Dirisa Dipampitshana go Simolola Motlotlo
1 A ga go baammaaruri gore go neela bosupi jo bo nang le matswela go ikaegile thata mo go reng o dire maiteko a a rileng go simolola motlotlo? Kgwetlho ke gore o bue sengwe se se tla kgatlhang motho yo o buang le ene le go mo dira gore a tlotle. Mme seno se ka dirwa jang ka tsela e e molemo?
2 Baboledi ba bantsi ba fitlhetse gore ka go bua go sekae ka tsela e e molemo, o neela nngwe ya dipampitshana tsa rona tse di theilweng mo Baebeleng, go ka simolola motlotlo. Ditlhogo tsa teng di a ngokela mme ditshwantsho tsa tsone di dintle e bile di a kgatlha. Pampitshana ga e dire gore motho a akanye gore o tlile go bala tshedimosetso e ntsi. Mme gone, melaetsa e mekhutshwane e e mo dipampitshaneng e a gapa e bile e ka dirisiwa go simolola thuto ya Baebele ka yone.
3 Mosupi mongwe ene o ikutlwa jaana: “Mo lefatsheng leno le le potlakileng, gantsi batho ga ba batle go tsaya lobaka lo loleele ba bala, mme dipampitshana di lekane sentle go naya molaetsa wa botlhokwa mme ga di ditelele mo di ka dirang gore batho ba tshabe le pele ga ba di leba fela. Ke ne ka bala dipampitshana tse dintsi mme kgabagare ka ithuta boammaaruri.” O se ke wa tlhaetsa matlho maatla a Lefoko la Modimo jaaka le tlhalosiwa mo melaetseng eno e mekhutshwane, e e gatisitsweng.—Bah. 4:12.
4 Dikgato Tse Nnè Tse di Motlhofo: Ba le bantsi ba ne ba atlega ka go dirisa ditsela tse di motlhofo. (1) Bontsha motho dipampitshana di le mmalwa mme o mmotse gore ke efe e e mo kgatlhang. (2) Fa motho a sena go tlhopha e le nngwe, mmotse potso e o e baakanyeditseng sentle e e tlhomololang ntlha ya botlhokwa mo pampitshaneng eo. (3) Go araba potso eo, bala serapa kana lokwalo lo lo tshwanetseng go tswa mo pampitshaneng. (4) Fa a tsiboga ka tsela e e kgatlhang, tswelela ka go tlotla ka diteng tsa pampitshana eno kana o umake thuto nngwe mo boroutšhareng jwa Re Direng kana kgaolo nngwe mo bukeng ya Kitso e e nang le dikakgelo tse di oketsegileng. Ka tsela eno o ka kgona gore o simolole thuto ya Baebele. Dikakantsho tse di latelang di tla go thusa go baakanyetsa se o tla se buang o dirisa nngwe ya dipampitshana di le nnè.
5 Setlhogo sa pampitshana ya “Ke Mang Tota Yo o Busang Lefatshe Leno?” se ka nna sa dirwa potso.
◼ Fa motho yo o buang le ene a araba ka gore ke “Modimo” kana “Ga ke itse,” bala mela e mebedi e e simololang mo tsebeng ya 2 le serapa sa ntlha se se mo tsebeng ya 3. Umaka 1 Johane 5:19 le Tshenolo 12:9. E ka tswa motho yono a belaela go nna gone ga ga Satane Diabolo kana nnyaa kgotsa gone gore o tlhotlheletsa lefatshe, o ka nna wa tlotla le ene ka se se boletsweng mo tlase ga setlhogwana sa “Lesedinyana la Seno go Tswa mo Maemong A A Leng mo Lefatsheng” go tsweletsa motlotlo. Fa motho yoo a bontsha gore o a kgatlhega, ithaopele go tla go mo tlhalosetsa gore Diabolo o tswa kae, o dirisa dintlha tse di mo ditsebeng 3 le 4 tsa pampitshana eno.
6 Pampitshana ya “Go na Le Tsholofelo Efe ka Baratiwa ba ba Suleng?” e ka dira gore motho a kgatlhege ka bonako. O ka nna wa simolola motlotlo ka go botsa jaana:
◼ “A o akanya gore re tla boa gape re bona baratiwa ba rona ba ba suleng?” Morago ga gore motho yono a arabe, bua ka serapa sa bobedi se se mo tsebeng ya 4 ya pampitshana eno mme o bale Johane 5:28, 29. Mme o tlhalose gore go a thusa go tlhaloganya tshedimosetso e e mo tlase ga setlhogwana sa ntlha sa pampitshana eno. Ithaopele go e tlotla mmogo le ene.
7 Pampitshana ya “Itumelele Botshelo Jwa Lelapa” e tshwanela malapa a lefatshe lotlhe. Fa o e dirisa, o ka nna wa re:
◼ “Gongwe o ka dumalana le nna gore lelapa le tlhasetswe thata gompieno. O akanya gore go ka dirwa eng go nonotsha dikgolagano tsa lelapa?” Fa motho yono a sena go araba, mo lemotshe dintlha tse di mo serapeng sa ntlha se se mo tsebeng ya 6. Tlhopha lengwe la dikwalo tse di nopotsweng mo ditsebeng 4 le 5 tsa pampitshana eno mme o tlhalose se le se bolelang. Mme ithaopele go mo tshwarela thuto ya Baebele ya legae ya mahala.
8 Pampitshana ya “Lebaka La go Bo O Ka Ikanya Bibela” e ka nna ya dirisiwa ka puisano eno:
◼ “Batho ba bantsi ba kile ba utlwa kgang ya ga Kaine le Abele, e e bonwang mo bukeng ya ntlha ya Baebele. Pego e e mo go Genesise e bua gape ka mosadi wa ga Kaine. A o kile wa ipotsa gore o ne a tswa kae?” Dirisa serapa sa bofelo se se mo go tsebe 2 ya pampitshana go mo araba. Tlhalosa gore pampitshana eno e bua gape ka dikgopolo tse di botlhokwa tsa Baebele malebana le se isagwe ya rona e re tsholetseng sone. Tswelela ka motlotlo, o dirisa dikwalo tse di tshegetsang dintlha tseo go simolola ka serapa sa boraro mo tsebeng ya 5.
9 Go aba dipampitshana tsa Baebele ke mokgwa o o sa bolong go nna le matswela wa go neela dikgang tse di molemo. Ka gonne o kgona go di tsaya motlhofo fela gongwe le gongwe kwa o yang teng, o ka di dirisa ka tsela e e molemo mo tirong ya gago ya ntlo le ntlo le fa o dira bosupi jo e seng jwa ka tlwaelo. Dipampitshana di na le seabe se segolo fa re dira bodiredi jwa rona. Tlhomamisega gore o tshware tse di farologaneng, mme o di dirise ka botlalo go simolola motlotlo.—Bakol. 4:17.