Dirisa ‘Mpho ya Gago e e Tswang Kwa Modimong’

Re itumelela go kgothatsana fa re fetsa nako re na le bakaulengwe le bokgaitsadi. Mme gone, ga re a tshwanela go kgotsofalela go nna le bone fela. Baebele e bitsa bokgoni jo re nang le jone jwa go kgothatsana e re ke ‘mpho e e tswang kwa Modimong.’ (Bar. 1:11, 12) Re ka dirisa mpho eno ka ditsela dife?

Kgothatsa ba bangwe ka se o se buang. Ka sekai, fa o araba kwa dipokanong, o se ka wa bua thata ka wena, go na le moo bua ka Jehofa, ka Lefoko la gagwe le ka batho ba gagwe. Fa o bua le bakaulengwe le bokgaitsadi, bua ka dilo tse di ka nonotshang tumelo ya bone.

Kgothatsa ba bangwe ka ditshwetso tse o di dirang le ka se o se dirang. Ka sekai, bangwe ba ka nna ba lemoga gore o tswelela o le mo tirelong ya nako e e tletseng le fa go se motlhofo, mme seo se ka ba kgothatsa. Kgotsa ba ka kgothadiwa ke go go bona ka metlha kwa dipokanong tsa mo gare ga beke tota le fa o lapile ka gonne o dira ka natla kwa tirong kgotsa o lwala.

A o kgothatsa bakaulengwe le bokgaitsadi ka se o se buang le se o se dirang? A le wena o lemoga kafa bakaulengwe le bokgaitsadi ba go kgothatsang ka gone ka se ba se buang le se ba se dirang?