Pego ya Baboledi ba Bogosi

KAELO ya Modimo mo Bakereseteng ke “lo sa ipope kaha dithatoñ tsa lona tsa galè, tsa motlha oa go tlhōka go itse ga lona: Me yaka eo o lo biditseñ a le boitshèpō, le lona lo nnè boitshèpō mo go tsheleñ goñwe le goñwe gotlhe ga lona: Ka go kwadilwe, ga twe, lo nnè boitshèpō; gonne Nna ke boitshèpō.” (1 Petere 1:14-16) Boitshwaro jo bo ntseng jalo jo bo boitshepo gantsi ke bosupi jo bo molemo mo go ba bangwe. (1 Petere 2:12) Mo lefatsheng lotlhe, jaaka maitemogelo a a latelang a bontsha, batho ba ba dipelo tse di ikanyegang ba dira diphetogo tse di tlhokafalang go dumalanya boitshwaro jwa bone le kgakololo eno.

◻ Mo Ecuador monna mongwe o ne a emisa thuto ya gagwe ya Bibela fa Mosupi yo a neng a ithuta le ene a ne a kgaolwa ka ntlha ya boitshwaro jo bo maswe jwa kafa dikobong. Tlhokafalo ya gagwe ya semoya e ne ya mo dira gore a tlhotlhomise bodumedi jo bongwe. O ne a tsena mo bodumeding jwa ‘Evangelist’ mme a tswelela-pele go fitlhelela a nna moruti wa kereke ya gagwe. Lefa go ntse jalo, segakolodi sa gagwe se ne sa mo tshwenya, ereka a ne a sa nyalana le mosadi yo a neng a nna le ene. Fa a ne a buisanya le baruti ba dikereke tse dingwe, ba ne ba mo tlhomamisetsa gore seno se ne se sa tshwenye. Lefa go ntse jalo, o ne a ikutlwa gore seno se ne se sa siama, ereka ene Mosupi yo a neng a ithuta le ene a ne a kgaolwa ka ntlha ya boitshwaro jo bo maswe jwa kafa dikobong. O ne a sa tlhaloganye gore ke ka ntlha yang fa a ne a sa kgalemelwe ke kereke ya gagwe. Moragonyana, yo a nnang le ene o ne a kopana le Basupi ba ga Jehofa mme a simolola go ithuta le bone. Monna yoo le ene o ne a simolola go ithuta. Bobeding jwa bone jaanong ba kopanela mo dipokanong, ba gola mo kitsong ya melao-metheo ya Bibela, gape ba ipaakanyetsa go nyalana gore ba tle ba direle Jehofa ka tsela e e phepa le e e amogelesegang.

◻ Mo boitemogelong jo bongwe go tswa kwa Ecuador, Mosupi mongwe o a bolela: “Ka February 1984, mmè mongwe wa dingwaga tse di fa gare o ne a re kopa gore re ithute le ene.” Ke eng se se neng se mo tlhotlheleditse jalo? Kgaitsadia mmè yono e ne e le mongwe wa Basupi ba ga Jehofa, mme o ile a kgatlhwa thata ke boitshwaro jwa gagwe jo bontle. Mo thutong ya bobedi ya Bibela, ba ile ba ama kgang ya go goga, se e neng e le bongwe jwa mathata a mmè yoo. Lefa go ntse jalo, mo thutong e e latelang beke moragonyana o ne a bolela ka go ikgantsha gore fa e sale a ithuta pono ya Bibela mo go gogeng ga a ise a ke a be a tshware motsoko! O ne a na le bothata jo bongwe​—ntlo ya gagwe e ne e tletse ditshwantsho tsa bodumedi. Mme fa a bala Duteronome 7:26, e e reng “u se ka ua isa se se makgapha mo ntluñ ea gago, . . . Ke selō se se neèlècweñ,” o ne a di tshuba tsotlhe.

Fa e sale ka nako eo, go ya pele o ne a simolola go nna gone mo dipokanong mme ga a ise a ke a tlolwe le ke e le nngwe fela. Moragonyana fela, o ne a kgona go fenya bothata jwa gagwe jo bo bokete thata​—o ne a emisa kamano ya boitshwaro jo bo maswe jwa kafa dikobong le monna yo o nyetseng. Jaanong, e le lwantlha mo botshelong jwa gagwe, o ne a kgona go itemogelela boitumelo jwa boammaaruri, ereka a ikutlwa gore jaanong a ne a kgona go direla Jehofa ka segakolodi se se phepa. O ne a kolobediwa ka April 1985 mme ka nako eo o ne a tsamaisa dithuto tsa Bibela di le nne le ba bangwe. Mokgele o o latelang wa gagwe ke go nna mmulatsela, ereka seno e le tsela e e molemo eo a ka bontshang kanaanelo ya gagwe mo go Jehofa, yo o mo golotseng mo “botshelong jo bo lolea le jo bo tletseng boitshwaro jo bo maswe jwa kafa dikobong.”

◻ Matswela a a molemo a boitshwaro jwa bomodimo a ne a bonwa mo sekoleng sa basetsana se se nang le borobalo kwa Kenya, kwa boitshwaro jo bontle jwa Mosupi mongwe bo neng jwa lemogiwa ka tsela e e tlhomologileng. Barutabana ba banna ba robabongwe ba ne ba thapiwa ke sekolo, go akareletsa le mongwe wa Basupi ba ga Jehofa. Mme ka bongwe ka bongwe ba ne ba tshwanelwa ke go kobiwa ka ntlha ya boitshwaro jo bo maswe jwa kafa dikobong le bana bao ba sekole. Morago ga lebakanyana a le mongwe fela go tswa mo go ba ba robang-bongwe o ne a sala​—eleng morutabana yo e neng e le mongwe wa Basupi ba ga Jehofa!

Eleruri, go a kgonagala mo bathong ba ba neng ba tshela matshelo a a nang le boitshwaro jo bo sa siamang gore ba fetoge. Fa re nna ‘boitshepo mo boitshwarong jotlhe jwa rona,’ ga se fela gore re neela ba bangwe bosupi jo bo molemo mme gape re ipedisa pelo ya ga Jehofa. Ka gone, re ipaya mo seemong sa go ya botshelong jo bosakhutleng.​—Diane 27:11.

[Lebokoso mo go tsebe 21]

“Gonne Nna ke Yehofa Modimo oa lona: me ke gōna lo iitshepiseñ, lo nnè boitshèpō; gonne Nna ke boitshèpō.”​—Lefitiko 11:44.

[Lebokoso mo go tsebe 21]

“A re itshekiseñ mo maitshekologoñ aotlhe a nama le a mōea.”​—2 Bakorintha 7:1