Setlhogo se Sesha sa go Simolola Dithuto Tsa Baebele
1. Go tla nna le setlhogo sefe se sesha mo kgatisong ya Tora ya Tebelo ya batho botlhe mme se diretswe eng?
1 Go simolola ka kgwedi e e tlang, go tla nna le setlhogo se sesha mo kgatisong ya Tora ya Tebelo ya batho botlhe mme se tla re thusa go simolola dithuto tsa Baebele. Setlhogo seo sa re: “Ithute mo Lefokong la Modimo.” Le fa go bonala sentle gore bangwe mo tshimong ba tla itumelela go bala setlhogo sengwe le sengwe sa motseletsele ono, gone mme ditlhogo tseno di diretswe gore re tlotle le beng ba matlo ka tsone.
2. Dikarolo dingwe tsa ditlhogo tseno ke dife?
2 Dikarolo Tsa Sone: Setlhogo se segolo le ditlhogwana tsa sone ke dipotso tse o ka di botsang mong wa ntlo fa lo ntse lo tlotla. Ditemana tsa konokono ga di a nopolwa mme di umakilwe e le gore mong wa ntlo a ka itumelela go di bala ka tlhamalalo go tswa mo Lefokong la Modimo. Se na le dirapa tse dikhutshwane tse re ka kgonang go tlotla ka tsone re eme fa kgorong. Setlhogo sengwe le sengwe se go lebisa kwa bukeng ya Baebele e Ruta Eng? go go thusa go fetisetsa thuto mo kgatisong eno fa go tshwanela.
3. Fa re tsamaya ka ntlo le ntlo, re ka dirisa setlhogo seno jang go simolola thuto ya Baebele re le fa kgorong?
3 Kafa O ka Se Dirisang ka Gone: Fa o tsamaisa dimakasine, o ka nna wa botsa potso e e ka kgatlhang mong wa ntlo e e amanang le setlhogo seo. Ka sekai, kgatiso ya January 1 e tlotla ka botlhokwa jwa Baebele. O ka nna wa botsa jaana: “A o tsaya Baebele e le Lefoko la Modimo kgotsa e le buka fela e e molemo? [Mo letle gore a arabe.] Ke na le sengwe se se kgatlhang se se buang ka kgang eno.” Mmontshe potso ya ntlha, bala serapa sa ntlha mme o bo o bala temana e e umakilweng. Bala potso eo gape mme o bo o kopa mong wa ntlo gore a akgele ka yone. Tlotlang ka tshedimosetso e ntsi kafa go tshwanelang ka teng, lo dirisa dipotso tse di nang le dinomoro go nna dintlha tse lo ka tlotlang ka tsone. Pele o tsamaya, mmontshe potso e e latelang mme o dire dithulaganyo tse di tlhomameng gore o boe o tle go tlotla ka yone. Boela beke le beke gore lo tlotle mo go oketsegileng ka setlhogo seo go fitlha o mo tlisetsa kgatiso e e latelang. Tsela e nngwe ke go buelela thuto ya Baebele ka tlhamalalo. Go tswa foo, dirisa setlhogo se se mo makasineng go bontsha gore thuto e tshwarwa jang.
4. Re ka dirisa jang ditlhogo tseno fa re dira maeto a go boela?
4 Gape o ka dirisa setlhogo seno se sesha ka tsela e e nang le matswela mo bathong ba o ba isetsang dimakasine ka metlha le mo maetong a mangwe a go boela. O ka nna wa re fela: “Go na le setlhogo se sesha mo makasineng wa Tora ya Tebelo. Mma ke go bontshe gore se dirisiwa jang.” Re rapelela gore setlhogo seno se sesha se thuse batho ba le bantsi gore “ba tle mo kitsong e e leng yone, ya boammaaruri.”—1 Tim. 2:4.