumelo a “bosa” jo bo tlang. Puso ya kagiso ya Dingwaga tse di Sekete ya ga Jesu Keresete ke setlhogo sa lekwalo-paka leo le le itumedisang. Mme pele ga “bosa” bo goroga, setlhopha se se direlang jaaka molebedi​—seo eleng masalela a Iseraele wa semoya gompieno—​se tlhagisa ka bopelokgale gore “bosigo” bo tsamaya kae, joo bo tla fitlhelelang lefifi la jone la ntshwarele ngwana kwa “ntweñ ea letsatsi ye legolo ya Modimo, Mothataeotlhe” kwa Hara-Magedona.​—Tshenolō 16:14-16.

11, 12. (a) Mafoko a Isaia 21:8 a bontsha jang gore setlhopha sa molebedi se a ikanyega ebile se ntshitse matlho dinameng? (b) Pego ya molebedi wa gompieno e tla ka modiredi ofe, mme e anamisiwa jang segolo-bogolo?

¹¹ Pelenyana ga moo, mo go Isaia 21:8, re itsisiwe molebedi yono yo o ikanyegang ka mafoko ano: “Me a goa yaka tau, a re, Morèna, ke tlhōla ke eme mo seraleñ sa go tlhōla mo motshegariñ, ke lala ke emisicwe mo tebeloñ ea me masigo a ee go sa.”

¹² A o ke o tshwantshe mo mogopolong wa gago molebedi mongwe yo o emisitsweng mo godimo ga tora e e kwa godimo, a inametse kwa pele​—a keleka khutlopono motshegare, a leka ka natla go bona mo gare ga lefifi mantsiboa​—a ntshitse matlho dinameng ka metlha. Jaanong o lemoga ntlha ya konokono eo e tlhalosiwang ke lefoko la Sehebera la ‘serala sa go tlhola’ (mits·peh’) jaaka le dirisitswe mo go Isaia 21:8. Ereka molebedi yono a thantse jaana, ke mang yoo tlhogo ya gagwe e tsayang sentle yoo a ka belaelang pego ya gagwe e e dumang? Ka mo go tshwanang gompieno, setlhopha sa molebedi se ile sa iteka ka thata go lotolotsa mo Dikwalong go bona gore Jehofa o tsholetse tsamaiso eno ya dilo eng. (Yakobe 1:25) Morago ga moo molebedi yono o goeletsa molaetsa oo kwa godimo le ka bopelokgale, segolo-bogolo ka ditsebe tsa Tora ya Tebelo. (Bapisa Amose 3:4, 8.) Makasine ono ga o kitla o bo o tsamaya o ikgogela morago mo go emeleng boammaaruri ka ntlha ya poifo!​—Isaia 43:9, 10.

13. Ke lekwalo-paka lefe leo le patang le lengwe leo le neng la tlhaga ka 1919, mme le na le boikaelelo bofe jo bo tshwanang?

¹³ Ka October 1, 1919, go ne ga tlhaga makasine o mosha mo seraleng sa lefatshe: The Golden Age.a Setlhopha sa molebedi se ne se tla dirisa sedirisiwa seno go pata Tora ya Tebelo. Lemororo ditlhogo tsa lone di ne di se kitla di nwela thata mo ditlhogong tsa Bibela jaaka tsa Tora ya Tebelo, o ne o tla tlhagisa setho ka dithuto tsa bodumedi tsa maaka, go fedisiwa ga tsamaiso ya ga jaanong e e boikepo ya dilo goo go tlang, le ka lefatshe le lesha la tshiamo leo le tla latelang. Ee, le one o ne o tla emela boammaaruri!

14. Boikaelelo jwa Consolation e ne e le bofe, mme moragonyana ga moo jwa Awake!?

¹⁴ Dingwaga di le somerobedi morago ga moo leina la The Golden Age le ne la fetolwa gonna Consolation. “Leina leno le lesha le emela boammaaruri,” tokololo ya October 6, 1937, e ne ya bolela jalo. Consolation e ne ya fetoga Awake! mo tokololong ya August 22, 1946. E ne ya ikuela jaana mo tokololong eo: “Boikaelelo jo bogolo jwa makasine ono e tla nna go thokgamela boammaaruri.” Go tla go fitlha nako kgolo ke eno, ga o ise o palelwe ke go boloka tsholofetso eo. Ka mo go tlhomologileng, Tora ya Tebelo le Awake! di tsholeletsa setlhogo se segolo sa boammaaruri kwa godimo gore botlhe ba se bone. Ka go dira jalo, dimakasine tseno di latela tsela eo e neng ya bonesiwa ke phuthego ya pele ya Bokeresete.​—3 Yohane 3, 4, 8.

Tora ya Tebelo le Awake!: Di Emela Boammaaruri

15. (a) Ke mokgwa ofe wa go tshola dijo tsa semoya wa gompieno oo o tshwanang le ole wa phuthego ya pele ya Bokeresete? (b) Mo godimo ga go tsopola ditemana tsa Bibela, ke eng gape seo se tlhokafalang? Neela dikao.

¹⁵ Setlhopha sa “motlhanka eo o boikañō le eo o botlhale,” eleng “molebedi,” gompieno se dirisa makasine wa Tora ya Tebelo se kaelwa ke Setlhopha se se Laolang sa Basupi ba ga Jehofa jaaka mosele wa sone o mogolo wa go tshola “diyo” tsa semoya “ka dipaka tse e leñ cōna.” (Mathaio 24:45) Seno se latela sekao sa phuthego ya lekgolo la ntlha la dingwaga, seo se neng sa kwala tshedimosetso e e papametseng e e malebana le dithuto le melao ya boitshwaro gore lo “balèlwè bakauleñwe botlhe.” (1 Bathesalonia 5:27) Fa esale go tloga fela fa Tora ya Tebelo e ne e simologa e ile ya nna makasine o o dirisang Bibela le o o rutang Bibela. Ka sekai, tokololo ya ntlha ya Zion’s Watch Tower e ne ya tsopola kana ya tlhagisa ditemana tse di fetang 200 go tswa mo dibukeng tsa Bibela bobotlana di le 30. Mme go tlhokafala mo go oketsegileng go feta go tsopola ditemana tsa Bibela fela. Batho ba tlhoka gore ba thusiwe gore ba di tlhaloganye. Tora ya Tebelo ka metlha e ile ya tsweletsa kutlwisiso ya Bibela pele. Go tloga ka 1892 go ya go 1927 tokololo nngwe le nngwe e ne e na le mmalo wa Bibela wa beke le beke le motlotlo wa temana ya konokono o o tswang mo go balweng gongwe le gongwe. Ka sekai se sengwe, bona tšhate e e bidiwang “Ditlhogo Tse Di Tlhomologileng tsa Tora ya Tebelo, Dingwaga Dingwe le Dingwe tse di Lesome.”

16, 17. Mokwadi wa ntlha wa Tora ya Tebelo o ne a dirang go tlhomamisa gore makasine ono o tla emela boammaaruri jwa Bibela ka metlha?

¹⁶ Tora ya Tebelo e ne e tla boloka jang go itsheka ga molaetsa wa yone o o gatisitsweng? Mokwadi wa ntlha wa makasine ono, ebong C. T. Russell, o ne a simolola dilo tseo di neng di tla tlhomamisa gore seo se neng se gatisitswe go Tora ya Tebelo e ne e le boammaaruri jaaka bo ne bo tlhaloganngwa ka nako eo. Nngwe ya ditlhomamisetso tseno e lemogiwa mo maikanong a gagwe ao a dirilweng ka June 27, 1907. (Russell o sule ka October 31, 1916.) Maikano a gagwe a bolela jaana:

“Ke laela gore molato otlhe wa ZION’S WATCH TOWER wa go gatisa o tla nna mo matsogong a komiti ya bakaulengwe ba le batlhano, bao ke ba kgothaletsang gore ba nne kelotlhoko thata le go ikanyega mo boammaaruring. Ditlhogo tsotlhe tseo di tlhagelelang mo dikarolong tsa ZION’S WATCH TOWER di tla rebolwa ka mo go feletseng ke bobotlana ba le bararo ba komiti ya ba le batlhano, mme ke kgothaletsa gore fa kgang nngwe eo e rebotsweng ke ba le bararo bano go itsege kana go dumelwa gore e kgatlhanong le dipono tsa a le mongwe kana ba le babedi ba maloko a mangwe a komiti eno, ditlhogo tse di ntseng jalo go tla iketlwa pele ka tsone gore di jelwe tlhogo, go rapelwa le go tlotliwa ka tsone dikgwedi di le tharo pele ga di gatisiwa​—gore go ya bokgakaleng joo bo ka kgonagalang kutlwano ya tumelo le dibofo tsa kagiso di bolokiwe mo tsamaisong ya go gatisa lekwalo-paka leno.”

¹⁷ Leloko lengwe le lengwe la Komiti e e Kwalang, go ya ka maikano a ga Russell, le ne le tshwanela gore “le ikanyege ka botlalo mo dithutong tsa Dikwalo,” mme ba ne ba tshwanela go bontsha, jaaka dinonofo tse di tumileng, “go tshela ka boitsheko, go tlhaloganya boammaaruri, go tlhoafalela Modimo, go rata bakaulengwe le go ikanyega mo Morekoloding.” Gape, Russell o ne a bolela gore “ga go kitla go supiwa ka mokgwa ope gore ditlhogo tse di farologaneng tseo di tlhagang mo lekwalo-pakeng leno di kwadilwe ke mang . . . ele gore boammaaruri bo ke bo tsewe le go anaanelwa ka moo bo tshwanelang ka gone, le gore Morena a ke a tsewe segolo-bogolo jaaka Tlhogo ya kereke le Motheo wa boammaaruri.”

18. Ke ka ntlhayang fa re ka bala Tora ya Tebelo le Awake! re na le tsholofelo?

¹⁸ Go tla go fitlha le gompieno Setlhopha se se Laolang se latela dikaelo tse di tshwanang le tseo. Setlhogo sengwe le sengwe se se go Tora ya Tebelo le Awake! le tsebe nngwe le nngwe, go balelwa le tiro ya botaki e e mo go one, se kelekiwa ke maloko a a tlhophilweng a Setlhopha se se Laolang pele ga se gatisiwa. Go feta moo, bao ba thusang mo go kwaleng ditlhogo tsa Tora ya Tebelo ke bagolwane ba Bakeresete bao ba lemogang ka moo kabelo ya bone e leng masisi ka gone. (Bapisa 2 Ditihalō 19:7.) Ba dirisa dioura di le dintsi ba lotolotsa mo Bibeleng le mo dibukeng tse dingwe tsa tshupiso go tlhomamisa gore seo se kwadilweng ke boammaaruri ebile se latela Dikwalo ka boikanyegi. (Moreri 12:9, 10; 2 Timotheo 1:13) Ga se selo se se sa tlwaelegang gore setlhogo se le sengwe sa makasine​—seo o ka se balang ka metsotso e le 15—​se tseye go tloga ka dibeke di le pedi go ya go feta kgwedi go se kwala.

19. O ka dirang go emela boammaaruri jwa Bibela?

¹⁹ Ka gone, o ka bala Tora ya Tebelo le Awake! o na le tsholofelo. Mme o ka dira se se fetang seo. O ka neela ba bangwe dimakasine tseno ka matlhagatlhaga e le gore le bone ba ke ba ithute boammaaruri ba bo ba iponele melemo ka go utlwa melaetsa ya ‘molebedi yo o emeng mo seraleng sa go tlhola.’ (Isaia 21:8) Ee, wena mmogo le molebedi wa motlha wa rona wa segompieno, lo ka emela boammaaruri.

[Dintlha tsa kwa tlase]

A O A Gakologelwa?

◻ Ke ka ntlhayang fa C. T. Russell a ne a simolola go gatisa dibuka tsa Bibela?

◻ Bakeresete ba pele ba ne ba emela boammaaruri jang?

◻ Ke ka ntlhayang fa lefoko “Tora ya Tebelo” le le mo setlhogong sa makasine ono?

◻ Molebedi wa motlha wa segompieno ke mang, mme o dirisa sedirisiwa sefe segolo-bogolo go godisa lentswe la gagwe?

◻ Tora ya Tebelo le Awake! di emela jang boammaaruri jwa Bibela?

[Tšhate mo go tsebe 13]

Ditlhogo Tse di Tlhomologileng Tsa Tora ya Tebelo, Dingwaga Dingwe le Dingwe tse di Lesome

1879: “Modimo o Lorato”​—se ne sa emela setlhabelo sa ga Jesu sa thekololo jaaka motheo wa thekololo ya setho

1879: “Lebaka la go bo Boikepo bo lle jwa Dumelelwa”​—se ne sa tlhalosa lebaka la go bo go nna gone gaga Jesu Keresete go ne go se kitla go bonala

1880: “Mmele o Mongwe, Moya o Mongwe, Tsholofelo e Nngwe”​—se ne sa supa 1914 jaaka bokhutlo jwa Metlha ya Baditšhaba

1882: “Maduo a Boleo ke Loso”​—se ne sa senola thuto ya go tlhokofalediwa ruri jaaka e e latolang lorato lwa Modimo

1885: “Thuto-tlhagelelo le Motlha wa Boramatlhale”​—se ne sa senola thuto-tlhagelelo jaaka kgopolo ya maaka

1897: “Dikwalo di a Reng ka Tirisa-Badimo?”​—se ne sa neela bosupi jwa gore tirisa-badimo ke ya badimona

1902: “Modimo Pele​—Ditumalano tsa Gagwe”​—se ne sa otlelela go utlwa molao wa Modimo mo ditirisanong tsa lelapa le tsa kgwebo

1919: “Go Sego ba ba Pelokgale”​—se ne sa tsitsibosa phuthego e e neng e tsoga ya baobamedi ba ba pelokgale

1925: “Go Tsalwa ga Morafe”​—se ne sa papamatsa dipolelelopele tseo di bontshang gore Bogosi jwa Modimo bo ne jwa tsalwa ka 1914

1931: “Leina le Lesha”​—ka gone leina Basupi ba ga Jehofa le ne le tla tlhaola Bakeresete ba boammaaruri mo go La-Bodumedi ya botenegi

1935: “Boidiidi jo Bogolo”​—se ne sa bontsha gore go phuthiwa ga bao ba tla tshelelang rurimo lefatsheng go ne go tswela pele

1938: “Phuthego”​—se ne sa itsise ka thulaganyo eo eleng ya bolegodimo tota mo gare ga Basupi ba ga Jehofa

1939: “Boitlhaodi”​—se ne sa nonotsha Basupi ba ga Jehofa lefatshe ka bophara gore ba emelane le dikgatelelo tsa Ntwa ya Lefatshe II

1942: “Lesedi leo Eleng Lone Fela”​—se ne sa utlwatsa modumo wa “gatelang pele” mo tirong e e pelokgale ya Basupi eo e neng e tshwanetse go tswela pele

1945: “Go sa Reketle mo Kobamelong ya Boammaaruri”​—se ne sa bontsha gore Bakeresete ba tshwanetse ba ithiba mo go amogeleng ditshelo tsa madi

1952: “Go Boloka Phuthego e Itshekile”​—se ne sa bontsha gore go kgaolwa ke diphuthego go amana le Dikwalo

1962: “Go Ineela mo ‘Babusiñ ba Bagolo​—Ka Ntlhayang?”​—se ne sa neela mabaka a go ineela ka mo go lekanyeditsweng mo mebusong ya batho

1973: “Go Boloka Phuthego ya Modimo e Itshekile ka ‘Nako ya Gagwe ya Katlholo’”​—se ne sa kgothaletsa gore go ganwe tiriso ya motsoko

1979: “Go Tlhoafalela Ntlo ya ga Jehofa”​—se ne sa boeletsa gore go rera ka ntlo le ntlo go latela sekao sa baaposetoloi

1983: “Baratwa, . . . Lo Nnè Lo Ipolokè mo Loratoñ Loa Modimo”​—se ne sa tlhagisa Bakeresete ka mokgwa oo batenegi ba dirang ka one

1983: “Go Sepela le Modimo mo Lefatsheng la Thubakanyo”​—se ne sa netefatsa gore Bakeresete ga baa tshwanela go nna le seabe ka gope mo tirisong-dikgoka

1984: “Bohulo jwa Bosheng jwa ‘Dinku di Sele’”​—se ne sa papamatsa ka moo setlhopha seno sa mo lefatsheng se dirwang seoposengwe le bao ba leng mo ‘lesakeng’ la ba ba leng mo kgolaganong e ntšha ka gone

1987: “Jubile ya Bakeresete E Felela ka Puso ya Dingwaga tse di Sekete”​—se ne sa bontsha ka moo Bakeresete botlhe ba ba ikanyegang ba bonang kgololesego le botshelo ka gone