A O Ne O Itse?

Mokwalo wa bogologolo o tshegetsa jang se Baebele e se buang?

KWA Musiamong o o kwa Jerusalema o o bidiwang Bible Lands go na le letlapa le le ileng la kwalwa ka dingwaga tsa bo700 le 600 pele Jesu a tla mo lefatsheng. Letlapa leo le ne la fitlhelwa gaufi le Heberone e e kwa Iseraele, kwa legageng lengwe le le neng le dirisiwa e le lebitla. Mokwalo o o mo letlapeng leo o ne o re: “A go hutsege Hagaf morwa wa ga Hagav go bua Yahweh Sabaot.” Mokwalo ono o tshegetsa jang se Baebele e se buang? Seno se bontsha gore leina la Modimo e bong Jehofa le le neng le kwadiwa ka ditlhaka tsa Sehebera e leng, YHWH, le ne le itsiwe fela thata e bile le ne le dirisiwa letsatsi le letsatsi mo metlheng ya go kwalwa ga Baebele. Tota e bile, go na le dilo di le dintsi tse batho ba ba neng ba tle ba ye go kopana kwa magageng ao le go iphitlha gone ba ileng ba di kwala. Gantsi ba ne ba kwala leina la Modimo le maina a bone a a neng a tsamaisana le leina la Modimo.

Dr. Rachel Nabulsi wa kwa Yunibesithing ya Georgia a re: “Re ithuta sengwe sa botlhokwa mo kgannyeng ya gore leina la Modimo e leng YHWH le kwadilwe makgetlho a le mantsi mo magageng ao. . . . Mokwalo o o mo magageng ao o bontsha gore leina la Modimo le ne le le botlhokwa mo Baiseraeleng le mo Bajudeng.” Seno se dumalana le se Baebele e se buang ka gonne leina la Modimo, e leng YHWH ka ditlhaka tsa Sehebera, le tlhagelela makgetlho a le mantsi. Go le gantsi maina a batho bao a ne a akaretsa le leina la Modimo.

Mafoko a a reng “Yahweh Sabaot,” a a kwadilweng mo letlapeng leo a kaya “Jehofa wa masomosomo.” Ka jalo, go bonala batho ba nako ya fa Baebele e ne e kwalwa ba ne ba dirisa leina la Modimo le mafoko a a reng “Jehofa wa masomosomo.” Seno se tlhalosa lebaka la go bo Baebele e dirisa mafoko a a reng “Jehofa wa masomosomo” makgetlo a a 283, mo Dikwalong Tsa Sehebera. Gantsi mafoko ao a tlhagelela mo dibukeng tsa Isaia, Jeremia, le Sekarea.