A o Latelela Bomolemo?

“Lefa e le bomolemo bofe jo bo leng gone jo bogolo thata le selo lefa e le sefe se se leng gone, tswelelang lo akanyetsa dilo tseno.”—BAFILIPI 4:8.

1. Boikepo ke eng, mme ke ka ntlha yang fa bo sa senya kobamelo ya ga Jehofa?

BOIKEPO ke go sokama ga boitsholo kana go senyega ga jone. Bo anama mo lefatsheng le re nnang mo go lone. (Baefeso 2:1-3) Le fa go ntse jalo, Jehofa Modimo ga a ne a letlelela gore kobamelo ya gagwe e e phepa e leswefadiwe. Dikgatiso tsa Bokeresete, dipokano, dikopano tse dinnye le dikopano tse dikgolo di re neela ditlhagiso tse di tshwanelang nako ya rona kgatlhanong le boitshwaro jo bo sa siamang. Re amogela thuso e e molemo ya Dikwalo ya gore re ‘ngaparele se se molemo’ mo matlhong a Modimo. (Baroma 12:9) Ka gone, jaaka mokgatlho, Basupi ba ga Jehofa ba leka go nna phepa, go nna le bomolemo. Mme go tweng ka rona motho ka bongwe? A eleruri o latelela bomolemo?

2. Bomolemo ke eng, mme ke ka ntlha yang fa go tlhokega boiteko go tswelela pele o na le bomolemo?

² Bomolemo ke go siama mo boitsholong, molemo, go dira le go akanya ka tsela e e siameng. Ga se nonofo e e sa tlhokeng motho go dira sengwe mme ke e e tlhokang gore motho a tseye kgato, nonofo e e siameng. Bomolemo bo akaretsa se se fetang fela go tila boleo; bo raya go latelela se se molemo. (1 Timotheo 6:11) Moaposetoloi Petere o ne a rotloetsa Bakeresetekaene jaana: “Tsenyang mo tumelong ya lona bomolemo jo bogolo thata.” Jang? Ka “go arabela [mo ditsholofetsong tse di botlhokwa tsa Modimo] lo tsenya boiteko jotlhe ka tlhoafalo.” (2 Petere 1:5) Ka ntlha ya boleo jwa rona, go tlhoka boiteko jwa mmatota gore re nne le bomolemo. Le fa go ntse jalo, batho ba ba boifang Modimo ba nako e e fetileng ba dirile fela jalo, tota le fa ba ne ba lebane le dikgoreletsi tse dikgolo.

O ne A Latelela Bomolemo

3. Kgosi Ahase o ne a na le molato wa ditiro dife tsa boikepo?

³ Dikwalo di na le dipego di le dintsi tsa batho ba ba neng ba latelela bomolemo. Ka sekai, akanya ka Hesekia yo o neng a na le bomolemo. Rraagwe e bong Kgosi Ahase wa Juta, go bonala a ne a obamela Moleke. “E rile Ahase a simolola go busa a bo a le dinyaga di le 20; mme a busa ka dinyaga di le 16 mo Jerusalema; ga a ka a dira se se siameng mo matlhong a ga Jehofa Modimo wa gagwe, jaaka Dafite rraagwe. Mme a sepela mo tseleng ya dikgosi tsa Iseraele, ee, a ba a ralatsa morwawe molelo kafa mekgweng e e makgapha ya baditšhaba, ba Jehofa o kileng a ba kgorometsa fa pele ga bone Baiseraele. O ne a tle a ise ditlhabelo a fise maswalo mo mafelong a a tlotlometseng, le mo godimo ga dithaba, le fa tlase ga setlhare sengwe le sengwe se setala.” (2 Dikgosi 16:2-4) Ba bangwe ba bolela gore ‘go ralatsa molelo’ gono go ne go tshwantshetsa mofuta mongwe wa ngwao ya go itshekisa mo kobamelong mme e seng go ntsha batho setlhabelo. Le fa go ntse jalo, buka ya Molech—A God of Human Sacrifice in the Old Testament, e e kwadilweng ke John Day, e bolela jaana: “Go na le bosupi mo metsweding e e tlwaelegileng ya tshedimosetso le ya Punic [ya kwa Carthage], le mo bosuping jwa boithutamarope, gore go ntsha batho ditlhabelo go ne go le teng . . . mo lefatsheng la Bakanana, mme ka jalo ga go na lebaka la go belaela fa Tesetamente e Kgologolo e bua [ka go ntsha batho ditlhabelo].” Mo godimo ga moo, 2 Ditirafalo 28:3 e bolela ka tlhamalalo gore Ahase o ne “a fisa bana ba gagwe mo molelong.” (Bapisa Duteronome 12:31; Pesalema 106:37, 38.) A bo e ne e le ditiro tse di boikepo jang ne!

4. Hesekia o ne a itshwara jang mo tikologong e e neng e tletse bosula?

⁴ Hesekia o ne a dira jang mo tikologong eno e e neng e tletse boikepo? Pesalema ya bo119 e a kgatlha, ka gonne bangwe ba dumela gore Hesekia ke ene a e tlhamileng, a e tlhama ka nako ya fa a ne a sa ntse e le kgosana. (Pesalema 119:46, 99, 100) Ka jalo maemo a a neng a le mo go one a ka nna a bo a tlhalosiwa ke mafoko ano: “Dikgosana le tsone tsa dula, tsa nna tsa ntsheba; mme motlhanka wa gago a nna a tlhatlhanya ditao tsa gago fela. Ke nyera mowa ka go imelesega.” (Pesalema 119:23, 28) E re ka a ne a dikologilwe ke batho ba ba neng ba le mo bodumeding jwa maaka, Hesekia o ka tswa a ne a sotlwa ke maloko a bogosi, a mo sotla thata mo a neng a sa kgone go robala. Le fa go ntse jalo, o ne a latelela bomolemo, fa nako e ntse e ya o ne a nna kgosi, mme “a dira se se siameng mo matlhong a ga Jehofa . . . O ne a ikanya Jehofa Modimo wa Iseraele.”—2 Dikgosi 18:1-5.

Ba ne Ba Tswelela Pele Ba na Le Bomolemo

5. Daniele le ditsala tsa gagwe tse tharo ba ne ba lebane le diteko dife?

⁵ Batho ba bangwe ba ba neng ba tlhoma sekao mo go nneng le bomolemo e ne e le Daniele le ditsala tsa gagwe tse tharo tsa Bahebera, e bong Hanania, Mishaele le Asaria. Ba ne ba ntshiwa ka dikgoka mo nagagaeng ya bone mme ba isiwa botshwarong kwa Babilone. Basha bano ba banè ba ne ba tewa maina a Sebabilone—Beleteshasare, Shaterake, Meshake le Abetenego. Ba ne ba neelwa “dijo tsa kgosi,” go akaretsa le dijo tse di neng di ilediwa ke Molao wa Modimo. Mo godimo ga moo, ba ne ba patelesega go tsaya khoso e e neng e tsaya dingwaga di le tharo e e neng e amana le “thuto le puo ya Sekalatea.” Seno se ne se feta fela go ithuta puo e nngwe, ka gonne go bonala e kete lereo “Sekalatea” fano le supa setlhopha se se rutegileng. Ka gone, basha bano ba Bahebera ba ne ba tshwanelwa ke go ithuta dithuto tsa Sebabilone tse di neng di sokame.—Daniele 1:1-7.

6. Ke ka ntlha yang fa re ka bolela gore Daniele o ne a latelela go nna le bomolemo?

⁶ Le fa ba ne ba lebane le mathata a magolo a a neng a ka dira gore ba ineele, Daniele le ditsala tsa gagwe tse tharo ba ne ba tlhopha bomolemo go na le boikepo. Daniele 1:21 e bolela jaana: “Daniele a nna a tshela fela a ya go fitlha mo ngwageng wa ntlha wa kgosi Kurose.” Ee, Daniele o ne “a tshela fela” e le motlhanka wa ga Jehofa yo o nang le bomolemo ka dingwaga tse di fetang 80—ka nako ya go fenya le ya go fenngwa ga dikgosi di le mmalwa tse di neng di nonofile. O ne a tswelela pele a ikanyega mo Modimong go sa kgathalesege go mo logela maano le go mo rera ga badiredi ba puso ba ba neng ba tlola molao le boikepo jwa tlhakanelodikobo jo bo neng bo tseneletse mo bodumeding jwa Sebabilone. Daniele o ne a tswelela pele a latelela bomolemo.

7. Ke eng se se ka ithutiwang mo tseleng e Daniele le ditsala tsa gagwe tse tharo ba neng ba e latela?

⁷ Re ka ithuta mo gontsi go tswa go Daniele yo o neng a boifa Modimo le ditsala tsa gagwe. Ba ne ba latelela bomolemo mme ba gana go tshwaediwa ke ngwao ya Sebabilone. Le mororo ba ne ba filwe maina a Sebabilone, ga ba ise ba ke ba tsamaye ba tlogele go ipitsa batlhanka ba ga Jehofa. Ebu, mo e ka nnang dingwaga di le 70 morago ga moo, kgosi ya Babilone e ne ya bitsa Daniele ka leina la gagwe la Sehebera! (Daniele 5:13) Mo botshelong jwa gagwe jotlhe jo boleele, Daniele o ne a gana go ineela tota le mo dilong tse dipotlana. Jaaka motho yo mosha, o ne “a ikaelela mo pelong ya gagwe fa a se ketla a iitshekolola ka dijo tsa kgosi.” (Daniele 1:8) Boemo jono jwa go sa ineele jo bo neng bo tserwe ke Daniele le ditsala tsa gagwe tse tharo kwantle ga pelaelo bo ne jwa ba nonotsha gore ba falole diteko tse di neng di kaya botshelo le loso tse kwa morago ba neng ba lebana le tsone.—Daniele, dikgaolo 3 le 6.

Go Latelela Bomolemo Gompieno

8. Basha ba Bakeresete ba ka gana jang go tshwaediwa ke lefatshe la ga Satane?

⁸ Fela jaaka Daniele le ditsala tsa gagwe tse tharo, batho ba Modimo gompieno ga ba batle go tshwaediwa ke lefatshe le le boikepo la ga Satane. (1 Johane 5:19) Fa e le gore o mosha wa Mokeresete, o ka nna wa bo o gateletswe thata ke balekane gore o etse mekgwa ya bone e e feteletsang dilo ya go apara, ya go ipaakanya le mmino. Le fa go le jalo, mo boemong jwa go latela feshene nngwe le nngwe kana mokgwa mongwe le mongwe o o tsenang, ema o nitame, mme o se ka wa iteseletsa “go bopega jaaka tsamaiso eno ya dilo.” (Baroma 12:2) “[Gana] gotlhelele bosenangbomodimo le dikeletso tsa selefatshe mme . . . [tshela] ka go itekanela sentle ga mogopolo le tshiamo le boineelo jwa bomodimo.” (Tito 2:11, 12) Selo sa botlhokwa ga se gore o amogelwe ke balekane ba gago mme ke go amogelwa ke Jehofa.—Diane 12:2.

9. Bakeresete ba ba nang le dikgwebo ba ka lebana le dikgatelelo dife, mme ba tshwanetse go itshwara jang?

⁹ Bakeresete ba ba godileng le bone ba lebana le mathata mme ba tshwanetse go nna le bomolemo. Borakgwebo ba Bakeresete ba ka nna ba raelesega go dirisa mekgwa e e belaetsang kana go itlhokomolosa ditaelo tsa puso le melao ya lekgetho. Le fa go ntse jalo, go sa kgathalesege gore bagaisani ba kgwebo kana badirikawena ba itshwara jang, “re eletsa go tshela ka go tlhoka matsoketsane mo dilong tsotlhe.” (Bahebera 13:18) Dikwalo di re tlhoka gore re ikanyege le go dirisana sentle le bahiri, bahiriwa, bareki le dipuso tsa lefatshe. (Duteronome 25:13-16; Mathaio 5:37; Baroma 13:1; 1 Timotheo 5:18; Tito 2:9, 10) Gape a re gagamaleleng go nna le thulaganyo mo dikgwebong tsa rona. Fa re na le direkoto tse di siameng le go kwala ditumalano, gantsi re ka thibela go tlhoka kutlwisisano.

Nnang lo Itlhokometse!

10. Ke ka ntlha yang fa go tlhokega go ‘itlhokomela’ malebana le mmino o re o tlhophang?

¹⁰ Pesalema 119:9 e tlhomolola karolo e nngwe ya go tswelela pele o na le bomolemo mo matlhong a Modimo. Mopesalema o ne a opela jaana: “Ana motho wa lekau o tlaa ntlafatsa tsela ya gagwe ka eng? Ka go e tlhokomela kafa lefokong la gago.” Nngwe ya dibetsa tse di berekang thata tsa ga Satane ke mmino, o o nang le maatla a go tlhotlheletsa maikutlo. Ka maswabi, Bakeresete ba bangwe ba ile ba palelwa ke go ‘itlhokomela’ malebana le mmino mme ba iphitlhela ba gogelwa ke mefuta e e maswe thata ya one, e e jaaka rap le heavy metal. Ba bangwe ba ka nna ba ganetsa ka gore mmino o o ntseng jalo ga o ba gobatse kana ga ba reetse mafoko a one. Ba bangwe ba bolela gore ba rata fela morithitho o mogolo kana modumo o o kwa godimo wa dikatara. Le fa go le jalo, mo Bakereseteng ga se kgang ya gore selo sengwe se monate. Se ba tshwenyegileng ka sone ke gore a ‘se a amogelesega mo Moreneng.’ (Baefeso 5:10) Ka kakaretso, mmino wa heavy metal le wa rap o rotloetsa boikepo jo bo jaaka matlhapa, kgokafalo, tota le kobamelo ya ga Satane—e leng dilo tse tota di sa batlegeng mo bathong ba Modimo.a (Baefeso 5:3) Bannye le bagolo, mongwe le mongwe wa rona o tla bo a dira sentle go akanyetsa potso eno, Ka mofuta wa me wa mmino, a ke latelela bomolemo kana boikepo?

11. Mokeresete a ka itlhokomela jang malebana le dithulaganyo tsa thelebishene, dibidio le dibaesekopo?

¹¹ Dithulaganyo di le dintsi tsa thelebishene, dibidio le dibaesekopo di rotloetsa boikepo. Mankge mongwe yo o tumileng thata wa bolwetse jwa tlhaloganyo o bolela gore, ‘go rata menate ka tsela e e feteletseng, tlhakanelodikobo, bothubaki, bohula le bopelotshetlha’ di aname thata mo dibaesekopong tse dintsi tse di dirwang gompieno. Ka gone, go itlhokomela go akaretsa go nna motho yo o tlhophang mo go se re batlang go se lebelela. Mopesalema o ne a rapela jaana: “Faposa matlho a me mo go lebeng boithamako.” (Pesalema 119:37) Mosha mongwe wa Mokeresete yo o neng a bidiwa Joseph o ne a dirisa molaomotheo ono. Fa filimi nngwe e ne e simolola go bontsha tlhakanelodikobo le bothubaki fela jaaka di ntse, o ne a tswa mo lefelong la dibaesekopo. A o ne a tlhabiwa ke ditlhong go dira seno? “Tota le e seng,” Joseph o bolela jalo. “Ke ne ka akanya ka Jehofa pele le go mo itumedisa.”

Seabe sa go Ithuta le go Tlhatlhanya

12. Ke ka ntlha yang fa go ithuta ka namana le go tlhatlhanya go tlhokega gore go latelelwe bomolemo?

¹² Ga go a lekana go tila go dira dilo tse di bosula. Gape go latelela bomolemo go akaretsa go ithuta le go tlhatlhanya ka dilo tse di molemo tse di kwadilweng mo Lefokong la Modimo e le gore melaometheo ya lone e e siameng e ka dirisiwa mo botshelong. “Ana ke rata molao wa gago jang!” mopesalema o ne a goela kwa godimo jalo. “Ke one go tlhatlhanya ga me ka letsatsi lotlhe.” (Pesalema 119:97) A go ithuta Baebele ka namana le dikgatiso tsa Bokeresete ke selo se se leng mo thulaganyong ya gago ya beke le beke? Ke boammaaruri gore go batla nako ya go ithuta Lefoko la Modimo ka tlhoafalo le go tlhatlhanya ka thapelo ka lone e ka nna kgwetlho. Mme gantsi go a kgonega go reka nako mo ditirong tse dingwe. (Baefeso 5:15, 16) Gongwe makuku e ka nna nako e e go siametseng go rapela, go ithuta le go tlhatlhanya.—Bapisa Pesalema 119:147.

13, 14. (a) Ke ka ntlha yang fa go tlhatlhanya go le botlhokwa thata jaana? (b) Re ka tlhatlhanya ka dikwalo dife tse di ka re thusang go ila boitsholo jo bo sa siamang jwa tlhakanelodikobo?

¹³ Go tlhatlhanya go botlhokwa thata, ka gonne go re thusa go boloka se re se ithutileng. Se se botlhokwa le go feta, go ka re thusa gore re nne le pono ya Modimo mo dilong. Fa re tshwantsha: Go itse fela gore Modimo o ila kgokafalo go farologane gotlhelele le fa o ‘ila se se boikepo le go ngaparela se se molemo.’ (Baroma 12:9) Tota re ka ikutlwa ka tsela e Jehofa a ikutlwang ka yone ka boitsholo jo bo sa siamang jwa tlhakanelodikobo fa re tlhatlhanya ka ditemana tsa Baebele tsa konokono, tse di jaaka Bakolosa 3:5, e e rotloetsang jaana: “Jalo, bolayang, ditokololo tsa lona tsa mmele tse di mo lefatsheng malebang le kgokafalo, bosengphepa, go fisegela tlhakanelodikobo, keletso e e utlwisang botlhoko, le keletso ya bopelotshetlha, se e leng kobamelo ya medingwana.” Ipotse jaana: ‘Ke mofuta ofe wa keletso ya tlhakanelodikobo e ke tshwanetseng go e bolaya? Ke eng se ke tshwanetseng go se tila se se ka nnang sa tsosa keletso e e sa siamang? A ke tshwanetse go dira diphetogo dingwe malebana le tsela e ke tshwarang batho ba bong bo sele ka yone?’—Bapisa 1 Timotheo 5:1, 2.

¹⁴ Paulo o rotloetsa Bakeresete gore ba ithibe mo kgokafalong mme ba bontshe boikgapo e le gore “motho a se ka a ya ntlheng ya go gobatsa a ba a tsenelela mo ditshwanelong tsa mokaulengwe wa gagwe.” (1 Bathesalonika 4:3-7) Ipotse jaana: ‘Ke ka ntlha yang fa go dira kgokafalo go le kotsi? Ke ikutlwisa botlhoko ka eng kana go utlwisa yo mongwe botlhoko fa ke leofa mo ntlheng eno? Seno se tla nkama jang mo semoyeng, mo maikutlong le mo mmeleng? Go tweng ka batho mo phuthegong ba ba tlodileng molao wa Modimo mme ba sa ikwatlhae? Dilo di ba tsamaetse jang?’ Go tlhwaela tsebe se Dikwalo di se bolelang ka boitshwaro jo bo ntseng jalo go ka dira gore re tlhoe thata se se bosula mo matlhong a Modimo. (Ekesodo 20:14; 1 Bakorintha 5:11-13; 6:9, 10; Bagalatia 5:19-21; Tshenolo 21:8) Paulo o bolela gore mogokafadi “o itlhokomolosa, e seng motho, fa e se Modimo.” (1 Bathesalonika 4:8) Tota ke Mokeresete ofe wa boammaaruri yo o ka itlhokomolosang Rraagwe wa selegodimo?

Bomolemo Le ba Re Tlwaelanang le Bone

15. Go tlwaelana le ba bangwe go na le seabe sefe mo go lateleleng bomolemo?

¹⁵ Selo sengwe se se thusang ke go tlwaelana le batho ba ba molemo. Mopesalema o ne a opela jaana: “Ke monkana wa botlhe ba ba go boifang [Jehofa], le wa ba ba tlhokomelang dikaelo tsa gago.” (Pesalema 119:63) Re tlhoka botsalano jo bo molemo jo re bo bonang kwa dipokanong tsa Bokeresete. (Bahebera 10:24, 25) Fa re ikgaphela kwa thoko, re ka nna ra simolola go ipona, mme boikepo bo ka nna jwa re fekeetsa. (Diane 18:1) Le fa go ntse jalo, bokopano jo bo lorato jwa Bakeresete bo ka nonotsha boikaelelo jwa rona jwa go nna le bomolemo. Gape ke boammaaruri gore re tshwanetse go ikela tlhoko mo ditsaleng tse di sa siamang. Re ka bontsha baagelani, badirikarona le baithutikarona lorato. Mme fa tota re tsamaya ka tsela e e tshwanetseng, re tla tila go tlwaelana thata le batho ba ba sa lateleleng bomolemo jwa Bokeresete.—Bapisa Bakolosa 4:5.

16. Go dirisa 1 Bakorintha 15:33 go ka re thusa jang gore re latelele bomolemo gompieno?

¹⁶ Paulo o ne a kwala jaana: “Go itlwaelanya le ba ba bosula go senya mekgwa e e nang le mosola.” Ka go bua mafoko ano, o ne a tlhagisa badumedi gore ba ka latlhegelwa ke tumelo ya bone fa ba tlwaelana le ba ba ipolelang gore ke Bakeresete mme ba ganne thuto ya Dikwalo e e malebana le tsogo. Molaomotheo wa tlhagiso ya ga Paulo o dira mo bathong ba re tlwaelanang le bone kwa ntle le mo teng ga phuthego. (1 Bakorintha 15:12, 33) Legale, ga re batle go tlhokomologa bakaulengwe le bokgaitsadi ba rona ba semoya fela ka gonne ba sa dumalane le rona mo dilong dingwe tse tota e leng tsa botho fela. (Mathaio 7:4, 5; Baroma 14:1-12) Le fa go ntse jalo, re tshwanetse go nna kelotlhoko fa ba bangwe mo phuthegong ba itshwara ka tsela e e belaetsang kana ba bontsha moya wa go tenega kana wa go ngongorega. (2 Timotheo 2:20-22) Go botlhale gore re tlwaele thata ba re ka itumelelang “go naana kgothatso” le bone. (Baroma 1:11, 12) Seno se tla re thusa go latelela bomolemo le go tswelela pele re le mo ‘tseleng ya botshelo.’—Pesalema 16:11.

Tswelela Pele o Latelela Bomolemo

17. Dipalo kgaolo 25 e bolela gore ke masetlapelo afe a a neng a wela Baiseraele, mme seno se re ruta eng?

¹⁷ Pelenyana fela ga Baiseraele ba gapa Naga e e Solofeditsweng, diketekete tsa bone di ne tsa itlhophela go latelela boikepo—mme tsa welwa ke masetlapelo. (Dipalo, kgaolo 25) Gompieno, batho ba ga Jehofa ba mo kgorong ya lefatshe le lesha la tshiamo. Batho ba ba tla nnang le tshiamelo e e segofaditsweng ya go tsena mo go lone e tla bo e le ba ba tswelelang pele ba gana boikepo jwa lefatshe leno. Jaaka batho ba ba sa itekanelang, re ka tswa re na le ditemalo tse di phoso, mme Modimo a ka re thusa go latela dikaelo tse di siameng tsa moya wa gagwe o o boitshepo. (Bagalatia 5:16; 1 Bathesalonika 4:3, 4) Ka gone a re tlhwaeleng tsebe tlhagiso e Joshua a neng a e neela Iseraele: “Boifang Jehofa, lo mo direle ka mo go se nang boithamako, le ka boammaaruri.” (Jošua 24:14) Go boifa ka tshisimogo go itumolola Jehofa go tla re thusa gore re latelele bomolemo.

18. Bakeresete botlhe ba tshwanetse go iketleetsa go dira eng malebana le boikepo le bomolemo?

¹⁸ Fa e le gore o eletsa ka pelo yotlhe gore o itumedise Modimo, iketleetse go tlhwaela tsebe kgothatso eno ya ga Paulo: “Dilo lefa e le dife tse di boammaaruri, dilo lefa e le dife tse di tsewang ka masisi, dilo lefa e le dife tse di siameng, dilo lefa e le dife tse di itshekileng, dilo lefa e le dife tse di rategang, dilo lefa e le dife tse di buiwang molemo, lefa e le bomolemo bofe jo bo leng gone jo bogolo thata le selo lefa e le sefe se se tshwanelwang ke pako se se leng gone, tswelelang lo akanyetsa dilo tseno.” Fa o dira seno, go tla felela ka eng? Paulo o ne a bolela jaana: “Dirang dilo tseno e le tlwaelo; mme Modimo wa kagiso o tla nna le lona.” (Bafilipi 4:8, 9) Ee, ka thuso ya ga Jehofa o ka gana boikepo mme wa latelela bomolemo.

[Ntlha e e kwa tlase]

Dintlha Tsa Poeletso

◻ Ke eng se se tlhokegang gore go latelelwe bomolemo?

◻ Ke kafa tlase ga maemo afe a Hesekia, Daniele le Bahebera ba bararo ba neng ba tswelela pele ba na le bomolemo?

◻ Re ka tshwana jang le Daniele gore re emelane le maano a ga Satane?

◻ Ke ka ntlha yang fa Bakeresete ba tshwanetse go itlhokomela malebana le boitlosobodutu?

◻ Go ithuta, go tlhatlhanya, le batho ba re tlwaelanang le bone, di na le seabe sefe mo go lateleleng bomolemo?

[Setshwantsho mo go tsebe 15]

Hesekia yo mosha o ne a latelela bomolemo le mororo a ne a dikologilwe ke baobamedi ba ga Moleke

[Ditshwantsho mo go tsebe 17]

Bakeresete ba tshwanetse go itlhokomela malebana le boitlosobodutu