Anaanela Kamano e o Nang le Yone le Jehofa

Basupi ba ga Jehofa ba na le tshiamelo e e kgethegileng. E re ka re le Bakeresete ba ba ineetseng le ba ba kolobeditsweng, re nna re leka go nna le kamano e e molemo le Morena Molaodimogolo Jehofa. O re gogetse kwa go ene a dirisa Morwawe. (Joh 6:44) O reetsa dithapelo tsa rona.—Pes 34:15.

Re ka sireletsa jang kamano e e molemo e re nang le yone le Modimo? Sengwe se re ka se dirang ke go tila go dira dilo tse di sa siamang tse Baiseraele ba neng ba di dira. Moragonyana fela fa ba sena go dira kgolagano le Jehofa, ba ne ba dira namane ya gauta ba bo ba e obamela. (Ek 32:7, 8; 1Bak 10:7, 11, 14) O ka nna wa ipotsa jaana: ‘Ke tsiboga jang fa ke raelesega go dira sengwe se se sa siamang? A ditiro tsa me di bontsha gore ke anaanela kamano e ke nang le yone le Jehofa?’ Fa re rata Rraarona yo o kwa legodimong thata, ga re kitla re dira dilo tse a di tlhoileng.—Pes 97:10.

LEBANG BIDIO YA, SIRELETSA KAMANO E O NANG LE YONE LE JEHOFA (BAK 3:5), LO BO LO ARABA DIPOTSO TSE DI LATELANG:

• Keletso ya bopelotshetlha ke eng?

• Ke ka ntlha yang fa re tshwanetse go tila go nna pelotshetlha le go obamela medingwana?

• Boaka le kobamelo ya medingwana di amana jang?

• Ke ka ntlha yang fa segolobogolo ba ba nang le maikarabelo mo phuthegong ba tshwanetse go amega ka dilo tse balekane ba bone ba di tlhokang?