Dipotso Tse Di Tswang go Babadi

◼ Go gelebetega ga dinaka tse supa tsa seengele tsa Tshenolō go ne ga simolola go utlwala leng?

Mo go Tshenolō dikgaolo tsa 8, 9, le 11, re bala ka baengele ba le supa bao ba neng ba letsa dinaka tse supa, bao ba neng ba itsise ka dipetso tse di setlhogo tse di welang dikarolo dingwe tsa batho. Bano ba emela go itsisiwe ga dikatlholo tsa ga Jehofa tse di ileng tsa nna tsa phasaladiwa ke batho ba ga Jehofa go ralala nako eno ya bofelo goo go lebegang go simolotse kwa kopanong ya kwa Cedar Point ka 1922.—Bona Tshenolō—Konelo ya Yone e e Molemolemo e Atametse!, kgaolo 21 go ya go 23 le kgaolo 26.

Go gelebetega ga dinaka tsa ntlha tse nnè go senola boemo jwa go swa mo semoyeng ga karolo ya La-Bodumedi ya “lehatshe” le “lewatlè,” le go wa ga baruti le lefifi la semoya le le mo go La-Bodumedi.—Tshenolō 8:7-12.

Hisitori e bontsha gore go senolwa phatlalatsa ga dintlha tseno tota go simolotse pele ga 1922. Ka sekai, puo e e neng e re “Dimilione tse Jaanong di Tshelang di ka Nna tsa Seka tsa Swa,” eo e neng ya neelwa la ntlha ka 1918 ya ba ya gatisiwa mo bukaneng ka 1920, e ne e itsise ka go palelwa ga La-Bodumedi le ka bokhutlo jo bo atamelang jwa lefatshe leno. The Golden Age ya September 29, 1920, e ne ya senola La-Bodumedi ka phepafalo jaaka mogokafadi, motsietsi yo o akang, le yo o timetsang batho.

Ke ka ntlhayang he, fa buka Tshenolō Konelo ya Yone e bolela gore dinaka tse nnè tseno di simolotse go lediwa kwa Kopanong ya Cedar Point ka 1922? Gonne pitso e e reng “itsiseng, itsiseng, itsiseng Kgosi le Bogosi” e ne ya dirwa ka nako eo e rotloetsa tiro ya go rera. Tokololo ya November 1, 1922 ya The Watch Tower, e bua jaana: “Ditsala . . . di ne tsa tsaya seno jaaka ntlhakgolo ya kopano gore tshiamelo e kgolo le tiro ya batho ba ba tloditsweng jaanong mo lefatsheng ke go itsise go nna gone ga Morena, Kgosi e kgolo ya dikgosi, le gore bogosi jwa gagwe jaanong bo tlhomilwe, le gore seno e ne e le selo se se botlhokwa go gaisa se ba tshwanetseng go se dira.”

Re tshwanetse go tlhokomela gape gore fa melaetsa yotlhe e menè ya katlholo e ne e phasaladiwa ke Basupi ba ga Jehofa fa esale ka 1922, mongwe le mongwe wa yone o ne wa rotloediwa thata ke maitlamo a a neng a tsewa kwa dikopanong tse di neng tsa tshwarwa fa gare ga 1922 le 1925. Masomesome a dimilione tsa dikaelo tsa maitlamo ano di ne tsa phasaladiwa ka dikgatiso, tseo di neng di atlega mo go senoleng boemo jwa go swa mo semoyeng ga La-Bodumedi.—Bona buka Tshenolō Konelo ya Yone, tsebe 133, serapa 15.

Go gelebetega ga bofelo ga dinaka tse tharo go kopanyeletsa “ditatlhègō.” (Tshenolō 8:13) Di farologana le tsa ntlha tse nnè ka gonne tsone di amana le ditiragalo tse di kgethegileng. Go gelebetega ga lonaka lwa botlhano go amana le go gololwa ga batho ba Modimo go tswa mo “moletiñ” ka 1919. Ga borataro go amana le “dintwa tsa bapagami” le tiro e kgolo ya meraferafe ya go rera e e simolotseng ka 1922. Ga bosupa go amana le go tsalwa ga Bogosi jwa Modimo ka 1914.—Tshenolō 9:1-19; 11:15-19.

Nngwe le nngwe ya ditiragalo tseno e ne ya tlisa tatlhego mo go Satane le lefatshe la gagwe. Go gololwa ga batlodiwa ka 1919 ba tswa mo moleteng wa go sa direng sepe go ne ga loma baruti ba La-Bodumedi mme ga supa gore Jehofa ga a ba amogele. Go tloga ka 1922 go fitlha gompieno, fa re bua ka tsela ya semoya, bapagami ba dipitse ba ile ba bolaya La-Bodumedi, ba senola boemo jwa gagwe jwa go swa mme ba tlhagisa ka go senngwa ga gagwe go go tlang. Morago ga go tsalwa ga Bogosi ka 1914, Satane o ne a kojwa kwa legodimong, mme a dira mathata mo bathong. Go ise go e kae bogosi bo tla senya tsamaiso ya batho ya ga Satane e e lebegang e tlhomame eo a ileng a e aga (mo lefatsheng), bo tla tlosa batho ba diganana (lewatle) ka Hara-Magedona.—Tshenolō 11:17–12:12; 21:1.

Kwa kopanong ya Cedar Point ka 1922, “ditatlhègō” tse tharo di ile tsa bonwa ke lefatshe lotlhe. Tiro e e neng ya simololwa ka nako eo ya go rera e ne ya phepafatsa gore “tsie” e e neng e tswa mo “moletiñ” le go tlhasela ga “bapagami ba ntwa” go ne go tla latela. Mme pitso e e amang maikutlo ya go itsise Kgosi le Bogosi jwa gagwe e ne e dumalana ka botlalo le go gelebetega ga lonaka lwa bosupa. Tokololo ya The Watch Tower ya March 1, 1925, e ne ya tlhalosa gore ditiragalo tsa 1914, 1919, le 1922 di ne di boleletswe pele mo go Tshenolō kgaolo 12. Go ne go tlhaloganngwa go tsalwa ga Bogosi ka botlalo, mme Basupi ba ga Jehofa ba ne ba go phatlalatsa ka boikanyegi. Mo godimo ga moo, go itsisiwe ga tshedimosetso e e utlwisang botlhoko eo go ne ga amogelwa mme tiro e kgolo e ne ya rotloediwa thata ke go tsewa le go gatisiwa ga maitlamo a a nonofileng kwa dikopanong tseo di neng tsa tshwarwa go tloga ka 1926 go ya go 1928.—Bona Tshenolō—Konelo ya Yone e e Molemolemo e Atametse!, ditsebe 147, 149, 172.

Ka gone, go gelebetega ga dinaka tse supa go ne ga simolola ka 1922 mme go ile ga tswelela le ka bo-1920. Fa esale ka nako eo, batho ba ga Jehofa ba ile ba dirisana mmogo ba sa boife le baengele mo go boleleleng batho botlhe gore La-Bodumedi e sule mo semoyeng, gore baruti ba gagwe ke baeteledipele ba ba oleng, le gore ene le lefatshe leno le le tletseng bosatane ba tla senngwa.