Bibela le Boitsholo jwa Basha

“Go lebega basha ba dingwaga tsa bolesome ba tshela mo nakong e e bosula go di feta tsotlhe malebana le ka moo ba bolelelwang ka dikgang tsa tlhakanelo-dikobo ka gone: Dibaesekopo, mmino, radio le thelebishene di ba bolelela gore go tlhakanela dikobo go a gadisa, go monate . . . Lefa go ntse jalo, ka nako e e tshwanang, basha ba ithuta gore basetsana ba ba molemo ba tshwanetse go gana.”—The Alan Guttmacher Institute.

BASHA ba segompieno ba goletse mo motlheng oo go nang le kakabalo malebana le gore boitsholo ke eng mo go one. Lefa go le jalo, Bibela e neela kaelo e e phepafetseng, e e sa dikologeng ka boitsholo jwa bonna le bosadi. Lemororo dithulaganyo tsa thuto ya tsa kafa dikobong di rata go lebisa tlhokomelo mo go tileng go ithwala, Bibela yone e bontsha gore go tlhakanela dikobo pele ga lenyalo ke sone selo se se tshwanetseng go tilwa. “Mo loa go itse ka tlhōmamō, ha go se seaka [go akareletsa go tlhakanela dikobo pele ga lenyalo] leha e le motho eo o mashwè, leha e le moiphetlhi . . . eo o ka dihañ le boshwa bopè mo bogosiñ yoa ga Keresete le Modimo,” Bibela e bolela jalo. (Baefesia 5:5) Ka phepafalo, dikamano tsa bonna le bosadi di tshwanetse go felela fela mo lenyalong.

Ka jalo tharabololo ya bothata jwa go ithwala ga basha ga se go ruta basha kaga go thibela pelegi, mme ke go ba ruta ka boitsholo le ka tsela ya semoya. Bibela e bontsha ka papamalo gore ke mang yo o tshwanetseng go neela thuto eno: “Borra bana, lo se ka loa rumola bana ba lona go ba gakatsa: me lo ba godisetsè mo koatlhaoñ le mo taoñ ea Morèna.”—Baefesia 6:4.

Lefa go ntse jalo, mo patlisisong nngwe, basha ba ne ba kopiwa gore ba “bolele gore batsadi ba bone ba wela kae mo go ba ba sa kgotsofatseng go isa go ba ba kgotsofatsang tota mo go neeleng tshedimosetso ya dikamano tsa bonna le bosadi. Basha ba le bantsi ba ne ba bolela gore bommaabone ba wela mo go ba ba kgotsofatsang go le gonnye fela. Ba ne ba bolela gore borre ba ne ba wela mo go ba ba sa kgotsofatseng gotlhelele.” A go a utlwala, he, go lebelela gore batsadi ba kaele bana ba bone mo dikgannyeng tse di malebana le bonna le bosadi?

Go Ruta Basha ka Boitsholo

Kgosi Solomone o rotloetsa basha jaana mo go Diane 4:1-4: “Bomorwaaka, utlwañ thutō ea rra batho, . . . Gonne ke ne ke le morwa rrè, ke le tlekeeco, ke ratèga ke le nosi mo matlhoñ a ga mmè. Me rrè a nthuta, a nthaea, a re, A pelo ea gago e tshegetsè mahoko a me.” Go bonala gore Solomone o ne a kgona go tlotla le eleng ka dilo tse di masisi tota le rraagwe; Solomone ka boene o tswelela pele go tlhalosa boitsholo jo bo sa siamang jwa kafa dikobong ka tshosologo tota.—Diane 5:1-19.

Mo gare ga Basupi ba ga Jehofa, malapa a le mantsi a nna le puisano e e tshwanang le eo le bana ba bone ba sa fitlhe sepe—mme ba nna le katlego e kgolo! Ba dira mo go fetang fela go raya bana ba bone ba re “Nnyaa!” mabapi le dikamano tsa bonna le bosadi. Bibela e ba thusa gore ba neye bana ba bone mabaka a a utlwalang a gore ba tile boitsholo jo bo sa siamang. Gape a o ko o tlhokomele mafoko a ga Solomone. Mo go Diane 5:3, 4, o kgothaletsa makau gore a tile go tlhakanela dikobo le mosadi wa seaka. “Dipounama tsa mosadi eo o leñ o sele [wa seaka] di rōtha sedinotshe, magalapa a gagwè a bolèta bogolo go loukwane.” Ee, tebelelo ya boitshwaro jo bo sa siamang e ka lebega e gogela tota. Lefa go ntse jalo, Solomone o tlhagisa jaana: “Bokhutlō yoa gagwè bo botlhoko yaka loñana, bo bogale yaka chaka e e magale mabedi.”

Jaaka Solomone, batsadi ba ka akantshana le bana ba bone ka diphelelo tsa dikamano tsa bonna le bosadi. Segakolodi se se utlwisitsweng botlhoko, go ithwala mo go sa batlegeng, malwetsi a a tshelanwang ka go tlhakanela dikobo a a ntseng jaaka AIDS—tseno ke diphelelo tse di botlhoko tsa dinako di sekae tsa monatenyana o o gogelang. Solomone o tswela pele go kgothatsa basha gore ba seka ba “naea ba sele tlotlō ea [bone].” (Diane 5:9) A ga se go bontsha go tlhoka go itlotla fa mosha a ineela mo go mongwe yo o sa kgatlhegeleng lenyalo? A ga se go intsha seriti go nna fela jaaka sengwe seo wena kgotsa mongwe a se dirisetsang go kgotsofatsa dikgotelo tsa gagwe tsa bogagapa? Batsadi ba ka thusa bana ba bone gore ba lemoge dintlha tseno.

Solomone o ne a tswelela pele go fa kgakololo malebana le ka moo go ka tshwarwang motho wa boitsholo jo bo sa siamang ka gone: “Katosetsa tsela ea gago kgakala naè, u se ka ua atamèla moyakō oa ntlo ea gagwè.” (Diane 5:8) Ka mo go tshwanang, batsadi ba ka naya basha kgakololo e e dirang ya ka moo ba ka tilang maemo a a kotsi ka teng. Ba ka ba kgothaletsa gore ba se ka ba ratana le batho ba ba senang boitshwaro. Mme fa ba fitlhelela selekanyo seo ba tshwanelegelang go tsena mo lefereong, ba ka kgothalediwa gore ba tseye dikgato tse ba ka di dirisetsang go tila boitshwaro jwa go leofa. Ka sekai, balekane ba ba fereanang ba ka rulaganyetsa gore go nne le mongwe yo o tsamayang le bone ka metlha fa ba intsha mmogo. A ke selo se se siilweng ke nako? Gongwe. Mme go botoka go tsaya dikgato tse di molemo tsa go ipabalela go na le go “lela mo bokhutloñ yoa gago, motlhañ nama ea gago e tlhōrègañ, le mmele oa gago: Me ua re, A bo nkile ka ila thutō, . . . leha e le go sekègèla ba ba nthutileñ tsèbè.”—Diane 5:11-13.

Go Thusa Basha Gore ba Boife Jehofa

Go ya ka diphopholetso dingwe, go na le basha bao ba fetang dimilione di le 12 kwa United States e le nosi ba ba tlhakanelang dikobo. Le eleng leroborobo la AIDS ga le a thusa lefa e le go le gonnye go emisa lekhubu leno la boitsholo jo bo sa siamang. Lefa go le jalo, Basupi ba ga Jehofa ba leka go tsenya sengwe se se tlhotlheletsang thata go gaisa go boifa AIDS kana go ithwala mo baneng ba bone: go boifa Jehofa Modimo ka tshwanelo. Solomone o gakolola basha jaana mo go Diane 5:21: “Gonne ditsela tsa motho di ha pele ga matlhō a ga Yehofa, me o lekalekanya ditselana cotlhe tsa gagwè.” John, ebong mongwe wa Basupi ba ga Jehofa le rre wa bana ba le bane, o gakolola jaana: ‘Seo se thusang ke fa bana ba boifa Jehofa ka lorato. O seka wa boifa go bolelela ngwana wa gago gore Jehofa a ka utlwisiwa botlhoko ke ditiro tsa rona tsa bogagapa.’—Bapisa Diane 27:11.

Legale, gore go boifa Modimo e nne sengwe se se nang le matswela sa go thibela boitsholo jo bo maswe, Modimo o tshwanetse go nna wa sebele tota mo mosheng. (Bapisa Bahebera 11:27.) Batsadi ba ka thusa bana ba bone gore ba tlhagolele kamano ya mmatota le Modimo ka gore ba ithute Bibela ka metlha, ba rapele tsatsi le letsatsi, le ka boitemogelo jwa mmatota mo botshelong. Fa mosha a simolola go lemoga gore Modimo o amega ka ene, o tla tlhotlheletsega gore a tile boitshwaro joo bo ka nnang jwa Mo itumolola.—1 Petere 5:7.

Se se kgatlhisang ke gore, kamano ya mosha le Modimo e ka thusa gape go kgotsofatsa ditlhokafalo tse dingwe tseo gantsi mo basheng ba bantsi di nnang fela di sa kgotsofadiwa. Ka sekai, bomankge ba bolela gore gantsi boitsholo jo bo maswe ke tsela eo basha ba lwantshang maikutlo a go tlhoka thata kana a go tlhoka go nna le seriti ka yone. Lefa go ntse jalo, motho yo o nang le botsalano le Jehofa ga aa tshwanela go tshwenngwa ke maikutlo a a ntseng jalo! Mosha yo o ntseng jalo a ka nna a re: “Modimo ke mothusi oa me: Yehofa o na le ba ba tshegetsañ mōea oa me.”—Pesalema 54:4.

Pono e e Lekalekaneng ka go Tlhakanela Dikobo le Lenyalo

Tota gone, batsadi ga ba batle gore bana ba bone ba nne le pono e e sa siamang kana e e ditlhong ka dikamano tsa bonna le bosadi. Lemororo Bibela e kgala boaka, gape e bontsha gore go tlhakanela dikobo go ka itumedisa eleruri—ke gore, mo lenyalong fela. Solomone o oketsa jaana a bua ka tsela ya go kgabisa puo: “A mocwedi oa gago o nnè segō; me u itumèlè mo mosadiñ oa bokau yoa gago . . . A mabèlè a gagwè a gu thethebatsè ka metlha eotlhe.”—Diane 5:18, 19.

Fa go tlhokomelwa tsela eno e e kwa godimo eo dikamano tsa lenyalo di lebiwang ka yone, ga go na lebaka lepe la gore batsadi ba ikutlwe ba tlhajwa ke ditlhong go tlotla ka dilo tse di masisi tseno. John (yo re buileng ka ene pelenyana) o bolela gore: “Re bua nabo puo phaa ka metlha, ka jalo kgang ya go tlhakanela dikobo ga se sephiri. Re tlotlomatsa gore ke mpho e e tswang kwa Mmoping, ebong Jehofa, eo e tshwanetseng go ipelelwa ke monna le mosadi ka nako e e tshwanetseng.” Rre yo mongwe wa basimane ba le babedi ba dingwaga tsa bolesome o bolela jaana: “Re ile ra bua puo phaa le bone ka dikamano tsa bonna le bosadi go tloga fa ba sale babotlana. Re ile ra leka go ba ruta gore ba nne le pono e e tlotlegang, e e kwa godimo ka lorato le go tlhakanela dikobo. Re nna le puisano e e tswelelang pele.” Se se botlhokwa ke gore bana ba bone ba itshwere sentle.

Go Dira Gore Basha ba ‘Tlhalefele Polokong’

“Batho ba ba boshula le batsietsi ba tla nna ba shulahalèla pele hèla,” moaposetoloi Paulo o ne a bonela pele jalo. (2 Timotheo 3:13) Ka jalo ditekanyetso tsa boitsholo di tla nna di ya kwa tlase go ya pele. Batho ba tla nna ba tlhaselwa go ya pele ke go ithwala ga basha le boitsholo jwa bone jo bo maswe.

Batsadi ba ba boifang Modimo ba tla retologela mo Bibeleng go “tlhalehisetsa [bana ba bone] polokoñ.” (2 Timotheo 3:15) Fa o lemoga gore wena ka bowena o tlhoka go rutwa Bibela, o seka wa tshaba go ikopanya le Basupi ba ga Jehofa ka go kwalela bagatisi ba makasine ono. Ba tla itumelela go go rulaganyetsa gore o amogele thuto e e ntseng jalo mahala. Gape Basupi ba ga Jehofa ba ka go naya dibuka tse di ntseng jaaka buka ya Bosha jwa Gago—Go Iponela Molemo mo go Jone.a E na le tshedimosetso ya Dikwalo eo e thusitseng diketekete tsa basha gore ba falole dirai tsa lefatshe tsa boitsholo jo bo sa siamang.

Lefa go ntse jalo, go tweng ka basetsana bao ba setseng ba diragaletswe ke matlhotlapelo a go ithwala bana ba dikgora? Le mo mabakeng a a ntseng jalo go na le tsholofelo. Modimo ‘o itshwarela ka botlalo’ motho yoo ka boammaaruri a swabelang tsela ya gagwe ya boitshwaro. (Isaia 55:7) Lefa go nna motsadi o le esi go se motlhofo, motho a ka bona katlego mo go seo ka go dirisa melao-metheo ya Bibela. Mosadi mongwe yo mosha yo o neng a na le bana ba bararo a sa nyalwa pele ga a fetoga Mokeresete o ile a dira fela jalo. O leka go dirisa Lefoko la Modimo mo lelapeng la gagwe. Ka go kopanela gaufi le phuthego ya Basupi ba ga Jehofa, o ile a bona kgotsofalo e kgolo mmogo le tshegofatso. O bolela jaana: “Eleruri go monate go direla Modimo yo o itshwarelang thata jaana, le go nna le bakaulengwe le bokgaitsadi ba ba nang le kutlwisiso jaana. Ke la ntlha mo botshelong jwa me, ke ikutlwa ke le phepa ebile ke na le pholo e e molemo, mo nameng le semoyeng.”

Tota gone, go tla bo go le molemo go tila mathata a go tlhakanela dikobo pele ga lenyalo. Ka boitumelo, diketekete tsa basha gompieno ba dira jalo ka gonne ba latela kgakololo e e mo nakong ka gale ya Bibela.

[Ntlha e e kwa tlase]

[Mafoko a a mo go tsebe 6]

Basupi ba ga Jehofa ba leka go tsenya sengwe se se tlhotlheletsang thata go gaisa go boifa AIDS kana go ithwala mo baneng ba bone: eleng go boifa Jehofa Modimo ka tshwanelo

[Mafoko a a mo go tsebe 6]

Go ya ka diphopholetso dingwe, go na le basha ba ba fetang dimilione di le 12 kwa United States e le nosi ba ba tlhakanelang dikobo

[Setshwantsho mo go tsebe 5]

Batsadi ba ka nna le puisano e e tswelang pele le bana ba bone ka dilo tse di malebana le bonna le bosadi

[Ditshwantsho mo go tsebe 7]

Basha ba Bakeresete ba tla tila boitsholo jo bo ka senyang kamano ya bone le Modimo