Nna Gone Kwa Kopanong ya Kgaolo ya “Poifo ya Bomodimo”

BATLHANKA ba ga Jehofa ba nako e e fetileng ba ne ba tshwanetse go kopana gararo ka ngwaga go keteka meletlo mengwe go ya ka Molao wa ga Moshe. Dinako tseno e ne e le tse di itumedisang le tse di agang semoyeng.—Duteronome 16:16.

Batlhanka ba ga Jehofa ba kopana gararo ka ngwaga ka tsela e e tshwanang gompieno: ka letsatsi la kopano e e kgethegileng, ka kopano ya potologo ya malatsi a le mabedi, le ka kopano ya kgaolo ya malatsi a le mane. Ka 1994, Basupi ba ga Jehofa ba tla kopana mmogo ka Kopano ya Kgaolo ya “Poifo ya Bomodimo.”

Lefoko la Modimo le phepafetse malebana le botlhokwa jwa poifo ya bomodimo. Poifo eno e umakiwa mo e ka nnang makgetlo a le 200 mo go lone. Poifo ya bomodimo ke tshireletso jaaka re ka bona mo go Diane 16:6: “Le gōna batho ba kgaogana le boshula ka go boiha Yehofa.” Ee, Pesalema 111:10 e re bolelela gore poifo ya bomodimo ke tshimologo ya botlhale!

Go ka nna ga twe go na le mefuta e mebedi ya poifo ya bomodimo. Mme sa botlhokwa, poifo e e ntseng jalo e tlhotlhelediwa ke lorato. Re boifa go utlwisa Modimo botlhoko ka gonne re mo rata thata. (Diane 27:11) Mme gape, go nna botlhale go tla re thusa go nna le poifo ya bomodimo, e re ka re itse gore Modimo ke “molelō o o lailañ” mo go botlhe ba ba dirang bosula.—Bahebera 12:29.

Kwa Kopanong ya rona ya Kgaolo ya “Poifo ya Bomodimo,” re tla amogela thuto le kgothatso e ntsi ya gore re gole mo poifong ya bomodimo. Thuto eno e tla neelwa ka dipuo, dipontsho, terama, le ka go neelwa ga maitemogelo.

Le rona re tshwanetse ra batla go dira seabe sa rona go itumedisa le go atlegisa dikopano tsa rona, fela jaaka Baiseraele ba bogologolo ba ne ba laelwa gore ba se ka ba tla dikopanong ba sa tshola sepe. (Duteronome 16:17) Re ka dira seno ka go tlotla lomati lwa bojelo lwa ga Jehofa. Jang? Ka go tla ka nako, ka go nna re tlhomile megopolo mo go se se buiwang go tswa mo seraleng, ka go nna le seabe ka tlhagafalo mo go opeleng dipina. Ga re kitla re nna re buabua le go tsamayatsamaya fa thulaganyo e ntse e tsweletse. Gape re tla batla go tshegetsa ka moo re ka kgonang ka teng ka go ithaopa. Go rulaganya kopano go akaretsa mafapha a le mantsi, ao mo go one go tlhokegang baithaopi go dira mo go one. Re tla batla go ntsha le meneelo ya madi go ya ka moo Jehofa a re segofaditseng ka teng.

E kete motlhanka mongwe le mongwe wa ga Jehofa a ka dira dithulaganyo go sa le jaanong go nna gone ka malatsi otlhe a mararo a Kopano ya Kgaolo ya “Poifo ya Bomodimo,” go simolola ka pina e e bulang ka Labotlhano mo mosong go fitlha ka thapelo e e konelang ka Sontaga thapama.