Dithulaganyo Tse Motho A Di Dirileng go Lere Polokesego Mo Merafeng Yotlhe

“Fa dilo tseno tsotlhe di sena go fela, re batla go baakanya dilo. Re batla go dira gotlhe mo re ka go kgonang gore re tlise ka bonako se ka tsholofelo nka se bitsang gore ke tsamaiso e ntšha ya lefatshe.”—Tautona ya U.S., George Bush, ka January 1991, moragonyana fela ga gore ntwa ya Iraq e simologe.

“Mogopolo wa ga Tautona Bush wa Tsamaiso e Ntšha ya Lefatshe o gatelela kafa go leng botlhokwa ka gone gore molao o kaele kafa dilo di dirwang ka teng le kafa tumelo ya gore merafe yotlhe e na le boikarabelo jwa go tlisa kgololesego le tshiamiso e leng botlhokwa ka gone. Jaaka fa Ntwa ya Molomo e fela, go simologa motlha o mosha.”—Moemedi wa U.S. kwa Australia, ka August 1991.

“Mo bosigong jono, jaaka fa ke bona ditiragalo tsa demokeratiki di ntse di diragala mo lefatsheng lotlhe, gongwe—gongwe re setse re le gaufi le lefatshe le lesha leo go feta lefa e le leng pele.”—Tautona ya U.S., George Bush, ka September 1991.

BAETELEDIPELE ba le bantsi ba lefatshe, fela jaaka Tautona Bush, ba bua mafoko a a kayang gore ba solofela go bona molemo mo isagweng. A go na le lebaka le le utlwalang la gore ba solofele go bona molemo mo isagweng? A ditiragalo tsa fa e sale go tloga ka Ntwa ya Lefatshe II di neela tsholofelo e e ntseng jalo? A o akanya gore boradipolotiki ba ka kgona go lere polokesego mo merafeng yotlhe?

Thulaganyo E E Tlhomologileng E E Dirilweng Ke Motho

“Mo dingwageng tse pedi tsa bofelo tsa ntwa ya bobedi ya lefatshe,” go ne ga tlhalosa jalo thulaganyo ya thelebishene e go tweng Goodbye War, “go ne go bolawa batho ba feta dimilione di le pedi kgwedi le kgwedi.” Ka nako eo, merafe e ne ya bona go tlhokega gore ka bofefo go dirwe thulaganyo e e neng e tla thibela gore go se ka ga tlhola go nna le ntwa e e ntseng jalo gape. Fa ntwa e ntse e tsweletse, baemedi ba merafe e le 50 ba ne ba dira thulaganyo e e tlhomologileng go gaisa ya polokesego ya merafe yotlhe eo e kileng ya dirwa ke motho: Molaotheo wa Lekgotla la Merafe E E Kopaneng. Ketapele ya Molaotheo oo e ne ya bontsha fa le ikemiseditse “go falotsa dikokomana tse di latelang masetlapelo a ntwa.” Merafe eo e neng e tla nna maloko a Lekgotla la Merafe E E Kopaneng e ne e tla “tshwaraganela kgetsi ya tsie go boloka kagiso le polokesego mo merafeng yotlhe.”

Malatsi a le somaamane le bongwe morago ga foo, sefofane se ne sa latlhela bomo ya atomo kwa Hiroshima, kwa Japane. E ne ya thunyetsa fa godimo ga bogare jwa toropo eo, ya bolaya batho ba feta 70 000. Go thunya gono, le go thunya go go neng ga latela malatsi a le mararo morago ga foo kwa Nagasaki, go ne ga emisa ntwa eo e neng e lowa le Japane. Ereka tsala ya Japane ebong Jeremane e ne e ineetse ka May 7, 1945, Ntwa ya Lefatshe II e ne ya fela. Lefa go ntse jalo, a seo se ne se raya gore ga go ketla go tlhola go nna ntwa?

Nnyaa. Fa e sale ka Ntwa ya Lefatshe II, batho ba ile ba nna le dintwa tse dipotlana di feta 150 tseo di ileng tsa bolaya batho ba feta dimilione tse 19. Go phepafetse gore, thulaganyo e e tlhomologileng e e dirilweng ke Lekgotla la Merafe E E Kopaneng ga e ise e lere polokesego mo merafeng yotlhe. Go senyegile fa kae?

Ntwa ya Molomo

Batho bao ba neng ba rulaganya Lekgotla la Merafe E E Kopaneng ga ba a ka ba lemoga go sa le pele kgaisano eo e neng ya tlhagoga ka bofefo fa gare ga merafe eo pele e neng e le ditsala ka Ntwa ya Lefatshe II. Dinaga di le dintsi di ne di na le seabe mo kgogakgoganong eno ya go batla go nna le thata, eo e neng ya re kgabagare ya bidiwa Ntwa ya Molomo mme e le kgogakgogano eo kafa letlhakoreng le lengwe, e neng e le fa gare ga Bokomonise le bokapitalise. Go na le gore e tshwaraganele kgetsi ya tsie e thibele ntwa, merafe eno e e ipopileng go nna makoko a mabedi e ne ya tshegetsa matlhakore a a lwang mo dintweng tsa mo mafelong a a rileng mme ka jalo ya lwa ka boyone kwa Asia, Afrika, le kwa dinageng tsa Amerika.

Mo dingwageng tsa bofelo tsa bo 1960, Ntwa ya Molomo e ne ya simolola go bepa. Go bepa gono go ne ga bonala sentle ka 1975 fa Dinaga di le 35 di ne di saena seo se bidiwang Tumalano ya Helsinki. Dingwe tsa dinaga tseo di neng tsa nna le seabe e ne e le Soviet Union le United States, mmogo le ditsala tsa bone tsa kwa Yuropa. Botlhe ba ne ba solofetsa gore ba ne ba tla leka gore go nne le “kagiso le polokesego” le gore ba tla “tila . . . go tshosetsa ka dibetsa kana go di dirisa kgatlhanong le dinaga tse di busiwang ke puso nngwe kana kgatlhanong le puso e e ikemetseng ka nosi ya naga epe, kana ka tsela epe fela e sele e e kgatlhanong le maikaelelo a Lekgotla la Merafe E E Kopaneng.”

Mme lefa go ntse jalo dikgopolo tseno ga di a ka tsa thusa sepe. Mo tshimologong ya bo 1980, kgotlhang fa gare ga mebuso e megolo e ne ya gakala gape. Dilo di ne tsa nna maswe tota mo e leng gore ka 1982 mokwaledimogolo yo o neng a sa tswa go tlhomiwa bosheng wa Lekgotla la Merafe E E Kopaneng, Dr. Javier Pérez de Cuéllar, o ne a dumela gore lekgotla la gagwe le ne le paletswe mme a tlhagisa gore go tlile go nna “tlhakatlhakano gape mo merafeng yotlhe.”

Lefa go ntse jalo, gompieno, mokwaledimogolo wa Lekgotla la Merafe E E Kopaneng le baeteledipele ba bangwe ba na le tsholofelo. Dipego tsa dikgang di bua kaga “motlha wa fa Ntwa ya Molomo e sena go fela.” Phetogo eno e nnile gone jang?

“Motlha wa Fa Ntwa ya Molomo E Sena go Fela”

Sengwe se se tlhomologileng seo se ileng sa dira gore e nne gone e ne e le go kopana ga Kokoano ya Polokesego le Tirisanommogo mo Yuropa eo e neng e tsenwe ke merafe e le 35. Ka September 1986 e ne ya saena se se bidiwang Lekwalo la Stockholm, leo le neng le tlhomamisa gape gore ba tlamiwa ke Tumalano ya Helsinki ya 1975.a Lekwalo la Stockholm le na le melao e le mentsi e e laolang go bewa leitlho ga ditiro tsa bosole. “Matswela a a bonweng mo dingwageng tse tharo tse di fetileng a a kgothatsa ebile selekanyo sa dilo tse di fitlheletsweng se simolola go feta dilo tse go kwadilweng gore di tshwanetse go dirwa mo Lekwalong la Stockholm,” go ne ga bega jalo SIPRI (Stockholm International Peace Research Institute) go Yearbook 1990 ya lone.

Go tswa foo, ka 1987, mebuso e megolo e ne ya dumalana ka tsela e e tlhomologileng gore e tla senya dimmisaele tsa yone tsotlhe tse di thuntshiwang go tswa fa fatshe di thuntshediwa sekgala sa go tloga go dikilometara di le 500 go ya go di le 5 500. “Go senngwa ka mmatota ga dimmisaele le didirisiwa tsa go di thuntsha go mo thulaganyong mme ka mo go tshwanelang matlhakore otlhe a dira dilo tseo go dumalanweng ka tsone,” go bolela jalo SIPRI.

Go tserwe dikgato tse dingwe gape go fokotsa matshosetsi a ntwa ya nuklea. Ka sekai, ka 1988 mebuso e megolo e ne ya saena tumalano malebana le “dimmisaele tse di itirisang tse di kgonang go thuntshiwa go kgabaganya dikontinente le tseo di thuntshiwang go tswa mo dikepeng.” Pele dibetsa tse di ntseng jalo di ka thuntshiwa, letlhakore lengwe le lengwe le tshwanetse la itsise le lengwe “mo nakong e e seng kwa tlase ga diura di le 24 go sa le pele, malebana le letlha le go rulagantsweng go thuntsha ka lone, lefelo le go tla thuntshediwang mo go lone, le lefelo leo le tla bong le thuntshiwa.” Go ya ka SIPRI, ditumalano tse di ntseng jalo di “dira gore go se ka ga kgonega gotlhelele gore ditiragalo tsa mo lefelong lengwe di nne maswe mo jaanong di fetogang ntwa ya lefatshe lotlhe ya nuklea.”

Go ntse go eme jalo, thulaganyo ya go tokafatsa polokesego ya merafe yotlhe e ne ya dirwa ka bofefo. Ka May 1990, mo kokoanong ya mebuso e megolo kwa Washington, D.C., Mikhail Gorbachev yo ka nako eo e neng e le tautona ya Soviet o ne a akantsha gore ditlhopha tse pedi tsa merafe ya Yuropa di saene tumalano ya kagiso. Ka July dinaga tse 16 tsa Bophirima tsa lekgotla la NATO (North Atlantic Treaty Organization) di ne tsa kopana kwa Lontone. Di ne tsa arabela kakantsho ya ga Mikhail Gorbachev ka go re matlhakore otlhe a saene “boipolelo jo mo go jone rotlhe re bolelang ka tsela e e masisi gore ga re tlhole re le baba le gore re tlhomamisa boikaelelo jwa rona jwa gore re tla ikgapa mo go tshosetseng ka dibetsa kana mo go di diriseng.” Setlhogo se segolo sa tsebe e e kafa ntle ya pampiri ya dikgang ya naga nngwe ya mo Afrika se ne sa tlhalosa seno e le “Kgato E Kgolo ya Go Lere Kagiso mo Lefatsheng.”

Go tswa foo, e ne ya re pelenyana fela ga kokoano ya mebuso e megolo kwa Helsinki, kwa Finland, mmueledi wa puso ya U.S. o ne a bolela gore ereka “go lebega okare go ka nna ga lowa [kwa Botlhaba Gare] seno se dira gore go nne le thulaganyo e ntšha ya go dira jaaka setlhopha go lere kagiso mo lefatsheng.” Kagiso e ne ya phutlhama fa Iraq e ne e tlhasela Kuwait mme go lebega okare ntwa e tla anama. Mme lefa go ntse jalo, United States e ne kafa tlase ga taolo ya Lekgotla la Merafe E E Kopaneng ya etelela masole a meraferafe pele go ya go busa masole ao a neng a tlhasela e a busetsa kwa nageng ya one. Go dira dilo ka kutlwano ga meraferafe goo go neng ga bonala mo ntweng eo go ne ga kgothatsa bangwe gore ba solofele gore go ne go simologa motlha o mosha wa tirisanommogo.

Fa e sale go tloga foo, ditiragalo tsa lefatshe di ile tsa tokafala go ya pele. Se se tlhomologileng ke gore, tsela eo se e kileng ya bo e le Soviet Union se ntseng ka yone e ne ya fetoga fela thata. Dinaga tsa Baltic di ne tsa letlelelwa go bolela fa di ipusa, le direpaboliki tse dingwe tsa Soviet Union le tsone di ne tsa dira fela jalo. Dintwa tse di matlho mahibidu tsa merafe di ne tsa simologa mo mafelong ao pele go neng go lebega a le seoposengwe kafa tlase ga taolo ya Bokomonise eo e neng e laola naga yotlhe. Kwa bokhutlong jwa 1991, Soviet Union e ne e sa tlhole e le gone semmuso.

Diphetogo tseno tse dikgolo mo ditiragalong tsa lefatshe tsa bopolotiki di buletse lekgotla la Merafe E E Kopaneng phatlha. The New York Times e ne ya bolela jaana mabapi le seno: “Go fela ga dikgotlhang mo lefatsheng lotlhe le moya o mosha wa tirisanommogo fa gare ga United States le Soviet Union go ka raya gore lekgotla leno la lefatshe le tla nna le seabe se sesha, se se nonofileng go gaisa mo dikgannyeng tsa merafe yotlhe.”

A jaanong e setse e le nako ya gore lekgotla leo le le sa bolong go nna teng ka dingwaga tse 47 le supe maatla a lone? A tota re tsena mo go se United States e se biditseng “lekgolo le lesha la dingwaga, le mileniamo o mosha, wa kagiso, kgololesego le katlego”?

[Ntlha e e kwa tlase]