Sola Botshelo Jwa Gago Molemo
RRE o ne a le mo ntlong, a le mo bolaong, a swa ka ntlha ya kankere. Morwawe o ne a le mo bothulelong, a phutha didirisiwa tsa ga rraagwe tsa go betla ka logong. Fa a ntse a tshwaratshwara didirisiwa, o ne a akanya ka dilo tse dintle tse rraagwe a neng a di dirile ka tsone. Le fa bothulelo bo ne bo le fa thoko ga ntlo, o ne a itse gore rraagwe o ne a ka se tlhole a tsena moo gape, o ne a ka se tlhole a dirisa didirisiwa tseno tse a neng a le setswerere mo go di diriseng. Nako eo e ne e fetile.
Morwa yono o ne a akanya ka lekwalo la Moreri 9:10: “Se seatla sa gago se se bonang go se dira o se dire fela ka nonofo ya gago; gonne ga go na tiro, le fa e le maano, le fa e le kitso, le fa e le botlhale mo Bobipong [lebitla], kwa o yang gone.” O ne a itse lekwalo leo sentle. O kile a le dirisa gantsi fa a ne a ruta ba bangwe boammaaruri jwa Baebele jwa gore fa motho a sule ga a kgone go dira sepe. Jaanong boammaaruri jwa mafoko a ga Solomone bo ne bo ama pelo—re tshwanetse go tshela botshelo jwa rona ka botlalo le go itumelela malatsi a rona fa re sa ntse re kgona ka gonne go tla tla nako e ka yone re tla bong re sa tlhole re kgona go dira jalo.
Itumelele Botshelo
Mo bukeng yotlhe ya Moreri, Kgosi e e botlhale e bong Solomone o kgothaletsa babadi ba gagwe gore ba itumelele botshelo. Ka sekai, kgaolo 3, e bolela jaana: “Ke a itse go re, ga go na sepe se se molemo mo [bathong] bogolo go go itumela le go dira molemo ka metlha yotlhe ya go tshela ga bone. Le gone ke neo ya Modimo gore motho mongwe le mongwe a je a nwe, mme a je monate ka letsapa lotlhe la gagwe.”—Moreri 3:12, 13.
Solomone o ne a tlhotlhelediwa ke Modimo gore a boeletse kgopolo eno: “Bonang, mo ke go bonyeng fa go le molemo go bile go le gontle, ke go re motho a je a nwe, a je monate wa letsapa la gagwe lotlhe, le o ineileng letsapa mo go lone tlase ga letsatsi, ka metlha yotlhe ya botshelo jwa gagwe jo Modimo o bo mo neileng; gonne ke yone kabelo ya gagwe.”—Moreri 5:18.
Ka mo go tshwanang, o kgothatsa basha jaana: “Itumele, wena lekau, mo bokaung jwa gago; a pelo ya gago e go jese monate mo metlheng ya bokau [kana bokgarebe] jwa gago, mme o sepele mo ditseleng tsa pelo ya gago, le mo ponong ya matlho a gago.” (Moreri 11:9a) A bo go le molemo jang ne go itumelela ka botlalo nonofo le matlhagatlhaga a bosha!—Diane 20:29.
‘Gakologelwa Mmopi wa Gago’
Gone mme, Solomone ga a reye gore go botlhale go latelela sengwe le sengwe se se ka kgatlhang pelo kana matlho a rona. (Bapisa 1 Johane 2:16.) Seno se bonala sentle mo go se a ileng a se kwala morago ga foo: “Mme o bo o itse fa Modimo o tlaa go isa tshekong ka ga dilo tse tsotlhe fela [ditiro tse di ka kgotsofatsang dikeletso tsa gago].” (Moreri 11:9b) Le fa re ka tswa re na le dingwaga di le kae, re tshwanetse go gakologelwa gore Modimo o bona se re se dirang ka matshelo a rona mme o tla re atlhola go ya ka gone.
A bo e le boeleele jang ne go akanya gore re ka tshela botshelo jwa boithati mme re bo re ipolelela gore re tla simolola go tshela ka poifomodimo mo dingwageng tsa rona tsa moragonyana! Botshelo jwa rona bo ka fela nako nngwe le nngwe. Tota le fa bo sa fele, go direla Modimo ga go motlhofo mo botsofeng. Ka go lemoga ntlha eno, Solomone o ne a kwala jaana: “O bo o gakologelwe Mmopi wa gago mo metlheng ya bokau jwa gago, metlha ya bosula e ise e be e tle, le dinyaga di ise di atamele, motlhang o tlaa buang, o re: ‘Ga ke na kgatlhego mo go tsone.’”—Moreri 12:1.
Botsofe bo atamela ka bofefo. Solomone morago ga foo o tlhalosa ditlamorago tsa botsofe ka mafoko a tshwantshetso. Diatla le matsogo di a roroma, maoto a koafala mme meno a a fokotsega. Moriri o nna mosweu e bile o a wa. Motho ga a kgone go tshwara boroko thata mo e leng gore o tsosiwa le ke modumo wa nonyane. Ditemosi—go bona, kutlo, go ama, go dupa le go latswa—tsotlhe di a koafala. Mmele o o bokoa o dira gore motho a boife go wa le go boifa “ditherego” tse dingwe tse di mo ditseleng tsa botlhe. Kgabagare motho o a swa.—Moreri 12:2-7.
Botsofe ke bomadimabe segolobogolo mo go ba ba ileng ba palelwa ke go ‘gakologelwa Mmopi wa bone [yo Mogolo]’ ka nako ya bone ya bosha. Ka ntlha ya go senya botshelo jwa gagwe, motho yo o ntseng jalo ‘ga a kgatlhegele’ dingwaga tsa gagwe tsa bofelo. Go tshela botshelo jwa boikepo le gone go oketsa mathata le ditlhabi tsa botsofe. (Diane 5:3-11) Ka maswabi, fa ba ba ntseng jalo ba leba kwa pele, ga ba bone isagwe epe fa e se lebitla fela.
Go Itumela mo Botsofeng
Seno ga se reye gore batsofe ba ka se ka ba itumelela botshelo. Mo Baebeleng, “boleele jwa malatsi, le dinyaga tsa botshelo” di amanngwa gape le tshegofatso ya Modimo. (Diane 3:1, 2) Jehofa o ne a bolelela tsala ya gagwe Aberahame jaana: “Mme wena, . . . o tlaa fitlhwa o tsofetse sentle thata.” (Genesise 15:15) Le fa Aberahame a ne a na le ditlalelo ka ntlha ya botsofe, o ne a na le kagiso e bile a ritibetse mo botsofeng jwa gagwe, a leba kwa morago ka kgotsofalo fa a leba botshelo jwa gagwe jwa boineelo mo go Jehofa. Gape ka tumelo o ne a solofetse go bona “motse o o nang le metheo ya mmatota,” Bogosi jwa Modimo. (Bahebera 11:10) Ka jalo, o ne a swa a “tsofetse e bile a kgotsofetse.”—Genesise 25:8, NW.
Ka jalo Solomone o ne a kgothatsa jaana: “Fa motho a tshela dinyaga di le dintsi, a a itumele mo go tsone tsotlhe.” (Moreri 11:8) Le fa re ka tswa re le basha kana re tsofetse, boitumelo jwa mmatota bo amana le kamano ya rona le Modimo.
E ne ya re fa lekawana le le neng le le kwa bothulelong le baya sedirisiwa sa bofelo sa ga rraalone, le ne la akanya ka dilo tseno. Le ne la akanya ka batho botlhe ba le neng le ba itse ba ba neng ba leka go sola matshelo a bone molemo mme ba se ka ba bona boitumelo ka gonne ba ne ba se na kamano epe le Mmopi wa bone. A bo go bonala go tshwanela jang ne gore fa Solomone a sena go kgothatsa gore motho a itumele mo botshelong, a bo a sobokanya dikgang ka mafoko ano: “Bokhutlo jwa mafoko ke jo; go utlwilwe gotlhe: Boifa Modimo, o bo o tshegetse ditaolo tsa one; gonne mo, ke tshwanelo yotlhe ya motho”!—Moreri 12:13.