Ka Gonne O Ne A Rapela

MOAPOSETOLOI Paulo o ne a bua jaana mo go 1 Bathesalonia 5:17, 18: “Lo rapeleñ ka go bisa go khutla; Lebogañ mo diloñ cotlhe: gonne mo ke go rata ga Modimo mo go Keresete Yesu kaga lona.” Lefa go ntse jalo, a ka dinako dingwe o ikutlwa o sa batle go rapela fa o ja dijo mo mafelong mangwe a botlhe, jaaka fa o le kwa resetetšhurenteng? Go a utlwala gore motho a ka nna a se ka a batla go goga tlhokomelo ya batho ka ntlha ya tlhagiso ya ga Jesu kgatlhanong le dithapelo tse di dirwang go bonwa ke batho. (Mathaio 6:5, 6) Lefa go ntse jalo, thapelo e e neelwang ka botlhale e ka goga tlhokomelo ya mongwe.

Seno ke se se neng sa diragalela modihedi mongwe yo mmotlana yo o direlang kwa Bethele ya Brooklyn, kwa ntlokgolong ya Basupi ba ga Jehofa. O ne a ja dijo tsa mo mosong kwa resetetšhurenteng, a le mo tseleng ya go ya kwa phuthegong ya mo lefelong leo go kopana le setlhopha seo se tla bong se dira tiro ya go rera ka Bogosi. Fa dijo tsa gagwe tsa mo mosong di goroga, o ne a rapela jaaka gale. Fa a bula matlho, o ne a tlhatlosa tlhogo mme a fitlhela mongwe wa badiri a eme a mo lebile.

“O a rapela, a ga go jalo?” o ne a botsa. Fa a dumela, o ne a re: “O tshwanetse wa bo o le mongwe wa Basupi ba ga Jehofa. Batsadi ba me ke bangwe ba bone. Ga ke ise ke ko ke tsene bodumedi jwa bone, mme ke a itse gore ke tshwanetse. Gongwe ke tshwanetse go dira peleetso ya Tora ya Tebelo le Tsogang! A nka di bona mo go wena?”

“Ke ne ka batla ke kgangwa ke dijo,” mokaulengwe yoo o gakologelwa jalo. Lefa go ntse jalo, o ne a kgona go bona dipeeletso tse pedi a bo a tsamaisa dimakasine tse pedi tsa bosheng a bo a baakanyetsa gore a dire loeto lwa go boela—fela ka gonne o ne a rapela.