Go Fodisiwa ga Batho ka Tsela ya Kgakgamatso go Gaufi

“GA RE ise re ke re bone mo go tshwanang le gone.” Go ne ga bolela jalo basupi bangwe ba ba boneng ka matlho fa Jesu a ne a fodisa ka tsela ya kgakgamatso, le e e bofefo monna mongwe yo o neng a sule ditokololo. (Mareko 2:12) Gape Jesu o ne a alafa difofu, dimumu le digole, mme balatedi ba gagwe ba ne ba dira se se tshwanang. Jesu o ne a dira ka maatla a eng? Tumelo e ne e na le seabe sefe? Ditiragalo tseno tsa lekgolo la ntlha la dingwaga di ile tsa lere lesedi lefe malebana le go fodisa ka tsela ya kgakgamatso gompieno?—Mathaio 15:30, 31.

“Tumelo ya Gago e go Fodisitse”

Batho ba ba fodisang ka tumelo ba gompieno ba rata go nopola mafoko a ga Jesu a a neng a a bolelela mosadi yo o neng a tshologa madi ka dingwaga di le 12 yo o neng a tla kwa go ene gore a mo alafe: “Tumelo ya gago e go fodisitse.” (Luke 8:43-48) A mafoko a ga Jesu a bontsha gore go alafiwa ga gagwe go ne go ikaegile ka tumelo ya gagwe? A seo e ne e le sekai sa “go fodisa ka tumelo” jaaka go dirwa gompieno?

Fa re bala pego ya Baebele ka kelotlhoko, re bona gore mo makgetlhong a le mantsi Jesu le balatedi ba gagwe ba ne ba sa tlhoke gore balwetse ba bolele tumelo ya bone pele ba ka fodisiwa. Mosadi yo o nopotsweng fa godimo o ne a tla mme, kwantle ga go bolelela Jesu sepe, o ne a ama seaparo sa gagwe ka tidimalo a le kwa morago mme “ka ponyo ya leitlho kelelo ya gagwe ya madi ya ema.” Mo lekgetlhong le lengwe, Jesu o ne a fodisa monna mongwe yo o neng a le fa gare ga batho ba ba neng ba tlile go mo tshwara. O ile a bo a fodisa monna yo o neng a sa itse gore Jesu ke mang.—Luke 22:50, 51; Johane 5:5-9, 13; 9:24-34.

Ka jalo, tumelo e ne e na le seabe sefe? Fa Jesu le barutwa ba gagwe ba ne ba le mo kgaolong ya Ture le Sidona, mosadi mongwe wa Mofonikia o ne a tla mme a goela kwa godimo a re: “Nkutlwele botlhoko, Morena, Morwa Dafide. Morwadiake o tsenwe ke madimona tota.” Akanya ka tlalelo e a neng a le mo go yone fa a ne a kopa jaana: “Morena, nthusa!” Jesu o ne a araba jaana a tletse kutlwelobotlhoko: “Oo mosadi, tumelo ya gago e kgolo; a go go diragalele jaaka o eletsa.” Mme morwadie o ne a fola “go tloga ka nako eo go ya pele.” (Mathaio 15:21-28) Go phepafetse gore tumelo e ne e akarediwa moo, mme e ne e le tumelo ya ga mang? Ela tlhoko gore e ne e le tumelo ya mmè e Jesu a neng a e baka, e seng ya ngwana yo o lwalang. Mme a dumela mo go eng? Ka go bolela Jesu e le “Morena, Morwa Dafide,” mosadi yono o ne a lemoga phatlalatsa gore Jesu e ne e le Mesia yo o solofeditsweng. E ne e se go bontsha tumelo fela mo Modimong kana go bontsha tumelo mo maatleng a motho yo o fodisang. Fa Jesu a ne a re, “Tumelo ya gago e go fodisitse,” o ne a kaya gore fa batho ba ba lwalang ba ne ba sa dumele mo go ene jaaka Mesia, ba ka bo ba sa tla kwa go ene gore ba fodisiwe.

Mo dikaing tseno tsa Dikwalo, re ka bona gore go fodisa mo go neng go dirwa ke Jesu go ne go farologane thata le se se tlwaetsweng go bonwa kana go bolelwa gompieno. Boidiidi bo ne bo sa bontshe maikutlo a a nonofileng—a go goa, go opela, go lela, go tshwarwa ke maibi, le tse dingwe fela jalo—e bile Jesu o ne a sa tseege maikutlo ka tsela epe. Mo godimo ga moo, Jesu ga a ise a ko a palelwe ke go fodisa balwetse ka seipato sa gore ba ne ba se na tumelo kana gore meneelo ya bone e ne e se ya bopelotshweu.

Dikalafi Tse di Dirwang ka Maatla a Modimo

Diphodiso tsa ga Jesu le barutwa ba gagwe di ne di dirwa jang? Baebele e araba jaana: “Maatla a ga Jehofa a ne a le gone gore a fodise.” (Luke 5:17) Morago ga go fodisa mo gongwe, Luke 9:43 e bolela gore, “botlhe ba simolola go tshwarwa ke kgakge ka ntlha ya maatla a magolo thata a Modimo.” Ka mo go tshwanetseng, Jesu ga a ka a ipitsa gore ke mofodisi. Mo lekgetlhong le lengwe o ne a bolelela monna mongwe jaana yo o neng a dira gore madimona a se ka a tlhola a mo tshwenya: “Ya kwa gaeno kwa ditsaleng tsa gago, o ba bolelele dilo tse dikgolo tse Morena o di go diretseng, le jaaka a go tlhomogetse pelo.”—Mareko 5:19.

E re ka Jesu le baaposetoloi ba ne ba fodisa ka maatla a Modimo, go motlhofo go bona lebaka la go bo tumelo ya motho yo o neng a fodisiwa e ne e sa tlhokege ka metlha gore a fole. Le fa go ntse jalo, go ne go tlhokega gore motho yo o fodisang a nne le tumelo e e nonofileng. Ka gone, fa balatedi ba ga Jesu ba ne ba palelwa ke go leleka ledimona lengwe le le neng le nonofile thata, Jesu o ne a ba bolelela lebaka la gone: “Ke ka ntlha ya tumelo ya lona e nnye.”—Mathaio 17:20.

Boikaelelo Jwa go Fodisa ka Kgakgamatso

Le mororo Jesu a ne a fodisa batho gantsi mo bodireding jotlhe jwa gagwe jwa fa a le mo lefatsheng, totatota o ne a sa latelele ‘bodiredi jwa go fodisa.’ Go fodisa ga gagwe ka kgakgamatso—mo a neng a sa dire gore batho ba duele kana a sa kope meneelo epe—go ne go le mo maemong a bobedi a se a neng a amegile ka sone thata, e leng go “rera dikgang tse di molemo tsa bogosi.” (Mathaio 9:35) Pego e bolela gore mo lekgetlhong le lengwe o ne “a ba amogela ka bopelonomi mme a simolola go bua le bone kaga bogosi jwa Modimo, mme a fodisa ba ba tlhokang kalafi.” (Luke 9:11) Mo dipegong tsa Efangele, gantsi Jesu o ne a bidiwa “Moruti” mme ga a ise a bidiwe “Mofodisi.”

Ke ka ntlha yang he fa Jesu a ne a alafa ka tsela ya dikgakgamatso? Boikaelelo jo bogolo e ne e le go ikitsise e le Mesia yo o solofeditsweng. Fa Johane Mokolobetsi a ne a tsentswe mo kgolegelong ka tsela e e sa tshwanelang, o ne a batla go tlhomamisediwa gore a o fitlheletse go dira se Modimo a neng a mo romile sone. O ne a romela barutwa ba gagwe kwa go Jesu mme a botsa jaana: “A o Yo O Tlang, kgotsa a re tshwanetse go lebelela o sele?” Ela tlhoko se Jesu a neng a se bolelela barutwa ba ga Johane: “Tsenang mo tseleng mme lo begele Johane se lo se utlwang le se lo se bonang: Difofu di bona gape, le ditlhotsa di a tsamayatsamaya, balepero ba a ntlafadiwa le bosusu ba a utlwa, mme baswi ba a tsosiwa, le bahumanegi ba bolelelwa dikgang tse di molemo.”—Mathaio 11:2-5.

Ee, lebaka la go bo Jesu a ne a se ka a fodisa fela mme gape a dira dikgakgamatso tse dingwe tse di kwadilweng mo Diefangeleng go ne go tlhomamisa gore e ne e le “Yo O Tlang,” e bong Mesia yo o solofeditsweng. Go ne go sa tlhokege gore motho ope a ‘lebelele o sele.’

A Dikalafi Tsa Kgakgamatso di a Dirwa Gompieno?

A ka gone re tshwanetse go lebelela gore Modimo a supe maatla a gagwe gompieno ka dikalafi? Nnyaa. Ka dikgakgamatso tse Jesu a neng a di dira ka maatla a Modimo, o ne a bontshitse kwantle ga pelaelo gore e ne e le Mesia yo Modimo a mo solofeditseng gore o ne a tla tla. Ditiro tse dikgolo tsa ga Jesu di kwadilwe mo Baebeleng gore rotlhe re di bale. Ga go tlhokege gore Modimo o supe maatla a gagwe ka go boeletsa dikgakgamatso tseo mo kokomaneng nngwe le nngwe ya batho.

Se se kgatlhang ke gore dikalafi le dikgakgamatso tse dingwe di ne di dira gore batho ba dumele fela ka nako e e rileng. Tota le batho bangwe ba ba boneng ka matlho dikgakgamatso tsa ga Jesu ba ne ba sa dumele gore o ne a thusiwa ke Rraagwe wa selegodimo. “Le mororo a ne a dirile ditshupo tse dintsi thata jalo fa pele ga bone, ba ne ba sa beye tumelo mo go ene.” (Johane 12:37) Ke gone ka moo, e neng ya re morago ga gore a bolele ka dineo tse di farologaneng tsa dikgakgamatso—tsa go porofeta, go bua ka diteme, go fodisa, le tse dingwe jalo—tse Modimo a di neetseng maloko a a farologaneng a phuthego ya Bokeresete ya lekgolo la ntlha la dingwaga, moaposetoloi Paulo o ne a tlhotlhelediwa go bolela jaana: “E ka ne go na le dimpho tsa go porofeta, di tla nyelediwa; e ka ne go na le diteme, di tla kgaotsa; e ka ne go na le kitso, e tla nyelediwa.”—1 Bakorintha 12:28-31; 13:8-10.

Ke boammaaruri gore go nna le tumelo mo Modimong go botlhokwa mo botshelong jwa rona. Le fa go ntse jalo, go baya tumelo ya gago mo ditsholofetsong tsa maaka tsa dikalafi go re dira gore re felelwe ke tshepo. Mo godimo ga moo, malebana le nako ya bokhutlo, Jesu o ne a ntsha tlhagiso eno: “Go tla tsoga bo Keresete ba maaka le baporofeti ba maaka mme ba tla dira ditshupo tse dikgolo le dikgakgamatso e le gore ba timetse, fa go kgonega, le eleng bakgethiwa.” (Mathaio 24:24) Kwantle ga tsietso le boferefere, go tla nna gape le ditshupo tsa maatla a badimona. Ka ntlha ya seo, maiphako a ditiragalo tse di sa tlhaloganyesegeng ga a tshwanela go re gakgamatsa, mme tota ga se motheo wa tumelo ya mmatota mo Modimong.

E re ka go se na motho ope gompieno yo o fodisang jaaka Jesu a ne a dira, a go raya gore ga re solegelwe molemo ka gope? Tota nnyaa. Tota e bile, batho ba ba neng ba fodisiwa ke Jesu kgabagare ba ne ba lwala gape. Botlhe ba ne ba tsofala le go swa. Melemo ya go fodisiwa e ba neng ba e amogela e ne e le ya nakwana fela. Le fa go ntse jalo, dikalafi tsa ga Jesu tsa kgakgamatso ke tse di nnelang ruri ka tsela ya gore di ne di tshwantshetsa masego a mo isagweng.

Ka gone, morago ga gore Alexandre le Benedita ba ba umakilweng pelenyana ba tlhatlhobe Lefoko la Modimo, Baebele, ga ba tlhole ba dumela mo go fodisiweng ka tumelo ga segompieno le mo dikalafing tsa semoya. Le fa go ntse jalo, ba tlhatswegile pelo gore go fodisiwa ka tsela ya kgakgamatso ga se dilo tsa nako e e fetileng. Ke ka ntlha yang fa ba dumela jalo? Fela jaaka dimilione tsa batho mo lefatsheng lotlhe, ba lebile pele kwa masegong a go fodisiwa mo Bogosing jwa Modimo.—Mathaio 6:10.

Go sa Tlhole Go na Le Bolwetse le Loso

Jaaka re bone pelenyana, boikaelelo jo bogolo jwa bodiredi jwa ga Jesu e ne e se go fodisa balwetse le go dira dikgakgamatso tse dingwe. Go na le moo, o ne a dira go rera dikgang tse di molemo tsa Bogosi jwa Modimo go nna tiro ya gagwe e kgolo. (Mathaio 9:35; Luke 4:43; 8:1) Bogosi joo ke jone jo Modimo a tla bo dirisang go fodisa batho ka tsela ya kgakgamatso le go baakanya tshenyo yotlhe e boleo le go sa itekanela di e dirileng mo bathong. O tla dira dilo tseno jang mme le gone leng?

Ka go bonela pele isagwe, Keresete Jesu o ne a bontsha moaposetoloi wa gagwe Johane ponatshegelo nngwe ya boporofeti: “Jaanong go diragetse poloko le maatla le bogosi tsa Modimo wa rona le taolo ya ga Keresete!” (Tshenolo 12:10) Bosupi jotlhe bo bontsha gore fa e sa le ka 1914 moganetsi yo mogolo wa Modimo e bong Satane, o ntse a latlhetswe mo lefatsheng, mme Bogosi jaanong bo a busa ka tsela ya mmatota! Jesu o ile a tlhomiwa e le Kgosi ya Bogosi jwa ga Mesia mme jaanong o ipaakanyeditse go dira diphetogo tse dikgolo mo lefatsheng.

Mo bogautshwaneng fela, puso ya legodimo ya ga Jesu e tla busa batho ba basha ba ba siameng, tota e bile e tla busa “lefatshe le lesha.” (2 Petere 3:13) Maemo a tla bo a le jang ka nako eo? Eno ke ponelopele e e molemolemo: “Ka bona legodimo le lesha le lefatshe le lesha; gonne legodimo la pele le lefatshe la pele di ne di fetile . . . Mme [Modimo] o tla phimola keledi nngwe le nngwe mo matlhong a bone, mme loso lo tla bo lo seyo, lefa e le khutsafalo lefa e le selelo lefa e le botlhoko di tla bo di sa tlhole di le gone. Dilo tsa pele di fetile.”—Tshenolo 21:1, 4.

A o ka akanya gore botshelo bo tla bo bo ntse jang fa go fodisiwa ga batho ka kgakgamatso go tla bo go diragala ka tsela ya mmatota? “Monni wa gona ga a ketla a re: ‘Ke a bobola,’ batho ba ba agang gona ba tlaa itshwarelwa boikepo jwa bone.” Ee, Modimo o tla dira se batho ba ba fodisang ka tumelo ba ka se kang ba se dira. ‘O tla kometsa loso ka bosakhutleng.’ Ee ruri, “Morena Modimo o tlaa phimola dikeledi mo matlhong otlhe.”—Isaia 25:8; 33:24.

[Setshwantsho mo go tsebe 7]

Mo Bogosing jwa Modimo batho ba tla fodisiwa ka tsela ya kgakgamatso