Dilo Tseo di Buiwang mo Tshimong Tseo di Dirang Gore Batho ba Arabele

¹ Dilo tseo di buiwang mo tshimong tseo di dirang gore batho ba arabele ke tseo ka phepafalo di bontshang kafa kgang eo go tlotliwang ka yone e tshwenyang mong wa ntlo ka gone, gore kgang eo ke sengwe seo a se tlhokang kana seo a ka se dirisang. Fa o ntse o buisana le mong wa ntlo, mo thuse gore a lemoge gore, “Selo seno se a nkama.” Re tshwanetse go ipotsa jaana ka nako ya fa re baakanyetsa seo re tlileng go se bua kwa tshimong: ‘Ke dikgang dife tseo di tshwenyang batho thata ba ba mo tshimong eo ke e berekang? Ke dilo dife tseo ba di tlhokang? Nka ba bolelela jang molaetsa go ba bontsha gore Jehofa o amega ka dilo tseo ba di tlhokang?’ Go rulagantswe dilo di le mmalwa fa tlase tseo di tshwenyang batho thata gompieno. A o ka dirisa se sengwe sa dilo tseno kana sengwe seo se tshwanang natso mo go seo o se buwang le batho mo tshimong? Gape, ela tlhoko kafa dintlha tseo di tswang mo bukeng ya Tshenolō—Konelo ya Yone di ka golaganngwang le motlotlo ka gone.

² Batho Bao Ba Tshwenyegileng Kaga go Tlhokega ga Boitumelo: “Re buisana le batho bao ruri ba tshwenyegileng kaga botshelo joo batho ba bo tshelang mo lefelong leno la rona. Lemororo batho ba ka nna ba tswa ba na le dilo tse di bonalang tseo ba di tlhokang, tota ba le bantsi ga ba itumedisiwe ke khumo eo ba nang nayo. A o akanya gore go ka kgonega go tshela botshelo joo tota bo itumedisang? [Leta karabo.] Sengwe sa dilo tsa konokono tseo di ka lereng boitumelo se fitlhelwa mo Bibeleng mo go Tshenolō 1:3. [E bale.] O ka bona boitumelo fa o ka kgona go tlhaloganya seo Tshenolō e se bolelang. A o ko o ele tlhoko e nngwe ya dipolelelopele tsa yone.” Bala Tshenolō 21:3, 4 mme morago ga foo o bo o tlhalosa setshwantsho se se mo tsebeng 302 sa buka ya Tshenolō—Konelo ya Yone.

³ Batho Bao Ba Tshwenyegileng Kaga Isagwe: “Re leka go tlotla le baagelani ba rona kaga go leba isagwe ba na le tsholofelo. A eo ke tsela eo o lekang go leba botshelo ka yone? [Leta karabo.] Go ya ka Bibela, re na le lebaka le le utlwalang la go nna le tsholofelo fa e le gore re dira seo e se bolelang mo go Tshenolō 1:3.”

⁴ Batho Bao Ba Tshwenyegileng Kaga go Ipoloka ba Itekanetse Sentle mo Mmeleng: “Batho ba le bantsi ba ba leng mo lefelong la rona ba tshwenyegile kaga go ipoloka ba itekanetse sentle mo mmeleng. Lefa go ntse jalo, re santse re bogisiwa ke bolwetsi go sa kgathalesege tsela eo re itlhokomelang ka yone. A o tla rata go tshela mo lefatsheng leo kwa go lone mongwe le mongwe a tla bong a itekanetse sentle mo mmeleng ebile a le matlhagatlhaga? Jaaka fa go ka nna ga bonala go se motlhofo go dumela gore selo seno se ka direga, buka ya Bibela ya Tshenolō e bua ka nako e e ntseng jalo ebile e re bolelela gore nako eo e gaufi.” Bala Tshenolō 21:3, 4. Morago ga foo o ka nna wa tlhalosa setshwantsho se se mo tsebeng 308-9 sa buka ya Tshenolō—Konelo ya Yone, o bontshe kafa batho ba tlileng go ipelela dilo tsa botshelo tseo ba di tlhokang ka gone mo Pusong ya ga Keresete ya Dingwaga Tse Di Sekete.

⁵ Batho Bao Ba Tshwenyegileng Kaga Kgotlelo le Maemo A A ba Dikologileng: “Fa re ntse re bua le baagelani ba rona, re fitlhetse gore ba le bantsi ba bone ba tshwentswe ke kafa moya wa rona, metsi, le dijo di kgotlhetsweng ka gone. A o akanya gore dipuso di tla tsamaya di kgona go rarabolola bothata jono? [Mo lete gore a akgele.] Go a kgothatsa go ela tlhoko seo Bibela e reng se tlile go diragalela bao ba senyang lefatshe.” Bala Tshenolō 11:18b. Tlhalosa gore mo godimo ga go fedisa batho bao ba senyang lefatshe, Modimo o ikaeletse gore batho ba ba boikokobetso ba dire lefatshe leno go nna paradaise, jaaka fa seno se supiwa mo go Pesalema 37:10, 11 kana mo go Isaia 65:21, 22.

⁶ Mo go Bao E Leng Batho ba Bodumedi: “Re botsa baagelani ba rona potso eno: A o akanya gore go ne go ikaeletswe gore buka ya Tshenolō e tlhaloganngwe, kana a e ne e tshwanetse gore e nne e ntse e le bosaitseweng ka dinako tsotlhe? [Mo lete gore a akgele.] Batho ba le bantsi ba leba dilo ka tsela eo o di lebang ka yone. A o ko o ele tlhoko seo Bibela ka boyone e se bolelang mo go Tshenolō 1:3.”

⁷ Jaaka fa o ntse o leka thata ka tlhoafalo gore o fitlhelele pelo ya bao ba go reetsang, bao ba tshwerweng ke tlala ya boammaaruri le ya go dira tshiamo ba tla arabela.—Math. 5:3, 6.

Ke Eng Seo Nka se Buang Gore ke Tsose Kgatlhego Yo ya Kwa Pele?

¹ Karolo e kgolo ya boikaelelo jwa rona mo go rereng mafoko a a molemo ke go dira barutwa, eseng fela go tsamaisa dibuka. Ka gone, morago ga fa re sena go bona batho ba ba kgatlhegang, re tlhoka gore re tlhagolele le go nosetsa dipeo tseo di jetsweng, re dire karolo ya rona gore go nne le maemo a a siameng ao mo go one Jehofa a ka kgonang go thusa motho yono gore a gole semoyeng. (1 Bakor. 3:6) Ke eng seo o ka se buang go latedisa se o neng wa se bua la ntlha se se kwadilweng fa godimo? Dikakantsho tsa maemo a a farologaneng ao o ka nnang wa kopana nao ke tseno.

² Go Tlhagolela Kgatlhego E E Bonweng: “O ne o tshwaregile tota ka nako ya fa re ne re tlotla ka bokhutswanyane mo nakong e e fetileng, mme lefa go ntse jalo o ile wa tsaya nako go tlhalosa kafa o tshwenyegileng ka gone ka isagwe. Jaaka fa o tla gakologelwa, re ne ra bala mo Bibeleng mo go Tshenolō 1:3 gore ‘lobaka lo lo beilweng lo atametse.’ Seo se ama isagwe ya rona rotlhe fela ka tlhamalalo. Ela tlhoko seo buka eno e se bolelang ka temana eno. [Bala go tswa mo serapeng 11 mo tsebeng 17 ya buka ya Tshenolō—Konelo ya Yone.] Kgatiso eno e boeletsa dipolelelopele tsotlhe tseo di leng mo bukeng ya Bibela ya Tshenolō ebile e bontsha kafa rona ka namana re ka solegelwang molemo ka gone. A o tla kgatlhegela go ithuta ka mo go oketsegileng?”

³ Go Simolola Thuto ya Bibela O Dirisa Buka ya Tshenolō—Konelo ya Yone: “Ke itumelela go go bona gape. Go na le ntlha e nngwe gape eo ke batlang go e tlotla le wena eo e fitlhelwang mo bukeng eo ke neng ka e go tlogelela, ebile e kgothatsa fela thata. Bibela e bua ka ‘lokwalo lwa botshelo’ malebana le bao ba tla tshelelang ruri. A o tla rata go itse gore ke maina a bomang ao a leng gone mo lekwalong leo?” Bula mo tsebeng 298 ya buka ya Tshenolō—Konelo ya Yone. Bala serapa 11, mme morago ga moo o bo o botsa dipotso tsa serapa seo. Morago ga fa lo sena go tlotla ka dirapa di le mmalwa, akantsha gore o tla boa mme o bo o tsweletsa motlotlo.

⁴ Go Simolola Thuto ya Bibela o Dirisa Kgatiso E Nngwe: “Ke itumelela go go fitlhela mo gae gompieno. Fa re ne re tlotla mo nakong e e fetileng, re ne ra bala mmogo seo Bibela e se solofetsang mo go Tshenolō 1:3. [E bale gape.] Lemoga gore boitumelo joo go buiwang ka jone fano ga bo itlele fela. Go tlhokega dilo di le pedi: Re tshwanetse gore re bale seo Bibela e se bolelang mme morago ga moo re bo re tshegetsa, kana re dirisa, seo se kwadilweng mo go yone. Boroutšhara eno e e nang le setlhogo se se reng ‘Bōnañ, Dilō Cotlhe Ke Di Diha Sesha’ e tla dira gore o ipelele ka mo go oketsegileng go bala kgatiso eo ke neng ka e go tlogelela ka gonne e tlhalosa ka tsela e e motlhofo fela dilo tseo tota Modimo o batlang re di dira. Mo tsebeng 30 go na le lenaane la dipotso di le 12 tseo batho ba le bantsi ba di botsang. Ke efe ya tsone eo o tla ratang go e arabelwa?” Morago ga fa mong wa ntlo a sena go araba, o ka nna wa bula boroutšhara eno koo potso eno e arabiwang gone o bo o simolola thuto ya Bibela.

⁵ Tsosa Kgatlhego ka Tsela E E Botswerere: Buka ya Tshenolō—Konelo ya Yone e na le ditshwantsho di le dintsi tseo di nang le mebala e e bonalang sentle. Go ka nna ga buelelwa ditshwantsho tseno gore go tsoswe kgatlhego. Ka sekai, ka nako ya fa re dira loeto lwa go boela, re ka nna ra bula buka eno mo tsebeng 7. Tlhalosetsa mong wa ntlo ka setshwantsho sa ga Johane a le mo setlhaketlhakeng sa Patamosa. Tshenolō 1:3 e gatelela gore dilo tseo Johane a neng a di senolelwa e ne e le molaetsa o o itumedisang. Tota seno se ne se ka nna jalo jang ereka Tshenolō e tlhalosa ka dibatana tse di tshosang le tshenyo? Tlotla ka serapa 1 le 2 mo tsebeng 6 ya buka eno. O ka nna wa buelela ditshwantsho tseo di leng mo tshimologong le mo bofelong jwa buka, le ditshwantsho tse di bontshang ka lefatshe la Paradaise tseo di leng mo ditsebeng 302, 308, le 309.

⁶ Ka nako ya fa re dira maeto a go boela, re tshwanetse gore re tsweledisetse motlotlo pele go simolola foo re o feleditseng gone. Go tlhokomela thata karolo eno ya bodihedi jwa rona go tla tlisetsa rona mmogo le bao ba re reetsang masego a a seng kana ka sepe a a tswang kwa go Jehofa.—1 Tim. 4:16.