Mo Pakeng Eno ya Segopotso, a o Tla Etsa Tlhoafalo ya ga Jehofa Le ya Ga Jesu?

1. Ke eng se Basupi ba ga Jehofa ba se dirang ka paka ya Segopotso?

¹ Jehofa o diragatsa boikaelelo jwa gagwe ka tlhoafalo. Fa Isaia 9:7 e bua ka masego mangwe a Bogosi Jwa Modimo ya re: “Tlhoafalo ya ga Jehofa wa masomosomo e tla dira seno.” Fa Morwa Modimo a ne a le mo lefatsheng, le ene o ne a tlhoafalela kobamelo ya boammaaruri. (Joh. 2:13-17; 4:34) Ngwaga le ngwaga ka paka ya Segopotso, baboledi ba le bantsi ba dira ka natla go etsa tlhoafalo ya ga Jehofa le ya ga Jesu ka go oketsa bodiredi jwa bone. A o tla nna mongwe wa bone?

2. Tlhoafalo e tla re thusa go dira eng go simologa ka Mopitlwe 7?

² Letsholo la Segopotso: Letsholo la monongwaga la Segopotso le tla simolola ka Matlhatso, Mopitlwe 7. Simolola go dira dithulaganyo tsa go nna le seabe ka tlhoafalo mo bodireding. Diphuthego di tla itumelela go bereka bontsi jwa tshimo ya tsone. Dira maiteko a go laletsa ba o ithutang le bone, ba o ba direlang maeto a go boela, badirimmogo, ba masika, le ba o tsenang sekolo le bone ka go ba naya taletso kgotsa ka go dirisa jw.org/tn.

3. Re ka oketsa bodiredi jwa rona jang ka kgwedi ya Mopitlwe le Moranang?

³ Bobulatsela jo bo Thusang: Gape tlhoafalo e tla re tlhotlheletsa gore re oketse bodiredi jwa rona. Ga go pelaelo gore bontsi bo tla kgona go tsaya bobulatsela jo bo thusang ka Mopitlwe le Moranang e re ka re tla nna le tshono ya go tlhopha go bereka diura di le 30 mo tshimong. Ka nako ya kobamelo ya lelapa kgotsa fa o ithuta o le nosi, akanyetsa ka thapelo kafa o ka dirang seno ka gone. (Dia. 15:22) E re ka tshipi e lootsa tshipi, tlhoafalo ya gago e ka tlhotlheletsa ba bangwe. Fa o dira diphetogo gore o kgone go fetsa nako e ntsi mo bodireding, o tla bo o bontsha gore o etsa tlhoafalo ya ga Jesu.—Mar. 6:31-34.

4. Go etsa tlhoafalo ya ga Jehofa le ya ga Jesu go na le melemo efe?

⁴ Re tla segofala thata fa re etsa tlhoafalo ya ga Jehofa le ya ga Jesu ka paka eno ya Segopotso. Batho ba le bantsi mo tshimong ya rona ba tla utlwa molaetsa. Re tla ipela thata le go ikutlwa re kgotsofetse fa re direla Jehofa e bile re abela ba bangwe. (Dit. 20:35) Sa botlhokwa le go feta, re tla itumedisa Modimo wa rona yo o tlhoafetseng le Morwawe.