Bodumedi jwa Boammaaruri bo Nyeletsa Poifo Jang?

BAKWADI ba Britani ebong Edwin le Mona Redford ba ne ba akabala. Morago ga go kgobokanya ditumelo-botlhodi di feta dikete tse pedi, ba ne ba fitlhela poifo e e tshwanang ya tumelo-botlhodi kwa Scotland, India, le Uganda, le mo Amerika Bogare. Ba ne be ipotse ka go re, ‘Ke eng se se dirileng gore go nne jaana?’ Robertson Davies wa mokwadi o lemoga sentle jaana: “Tumelo-botlhodi e lebege e amana le bodumedi bongwe jo bo ileng jwa nna gone pele ga bodumedi jo re bo itseng.” Mme he, ke “bodumedi bongwe” bofe jo bo tlileng pele ga Bokeresete jo e leng tshimologo ya tumelo-botlhodi?

Modi wa Tumelo-botlhodi le Dikala tsa Yone

Bibela e umaka lefatshe la Shinara (lefelo le le fa gare ga dinoka tsa Tigris le Euferatese, le morago le neng la bidiwa Babelona) jaaka botsalo jwa ditumelo tsa bodumedi jwa maaka, go akareletsa tumelo-botlhodi. Koo, “mocumi eo o nonohileñ” yo o neng a bidiwa Nimerode o ne a simolola go aga Kago e kgolo e e tlontlololang ya Babele. E ne e tshwanetse go dirisediwa kobamelo ya maaka. Lefa go le jalo, Jehofa Modimo o ne a senya maikaelelo a baagi ka go tlhakatlhakanya puo ya bone. Ka bonya ka bonya, tiro e ne ya ema, mme ba ne ba phatlalala. (Genesise 10:8-10; 11:2-9) Mme gongwe le gongwe kwa ba neng ba thibelela gone, ba ne ba ntse ba na le ditumelo tsone tseo, megopolo, le dikinane. Lefa go ntse jalo; Babele e ne a sala e ntse e le lefelo le legolo la bodumedi jwa maaka, gape fa go ntse go ya e ne ya godisa boemo jwa yone jaaka motsadi le morotloetsa maselamose, boloi, le ditumelo tsa tumelo-botlhodi, jaaka tepodinaledi (Bapisa Isaia 47:12, 13; Daniele 2:27; 4:7.) Ka gone, buka ya Great Cities of the Ancient World ya riana: “Tepo-dinaledi e ne e theilwe mo megopolong e le mebedi ya Sebabelona: Dipopego tsa dinaledi, le bomodimo jwa dipopo tsa selegodimo. . . . Bababelona ba ne ba tlotla dipolanete ka tlhotlheletso e mongwe a neng a ka e lebelela mo medimong ya bone e e farologaneng.”

Ditiragalo tseno tsa bogologolo di re amile jang? Buka ya Bibela ya Tshenolō e supa gore tsamaiso ya bodumedi jwa maaka ya lefatshe lotlhe e ile ya simologa mo megopolong ya Babelona wa bogologolo. Bo ne jwa nna go fitlhelela gompieno mme bo bidiwa “Babelona o Mogolo.” (Tshenolō 17:5) Legale, fa nako e ntse e tsamaya ditiragalo tsa lefelo leo di ile tsa tlhotlheletsa megopolo eo ya ntlha ya Sebabelona. Go anama mo go golo ga bodumedi mo go bonalang gompieno ke matswela a gone. Mme jaaka ditlhare tse di farologaneng di tlhoga mo mmung o le mongwe fela, ka mo go tshwanang bodumedi le ditumelo-botlhodi go dikologa lefatshe di na le motheo o le mongwe fela​—Babelona. Go tshwantsha, a re boneng nngwe ya ditumelo tsa tumelo-botlhodi tsa Babelona e e kukunetseng mo e ka nnang mo bodumeding jotlhe jwa lefatshe gompieno.

Poifo ya Baswi​—E Thailwe mo go Eng?

Bababelona ba ne ba dumela gore karolo ya semoya ya motho e ne e falola loso lwa mmele wa senama mme e ne e ka nna ya boa ya tla ya ama ba ba tshelang e le molemong kana bosuleng. Ka gone ba ne ba itshimololela mediro ya bodumedi e e neng e diretswe go itumedisa baswi le go tila ipusolosetso ya bone. Tumelo eno e santse e le gone mo mafatsheng a le mantsi gompieno. Ka sekai, mo Afrika “e ama thata-thata matshelo a malatsi otlhe mo e ka nnang . . . setlhopha sengwe le sengwe sa batho.”​—African Religions​—Symbol, Ritual, and Community.

Le eleng batho ba ba ipitsang Bakeresete mo mafatsheng ao ba a amega. Ka sekai, Henriette, mosadi mongwe wa lotso lwa Se-Afrika yo o dingwaga di 63, o dumela jaana: “Lemororo ke ne ke le leloko le le tlhagafetseng la kereke ya lefelo la rona ya Porosetanta, ke ne ke boifa ‘meya’ ya baswi. Re ne re nna gaufi le mabitla, mme ka nako tsotlhe fa batho ba feta ba ya go fitlha moswi ba fitlha gaufi le ntlo ya rona, ke ne ke tsosa ngwanake mme ke mo ngaparele go fitlhelela batho ba phitlho ba feta. Eseng jalo, ‘moya’ wa moswi o ne o tla tsena mo ntlong ya me mme o tsene mo ngwaneng yo o robetseng.”

Tumelo-botlhodi e e ntseng jalo e nna gone ka ntlha ya gore thuto ya gore moya ga o swe e tswelela-pele mo go La-Bodumedi. Hisitori e bontsha gore bora-dikitso ba Gerika-segolo bogolo Plato​—ba ne ba godisa mogopolo wa Sebabelona wa go sa sweng ga moya. John Dunnett, motlhatlheledi yo mogolo wa thuto ya seruti wa Mo-Britani o kwala gore ka tlhotlheletso ya bone “tumelo ya go sa sweng ga moya e ne ya tla segolo bogolo mo Kerekeng ya Bokeresete.” Thuto eno ya Sebabelona e ile ya tsenya dimilione tsa batho mo bokgobeng jwa poifo ya tumelo-botlhodi.

Lefa go ntse jalo, bodumedi jwa boammaaruri bo nyeletsa poifo ya go nna jalo. Ka ntlhayang? Ka ntlha ya gore bodumedi jwa boammaaruri ga ho a thaiwa mo ditumelong tse di itshetletseng mo Babelona mme bo thailwe mo dithutong tse di fitlhelwang mo Bibeleng.

Moya go ya ka Bibela

Buka ya ntlha ya Bibela e re bolelela gore motho o ne a nna moya, motho yo o tshelang. (Genesise 2:7) Ka gone fa motho a a swa, moya o a swa. Moperofeti Esekiele o ne a netefatsa jaana: “Mōea o o leohañ, go tla shwa ōna.” (Esekiele 18:4; Baroma 3:23) Moya o a swa mme ga o tshele morago ga loso. Mo boemong jwa moo, jaaka Pesalema 146:4 e bolela: “Mōea oa gagwè oa cwa mme a boèle mo mbuñ oa gagwè; ka letsatsi yeuō hèla maikaèlèlō a gagwè a nyèlèle.” Ka gone, John Dunnett wa motlhatlheledi o konela ka gore, go sa sweng ga moya “go sala e ntse e le tumelo e e seng ya Bibela.”

Fa go sena moya o o sa sweng, go ka seke go nne “meya” ya baswi e e tshosang batho mo lefatsheng. Ka gone motheo wa poifo ya tumelo-botlhodi ya baswi ke o o reketlang.

Poifo e e Thailweng mo Boferefereng

Poifo ya tumelo-botlhodi ya baswi e nonofela pele. Ka ntlhayang? Ka gore dilo tse di tshosang di a diragala. Jaaka mo bosigong jole, fa mosadi mongwe wa dingwaga tse di fa gare kwa Suriname a ne a utlwa mongwe a mmitsa ka leina. O ne a mo itlhokomolosa, mme “diatla” tse di sa bonaleng di ne tsa simolola go mo tshwara, fa a gana, o ne a batla go kgamiwa ke maatla a a sa bonaleng. Gongwe o ipotsa gore, ‘fa “meya” ya baswi e sa tshele, jalo he ke mang yo o neng a ikarabelela?’ Gape, kitso ya Bibela e nyeletsa poifo ya tumelo-botlhodi.

E tlhalosa gore maatla a semoya a a bosula, a a bidiwang badimona, a gone. Lefa go ntse jalo, badimona bao ga se meya e e tswang mo baswing. Ke baengele ba Modimo ba ba neng ba nna diganana mme ba ema Satane nokeng, “yo e leng motsietsi oa lehatshe yeotlhe.” (Tshenolō 12:9; Yakobe 2:19; Baefesia 6:12; 2 Petere 2:4) Bibela e bontsha gore badimona ba ipedisiwa ke go timetsa batho, go ba tshosa, le go ba tshwenya. Tlhaloso e e mo go Luke 9:37-43 e bolela gore ledimona le ne la tlhasela mosimane mongwe la mo ‘tsibiketsa, a phoke mahulo’ le go mo utlwisa botlhoko a sala a na le dintho. Le eleng fa mosimane a ne a isiwa kwa go Jesu, badimona ba mo piriganya, ba mo tsibiketsa mo go botlhoko. “Me,” pego e tswelela-pele, “Yesu a kgalemela mōea o o mashwè, a hodisa ñwana, a ba a mo neèla rragwè.”

Se se kgatlhisang, Cyclopedia of Biblical, Theological, and Ecclesiastical Literature e tlhalosa tumelo-botlhodi jaaka “kobamelo ya medimo ya maaka.” Ka gone, fa o dira ditiro tsa tumelo-botlhodi e e ntseng jalo, gongwe kwantle ga kitso, o itumedisa “medimo ya maaka,” kana badimona! Kobamelo e e ntseng jalo ya maaka ke molato o o masisi kgatlhanong le Jehofa Modimo.​—Bapisa 1 Bakorintha 10:20 le Duteronome 18:10-12.a

‘Ineele mo Modimong’​—A O Dira Jalo?

A o ka nna le bopelokgale jwa go hularela badimona bao ka go gana tumelo-botlhodi? Ke boammaaruri gore badimona ba na le maatla. Mme morago ga go bontsha gore re tshwanetse go kgetha fa gare ga go direla Jehofa Modimo kana badimona, moaposetoloi Paulo o ne a botsa gore: “A re thata bogolo go [Jehofa]?” (1 Bakorintha 10:21, 22) Nnyaa, ga re thata go mo feta​—mme gakologelwa, Satane kana badimona ba gagwe le bone ga ba a nonofa go mo feta! Mo boemong jwa moo, badimona bao ‘ba tsitsibana’ ka ntlha ya go boifa Jehofa. (Yakobe 2:19) Mme Modimo Mothatayotlhe o go neela tshireletso ya gagwe fa o e kopa. Mokwadi wa Bibela Jakobe o tswelela gape ka gore: “Lo ineèleñ mo Modimoñ; me tlhabanañ le Diabolo, me o tla lo tshaba.” (Yakobe 4:7) Poifo ya gago ya tumelo-botlhodi le yone e tla sia.

Diketekete tsa batho go dikologa lefatshe bao nako nngwe ba neng ba tshelela mo poifong le mo bokgobeng jwa dingwao tsa tumelo-botlhodi jaanon ba ka supela seo. Diabolo o ne a ba tshaba! ga tsela efe? Gakologelwa, mmaba wa poifo ya tumelo-botlhodi ke kitso. Moporofesa Rudolph Brasch, yo eleng moitseanape wa tshimologo ya tumelo-botlhodi a re: “Ke kgang fela ya thuto​—gore fa batho ba rutega thata, go dumela botlhodi ga bone le gone go a fokotsega.”

Ka gone, fa Henriette, yo o umakilweng pele, a ne a amogela taletso ya Basupi ba ga Jehofa go simolola thuto ya Bibela kwantle ga tuelo, ka bofefo o-ne a bona boferefere jwa sedimona. Maikatlapelo a tumelo-botlhodi a ne a kgaoga. Ene, gammogo le diketekete tsa ba ba tshwanang le ene, ba itemogetse boammaaruri jwa mafoko a a mo go Bahebera 2:15. Koo, moaposetoloi Paulo a re Jesu o tla “golola bone botlhe ba e rileng ka poifo ya loso ba bo ba ntse ba le mo kgolegelong ya botshelo jotlhe jwa bone.” (New International Version) Fela jaaka letsatsi la moso la lefelo le le mogote le nyeletsa monyo o montsi wa lefelo la pula e ntsi, lesedi la boammaaruri jwa Bibela le nyeletsa poifo ya tumelo-botlhodi yotlhe.

Gompieno, ba le bantsi ba e neng e le ‘makgoba a poifo’ ba tlositse dipheko mo melaleng ya bone le megala ya tshireletso mo baneng ba bone. Jaanong ba ikutlwa jaaka Isaac yo o dingwaga di 68 a ikutlwa, yo a neng a le ngaka ya setswana mo Afrika Borwa. Morago ga go ithuta Bibela le Basupi ba ga Jehofa, o ne a re: “Ke ikutlwa ke itumetse thata ebile ke gololesegile ka gore ga ke sa tlhole ke imelwa ke poifo ya meya.” Abo mafoko a ga Jesu a itshupa a le boammaaruri jang ne a a reng: “Me lo tla itse boamarure, me boamarure bo tla lo golola.”​—Yohane 8:32.

Ee, bodumedi jwa boammaaruri bo nyeletsa poifo!

[Dintlha tse di kwa tlase]

[Setshwantsho mo go tsebe 5]

Ditumelo-botlhodi di ne tsa anama mo lefatsheng lotlhe go tswa kwa pitseng-kgolo kwa Babelona