Ke Eng se re ka se Ithutang Go Tswa Popong ya Modimo?

MAPHOI a kgona go bona kwa a yang teng ka majananyana a mmakenete mo ditlhogong tsa one le mo melaleng. Go na le ditlhapi dingwe tse di fetlhang motlakase. Mefuta e le mmalwa ya dinonyane tse di farologanyeng di fokotsa letswai mo metsing a lewatle a di a nwang. Ditlhapi dingwe tse di nang le logapa di kgona go tlatsa dikgapa tseo ka metsi gore di nwele kana go di tlatsa ka kese gore di kgone go kokobala gape.

Ee, e ka ne a lemoga seo kana nnyaa, fa motho a dirisa kompase, a fetlha motlakase, a tlhama sabomarine, kana a tlhotlha letswai mo metsing a lewatle, tota o a bo a etsa fela popo ya Modimo.

Ruri, popo ya Modimo e tsholetse motho dithuto di le dintsi mo e leng gore fa gongwe e bidiwa “buka ya popo.” Ka sekai, bionics ke lekala la boitseanape leo le itebagantseng le tsela ya go dirisa ditsamaiso tse di fitlhelwang mo popong. Tseno di akareletsa diphuka tsa sefofane tse go tserweng malebela mo go tsa dinonyane, disabomarine tseo di bopilweng jaaka didolofine, le ditshegetsi tsa dikonkereite tseo di tlhamilweng jaaka marapo a motho. A mme kitso ya boranyane ke yone fela e e tlhagisiwang ke “Buka ya tlholego?”

Nnyaa, fa gongwe e tlhagisa dithuto tse di nang le mosola tseo le tsone di supang tsela e e molemo ya botshelo. Ka sekai, fa a ne a lebisitse mo botlhaleng jwa tlholego jwa tlhagafalo ya tshoswane, buka ya Bibela ya Diane e kgothatsa jaana: “Ea kwa choshwaneñ, wèna mmoduhadi; u akanyè mekgwa ea eōna, me u tlhalehè: E e reñ e sena kgosi, leha e le molebedi, kgotsa molaodi, E be e etleetse diyō tsa eōna go le selemō, e kokotletse diyō tsa eōna mo lobakeñ loa thōbō.”—Diane 6:6-8.

Lefa go ntse jalo, ethology, lekala la boitseanape le le iphakang gore le ithuta sengwe ka mekgwa ya diphologolo, le na le fa le tlhaelelang teng. Boitshwaro jwa motho ga se jo bo ka bewang mo seemong se se tshwanang fela le jwa diphologolo. Go na le dipharologanyo tse di lemosegang motlhofo, jaaka puo, le tsela e e raraanyeng thata ya go akanya e e mo mothong, di tshwanetse go akanyediwa le tsone. Mme ke fela jaaka moitseanape mongwe a ne a tlhalosa: “Ga re ditshwene tse di botlhale fela.” Ditlhaloganyo tsa rona “di re farologanya gotlhelele le mefuta e mengwe ya ditshedi.”

Mme gape, go na le dipotso tseo di ka se arabiweng ke go ithuta popo ka kelotlhoko go le gosi. Tseo di akareletsa tse: A botshelo bo na le boikaelelo? A Modimo o gone, mme fa go ntse jalo, a o amega ka rona? A jaanong re bone fa e le gore a dipotso tse di ntseng jalo di ka arabiwa.

[Lebokoso/Setshwantsho mo go tsebe 3]

Popo ke Yone e Simolotseng Pele: Sonara

Bommamanthwane ba na le sedirisiwa se se batlileng se tshwana le sonara, se se ba kgonisang gore ba bone ba bo ba latele motlhala wa selo se ba batlang go se bolaya ka go romela medumo ba bo ba elatlhoko kwa e itayang teng. Mme go na le motoutwane mongwe (dogbane tiger) o o ntshang marang a a tshwanang a a tlhabantshang a motlhasedi. Fa mmamanthwane a tlelwa ke lerang, ka go bo a sena nako e e lekaneng go tlhatlhoba gore a ke sekgoreletsi kana nnyaa, o tila motoutwane oo.

Moperofesa James Fullard, wa Unibesithi ya Toronto, mo Canada, o ne a tlhalosa kgatlhego ya gagwe, ka gore: “Selo se se jesang kgakge ke namane e tona ya boikitsiso jo bo farologanngwang le tiriso ya boboko tseo di dirisiwang ke bommamanthwane le metoutwane, di dirisa disele tsa boboko tse di seng kaekae. Di supa tshomarelo e kgolo le maranyane ao a tswelwang pelo ke batlhabani ba difofane tsa ntwa.”

Lebokoso/Setshwantsho mo go tsebe 4]

Popo ke Yone e Simolotseng Pele: “Diving Bell”

Mo e ka nnang masimologong a lekgolo la dingwaga la bo-16, go ne ga bolelwa fa Leonardo da Vinci a tlhamile didirisiwa tsa go thabuela mo metsing. Mme segokgo sengwe se se bidiwang Argyroneta aquatica se ne se setse se na le tsela eo se kgonang go e dirisa fa se hema fa se ntse se le kafa tlase ga metsi. Fela jaaka Andrée Tétry a tlhalosa mo bukeng ya gagwe Les outils chez les êtres vivants (Didirisiwa tse di Dirisiwang ke Ditshedi), segokgo seno “se itshetlela mo dinokaneng tse di elelang ka bonya tse di kafa tlase ga ditlhatshana se bo se loga mo go tsone lotloa lo lo sephara lo lo siameng sentle, lo lo tshwaragantsweng ka ditlhaletlhale. Fa se kwetoga, . . . segokgo seo, ka bofefo fela, se phamola lerothodi la phefo ka maodi a sone a a mo mpeng a a fetlhang metsi. . . . Segokgo se bo se tiba gape se bo se lesa lerothodi la phefo kafa tlase ga mafaratlhatlha a ditlhale tse di boleta. Lerothodi jaanong le a tlhatloga go nna le kwetogile mo lotloeng.” Ka go nna se boaboelela, segokgo se kokoanya phefo e e lekanyeng gore se e dirise letsatsi lotlhe kafa tlase ga tloloko ya sone, koo se fetang se eja dijo tse se di bapetseng mo bosigong. Malebana le seno, Tétry o oketsa ka go re: “Ka gone he, didirisiwa tsa motho tsa go thabuela mo metsing, di tshwana le mefuta e e kgethegileng thata e e bonwang mo popong.”