DITEMANA TSA BAEBELE DI A TLHALOSIWA
Dipalo 6:24-26—“A MORENA a go Tshegofatse a go Boloke”
“E kete Jehofa a ka lo segofatsa a bo a lo sireletsa. E kete Jehofa a ka lo phatsimisetsa sefatlhego sa gagwe, mme e kete a ka lo amogela. E kete Jehofa a ka tsholeletsa sefatlhego sa gagwe kwa go lona a bo a lo naya kagiso.”—Dipalo 6:24-26, Baebele ya Thanolo ya Lefatshe le Lesha.
“A MORENA a go tshegofatse a go boloke; a MORENA a go phatsimisetse sefatlhego sa gagwe, a go itshwarele, a MORENA a tsholeletse sefatlhego sa gagwe, a go nee kagiso.”—Dipalo 6:24-26, Setswana Central Bible.
Se Dipalo 6:24-26 e se Kayang
Mafoko ano a itsege e le tshegofatso ya baperesiti, kgotsa ya ga Arone, ka gonne Arone e ne e le moperesiti yo mogolo wa ntlha kwa Iseraele. (Ekesodo 28:1) Tshegofatso eo e ne e tswa kwa Modimong. (Dipalo 6:22, 23) Modimo o ne a raya Moshe a re: “Bolelela Arone le bomorwawe o re, ‘Eno ke tsela e lo tla segofatsang batho ba Iseraele ka yone,’” go tswa foo Modimo o ne a mmolelela mafoko a a fitlhelwang mo go Dipalo 6:24-26. Baperesiti ba ne ba ikobela taelo eno e e neng e tswa kwa Modimong. Gape ba ne ba galaletsa leina la Modimo, Jehofa.a Temana ya 27 e a re: “Mme [baperesiti] ba tshwanetse go bitsa leina la me mo bathong ba Iseraele gore ke tle ke ba segofatse.”
“E kete Jehofa a ka lo segofatsa a bo a lo sireletsa.” Jehofa o segofatsa batho ba ba mo obamelang ka go ba sireletsa, go ba kaela le go dira gore ba atlege mo botshelong. (Diane 10:22) Mo go Dipalo 6:24-26, lefoko “lo” ka Sehebera le ka kaya “a go”. Seno se ka tswa se raya gore Jehofa o ne a sa eletse fela go segofatsa setšhaba sotlhe, mme gape o ne a batla go segofatsa Moiseraele mongwe le mongwe.
“E kete Jehofa a ka lo phatsimisetsa sefatlhego sa gagwe, mme e kete a ka lo amogela.” Fa motho a ne a kopa Modimo gore a “phatsimisetse” motho yo mongwe sefatlhego sa gagwe, o ne a kopa Modimo gore a mo amogele.b Jehofa o bontsha gore o amogela batho ba gagwe ka go ba tshwara sentle le ka go ba utlwela botlhoko.—Isaiah 30:18.
“E kete Jehofac a ka tsholeletsa sefatlhego sa gagwe kwa go lona a bo a lo naya kagiso.” Fa Jehofa a leba kwa bathong ba ba mo obamelang a bo a ba naya kagiso, go tshwana le fa a “tsholeletsa sefatlhego sa gagwe” kwa go bone. Go ya ka kgatiso nngwe, “lefoko la Sehebera e leng kagiso (shalom) ga le reye fela gore motho ga a na dikgotlhang le batho ba bangwe, mme gape le raya gore o siame mo mmeleng e bile o rata Modimo.”
Baiseraele ba ne ba tshwanetse go ikobela Jehofa fa ba ne ba batla go solegelwa molemo ke masego a go buiwang ka one mo ditemaneng tseno. (Lefitiko 26:3-6, 9) Mme fa ba ne ba mo ikobela o ne a diragatsa se a neng a ba solofeditse sone. Seno se ne sa diragala fa dikgosi dingwe di ne di busa jaaka Solomone le Hesekia.—1 Dikgosi 4:20, 25; 2 Ditiragalo 31:9, 10.
Bakeresete ga ba tlhoke go tshwarelela mafoko a a mo go Dipalo 6:24-26 ka tlhogo kgotsa go boaboeletsa tshegofatso eno, mme gone ba kgona go bontsha boikutlo joo fa ba rapelela ba bangwe go tswa pelong kgotsa ba ba kgothatsa. (1 Bathesalonika 5:11, 25) Jehofa ga a fetoge. Ka dinako tsotlhe o batla go segofatsa le go sireletsa batho ba ba mo obamelang. Bakeresete ba ka nna le kagiso fa ba itse gore Jehofa Modimo o a ba amogela.
Se go buiwang ka Sone mo go Dipalo 6:24-26
Fa Baiseraele ba ne ba le mo loetong lwa go ya kwa Lefatsheng le le Solofeditsweng, Jehofa o ne a ba naya ditaelo tse di kwadilweng mo dikgaolong tsa ntlha tse di lesome tsa buka ya Dipalo fa ba ne ba kampile gaufi le Thaba ya Sinai. Ba ne ba kampile ngwaga koo, mme Jehofa o ne a ba rulaganya gore e nne setšhaba a bo a ba naya melao e e itsegeng jaaka Molao wa ga Moshe.
Gape Jehofa o ne a bolelela Moshe gore Arone le bomorwawe ba ba neng ba tlhophilwe go nna baperesiti ba ka segofatsa Baiseraele jang. (Dipalo 6:22, 23) Morago ga moo, Arone le ditlogolwana tsa gagwe ba ile ba dirisa mafoko a a mo Dipalo 6:24-26 go segofatsa setšhaba. Fa nako e ntse e ya, go ne go tlwaelegile gore moperesiti a boeletse tshegofatso eno fa sena go ntsha setlhabelo sa bofelo mo letsatsing leo.
Leba bidio eno e khutshwane gore o bone se se mo bukeng ya Dipalo.
a Jehofa ke leina la Modimo le le ranotsweng go tswa mo di tlhakeng tse nnê tsa Sehebera. Go bona gore ke eng fa dithanolo tse dingwe tsa Baebele di dirisa sereto Morena go na le go dirisa leina la Modimo, bala setlhogo se se reng, “Jehofa ke Mang?”
b Go farologana, Baebele e a re Jehofa o ne a fitlhela Baiseraele sefatlhego sa gagwe fa a ne a sa amogele dilo tse ba neng ba neng ba di dira.—Isaia 59:2; Mika 3:4.
c Go ya ka NIV Study Bible, leina la Modimo le a boelediwa mo ditemaneng tseno go “gatelela le go tlhomolola ntlha e mo go [temana 27].” Mme gone, bangwe ba re lebaka la go bo leina la Modimo le boelediwa makgetlo a le mararo mo ditemaneng tseno ke ka gonne di tshegetsa thuto ya Tharonngwe. Mme gone ga go a nna jalo. Moithuti mongwe wa Baebele yo o tshegetsang thuto ya Tharonngwe o ile a re “go dirisiwa ga leina la Modimo makgetlo a le mararo go ne go ka se ka ga dira gore moperesiti yo o neng a segofatsa batho le ba ba neng ba amogela tshegofatso eo, ba akanye ka tsela eno. Mme mo go bone go boeletsa leina la Modimo makgetlo a le mararo go ne go dira gore tshegofatso eo e itumedise.” (The Pulpit Commentary, Bolumo 2, tsebe 52) Fa o batla go itse tshedimosetso e e oketsegileng bala setlhogo se se reng, “A Modimo ke Tharonngwe?”