O Ka Bona Dikhumo Tse Di Tlhwatlhwakgolo go Gaisa Gouta!

BOAMMAARURI jwa Bibela bo ka tshwantshanngwa le gouta, selefera, kana dikhumo tse dingwe tse di fitlhegileng. Lemororo o ka tswa o ise o ko o tsamaye go ya go batla gouta ya mmatota kana selefera, o tshwanetse wa bo o lemoga gore go dira seno go batla gore o dire ka natla le ka bopelotelele. Ebile gantsi ba ba e batlang ga ba ke ba e bona.

Lefa go ntse jalo, ba ba batlang dikhumo tse di mo Bibeleng tse di fitlhegileng ga ba ke ba tlhoka go di bona. Tlhokomela tlhomamisetso eno e e kgothatsang: “Ha u mmatla yaka e ka bo e le selefera, ha u ka mo hukuletsa yaka e ka bo e le dikhumō tse di shubegileñ; Hoñ u tla tlhaloganya go boiha Yehofa, me u tla bōna kicō ea Modimo.” (Diane 2:4, 5) Mme o tshwanetse go hukutsa.

“Botsisa, me U Bōnè”

“Botsisa, me u bōnè ha go sa cwe moperofeti opè mo Galilea.” Eno ke kgakololo eo Nikodemo wa Mofarasai a neng a e newa ke Bafarasai ba bangwe ba Bajuda ba lekgolo la ntlha la dingwaga. “Botsisa, me u bōnè.” Kgakololo e e molemo eleruri. Motho o ne a ka kgona go senka boammaaruri mme a bo bona—sengwe se se tlhwatlhwakgolo go gaisa gouta.

Lefa go ntse jalo, bao ba neng ba naya kgakololo ya gore a ‘botsise mme a bone’ ka nako eo ba ne ba palelwa go dira jalo. Jang?

Baperesiti ba bagolo le Bafarasai ba ne ba romile maotlana go ya go tshwara Jesu Keresete. Maotlana a ne a boa a iphotlhere fela ka gonne ba ne ba kgatlhilwe thata ke tsela e a rutang ka yone. Kwa bokhutlong, Bafarasai ba ne ba ba botsa jaana: “A le lona lo timedicwe?” Nikodemo o ne a re: “A molaō oa rona o tlo o sekise motho o e se o utlwe mo go èna pele, me o itse se o se dihañ?” Mafoko ano a ne a dira gore a gakololwe ka go re “botsisa, me u bōnè.”—Yohane 7:32, 45-52.

Baperesiti le Bafarasai ba ne ba paletswe jang? Ba ne ba sa itse kana ba ne ba sa dumele gore lemororo Jesu a ne a goletse mo Galilea, o ne a tsholetswe kwa Bethelehema. Moperofeti Mika o ne a boleletse pele jaana: “Me wèna [Bethelehema] eo u leñ mmōtlana mo go makgolo kgolo a Yuda, mo go wèna go tla ncwèla moñwe eo o tla nnañ molaodi mo Iseraela.” (Mika 5:2) Ka jalo banna bao ba baeteledipele ba ne ba palelwa go batla le go bona gore a Jesu tota e ne e le moperofeti, ene yoo e neng e tla nna molaodi wa Iseraele. Seno se ne sa felela ka botlhoko, mme se bontsha kafa go leng botlhokwa ka gone go batla le go bona boammaaruri jotlhe ka dilo. Mme gantsi boammaaruri bo lejwa jang?

Boammaaruri bo Leswefaditswe

“Boammaaruri jo bo itshekileng, fela jaaka gouta e e itshekileng, ga di tshwanelege go ka phasaladiwa, gonne batho ba ile ba fitlhela go le bonolo go leswefatsa boammaaruri go na le go iphepafatsa bone ka bobone,” go ne ga bua jalo mokwadi mongwe wa lekgolo la bo 19 la dingwaga. Abo mafoko ano a santse a opa kgomo lonaka jang ne mabapi le karolo ya lefatshe ya bodumedi! Satane Diabolo “rra aōna maaka,” ke ene a tlhotlheletsang gore boammaaruri bo leswefadiwe. (Yohane 8:44; Tshenolō 12:9) O dirisa bodumedi jwa maaka go leswefatsa dithuto tsa boammaaruri tse di buang ka dikgang tsa botlhokwa tse di jaaka tseno: Modimo ke mang? Jesu o amana jang le ene? Lefatshe leno mmogo le batho di tlile go felela kae?

Baperesiti le Bafarasai ba ka bo ba ile ba batla boammaaruri mme ba bo bona. Ba ka bo ba ile ba bona dikhumo tse di tlhwatlhwakgolo go gaisa gouta. Ee, ba ka bo ba ile ba bona boammaaruri jotlhe kaga Jesu ka go ‘utlwa mo go ene pele le go itse se a se dirang,’ jaaka Nikodemo a ne a akantsha. Fa ba ne ba ile ba tlhoafalela go dira seno, ga go belaetse gore Jesu o ne a ka bo a ile a ba tlhalosetsa dilo tseno jaaka a ne a tlhalosetsa barutwa ba gagwe. (Mareko 4:34) Mme re ka bona boammaaruri jo bo itshekileng kae gompieno? Eleruri, a go na le tlhomamisetso nngwe ya gore re ka batla boammaaruri jotlhe ra bo ra bo bona?

[Setshwantsho mo go tsebe 4]

Baeteledipele ba bodumedi ba ka bo ba ile ba bona boammaaruri jotlhe kaga Jesu ka go bo ‘utlwa mo go ene’