Botshelo le Bodihedi tsa ga Jesu

Ba Palelwa ke go Mo Tshwara

FA MODIRO wa Metlaagana o santse o tsweletse, baeteledipele ba bodumedi ba romela maotlana go ya go tshwara Jesu. Ga a leke go iphitlha. Jesu o tswelela ka go ruta phatlalatsa, a bolela jaana: “Ke sa nna le lona ka lobakanyana, me ke tloga ke ea kwa go eo o nthomileñ. Lo tla mpatla, me ga lo ketla lo mphitlhèla; le kwa ke gōna, ga lo kake loa ea go hitlha gōna.”

Bajuda ga ba tlhaloganye seno, mme ka jalo ba botsana jaana: “Ana monna eo o tla ea kae kwa re se ketlañ re mo hitlhèla gōna? A o tla ea kwa Phaladiñ e e kwa Bagerikeñ a ea go ruta Bagerika? Ana lehoko ye ke eñ, ye o le buileñ, a re, Lo tla mpatla, me ga lo ketla lo mphitlhèla: le kwa ke gōna, ga lo kake loa ea go hitlha gōna?” Tota gone, Jesu o bua kaga loso le go tsosediwa kwa legodimong ga gagwe tseo di atamelang, koo baba ba gagwe ba ka se mo lateleng gona.

Letsatsi la bosupa leo e leng lona la bofelo la modiro le a goroga. Mo mosong mongwe le mongwe wa modiro, moperisiti o ne a tsholola metsi, ao a neng aa gile kwa lekadibeng la Silwame, gore a elelele kwa motheong wa aletare. E le go gopotsa batho ka tirelo eno ya letsatsi le letsatsi, Jesu o goa a re: “Ha moñwe a nyōrilwe, aa tlè mo go nna a nwè. Eo o dumèlañ mo go nna, dinoka tsa metse a a tshedileñ di tla èla di cwa mo mpeñ ea gagwè, yaka dikwalō di buile.”

Totatota, Jesu fano o bua ka diphelelo tse dikgolo tseo di tla tlang morago ga go tshololwa ga moya o o boitshepo. Go tshololwa gono ga moya o o boitshepo go diragala mo ngwageng o o latelang ka Pentekosete. Dinokana tsa metsi a a tshedileng di elela fa barutwa ba ba 120 ba simolola go rerela batho. Mme go fitlha ka nako eo, ga go na moya ka tlhaloganyo ya gore ga go ope wa barutwa ba ga Keresete yo o tloditsweng ka moya o o boitshepo le go bilediwa botshelo jwa selegodimo.

Bangwe ba arabela thuto ya ga Jesu, ka go simolola go re: “Amarure, eo ke ene moperofeti,” go bonala fa ba bua ka moperofeti mongwe yo mogolo mo go Moshe yo go neng go solofeditswe gore o tla tla. Ba bangwe baa re: “Ke Keresete.” Ba bangwe ba ganela ka go re: “Ao! Keresete o cwa Galilea? A dikwalō ga dia re, Keresete o cwa mo losikeñ loa ga Dafide, le kwa Bethelehema, motsana o Dafide o na a nna mo go ōna?”

Jalo boidiidi joo bo simolola go se utlwane ka mafoko. Ba bangwe ba batla gore Jesu a tshwarwe mme ga go na ope yo o mo amang. Fa maotlana a boa mme a sena le Jesu, baperesiti ba bagolo le Bafarasai ba botsa jaana: “Lo no lo sa tleleñ naè?”

“Ga go e se go ko go bue motho opè yaka èna,” maotlana a araba jalo.

Ba tletse bogale, baeteledipele bano ba bodumedi baa mo sotla, ba mo senya, ba mo tlhapatsa. Ba sotla ka go re: “A le lona lo timedicwe? A bañwe ba balaodi, kgotsa ba Bafarasai, ba dumetse mo go èna? Me batho ba ba bantsi ba ba sa itseñ molaō, ba hutsegile.”

Gone fela foo, Nikodemo, ebong Mofarasai le molaodi wa Bajuda (ke gore, leloko lengwe la Lekgotla la Bajuda), o buelela Jesu ka bopelokgale. O tla gakologelwa gore mo dingwageng di le pedi le sephatlo tse di fetileng, Nikodemo o ne a tla kwa go Jesu bosigo mme a dumela mo go ene. Jaanong Nikodemo a re: “A molaō oa rona o tlo o sekise motho o e se o utlwe mo go èna pele, me o itse se o se dihañ?”

Bafarasai ba galefisiwa ke gore le eleng mongwe wa bone o emela Jesu. “A le wèna u oa Galilea?” Ba akgela jalo ka bogale. “Botsisa, me u bōne ha go sa cwe moperofeti opè mo Galilea.”

Lefa Dikwalo di sa bolele ka tlhamalalo gore moperofeti o ne a tla tswa kwa Galilea, gone di supa gore Keresete o tswa koo, jaaka di re “lesedi ye legolo” le tla bonwa mo kgaolong eno. Mme go fapaana le dikgopolo tse di phoso tseno, Jesu o tsholelwa kwa Bethelehema, mme ke setlogolwana sa ga Dafide. Lefa gongwe Bafarasai ba ka ne ba itse kaga seno, e tshwanetse ya bo e le bone ba phatlalatsang dikgopolo tseno tse di phoso tse batho ba nang le tsone kaga Jesu. Yohane 7:32-52; Isaia 9:1, 2; Mathaio 4:13-17.

◆ Ke eng seo se diragalang mo mosong mongwe le mongwe wa modiro, mme Jesu o ka ne a gogela tlhokomelo jang mo go seno?

◆ Ke ka ntlhayang fa maotlana a palelwa ke go tshwara Jesu, mme baeteledipele ba bodumedi baa reng?

◆ Nikodemo ke mang, boikutlo jwa gagwe ka Jesu ke bofe, mme Bafarasai-ka-ene ba mo tsaya jang?

◆ Ke bosupi bofe jo bo gone jwa gore Keresete o ne a tla tswa Galilea?