Thulaganyo e Ntšha go re Thusa go Ithiba mo Mading
Setlhopha se se Laolang se dumetse go emisetsa karata ya Advance Medical Directive/Release ka karata e ntšha ya semolao e e bidiwang durable power of attorney (DPA). Gantsi re tla e bitsa fela karata ya DPA. Dinaga tse di mo borwa jwa Afrika le tsone di diretswe karata ya DPA.
Karata ya DPA ga e na letlha le e felang ka lone gope fela mo borwa jwa Afrika mme e tla go buelela kwa nageng epe fela e o yang kwa go yone. Mo nakong e e tlang, o tla tshwanelwa ke go tlatsa karata e ntšha ya DPA fa (1) o tlhoka go dira diphetogo dingwe mo karateng ya gago ya DPA, jaaka tse di tshwanang le go fetola se o batlang gore se dirwe, go fetola baemedi ba gago ba tsa kalafi, diaterese le dinomoro tsa founo, kana fa (2) karata ya gago ya DPA e latlhegile kana e senyegile.
O tshwanetse go akanyetsa dintlha tsa karata ya DPA ka thapelo mme morago ga moo o bo o e tlatsa ka kelotlhoko kwa gae. Le fa go ntse jalo, pele o saena karata eno, go botlhokwa gore o latelele ka kelotlhoko dilo tse di batliwang ke molao. Ka sekai, fa karata ya gago e re go tlhokega gore o bonwe ke basupi ba le babedi fa o saena, ba tshwanetse ba bo ba le gone fa o e saena. Balebedi ba thuto ya buka ba tla tshwanelwa ke go tlhola nako le nako gore a go na le ba ba iseng ba tlatse dikarata tse disha le gore a ba tlhoka go thusiwa.
Pele ga o mena karata ya DPA, direla moemedi wa gago wa tsa kalafi kana mothusi wa gagwe le ngaka ya gago difotokhopi tse di bonalang sentle tsa karata eno, le e e tla nnang mo difaeleng tsa gago. O ka nna wa batla le go direla maloko a mangwe a lelapa la gago dikhopi le mokwaledi wa phuthego. Dira gore karata ya DPA e tlhage kafa letlhakoreng le le lengwe fela la pampiri ya bogolo jo bo tlwaelegileng (A4 210mm x 297mm), e le mo bogareng jwa yone. Tshola karata ya DPA mo go wena ka dinako tsotlhe, e seng fotokhopi ya yone.
Identity Card e e kwadilweng letlha la 3/99 ya bana ba ba sa kolobediwang ba batsadi ba bone e leng Basupi ga e a fetoga. Batsadi ba tshwanetse go tlhomamisa gore ngwana mongwe le mongwe o na le karata e e tladitsweng sentle e bile e saenilwe le gore ngwana a e tshole mo go ene mo maemong a a tshwanelang.
Baboledi ba ba sa kolobediwang ba ka nna ba fetola se se kwadilweng mo karateng ya DPA le ya Identity Card gore ba kgone go ikwalela ditaelo tsa tlhokomelo ya kalafi le bana ba bone. Mokwaledi o tshwanetse go naya baboledi botlhe ba ba sa tswang go kolobediwa mo ngwageng karata ya DPA.