Dira Boipolelo Jwa Phatlalatsa Gore o Bolokwe

“Mongwe le mongwe yo o bitsang leina la ga Jehofa o tla bolokwa.”—BAROMA 10:13.

1. Mo hisitoring yotlhe, ke ditlhagiso dife tse di neng tsa utlwatswa?

HISITORI e tlhalosa ‘malatsi a ga Jehofa’ a le mmalwa. Morwalela wa motlha wa ga Noa, go nyelediwa ga Sodoma le Gomora, le go senngwa ga Jerusalema ka 607 B.C.E. le ka 70 C.E. e ne e le malatsi a magolo le a a boitshegang a ga Jehofa. E ne e le malatsi a go diragatsa tshiamiso mo bathong ba ba neng ba tsuologela Jehofa. (Malaki 4:5; Luke 21:22) Mo metlheng eo, ba le bantsi ba ne ba nyelela ka ntlha ya boikepo jwa bone. Mme ba bangwe ba ne ba falola. Jehofa o ne a dira gore go utlwatswe ditlhagiso, tse di neng di itsise baikepi ka masetlapelo a a neng a tla tloga a tla le go naya batho ba ba dipelo tse di ikanyegang sebaka sa go batla poloko.

2, 3. (a) Ke tlhagiso efe ya boporofeti e e neng ya nopolwa ka Pentekosete? (b) Go tloga ka Pentekosete ya 33 C.E., ke eng se se neng se tlhokega malebana le go bitsa leina la ga Jehofa?

² Go senngwa ga Jerusalema ka 70 C.E. ke sekai se se tlhomologileng sa seno. Fa a ne a go bolelela pele ka tiragalo eo mo e ka nnang ka dingwaga tse 900 go sa le pele, moporofeti Joele o ne a kwala jaana: “Ke tlaa bonatsa dikgakgamatso mo magodimong le mo lefatsheng, madi le molelo, le dithogomosi tsa mosi. Letsatsi le tlaa fetolwa lefifi le kgwedi madi, pele motlha o mogolo le o o boitshegang wa ga Jehofa o ise o tle.” Motho o ne a ka falola jang mo nakong eno e e tshosang? Joele o ne kwala jaana ka tlhotlheletso: “Go tlaa dira[ga]la go re, le fa e le mang yo o tlaa bitsang leina la ga Jehofa o tlaa gololwa; gonne mo thabeng ya Sione le mo Jerusalema go tlaa nna ba ba falolang, jaaka Jehofa a buile, le mo masaleleng go tlaa nna bone ba Jehofa o ba bitsang.”—Joele 2:30-32.

³ Ka Pentekosete ya 33 C.E., moaposetoloi Petere o ne a bolelela boidiidi jwa Bajuda le basokologi kwa Jerusalema mme a nopola boporofeti jwa ga Joele, a bontsha gore bareetsi ba gagwe ba ne ba ka lebelela go diragadiwa ga seno mo letsatsing la bone: “Ke tla naya dikgakgamatso tse di bolelelang pele isagwe mo legodimong kwa godimo le ditshupo mo lefatsheng kwa tlase, madi le molelo le mouwane wa mosi; letsatsi le tla fetolwa lefifi le ngwedi madi pele ga letsatsi le legolo le le le tlhomologileng thata la ga Jehofa le goroga. Mme mongwe le mongwe yo o bitsang leina la ga Jehofa o tla bolokwa.” (Ditiro 2:16-21) Boidiidi jotlhe jwa batho jo bo neng bo reeditse Petere bo ne bo le kafa tlase ga Molao wa ga Moshe, mme ka gone bo ne bo itse leina la ga Jehofa. Petere o ne a tlhalosa gore, go tloga ka nako eo go ya pele, go bitsa leina la ga Jehofa go ne go tla akaretsa mo gontsi. Se se tlhomologileng, seno se ne se akaretsa go kolobediwa mo leineng la ga Jesu, ene yo o neng a bolawa mme kwa morago a tsosediwa mo botshelong jwa selegodimo jwa bosasweng.—Ditiro 2:37, 38.

4. Ke molaetsa ofe o Bakeresete ba neng ba o bolela kgakala?

⁴ Go tloga ka Pentekosete go ya pele, Bakeresete ba ne ba anamisa lefoko ka Jesu yo o tsositsweng. (1 Bakorintha 1:23) Ba ne ba itsise gore batho ba ka amogelwa e le barwa ba semoya ba ga Jehofa Modimo mme ba nna karolo ya “Iseraele wa Modimo” o mosha, setšhaba sa semoya se se neng se tla ‘bolela dinonofo tse di molemolemo tsa ga Jehofa.’ (Bagalatia 6:16; 1 Petere 2:9) Ba ba neng ba nna ba ikanyega go ya losong ba ne ba tla rua botshelo jwa selegodimo jwa bosasweng e le baruaboswammogo le Jesu mo Bogosing jwa gagwe jwa selegodimo. (Mathaio 24:13; Baroma 8:15, 16; 1 Bakorintha 15:50-54) Mo godimo ga moo, Bakeresete bano ba ne ba tshwanetse go bolela ka go tla ga letsatsi le legolo le le le boitshegang la ga Jehofa. Ba ne ba tshwanetse go tlhagisa lefatshe la Bajuda le le neng le tla tloga le tlelwa ke pitlagano e e iseng e ko e tlhasele Jerusalema le batho ba go bolelwang e le ba Modimo go fitlha ka nako eo. Le fa go ntse jalo, go ne go tla nna le bafalodi. Bomang? Ba ba neng ba bitsa leina la ga Jehofa.

“Mo Malatsing a Bofelo”

5. Ke ditiragatso dife tsa boporofeti tse di diragetseng gompieno?

⁵ Ka ditsela di le dintsi, maemo a a neng a le teng ka nako eo a ne a bonela pele se re se bonang se diragala gompieno. Fa e sa le ka 1914, batho ba ntse ba tshela mo nakong e e kgethegileng e Baebele e e bolelang gore ke ‘motlha wa bokhutlo,’ ‘bokhutlo jwa tsamaiso ya dilo,’ le ‘malatsi a bofelo.’ (Daniele 12:1, 4; Mathaio 24:3-8; 2 Timotheo 3:1-5, 13) Mo lekgolong la rona la dingwaga, dintwa tse di setlhogo, bothubaki jo bo sa laolesegeng le go senngwa ga setšhaba le tikologo go bontshitse go diragadiwa mo gogolo ga boporofeti jwa Baebele. Gotlhe gono ke karolo ya sesupo se se neng sa porofetiwa ke Jesu, se se bontshang gore batho ba tla tloga ba bona letsatsi la bofelo, la makgaolakgang le le boitshegang la ga Jehofa. Sone se fitlha kwa setlhoeng mo ntweng ya Haramagedona, setlhoa sa “pitlagano e kgolo e e leng gore ga e ise e ko e diragale fa e sale ka tshimologo ya lefatshe go fitlha jaanong, nnyaa, le gone e se kitla e diragala gape.”—Mathaio 24:21; Tshenolo 16:16.

6. (a) Jehofa o ntse a dira jang go boloka bapelonomi? (b) Re fitlhela kae kgakololo ya ga Paulo e e malebana le tsela ya go falola?

⁶ Jaaka letsatsi la tshenyego le ntse le atamela thata, Jehofa o tsaya kgato gore bapelonomi ba bolokwe. Mo “motlheng [ono] wa bokhutlo,” o phuthile ba ba setseng ba Iseraele wa semoya wa Modimo mme, go tloga ka bo1930 go ya pele, o ne a lebisa tlhokomelo ya batlhanka ba gagwe ba ba mo lefatsheng ka go phutha “boidiidi jo bogolo, jo go seng motho ope yo o neng a kgona go bo bala, bo tswa mo merafeng yotlhe le ditso le batho le diteme.” Jaaka setlhopha, bano ke ba “ba tswang mo pitlaganong e kgolo” ba ntse ba tshela. (Tshenolo 7:9, 14) Mme motho mongwe le mongwe a ka tlhomamisa jang gore o a falola? Moaposetoloi Paulo o araba potso eo. Mo go Baroma kgaolo 10 o ntsha kgakololo e e molemo ya go falola—kgakololo e e neng e dira mo motlheng wa gagwe e bile e dira le mo motlheng wa rona.

Go Rapelela Poloko

7. (a) Ke tsholofelo efe e e supilweng mo go Baroma 10:1, 2? (b) Ke ka ntlha yang fa Jehofa jaanong a ka dira gore go bolelwe “dikgang tse di molemo” gongwe le gongwe?

⁷ Fa Paulo a ne a kwala buka ya Baroma, Jehofa o ne a setse a latlhile setšhaba sa Iseraele. Le fa go ntse jalo, moaposetoloi yono o ne a tlhomamisa jaana: “Keletso e e molemo ya pelo ya me le mokokotlelo wa me ka bone mo Modimong, eleruri, ke tsa gore ba bolokwe.” O ne a solofetse gore Bajuda ka bongwe ba kgone go nna le kitso e e tlhomameng ya go rata ga Modimo, e e neng e tla ba boloka. (Baroma 10:1, 2) Mo godimo ga moo, Jehofa o ne a tla eletsa gore botlhe ba ba mo lefatsheng lotlhe la batho ba ba nang le tumelo ba bolokwe, jaaka go supilwe mo go Johane 3:16: “Modimo o ratile lefatshe mo go kalo mo o bileng wa ntsha Morwaone yo o tsetsweng a le esi, e le gore mongwe le mongwe yo o supang tumelo mo go ene a tle a se ka a senngwa mme a nne le botshelo jo bo sa khutleng.” Setlhabelo sa ga Jesu sa thekololo se ne sa bula tsela ya poloko eo e e molemolemo. Fela jaaka mo letsatsing la ga Noa le mo malatsing a mangwe a katlholo a a neng a latela, Jehofa o ne a dira gore go bolelwe “dikgang tse di molemo” tse di tlhalosang tsela ya poloko.—Mareko 13:10, 19, 20.

8. E le go etsa sekao sa ga Paulo, Bakeresete ba boammaaruri ba bontsha keletso e e molemo mo go bomang gompieno, mme gone jang?

⁸ Go bontsha keletso e e molemo mo Mojudeng mmogo le mo Moditšhabeng, Paulo o ne a rera ka sebaka sengwe le sengwe. O ne a tle “a tlhotlheletse Bajuda le Bagerika go dumela.” O ne a bolelela bagolwane ba Efeso jaana: “Ke ne ka se ka ka ithiba go lo bolelela sepe sa dilo tse di neng di na le poelo lefa e le go lo ruta phatlalatsa le go tswa ntlong go ya ntlong e nngwe. Mme ke ne ka naya bosupi ka botlalo mo Bajudeng le mo Bagerikeng kaga boikotlhao mo Modimong le tumelo mo Moreneng wa rona Jesu.” (Ditiro 18:4; 20:20, 21) Ka mo go tshwanang, Basupi ba ga Jehofa gompieno ba ipha nako ya go rera, e seng fela mo bathong ba ba ipolelang gore ke Bakeresete mme le mo bathong botlhe, tota le go ya “karolong e e kwa kgakalakgakala ya lefatshe.”—Ditiro 1:8; 18:5.

Go Bolela “‘Lefoko’ la Tumelo”

9. (a) Baroma 10:8, 9 e re kgothaletsa gore re nne le tumelo e e ntseng jang? (b) Re tshwanetse go dira boipolelo jwa tumelo ya rona leng le gone jang?

⁹ Tumelo e e nnetseng ruri e a tlhokega gore motho a bolokwe. Paulo o ne a bolela jaana fa a ne a nopola Duteronome 30:14: “‘Lefoko le gaufi le wena, mo molomong wa gago le mo pelong ya gago’; ke gore ‘lefoko’ la tumelo, le re le rerang.” (Baroma 10:8) Fa re ntse re rera “‘lefoko’ la tumelo,” le simolola go nwelelela thata mo dipelong tsa rona. Go ne go ntse jalo ka Paulo, mme mafoko a mangwe a gagwe a ka nonotsha boikaelelo jwa rona gore re tshwane le ene mo go abeleng ba bangwe tumelo eo: “Fa o bolela ‘lefoko leo le le mo molomong wa gago’ phatlalatsa, gore Jesu ke Morena, o bo o supa tumelo mo pelong ya gago gore Modimo o ne wa mo tsosa mo baswing, o tla bolokwa.” (Baroma 10:9) Boipolelo jono ga bo dirwe fa pele ga ba bangwe fela ka nako ya kolobetso mme bo tshwanetse jwa nna boipolelo jo bo tswelelang pele, bosupi jo bo tlhoafetseng jwa phatlalatsa malebana le dikarolo tsotlhe tse di molemo tsa boammaaruri. Boammaaruri jo bo ntseng jalo bo ikaegile thata ka leina le le tlhwatlhwakgolo la Morena Molaodi Jehofa; ka Kgosi ya rona ya Bomesia le Morekolodi, Morena Jesu Keresete; le ka ditsholofetso tse di molemolemo tsa Bogosi.

10. Go dumalana le Baroma 10:10, 11, re tshwanetse go tshwara “‘lefoko’ [leno] la tumelo” jang?

¹⁰ Ga go na ope yo o ka bolokwang a sa amogela le go dirisa “‘lefoko’ la tumelo,” jaaka moaposetoloi a tswelela pele a bolela jaana: “Motho o supa tumelo ka pelo go bona tshiamo, mme o dira polelo ka molomo phatlalatsa go bona poloko. Gonne Lokwalo lwa re: ‘Ga go na ope yo o bayang tumelo ya gagwe mo go ene yo o tla swabisiwang.’” (Baroma 10:10, 11) Re tshwanetse go nna le kitso e e tlhomameng ya “‘lefoko’ [leno] la tumelo” le go tswelela re le boloka mo dipelong tsa rona e le gore re tlhotlheletsege go bolelela ba bangwe ka lone. Jesu ka boene o re gakolola jaana: “Lefa e le mang yo o tlhabisiwang ditlhong ke nna le ke mafoko a me mo kokomaneng e e akafalang eno le e e boleo, Morwa motho le ene o tla tlhabisiwa ditlhong ke ene fa a goroga ka kgalalelo ya ga Rraagwe a na le baengele ba ba boitshepo.”—Mareko 8:38.

11. Dikgang tse di molemo di tshwanetse go bolelwa go ya bokgakaleng bofe, mme ka ntlha yang?

¹¹ Jaaka go boleletswe pele ke moporofeti Daniele, mo motlheng ono wa bokhutlo, “ba ba botlhale” ba bonwa ba phatsima “jaaka phatsimo ya phuthologo ya loapi,” jaaka go neela bosupi ka Bogosi go atologa go ya dikhutlong tsa lefatshe. Ba ‘sokololela bontsi kwa tshiamong,’ mme kitso ya boammaaruri tota e ntsifetse, ka gonne Jehofa o phatsimisa lesedi thata mo boporofeting jo bo malebana le nako eno ya bofelo. (Daniele 12:3, 4) Molaetsa wa poloko ke one o o leng botlhokwa gore botlhe ba ba ratang boammaaruri le tshiamo ba bolokwe.

12. Baroma 10:12 e amana jang le thomo ya moengele e e tlhalositsweng mo go Tshenolo 14:6?

¹² Moaposetoloi Paulo o tswelela pele jaana: “Ga go na pharologanyo gareng ga Mojuda le Mogerika, gonne go na le Morena a le mongwe fela godimo ga botlhe, yo o humetseng botlhe ba ba mmitsang.” (Baroma 10:12) “Dikgang tse di molemo” di tshwanetse go rerwa gompieno ka selekanyo se segolo mo lefatsheng—mo ditšhabeng tsotlhe, go ya fela kwa dikhutlong tsa lefatshe. Moengele wa Tshenolo 14:6 o tswelela a fofa fa gare ga legodimo, a re neela “dikgang tse di molemo tsa bosakhutleng go di bolela e le mafoko a a itumedisang mo go ba ba nnang mo lefatsheng, le mo morafeng mongwe le mongwe le lotso le teme le batho.” Seno se tla solegela batho ba ba utlwang molemo jang?

Go Bitsa Leina la ga Jehofa

13. (a) Temana ya rona ya ngwaga ya 1998 ke efe? (b) Ke ka ntlha yang fa temana eno ya ngwaga e tshwanela thata gompieno?

¹³ Fa a nopola Joele 2:32, Paulo o bolela jaana: “Mongwe le mongwe yo o bitsang leina la ga Jehofa o tla bolokwa.” (Baroma 10:13) A bo go tshwanela jang ne gore mafoko ao a bo a dirisitswe go nna temana ya ngwaga ya Basupi ba ga Jehofa ya 1998! Ga go ise go nne botlhokwa thata jaana pele go gatela pele re ikanya Jehofa, re itsise leina la gagwe le maikaelelo a a molemolemo a a le emelang! Fela jaaka mo lekgolong la ntlha la dingwaga, fela jalo le mo malatsing a bofelo a tsamaiso ya dilo ya gompieno e e boikepo, go goelediwa gape jaana: “Bolokwang mo kokomaneng eno e e kgopameng.” (Ditiro 2:40) Ke taletso e e tshwanang le ya terompeta e e yang kwa bathong botlhe ba ba boifang Modimo mo lefatsheng lotlhe gore ba bitse leina la ga Jehofa gore a ba boloke mme gape le mo bathong ba ba reetsang boipolelo jwa bone jwa phatlalatsa jwa dikgang tse di molemo.—1 Timotheo 4:16.

14. Re tshwanetse go batla poloko mo Lefikeng lefe?

¹⁴ Ke eng se se tla diragalang fa letsatsi le legolo la ga Jehofa le tlhasela mo lefatsheng leno? Ba le bantsi ba ka se lebe kwa go Jehofa go bona poloko. Batho ka bontsi ba tla “nna ba raya dithaba le mafika ba re: ‘Re weleng godimo lo bo lo re fitlhele sefatlhego sa Yo o ntseng mo setulong sa bogosi le tšhakgalo ya Kwana.’” (Tshenolo 6:15, 16) Ba tla bo ba tshepile mekgatlho le ditheo tsa tsamaiso eno ya dilo e e tshwanang le dithaba. Le fa go ntse jalo, a bo go tla nna molemo jang ne fa ba ne ba ka ikanya Lefika le le a fetang otlhe, Jehofa Modimo! (Duteronome 32:3, 4) Kgosi Dafide o ne a bua jaana ka ene: “Jehofa ke lefika la me, le kago ya me ya phemelo, le mogolodi wa me.” Jehofa ke “lefika la poloko ya rona.” (Pesalema 18:2; 95:1) Leina la gagwe ke “kago e e godileng,” “kago” e le yosi fela e e nonofileng thata go ka re sireletsa mo masetlapelong a a tlang. (Diane 18:10) Ka gone, go botlhokwa gore batho ba le bantsi ka mo go ka kgonegang ba ba ka tshwarang dikete tse thataro tsa dimilione ba ba tshelang gompieno ba rutwe go bitsa leina la ga Jehofa ka boikanyegi le ka bopeloephepa.

15. Ke eng se Baroma 10:14 e se bontshang malebana le tumelo?

¹⁵ Ka mo go tshwanetseng, moaposetoloi Paulo o tswelela pele a botsa jaana: “Le fa go ntse jalo, ba tla bitsa jang yo ba sa bayang tumelo mo go ene?” (Baroma 10:14) Go na le matshutitshuti a batho ba ba sa ntseng ba ka thusiwa gore ba dire gore “‘lefoko’ la tumelo” e nne la bone, e le gore ba bitse Jehofa gore ba bolokwe. Tumelo e botlhokwa thata. Paulo o bolela jaana mo lekwalong le lengwe: “Kwantle ga tumelo ga go kgonege go o itumedisa sentle [Modimo], gonne yo o atamelang Modimo o tshwanetse go dumela gore o gone le gore o nna moduedi wa ba ba o senkang ka tlhoafalo.” (Bahebera 11:6) Le fa go le jalo, dimilione tse dingwe tsa batho di nna le tumelo jang mo Modimong? Mo lekwalong le Paulo a neng a le kwalela Baroma, o botsa jaana: “Le gone, ba tla baya tumelo jang mo go yo ba sa utlwang ka ene?” (Baroma 10:14) A Jehofa o ba tlamela ka dilo dingwe gore ba utlwe? Totatota o dira jalo! Reetsa mafoko a ga Paulo a a tswelelang pele jaana: “Le gone, ba tla utlwa jang fa go se na ope yo o rerang?”

16. Mo thulaganyong ya Modimo, ke ka ntlha yang fa go tlhokega bareri?

¹⁶ Go tswa mo mafokong a ga Paulo go phepafetse gore bareri ba a tlhokega. Jesu o ne a bontsha gore seno se ne se tla nna jalo, go ya “go fitlha bokhutlong jwa tsamaiso eno ya dilo.” (Mathaio 24:14; 28:18-20) Go rera ke karolo e e botlhokwa ya thulaganyo ya Modimo ya go thusa batho gore ba bitse leina la ga Jehofa gore ba tle ba bolokwe. Tota le mo go Labokeresete bontsi jwa batho ga bo dire sepe go tlotla leina le le botlhokwa la Modimo. Batho ba le bantsi ba kopanya Jehofa le maina a mangwe a mabedi mo thutong ya Tharonngwe e e ka se tlhalosiweng. Gape, ba le bantsi ba wela mo setlhopheng se go buiwang ka sone mo go Pesalema 14:1 le 53:1: “Seeleele mo pelong ya sone se rile: ‘Ga go na Modimo ope.’” Ba tlhoka go itse gore Jehofa ke Modimo yo o tshelang, e bile ba tshwanetse go tlhaloganya sotlhe se leina la gagwe le se emelang fa ba batla go bolokwa mo pitlaganong e kgolo e e tla tlogang e tla.

‘Dinao Tse di Kgatlhang’ Tsa Bareri

17. (a) Ke ka ntlha yang fa go tshwanela gore Paulo a nopole boporofeti jwa tsosoloso? (b) Ke eng se se bolelwang ke go nna le ‘dinao tse di kgatlhang’?

¹⁷ Moaposetoloi Paulo o na le potso e nngwe e e botlhokwa: “Le gone, ba tla rera jang fa ba sa romelwa? Fela jaaka go kwadilwe ga twe: ‘Abo dinao tsa ba ba bolelang dikgang tse di molemo tsa dilo tse di molemo di kgatlha jang ne!’” (Baroma 10:15) Fano Paulo o nopola Isaia 52:7, e e leng karolo ya boporofeti jwa tsosoloso jo bo sa leng bo diragala fa e sa le ka 1919. Gompieno, gape, Jehofa o roma motho “yo o tlisang mafoko a a molemo, yo o utlwatsang kagiso, yo o tlisang mafoko a mantle a a molemo, yo o utlwatsang poloko.” Ka kutlo, “balebedi” ba ba tloditsweng ba Modimo le ditsala tsa bone ba tswelela pele ba goa ka boipelo. (Isaia 52:7, 8) Maoto a batho ba ba phatlalatsang poloko gompieno a ka lapa, tota le go tlala lerole, fa ba ntse ba tsamaya ka ntlo le ntlo, mme a bo difatlhego tsa bone di benya ka boitumelo jang ne! Ba itse gore ba romilwe ke Jehofa gore ba bolele dikgang tse di molemo tsa kagiso le go gomotsa batho ba ba hutsafetseng, ba thusa bano gore ba bitse leina la ga Jehofa gore le bone ba bolokwe.

18. Ke eng se Baroma 10:16-18 e se bolelang malebana le matswela a bofelo a go utlwatsa dikgang tse di molemo?

¹⁸ Go sa kgathalesege gore a batho ba ‘baya tumelo mo dilong tse di utlwilweng’ kana ba tlhopha go sa di utlwe, mafoko ano a ga Paulo a boammaaruri: “Ba ne ba se ka ba tlhoka go utlwa, ga ke re? Aitsane, e bile tota, ‘modumo wa bone o ne wa tswela mo lefatsheng lotlhe, le mafoko a bone a ne a tswela kwa dikarolong tse di kwa kgakalakgakala tsa lefatshe le le nang le banni.’” (Baroma 10:16-18) Fela jaaka “magodimo a bolela kgalalelo ya Modimo,” jaaka e bontshitswe mo ditirong tsa gagwe tsa popo, ka jalo Basupi ba gagwe mo lefatsheng ba tshwanetse go bolela “ngwaga o o lebosegang wa ga Jehofa, le letsatsi la pusoloso ya Modimo wa rona . . . go gomotsa botlhe ba ba hutsafetseng.”—Pesalema 19:1-4; Isaia 61:2.

19. Ke eng se se tla diragalelang ba ba “bitsang leina la ga Jehofa” gompieno?

¹⁹ Letsatsi le legolo le le boitshegang la ga Jehofa le atametse thata. “Ija we! A letsatsi le legolo! Gonne letsatsi la ga Jehofa le atametse, le tlaa tla jaaka tshenyo e e tswang kwa go Mothatayotlhe.” (Joele 1:15; 2:31) Re rapelela gore matshutitshuti a mangwe a tle a utlwe ka bonako dikgang tse di molemo, a ologele mo phuthegong ya ga Jehofa. (Isaia 60:8; Habakuke 2:3) Gakologelwa gore malatsi a mangwe a ga Jehofa a ne a senya baikepi—mo motlheng wa ga Noa, mo motlheng wa ga Lote, le mo malatsing a Iseraele wa motenegi le Juda. Jaanong re eme fa bofelong jwa pitlaganyo e kgolo go di feta tsotlhe, fa setsuatsue sa ga Jehofa se tla go feela boikepo mo godimo ga lefatshe leno, se phepafatsa tsela ya paradaise e e nang le kagiso e e nnelang ruri. A o tla nna mongwe wa ba ba “bitsang leina la ga Jehofa” ka boikanyegi? Fa go le jalo, ipele! O na le tsholofetso ya Modimo ya gore o tla bolokwa.—Baroma 10:13.

O ne O Tla Araba Jang?

◻ Ke dilo dife tse disha tse di neng tsa bolelwa morago ga Pentekosete ya 33 C.E.?

◻ Bakeresete ba tshwanetse go tlhokomela “‘lefoko’ la tumelo” jang?

◻ Ke eng se se bolelwang ke ‘go bitsa leina la ga Jehofa’?

◻ Barongwa ba Bogosi ba na le ‘dinao tse di kgatlhang’ ka tsela efe?

[Ditshwantsho mo go tsebe 18]

Batho ba Modimo ba bolela dilo tsa gagwe tse di molemolemo kwa Puerto Rico, Senegal, Peru, Papua New Guinea—ee, mo lefatsheng lotlhe