Go Kopanngwa Mmogo ka Kutlwano
1 Ke makgetlo a le kae o gakgamadiwa ke tsela e e matsetseleko e mmele wa motho o dirilweng ka yone? (Pes. 139:14) Karolo nngwe le nngwe ya mmele e dirisana le tse dingwe. Lefoko la Modimo le tshwantsha phuthego ya Bokeresete le mmele o o rulagantsweng sentle. Ka fa tlase ga Boeteledipele jwa ga Keresete, maloko otlhe a phuthego a ‘kopane mmogo ka kutlwano mme a dirwa gore a dirisane, lelokololo lengwe le lengwe le naya se se tlhokwang.’ (Baef. 4:16a) Ka gone, Jehofa o kgona go dirisa batho ba gagwe ba ba leng seoposengwe go fitlhelela dilo tse di gakgamatsang.
2 Maloko a phuthego ya lekgolo la ntlha la dingwaga a ne a dira “a le seoposengwe” ka go thusana ka dilo tse ba neng ba di tlhoka tsa semoya le tsa senama. (Dit. 2:44-47) Ba ne ba kgona go lebana le pogiso e e setlhogo ba bo ba e fenya ba le seoposengwe ka thuso ya ga Jehofa. (Dit. 4:24-31) Ba ne ba bolela molaetsa wa Bogosi gongwe le gongwe kwa ba neng ba ya gone ba bolela dikgang tse di molemo mo lefatsheng lotlhe la nako eo. (Bakol. 1:23) Mo metlheng ya segompieno, phuthego ya Bokeresete e fitlheletse dilo tseno e le seoposengwe ka selekanyo se segolwane. Ke dilo dife tse di dirileng gore e nne seoposengwe jaana?
3 Ba Kopantswe Mmogo ke Thuto ya Bomodimo: Kobamelo ya rona e re kopanya mmogo lefatshe ka bophara. Seno se kgonega jang? Re anaanela tsela e Jehofa a e dirisang ya go re naya “dijo tsa semoya ka nako e e tshwanetseng.” (Math. 24:45) Gape re anaanela “dimpho tse e leng banna” tse a di re neileng go nna barutisi mo phuthegong. Fa re ntse re amogela thulaganyo ya ga Jehofa ka boikobo ya go re fepa semoyeng, tsela e re tlhaloganyang Lefoko la Modimo ka yone e a gola, e bile e re tlhotlheletsa gore rotlhe re eletse go etsa Jesu jaaka barutwa ba gagwe ba ne ba mo etsa. Re tshwanetse go tswelela re ithuta Lefoko la Modimo, re iteka ka tlhoafalo go fitlha rotlhe re “fitlhelela bongwefela mo tumelong.” (Baef. 4:8, 11-13) A o nna le seabe mo go direng gore re nne seoposengwe semoyeng ka go bala Baebele letsatsi le letsatsi?
4 Bokopano Jwa Bokeresete bo re Dira Seoposengwe: Lerato le re dira seoposengwe kwa dipokanong tsa Bokeresete. Fa re le mo dipokanong tseno re a ‘akanyetsana.’ (Baheb. 10:24, 25) Seno se akaretsa go se lebe bakaulengwe ba rona ka fa ntle fela mme re tshwanetse go ba itse sentle, re ba lebe ka tsela e Jehofa a ba lebang ka yone jaaka ba ba botlhokwa. (Hag. 2:7) Fa re ntse re reeditse dikakgelo tsa bone tse di bontshang tumelo, go ba rata ga rona go a gola, mme kutlwano ya rona le yone e a nonofa. A o itsege o le mongwe yo o nnang teng kwa dipokanong tsa phuthego ka metlha?
5 Badirimmogo mo Tshimong: Go rera dikgang tse di molemo le badumedimmogo go dira gore re nne seoposengwe mo go direng thato ya Modimo. Moaposetoloi Paulo o ne a anaanela ‘badirimmogo le ene ba bogosi jwa Modimo.’ (Bakol. 4:11) Go bolelelana maitemogelo le go thusana fa re le mo bodireding, go re thusa go diragatsa thomo ya rona ya Bokeresete e bile go nonotsha sebofo sa rona sa kutlwano.—Bakol. 3:14.
6 Tlhotlheletso ya Moya o o Boitshepo E a Re Kopanya: Fa re ntse re iteka go dira thato ya gagwe, Jehofa o re segofatsa ka moya wa gagwe. Seno se re thusa go rarabolola mathata le go nna mmogo ka kutlwano. (Pes. 133:1) O re tlhotlheletsa “go boloka bongwefela jwa moya mo sebofong se se kopanyang sa kagiso.” (Baef. 4:3) Mongwe le mongwe wa rona o ka nna le seabe mo go direng gore go nne le kutlwano mo gare ga batho ba Modimo, ka go bontsha maungo a moya fa re dirisana le ba bangwe.—Bagal. 5:22, 23.
7 Go dira mmogo ka kutlwano re eteletswe pele ke Keresete go “direla kgolo ya mmele gore o ikage mo loratong.” (Baef. 4:16b) Mo godimo ga moo, go galaletsa Jehofa “Modimo yo o nayang kagiso.”—Bar. 16:20.