A o Dira O na Le Boikaelelo?
1 Jehofa ke Modimo yo o nang le boikaelelo. (Isa. 55:10, 11) Re gakololwa gore re mo etse. (Baef. 5:1) Tota seno se tshwanetse sa bontshiwa ka tsela e re dirang bodiredi jwa rona ka yone. Ka jalo potso eno e a tshwanela: “A o dira o na le boikaelelo?”
2 Go rera ka ntlo le ntlo, go neela bosupi jo e seng jwa tlwaelo le go tsamaisa dibuka ke karolo ya bodiredi jo o bo dirang o na le boikaelelo. Mme gakologelwa gore thomo ya rona ga e akaretse fela go rera mme gape e akaretsa go dira barutwa. (Math. 28:19, 20) Fa re sena go jala dipeo tsa boammaaruri jwa Bogosi, re tshwanetse go boela go ya go di nosetsa le go di tlhokomela ka metlha fa re ntse re tshepa Jehofa gore o tla lere koketsego. (1 Bakor. 3:6) Re tshwanetse go nna re akantse ka go dira maeto a go boela le go simolola dithuto tsa Baebele.
3 Atolosa Bodiredi Jwa Gago: Go a itumedisa ka dinako tsotlhe fa o ka re o leba kwa morago mo go se o se dirileng mo tirelong o bo o ka re: “Ke weditse se ke neng ke ikaeletse go se dira.” Jaaka go kwadilwe mo go 2 Timotheo 4:5, Paulo o ne a rotloetsa jaana: “Wetsa bodiredi jwa gago ka botlalo.” Seo se akaretsa go dira ka natla gore o boele kwa go botlhe ba ba bontshitseng kgatlhego. Mo thulaganyong ya gago ya tirelo ya beke le beke, rulaganya nako e e tlhomameng ya go dira maeto a go boela. Ipeele mokgele wa go leka go simolola dithuto tsa Baebele le batho ba ba ratang tshiamo. Seno e tshwanetse go nna boikaelelo jwa gago fa o nna le seabe mo bodireding.
4 Botsa baboledi gore ba ile ba ikutlwa jang fa ba ne ba bona diithuti tsa bone tsa Baebele di kolobediwa kwa kopanong. Ba ne ba itumela, gongwe jaaka ba ba neng ba kolobediwa. Ba ne ba weditse boikaelelo jo bogolo! Motho mongwe yo o neng a dira motho morutwa o ne a tlhalosa seno jaana: “Go dira barutwa go kaya go dira babaki ba ga Jehofa ba ba oketsegileng. Go kaya gore ba ba amogelang boammaaruri ba tla bona botshelo. Ke rata go ruta ba bangwe boammaaruri—go monate thata! . . . Batho ba le bantsi ba ba neng ba simolola go rata Jehofa ba ile ba nna ditsala tsa me tse di rategang thata.”
5 Akanya fela o kgona go thusa motho go nna motlhanka yo o ineetseng wa ga Jehofa! A bo go tla itumedisa jang ne! Masego a a ntseng jalo a nna gone fa o dira o na le boikaelelo mo bodireding.—Bakol. 4:17.