Filipo—Moefangele yo o Tlhoafetseng

DIKWALO di tshotse dipego di le dintsi ka banna le basadi ba re ka etsang tumelo ya bone. Akanya ka Filipo, morongwa wa Mokeresete wa lekgolo la ntlha la dingwaga. E ne e se moaposetoloi, le fa go ntse jalo o ne a dirisiwa thata mo go anamiseng molaetsa wa Bogosi. Tota e bile, Filipo o ne a itsiwe e le “moefangele.” (Ditiro 21:8) Ke ka ntlha yang fa Filipo a ile a bidiwa jalo? Mme ke eng se re ka se ithutang mo go ene?

Baebele e simolola go bua ka Filipo ka bonako fela morago ga Pentekosete ya 33 C.E. Ka nako eo Bajuda ba ba neng ba bua Segerika ba ne ba ngongorega ka Bajuda ba ba neng ba bua Sehebera, ba bolela gore batlholagadi ba bone ba ne ba tlodisiwa matlho mo kabong ya dijo ya letsatsi le letsatsi. Baaposetoloi ba ne ba tlhoma “banna ba le supa . . . ba ba tlhomamisitsweng” gore ba rarabolole kgang eno. Filipo e ne e le mongwe wa ba ba neng ba tlhophilwe.—Ditiro 6:1-6.

Banna bano ba ba supa e ne e le ba ba “tlhomamisitsweng.” Thanolo ya ga James Moffatt e bolela gore ba ne ba na le “leina le lentle.” Ee, ka nako ya fa ba ne ba tlhomiwa, ba ne ba setse ba itsiwe e le banna ba ba ratang dilo tsa semoya e bile ba akanya ka tsela e e molemo. Go ntse jalo le ka ba e leng balebedi ba Bakeresete gompieno. Banna bano ga ba tlhomiwe ka lepotlapotla. (1 Timotheo 5:22) Ba tshwanetse go nna le “tshupo e e molemomogolo go tswa mo bathong ba ba ka kwa ntle,” mme Bakeresetekabone ba tshwanetse go itse gore ke batho ba ba akanyetsang ba bangwe e bile ba itekanetse sentle mo mogopolong.—1 Timotheo 3:2, 3, 7; Bafilipi 4:5.

Go bonala Filipo a ile a dira kabelo ya gagwe sentle kwa Jerusalema. Le fa go ntse jalo, go ise go ye kae go ile ga tsoga pogiso e e setlhogo mme ya phatlalatsa balatedi ba ga Keresete. Fela jaaka ba bangwe, Filipo o ne a tswa mo motseng, mme o ne a se ka a kgaotsa bodiredi jwa gagwe. Go ise go ye kae, ke fa a setse a tshwaregile ka go rera mo tshimong e ntšha—Samarea.—Ditiro 8:1-5.

Go Simolola Ditshimo Tse Disha

Jesu o ne a boleletse pele gore barutwa ba gagwe ba ne ba tla rera “mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.” (Ditiro 1:8) Ka go rera kwa Samarea, Filipo o ne a diragatsa mafoko ao. Ka tlwaelo fela Bajuda ba ne ba nyatsa Basamarea. Mme Filipo o ne a se ka a atlhola batho bano, mme o ne a segofalediwa go bo a sa tlhaole batho. Ee ruri, Basamarea ba le bantsi ba ne ba kolobediwa, go akaretsa le yo pele e kileng ya nna ramaselamose yo o neng a bidiwa Simone.—Ditiro 8:6-13.

Fa nako e ntse e ya, moengele wa ga Jehofa o ne a kaela Filipo go ya kwa tseleng ya sekaka e e neng e tswa Jerusalema e ya Gasa. Ke gone koo Filipo a neng a bona kara e e neng e palangwe ke modiredimogolo wa Moethiopia yo o neng a balela boporofeti jwa ga Isaia kwa godimo. Filipo o ne a siana fa thoko ga kara mme a simolola go bua le ene. Le mororo Moethiopia yono e ne e le mosokologi a na le kitsonyana ka Modimo le Dikwalo, o ne a dumela ka boikokobetso gore o tlhoka go thusiwa go tlhaloganya se a neng a se bala. Ka gone, o ne a kopa Filipo go palama kara le go nna le ene. Fa a sena go mo neela bosupi, ba ne ba fitlha fa bodibeng jwa metsi. Moethiopia o ne a botsa jaana: “Ke eng se se nkitsang go kolobediwa?” Ka bonako fela Filipo o ne a mo kolobetsa, mme Moethiopia a tswelela pele ka mosepele wa gagwe a ipela. Gongwe, morutwa yono yo mosha o ile a anamisa dikgang tse di molemo kwa nageng ya gagabo.—Ditiro 8:26-39.

Ke eng se re se ithutang mo bodireding jwa ga Filipo malebana le Basamarea le modiredimogolo wa Moethiopia? Le ka motlha re se ka ra akanya gore batho ba ditšhaba di sele, lotso, kana batho ba maemo a a rileng mo loagong ba ka se kgatlhegele dikgang tse di molemo. Go na le moo, re tshwanetse go bolelela ‘batho ba mefuta yotlhe’ molaetsa wa Bogosi. (1 Bakorintha 9:19-23) Fa re rerela batho botlhe, Jehofa a ka re dirisa mo tirong ya go ‘dira batho ba merafe yotlhe barutwa,’ pele bokhutlo jwa tsamaiso eno e e boikepo bo fitlha.—Mathaio 28:19, 20.

Ditshiamelo Tse Dingwe Tsa ga Filipo

Fa Filipo a sena go rerela modiredimogolo wa Moethiopia, o ne a ya go neela bosupi kwa Ashedoda, “mme a ralala karolo ya naga eo a ba a nna a bolela dikgang tse di molemo mo metseng yotlhe go fitlha a fitlha kwa Kaesarea.” (Ditiro 8:40) Mo lekgolong la ntlha la dingwaga, metse eno e mebedi e ne e na le palo e ntsi ya Baditšhaba. Fa a ne a le mo tseleng e e yang bokone a ya Kaesarea, Filipo a ka tswa a ile a etla a rera mo mafelong a Bajuda a a neng a itsege thata, a a jaaka Lida le Jopa. Gongwe ke lone lebaka le le dirileng gore moragonyana go fitlhelwe barutwa mo dikarolong tseno.—Ditiro 9:32-43.

Go ne ga umakiwa Filipo la bofelo dingwaga di ka nna 20 moragonyana. Kwa bokhutlong jwa loeto lwa ga Paulo lwa boraro lwa borongwa, o ile a fologa sekepe kwa Petolomai. Luke, mopati wa ga Paulo o ne a bolela jaana: “Letsatsi le le latelang ra bolola mme ra goroga kwa Kaesarea, mme ra tsena mo ntlong ya ga Filipo moefangele.” Mo nakong eno, Filipo o ne a na le “barwadi ba le banè, makgarebane, a a neng a porofeta.”—Ditiro 21:8, 9.

Go bonala Filipo a ile a aga kwa Kaesarea. Mme o ne a sa ntse a na le moya wa borongwa, ka gonne Luke o ne a mmitsa “moefangele.” Gantsi mafoko ano a kaya motho yo o tswang mo legaeng la gagwe a ya go rera dikgang tse di molemo kwa dikgaolong tse di iseng di rerelwe. Kgang ya go bo Filipo a ne a na le barwadi ba le banè ba ba neng ba porofeta e bontsha gore ba ne ba gata mo dikgatong tsa ga rraabone yo o neng a tlhoafetse.

Batsadi ba Bakeresete ba gompieno ba tshwanetse go gakologelwa gore bana ba bone ke barutwa ba bone ba konokono. Tota le fa batsadi bao ba ka tlogela ditshiamelo dingwe tsa puso ya Modimo ka ntlha ya maikarabelo a lelapa, jaaka Filipo, ba ka nna batlhanka ba Modimo ba ba dirang ka pelo yotlhe e bile e le batsadi ba ba tlhomang sekao.—Baefeso 6:4.

Go eta ga ga Paulo le bapati ba gagwe go ne ga dira gore lelapa la ga Filipo le nne le sebaka se se molemo sa go amogela baeng. A o ko o akanye tsela e ba neng ba kgothatsana ka yone! Gongwe e ne e le mo nakong eno mo Luke a neng a bona dintlha tse di malebana le ditiro tsa ga Filipo ka yone, tse moragonyana di neng tsa kwalwa mo go Ditiro kgaolo ya 6 le ya 8.

Jehofa Modimo o ne a dirisa Filipo thata gore a tsweledise dilo tse di direlwang Bogosi pele. Tlhoafalo ya ga Filipo e ne ya dira gore a kgone go anamisetsa dikgang tse di molemo kwa ditshimong tse disha le gore lelapa la gagwe le rate dilo tsa semoya. A o ka rata go nna le ditshiamelo le masego a a ntseng jalo? Ka gone o tla bo o dira sentle go etsa dinonofo tse di neng tsa bontshiwa ke Filipo wa moefangele.