Dipotso Tse Di Tswang go Babadi
◼ Ke ka ntlhayang fa Dikhutsahalō 4:10 e bua ka basadi bao ba neng ba ja bana ba bone jaaka “basadi ba ba pelo namagadi”?
Fa Jeremia a ne a tlhalosa boemo jo bo maswe jwa Bajuda ka nako ya fa Bababelona ba dikaganyeditse Jerusalema ka 607 B.C.E., o ne a kwala jaana: “Diatla tsa basadi ba ba pelo namagadi di apeile bana ba bōnè tōta; e ne e le diyō tsa bōnè mo tshenyegoñ ea morwadia batho ba me.”—Dikhutsahalō 4:10.
Makgolokgolo a dingwaga pele ga foo, Moshe o ne a ile a tlhagisa Baiseraele gore isagwe ya bone e ne e tla nna le “tshegōhacō” kana “phucō.” Ba ne ba tla ipelela masego fa ba ne ba ka boloka ditaolo tsa Modimo, mme ba ne ba tla itlisetsa pogo fa ba ne ba ka gana ditsela tsa gagwe tsa tshiamo. Nngwe ya diphelelo tse di maswe e ne e tla nna gore Baiseraele ba ne ba tla nna mo seemong se se maswe sa go ja bana ba bone. (Duteronome 28:1, 11-15, 54, 55; 30:1; Lefitiko 26:3-5, 29) Seno se ne sa diragala ka boammaaruri morago ga fa Jehofa a sena go tlogela morafe o o sa ikanyegeng, o o senang kutlo oo, gore o fenngwe ke Bababelona.
Mo go Dikhutsahalō 4:10 moperofeti Jeremia o kwala kaga ntlha e e itsegeng ya gore ka tlholego mmè o pelonolo, o pelonamagadi, ebile o sireletsa bana ba gagwe. (1 Dikgosi 3:26, 27; 1 Bathesalonia 2:7) Lefa go le jalo, leuba leo le neng le le mo Jerusalema e e neng e dikaganyeditswe ke masole le ne le le legolo thata mme tlala eo e neng ya bakiwa ke lone e ne e le kgolo mo eleng gore bommè bao ka tlwaelo ba neng ba tshwanetse go nna pelonamagadi ba ne ba apaya bana ba bone mme ba ba ja.—Bapisa Dikhutsahalō 2:20.
Go ne ga nna le seemo se se tshwanang morago ga fa Bajuda ba sena go gana Mesia, yoo a neng a ile a tlhagisa kaga go dikaganyediwa ga Jerusalema ke masole. (Mathaio 23:37, 38; 24:15-19; Luke 21:20-24) Raditiragalo Josephus o tlhalosa ka sengwe sa dilo tseo di neng di tshosa ka nako ya tikaganyetso eo ka 70 C.E.: “Maria morwadia Eliasare . . . o ne a bolaya morwawe, mme a mo gadika a ja bontlhabongwe jwa gagwe, a fitlha le go boloka karolo e e setseng.”—The Jewish War, e e ranotsweng ke G. A. Williamson, kgaolo 20, tsebe 319.
Eleruri, go tlogela melao le ditsela tsa Modimo ga se tsela e e botlhale.