O se Ka wa Nna Mothusi yo o Didimalang Fela
1. Re ka etsa jang boikutlo jwa ga moaposetoloi Paulo fa re dira le ba bangwe mo bodireding?
1 Moaposetoloi Paulo o ne a tsaya nako e a neng a e fetsa le badumedi ka ene e le tshono ya gore ba “kgothatsane.” (Bar. 1:12) Fa o dira le mmoledi yo mongwe mo bodireding, a o dirisa nako eo go mo kgothatsa le go mo thusa? Go na le go nna mothusi yo o didimalang fela, ke eng fa o sa mmolelele gore wena o thusiwa ke eng go nna mmoledi yo o nang le matswela?
2. Re ka dirang go thusa yo re tsamayang le ene mo tirelong ya tshimo gore a itshepe, mme ke ka ntlha yang fa seno se le botlhokwa?
2 Mo Thuse Gore a Itshepe: Baboledi bangwe ga ba itshepe, mme seo se ka bonala mo difatlhegong tsa bone le mo segalong sa lentswe la bone. Re ka dira gore ba itshepe le go feta ka go ba akgola go tswa pelong. Ditsela tse dingwe tsa go thusa motho gore a itshepe ke dife? Molebedi mongwe yo o etang o bolelela motho yo a tsamayang le ene ka tshosologo dilo dingwe tse a di boifang le kafa a rapelang ka metlha ka teng gore a kgone go fenya maikutlo ao. Mokaulengwe yo mongwe ene o ne a bolela jaana a tlhalosa se se mo thusang gore a bontshe go itshepa: “Selo sa ntlha ke go nyenya. Ka dinako tse dingwe ke tshwanelwa ke go rapela gore ke kgone go dira selo se se motlhofo jaaka seo.” A go na le sengwe se se go thusitseng gore o itshepe mo bodireding? Se bolelele yo o tsamayang le ene mo tirelong ya tshimo.
3. Ke eng se re ka se bolelelang motho yo re tsamayang le ene se se ka mo thusang gore a nne le matswela mo bodireding jwa gagwe?
3 Bua ka Mekgwa E o E Dirisang: A o lemogile gore o nna le puisano e e nang le matswela fa o simolola ka go bua mafoko a a sa raraanang kgotsa go botsa potso e e motlhofo, gongwe ka sengwe se se diregileng mo lefelong la lona? A o kile wa nna le matswela a a molemo ka go fetola sekai sa puisano ka tsela nngwe? Bolelela motho yo o tsamayang le ene. (Dia. 27:17) Fa lo ya go dira loeto lwa go boela, o ka tlhalosa boikaelelo jwa gago ka loeto lono le gore o ikaelela go bo fitlhelela jang. Fa o sena go tshwara thuto ya Baebele, o ka tlhalosa gore ke ka ntlha yang fa o tlhophile ntlha, temana kgotsa mokgwa mongwe wa go ruta go thusa moithuti ka se a se tlhokang.
4. Ke ka ntlha yang fa re tshwanetse go kgatlhegela go thusa bareri ka rona?
4 Bareri ba lekgolo la ntlha la dingwaga ba ne ba sa kgatlhegele fela go thusa batho ba e seng badumedi. Gape ba ne ba bona botlhokwa jwa go kgothatsana le go nonotshana. (Dit. 11:23; 15:32) Moaposetoloi Paulo o ne a thapisa Timotheo yo mmotlana a bo a mo kgothaletsa gore a bolelele ba bangwe se a se ithutileng. (2 Tim. 2:2) Fa re sa lebale go direla Bakeresete ka rona molemo fa re le mo bodireding, re oketsa boipelo jwa bone le matswela a ba nnang le one e bile gape re itumedisa Rraarona yo o kwa legodimong.—Baheb. 13:15, 16.