Bakeresete ba ka Nna le Kutlwano ya Boammaaruri Jang?
1 Ke eng se se ka dirang gore batho ba ba fetang dimilione tse thataro ba ba tswang mo dinageng tse 234 le ba dipuo tse di ka nnang 380 ba utlwane? Ke kobamelo ya ga Jehofa Modimo fela. (Mik. 2:12; 4:1-3) Basupi ba ga Jehofa ba iponetse ka bobone gore kutlwano ya boammaaruri ya Bokeresete e gone gompieno. E re ka re le “letsomane le le lengwe” tlase ga “modisa a le mongwe,” re iketleeditse go lwantsha moya wa lefatshe leno o o kgaoganyang batho.—Joh. 10:16; Baef. 2:2.
2 Maikaelelo a a sa fetogeng a Modimo ke gore dibopiwa tsotlhe tse di botlhale di utlwane mo kobamelong ya boammaaruri. (Tshen. 5:13) E re ka Jesu a ne a itse botlhokwa jwa seno, o ne a rapela ka tlhoafalo gore balatedi ba gagwe ba utlwane. (Joh. 17:20, 21) Ke eng se mongwe le mongwe wa rona a ka se dirang gore re nne le kutlwano mo phuthegong ya Bokeresete?
3 Kafa Kutlwano e Nnang Gone ka Teng: Bakeresete ba ka se utlwane fa ba sa dirise Lefoko la Modimo le moya wa gagwe. Fa re dirisa dilo tse re di balang mo Baebeleng seno se dira gore moya wa Modimo o dire ka kgololesego mo matshelong a rona. Seno se dira gore re kgone go “boloka bongwefela jwa moya mo sebofong se se kopanyang sa kagiso.” (Baef. 4:3) Seno se a re tlama gore re itshokelane. (Bakol. 3:13, 14; 1 Pet. 4:8) A wena o rotloetsa kutlwano ka go tlhatlhanya ka Lefoko la Modimo letsatsi le letsatsi?
4 Thomo ya rona ya go rera le go dira barutwa le yone e dira gore re utlwane. Fa re dira le ba bangwe mo bodireding jwa Bokeresete, re “tsoga mmogo ka ntlha ya tumelo ya dikgang tse di molemo,” re nna “badirimmogo mo boammaaruring.” (Bafil. 1:27; 3 Joh. 8) Fa re ntse re dira jalo, lorato lwa rona lo a gola mo phuthegong. Ke eng fa o sa laletse mongwe yo o iseng o tsamaye le ene bosheng jaana gore a dire le wena mo bodireding mo bekeng eno?
5 A bo re na le tshiamelo jang ne go nna karolo ya bokaulengwe jwa lefatshe lotlhe jo e leng jone fela jwa boammaaruri mo lefatsheng gompieno! (1 Pet. 5:9) Bosheng jaana, batho ba le bantsi ba ile ba iponela kutlwano eno ya lefatshe lotlhe kwa Dikopanong Tsa Ditšhabatšhaba Tsa “Nayang Modimo Kgalalelo.” E kete mongwe le mongwe wa rona a ka dira gore re nne le kutlwano eno e e botlhokwa ka go bala Lefoko la Modimo letsatsi le letsatsi, ka go rarabolola dikgotlhang ka lorato le ka go rera dikgang tse di molemo “ka tumalano e le nngwe.”—Bar. 15:6.