Pego ya Baboledi ba Bogosi

Moitlami wa Mosadi yo A Nnileng Moitlami ka Dingwaga Tse 25 O Ithuta Boammaaruri

BIBELA e ne ya bolelela pele gore “boidiidi yo bogolo” jo bo tswang mo merafeng yotlhe bo tla tla go obamela mo tempeleng ya ga Jehofa ya semoya. (Tshenolō 7:9) Seno se a diragala gompieno, mme re itumelela go bona ba le bantsi ba kgaola dikgole tsa bodumedi jwa maaka ka thuso ya boammaaruri jwa Modimo. Maitemogelo a a latelang a bontsha seno.

◻ Mosadi mongwe wa kwa Rome kwa Italy o anela jaana: “Ke sale ke batla go nna moitlami wa mosadi go tloga fela fa ke santse ke le mmotlana, gonne ke ne ke batla go direla Modimo ka pelo ya me yotlhe. Ke ne ka kgona go fitlhelela seo fa ke na le dingwaga di le 32, ka December 8, 1960, fa ke dira ikano ya me ya ntlha ya go nna boikobo, go nna ke sa huma, le ya go nna ke itshekile. Kabelo ya me e ne e le go tlhokomela motshegare le bosigo bana ba ba ka nnang 30 ba ba latlhilweng le ba ba humanegileng bao e neng e le dikhutsana kana bana ba batho ba ba mo kgolegelong. Ke ne ke ikutlwa ke kgotsofetse mo kabelong eno ya me.

“Tumelo ya me e ne ya tshikinngwa morago ga dingwaga di le lesome ke ntse ke dira fano fa go ne go nna le dikgogakgogano mo mokgatlhong ono. Ke ne ke ipotsa gore fa e le gore re kaelwa ke Modimo ke ka ntlha yang fa a letla dikgogakgogano le tlhakatlhakano mo ntlong ya gagwe.”

Moitlami yono wa mosadi o ne a na le morwadiarraagwe yo a neng a nna kwa Fora ebile e le mongwe wa Basupi ba ga Jehofa. O ne a neela moitlami yono wa mosadi bosupi ka go mo kwalela a bo a mo romelela New World Translation of the Holy Scriptures. Moitlami yono wa mosadi o ne a anela jaana: “E ne e le la ntlha ke kopana le Lefoko la Modimo morago ga dingwaga di le 23.” Ka yone nako eo o ne a dumela go ithuta Bibela le Basupi ba ga Jehofa. O bolela jaana: “Fa ke ntse ke ithuta, ke ne ka itse Jehofa Modimo le seo a se batlang mmogo le dinonofo tsa gagwe tse di molemo. Ke ne ka utlwa botlhoko tota fa ke ithuta gore ga a dumalane le go dirisiwa ga ditshwantsho, ereka lefelo leo le ne le tletse ka ditshwantsho tsa bogolo jo bo sa lekaneng le tsa mefuta yotlhe. Ke ne ka tlhaloganya gore ke ne ke sa tshwanela go nna mo lefelong leo fa ke batla go itumedisa Jehofa. Ke ne ke bone boammaaruri morago ga dingwaga di le 25 ke ineetse mo tirelong ya boitlami. Ka jalo ke ne ka ba itsise gore ke tlogela tiro ka October 1, 1985, selo se se neng sa gakgamatsa baokamedi ba me.

“Bakaulengwe le bokgaitsadi ba me ba ba lorato ba ne ba nthusa semoyeng le ka dilo tse di bonalang. Ke ne ka kolobediwa ka August 30, 1986, gonne ke ne ke leboga Jehofa le phuthego ya gagwe mme ke ne ka simolola go tsamaya mo tseleng ya mmatota e e isang kwa botshelong jo bo sa khutleng.”

Jehofa O Segofatsa Keletso ya Mosha ya go Direla Modimo

◻ Morutisi mongwe wa sekolo wa kwa Brazil yo e neng e le mongwe wa Basupi ba ga Jehofa, fa a ntse a tshwaya dipampiri tsa sekolo o ne a lemoga gore moithuti mongwe wa dingwaga tse 14 o ne a kwadile gore o eletsa go ithuta kaga Modimo. O ne a simolola go ithuta Bibela le moithuti yono, mme fa mosetsana yono a ntse a tswelela, lelapa laabo la Bakatoliki le ne la thibela thuto eno mme la senya dibuka tsa gagwe. Moithuti yo mmotlana yono o ne a ithuta Bibela ka nako ya go ikhutsa kwa sekolong, mme o ne a lemogiwa. Ka jalo thuto eno e ne ya tsweledisiwa ka lokwalo. Lefa go le jalo, ka bonako fela lelapa leno le ne la bona makwalo ano mme la a tshuba. Rraagwe o ne a simolola go mo pateletsa go ya kwa Mmiseng. O ne a tsamaya mme a tsaya sekaelo sa gagwe sa Tora ya Tebelo go se bala mo tirelong ya Mmisa, a se fitlhile mo gare ga ditsebe tsa bukana ya kereke. Seno se ne sa tswelela ka dikgwedi di le thataro, go fitlha fa ka letsatsi lengwe a ngwega mme a ya kwa Holong ya Bogosi. Fa dipokano di ntse di tsweletse rraagwe o ne a tla mme a bolelela bakaulengwe gore ba bolelele morwadie gore o tlile go mo itaya fa a tsena kwa gae. Bakaulengwe ba ne ba leka go bua nae mme ga se ka ga thusa sepe.

Mo letsatsing le le latelang, o ne a ya kwa bakaulengweng a itumetse ebile a nyenya. O ne a ba bontsha matsadi a mantsi mo mmeleng wa gagwe foo rraagwe a neng a fetsa go mo itaya gone. Ke ka ntlha yang fa a ne a itumetse? Fa a sena go tloga kwa Holong ya Bogosi, rraagwe o ne a botsa batho ba le mmalwa, go akaretsa le ramotse melemo le bodiphatsa jwa gore morwadie e nne mongwe wa Basupi ba ga Jehofa. Ramotse o ne a bolela gore Basupi e ne e le batho ba ba molemo, ba a tshwanetseng go ba ikanya. O ne a oketsa ka gore ba na le boitsholo jo bontle tota le gore go tla nna molemo tota go nna le ngwana yo o tshelang ka ditekanyetso tse di ntseng jalo, tseo di neng di le kwa godimo tota ga tsa basha ka kakaretso.

Lefa go ntse jalo, mosetsana o ne a itewa. Mme rraagwe o ne a mmolelela gore o mo iteela go bo a tsamaile fela kwa gae kwantle ga tetla. Mme o ne a mmolelela gape gore o tla mo itaya gape fa a ka tlogela go ithuta Bibela kana fa a ka tlogela go ya kwa dipokanong tsa Basupi ba ga Jehofa! Mosetsana yono jaanong ke mmoledi yo o tlhaga, mme bangwe ba lelapa la gagwe ba kgatlhegela boammaaruri.

Ka boammaaruri, Jehofa o segofatsa ba babotlana bao ba nang le keletso ya mmatota ya go mo direla, jaaka boitemogelo jono bo bontsha.—Pesalema 148:12, 13.