Thulaganyo e Ntšha ya Kopano e e Kgethegileng ya Letsatsi le le Lengwe

“Lo Nneng ba ba Godileng ka Botlalo mo Maatleng a go Tlhaloganya” ke setlhogo sa thulaganyo ya kopano e e kgethegileng ya letsatsi le le lengwe ka September 2000. (1 Bakor. 14:20) Ke ka ntlha yang fa go le botlhokwa gore re nne gone? Re tshela mo lefatsheng le le tletseng bosula. Gore re emelane le seno, re tshwanetse go nna le maatla a go tlhaloganya a semoya e le gore re fenye bosula ka molemo. Ke sone se thulaganyo ya kopano e e kgethegileng ya letsatsi le le lengwe e tlileng go re thusa go se dira.

Mo thulaganyong e e simololang, molebedi wa potologo o tla tlotla ka “Dilo Tse Di ka Re Thusang go Gola ka Botlalo mo go Tlhaloganyeng Baebele.” O tla re bontsha ka fa re ka tlhomamang mo tumelong ya Bokeresete ka gone. Sebui se se etileng se tla gatelela ka fa go dirisa melaometheo ya Baebele go leng botlhokwa ka gone gore re kgatlhegele go lemoga dilo, fa a bua ka setlhogo se se reng “Sireletsa Bomoya ka go Thapisa Bokgoni Jwa Gago Jwa go Lemoga.”

Basha le bone ba tshwanetse go nonotsha maatla a bone a go tlhaloganya. Seno se tla tlotliwa mo dipuong tse di reng “Lebaka la go Nna Masea Malebang le Bosula” le “Basha ba ba Bapalang Tlhaloganyo Gone Jaanong.” Utlwa basha ba bolela se ba se dirang go inonotsha semoyeng gore ba kgone go laola keletso epe e ba ka nnang le yone ya ditiro tse di boikepo tsa lefatshe le go tila mathata.

Re ka bona jang boitumelo jo bogolo mo botshelong? Sebui se se etileng se tla tlhalosa seno mo puong e e konelang e e reng “Solegelwa Molemo ke go Dirisa Melaometheo ya Baebele ka Tlhaloganyo.” O tla naya dikai tse di bontshang gore go dirisa Lefoko la Modimo go re thusa go itshokela mathata, go dira ditshwetso, le go solegelwa molemo ke se Jehofa a re rutang sone.

Ba ba ratang go tshwantshetsa boineelo jwa bone go Modimo ka go kolobediwa mo metsing kwa kopanong eno ba tshwanetse go itsise molebedi yo o okamelang ka bonako jo bo ka kgonegang. Tshwaya mo khalendareng ya gago fa go setse go itsisitswe letlha la kopano e e kgethegileng ya letsatsi le le lengwe, mme o dire dithulaganyo tse di tlhomameng gore o solegelwe molemo ke thulaganyo eno e e botlhokwa. O se ka wa foswa ke puo epe ya kopano e e kgethegileng ya letsatsi le le lengwe! E tla go nonotsha gore o itshokele tsamaiso eno e e boikepo le go nna o ikanyega mo go Jehofa.